Loksins, loksins, Evrópudeildin. Astana á morgun

Loksins kemur að United að fái aftur að taka þátt í hinni frábæru Evrópudeild sem liðið vann svo eftirminnilega vorið 2017. Við fögnum því með að taka á móti „Rúnari Má og félögum“ eða Astana FC eins og liðið heitir utan Íslands.

Astana eru meistarar síðustu fimm ára í Kasakstan en eru í þriðja sæti í deildinni í dag, fimm stigum á eftir efsta liðinu. Það getur þó staðið til bóta því liðið á tvo leiki til góða. Liðið er því sigurvant. Þetta er fjórða árið í röð sem liðið hefur komist í riðlakeppni Evrópudeildarinnar, árið þar áður var það í riðlakeppni Meistaradeildarinnar. Það er því nóg af Evrópureynslu þarna. Það er þó ekki útivallarárangur sem hefur gert Astana gott, mun frekar sterkur heimavöllur, sem við tökum nánar fyrir þegar þar að kemur.

Það er reyndar ekki svo vitlaust að kalla liðið ‘og félaga’ enda enginn þarna utan Rúnars sem við könnumst við, liðið er að öðru leyti byggt á heimamönnum og nokkrum aðkomumönnum frá Austur Evrópu. Meira að segja svo þegar Andy Mitten þarf að skrifa um það, setur hann fókusinn á Rúnar Má, og stuðning hans við United.

Það er því til lítils að reyna að fjalla um lið Astana að einhverju viti. Hvað verður hjá United er þó öllu meira spennandi. Byrjunin hefur verið svona og svona hjá United en liðið er samt í fjórða sæti í deild. Nú er komið að nokku stóru prófi hjá Ole Gunnar og spurningin er:

Verður unglingunum treyst?

Innkaupin í sumar tókust vel, en voru í færra lagi miðað við væntingar og eitt af því sem hefur verið sagt er að þá gefist tækifæri til að láta hinn efnliega hóp unglinga fá tækifæri í alvöru leikjum í Evrópudeildinni og deildarbikarnum. Það verður því spennandi að sjá hverjir af Greenwood, Chong, Gomes og Garner verða í byrjunarliði í kvöld, eða hvort gamlingjar á borð við Matic og Mata verða þarna.

Fyrrnefndi hópurinn æfði allur með aðalliðinu í dag, og á blaðamannafundi í dag staðfesti Ole að Greenwood yrði í liðinu. Sömuleiðis að Fred og Tuanzebe myndu byrja og að Romero væri markvörðurinn í keppninni. Ég býst samt við að Mata verði í liðinu. Hann kemur þá amk með reynslu og yfirvegun. Pogba, Martial, Shaw og James voru allir fjarverandi á æfingunni og má því kannske búast við liðinu einhvern veginn svona.

Leikurinn er kl 19:00 að íslenskum tíma