Rauðu djöflarnir

Enska deildarbikarkeppnin

Manchester United 3:0 Ipswich Town

skrifaði þann | 14 ummæli

Fínn skyldusigur að baki. Þetta var ekki flókið. Liðið var svona:

De Gea
Young
Blind
Smalling
Valencia
Bastian
Herrera
Pereira
Fellaini
Mata
Rooney

Bekkur: Romero, Darmian, Jones (Smalling), Carrick, Schneiderlin, Memphis (Rooney), Martial (Mata).

Andreas Pereira fékk sénsinn en aumingja James Wilson fékk frí enda var talið mikilvægara að hann spilaði þýðingarlítinn leik gegn u21-liði Everton á mánudaginn. Annars var Louis van Gaal ekkert að grínast með þessari liðsuppstillingu, nánast sterkasta liðið sem í boði var gegn neðrideildarliði Ipswich sem nýtti tækifærið og hvíldi nánast allt byrjunarliðið sitt.

Það gerði það að verkum að þessi leikur var afskaplega þægilegur fyrir United og varla hægt að segja að liðið hafi farið mikið ofar en í þriðja gír. Fyrsta markið kom á 23. mínútu. Blind sá ágætt hlaup hjá Wayne Rooney sem loksins sýndi af sér gamalkunna framherjatakta. Hann tók háa sendingu Blind niður, kjötaði miðvörð Ipswich og lagði hann snyrtilega undir markmann Ipswich.

Leikurinn varð bara þægilegri við þetta en það var helst Andreas Pereira sem var að spila í efri gír en aðrir og ljóst að hann var ólmur í að sanna sig. Hann átti margar góðar rispur upp vinstri kantinn og ég held að það sé óhætt að segja að hann muni fá töluvert fleiri tækifæri eftir því sem líður á tímabilið.

Það var einmitt hann sem skoraði annað mark United í upphafi seinni hálfleiks og drap þar með allar vonir Ipswich um eitthvað. Gestirnir komu nefnilega virkilega sprækir inn í seinni hálfleik og hefðu vel getað sett jöfnunarmark hefðu framherjar liðsins verið örlítið meira á tánum. Ungi Brassinn okkar drap þó þá vonarglætu þegar hann skoraði sitt fyrsta mark fyrir United og það í sínum fyrsta byrjunarliðsleik. United fékk aukaspyrnu fyrir framan vítateig Ipswich og okkar maður gerði sér lítið fyrir og sneri boltann laglega í netið, markmaður Ipswich gerði ekki einu sinni tilraun til þess að verja boltann.

Þetta mark drap allt hjá Ipswich og það var ljóst að eftir þetta fóru okkar menn bara að hvíla sig á vellinum. Þeir hefðu getað valtað yfir andstæðinginn í kvöld og tóku þessu bara rólega. King Schweinsteger, líkt og venjulega, tók við stjórninni, þvílík unun sem það er að horfa á hann í United-treyjunni.

Phil Jones og Anthony Martial komu inn fyrir Smalling og Mata, auk þess sem að Memphis fékk tíu mínútur. Hann og Martial settu svo punktinn yfir I-ið þegar Memphis kassaði boltann niður til Martial sem tók á rás að markinu. Ég þarf ekki að segja ykkur hvað gerðist næst, þið þekkið orðið handritið.

Ofboðslega þægilegur leikur og ljóst að menn taka þessi keppni alvarlega. Eftir leikinn var dregið  í næstu umferð og aftur fáum við Championship-lið á heimavelli, Middlesboro mun koma í heimsókn.

Nokkur tíst

Reader Interactions

Athugasemdir

  1. 1

    væri til í að sjá Wilson fyrir Fellaini og Lingard fyrir Mata, um að gera að leyfa fleiri ungum strákum að spreyta sig!

    0
  2. 2

    Meðan United teflir fram ROSALEGA sterku liði að þá teflir Ipswich Town fram varaliðinu (11 breytingar frá seinasta leik). Vona að við fáum markaregn, gott fyrir sjálfstraust að skora :)

    0
  3. 3

    Ég er ósammála þessu með Wilson, Rúnar Þór. Hann er nýbúinn að spila 90 mínútur með varaliðinu og því óþarfi að keyra hann út. Las það að LVG ætli að setja hann í starter á móti Sunderland. Veit ekki af hverju Lingard er aldrei í liðinu.. LVG ætti samt að hafa góða ástæðu fyrir því.
    Mér finnst þetta kjörið tækifæri fyrir Rooney að skora mörk, en núna finnst mér mikil pressa á honum að skora. Svo er ég mikill Fellaini maður og býst við engu minna nema þrennu frá honum.

    Staðfestur 5-0 sigur, þar sem Fellaini skorar þrennu, Rooney eitt, og Pereira eitt.

    0
  4. 4

    Mjög áhugavert byrjunarlið. Greinilega á ekki að taka neina sénsa hérna. Fyrir utan ungu guttana sem hefði verið gaman að sjá þá hefði líka verið flott ef Phil Jones hefði náð þessum leik í byrjunarliðinu. Hann kannski fær einhverjar mínútur í leiknum til að vinna í leikforminu.

    0
  5. 5

    já Sveinbjörn ég veit. Það sem ég meinti var að Wilson átti ekki að spila með u21 heldur starta í dag :)

    0
  6. 6

    Þessi Martial er algert flopp og greinilega despó kaup àrsins..

    Sagði enginn aldrei

    0
  7. 7

    Bara virkilega öruggt og flott. Gott að sjá þessa sem komu inn og létu til sín taka, þetta þýðir vonandi að Pereira fer að fá aðeins fleiri mínútur.

    Og þessi Martial, það er æðislegt að fylgjast með honum.

    0
  8. 8

    Sorry.. en ég er farinn að hallast á að Þessi Lúlli Van Gal sé kannski að gera eitthvað rétt eftir allt saman? og ég sé fyrir mér 21. Englandsmeistara titilinn fljótlega.

    0
  9. 9

    Rúnar, þetta var Ipswich. Róum okkur.

    Annars flott niðurstaða, frábært að Rooney hafi skorað, frábært að Pereira hafi skorað, frábært að Martial hafi skorað. Allt er frábært. Vonandi heldur þetta áfram í deildinni.

    0
  10. 10

    Var að horfa á leikinn á MUTV. Öruggt og þægilegt. Fylgdist sérstaklega með Martial eftir að hann kom inn, hann heldur áfram að borga inn á, ekki nóg með að hann skori heldur lætur hann þetta líta út fyrir að vera piece of cake.. hlaupin hjá drengnum og staðsetningar eru líka algjör klassi.. 19 ára gamall!

    0
  11. 11

    Þrjú af Martial mörkunum eru „eins“. Kominn í gegn, opna líkamsstöðuna, innanfótarsending undir skutl markmannsins.

    Fótbolti er svo svakalega einföld íþrótt þegar þú ert góður leikmaður.

    0
  13. 13

    Nú fara markmenn að henda sér fyrr í vinstrahornið þegar Martial kemur á móti þeim með boltann, þá þarf hann ekkert annað en að setja hann rólegan í hitt hornið. Hann er alltaf skrefi á undan markmönnum í þessum hreyfingum að unun er að horfa á. Þetta er á meðan er en hann er gríðarlegt efni, slúttar ekkert ósvipað og „the baby assassin“ (Ole Gunnar) ef einhver man eftir honum. Nú er Perreira búin að sýna sig þannig framtíðin er björt.

    0

Skildu eftir svar

Netfang þitt verður ekki birt. Nauðsynlegir reitir eru merktir *