Hræringar í þjálfaraliðinu

Eftir fréttir um daginn að Mickey Phelan og Eric Steel hefði verið sagt upp sem aðstoðar­framkvæmda­stjóra og markmanns­þjálfara, virðist sem breytingar í þjálfaraliðinu séu að komast á hreint.

Nú virðist ljóst að René Meulensteen, sem var aðalliðsþjálfari, hafi einungis boðist minni staða í nýju þjálfarateymi og hann ákveðið að taka henni ekki heldur reyna fyrir sér á nýjum miðum.

Meulensteen hefur verið einn af lykilmönnum í þjálfarateyminu síðustu tíu árin, fyrst sem unglinga­þjálfari og nú síðustu ár sem þjálfari aðalliðsins. Meulensteen var einn af helstu lærisveinum Wiel Coerver, en þjálfunaraðferðir hins síðarnefnda eru heimsfrægar og þykja frábærar. Það er því nokkur missir að Meulensteen, en það er nú þannig að það er vel skiljanlegt að Moyes vilji hafa sína menn í kringum sig þegar kemur að því að setja mark sitt á liðið. Enn sem komið er hafa litlar fréttir borist af væntum breytingum í unglingastarfinu, þar sem er líklega mikilvægara að séu ekki miklar hræringar. Á meðan nýir þjálfarar eru starfi sínu vaxnir eiga fullorðnir fótboltamenn að geta æft undir stjórn þeirra án þess að sakna þeirra fyrri of mikið.

Að nýju mönnunum sem nú eru líklega á leiðinni.

Phil Neville þarf ekki að kynna. Moyes ætlar að setja traust sitt á hann sem þjálfara og kemur greinlega bæði til af samstarfi þeirra síðustu 8 árin hjá Everton og einnig að Neville þekkir kúltúr Manchester United út og inn. Það sem Neville þekkir síður eru kannske leikmennirnir, en af þeim sem í dag spila með United eru einungis þrír sem léku með liðinu þegar Neville hætti. Já það er það langt síðan! Það má hins vegar reikna með að ef hann kannast ekki við þá flesta gegnum…  ákveðin tengsl… sem hann hélt jú við félagið, þá er stutt fyrir hann að fara ef hann vill innherjaupplýsingar um hvernig á að fara að guttunum.

Steve Round er búinn að vera aðstoðarframkvæmdastjóri Everton í fimm ár. Fátt er vitað um pilt, eins og títt er með aðstoðarstjóra, en við treystum bara Moyes. Á Wikipediu er hins vegar að finna fyndnasta hrós sem ég hef séð í lengri tíma „Round has a glowing reputation and is frequently rating as one of the most talented assistant managers on computer game Football Manager.“ Stundum hefur maður séð á fésinu og Twitter fólk vera að dæma leikmenn eftir einkunnum þeirra í FM, en þetta er í fyrsta skipti sem ég sé FM koma við sögu aðstoðarstjóra!

Chris Woods verður markmannsþjálfari. Hann er í dag markmanns­þjálfari Everton og bandaríska landsliðsins og ku vera að standa sig vel sem slíkur. Ég sé ekki að hann fái að halda stöðunni hjá Bandaríkjunum ef hann kemur til okkar. Woods þekkja þeir sem komnir eru vel til vits og ára sem fyrrverandi markmann enska landsliðsins, var einn af þeim sem voru endalaust í biðröðinni sem ‘næsti markvörður Englands’ á eftir Peter Shilton. Á endanum þraukaði hann nógu lengi til að verða númer eitt og hélt treyjunni í 3 ár áður en David Seaman kom til sögunnar. Woods hefur verið markmanns­þjálfari Everton frá 1998.

Robbie Cooke er aðalnjósnari Everton og myndi taka við sömu stöðu hjá okkur. Hann var í eina tíð senter hjá stórliðum á borð við Mansfield, Peterborough, Cambridge og Brentford, vann síðan á ferðaskrifstofu í níu ár og var þá allt í einu ráðinn sem yfirmaður njósna hjá Everton og er búinn að vera þar í 11 ár. Aftur, maður sem Moyes treystir en þarf nú að fara að skoða leikmenn sem eru einum til fimm verðflokkum ofar en þeir sem hann mátti áður hugsa um.

Leikmannaslúður hefur ekki verið mikið að ráði undanfarna viku, a.m.k. ekki hvað okkur varðar en orðið er laust og umræðan opin!