Rauðu djöflarnir

Meistaradeild Evrópu

Manchester United 2:1 CSKA Moskva

skrifaði þann | 8 ummæli

Manchester United vinnur A-riðil Meistaradeildar Evrópu og er þar með öruggt um sæti í 16-liða úrslitunum en dregið verður næstkomandi mánudag, 11. desember. Þó sæti í 16-liða úrslitunum hafi harla verið í hættu fyrir þennan leik þá er ánægjulegt að enda riðlakeppnina á sigri og mikilvægt að hafa þann meðbyr fyrir risaleik næstu helgar gegn Manchester City. Fimm sigrar og eitt tap er uppskeran í riðlakeppninni í ár, sú besta síðan tímabilið 07/08 þegar við fórum alla leið.

Jose Mourinho hélt sig við 3-4-1-2 kerfið sem hann hefur notað í síðustu leikjum en hann hristi þokkalega upp í byrjunarliðinu enda með annað augað á grannaslagnum. Luke Shaw var í byrjunarliðinu og spilað sínar fyrstu mínútur síðan í október á meðan Sergio Romero stóð milli stanganna en David de Gea var alveg hvíldur. Þeir Ander Herrera, Juan Mata og Marcus Rashford komu einnig inn í liðið á meðan Ashley Young og Jesse Lingard settust á bekkinn; Marcos Rojo og Nemanja Matic voru ekki með. Paul Pogba var auðvitað 90 mínútna maður á miðjunni enda á leiðinni í þriggja leikja bann núna.

20
Romero
17
Blind
12
Smalling
2
Lindelöf
23
Shaw
21
Herrera
6
Pogba
25
Valencia
8
Mata
19
Rashford
9
Lukaku

Varamenn: Pereira, Darmian, Tuanzebe, Young, McTominay, Lingard, Martial.

Leikurinn

Jose Mourinho hefur, í sjö tilraunum, aldrei tapað gegn CSKA Moskvu (unnið sex, eitt jafntefli) og gáfu fyrstu mínútur leiksins það sterklega til kynna að engin breyting yrði þar á í kvöld. Það tók ekki fimm mínútur fyrir fyrsta færið að líta dagsins ljós er Lukaku átti afar huggulega, lúmska stungusendingu inn fyrir á Rashford sem renndi boltanum í fjærstöngina. Stuttu seinna var týndi maðurinn Luke Shaw nálægt því að skora með föstu viðstöðulausu skoti frá vinstra vítateigshorninu en gamla kempan í markinu, Igor Akinfeev, varði virkilega vel. Það skapaðist mikið pláss fyrir Shaw og Antonio Valencia til að athafna sig í á köntunum og okkar menn voru sprækir en gestirnir frá Rússlandi skoruðu hins vegar fyrsta mark kvöldsins.

Embed from Getty Images

Eftir fína þversendingu inn í teig skot Brasilíumaðurinn Vitinho í bakið á Alan Dzagoev og þaðan lak boltinn í netið af stuttu færi og staðan orðin 0:1 rétt fyrir hálfleik. Einhverjir vildu sjá flagg aðstoðardómarans fara á loft þar sem Dzagoev virtist rangur en svo var ekki. Daley Blind hafði skömmu áður reynt að rennitækla fyrir boltann, misheppnast það og í staðinn rennt sér út af vellinum. Þrátt fyrir það var Blind enn þá í leik og því að spila Dzagoev réttan en endalínan afmarkar leiksvæði boltans, ekki leikmanna. Leikmenn eru í leik nema dómarinn gefi þeim leyfi til að yfirgefa völlinn.

https://twitter.com/DaleJohnsonESPN/status/938149145994584069

Leikmenn United létu þetta mark ekki á sig fá og héldu uppteknum hætti í síðari hálfleik, það átti eftir að skila sér. Á 64. mínútu átti Paul Pogba frábæra háa sendingu inn fyrir vörn gestanna þar sem Romelu Lukaku, með varnarmann á bakinu, stýrði boltanum í markið. Belginn sýndi þarna hversu sterkur hann er og skoraði gott mark, aðeins hans annað í síðustu 13 leikjum. Tveimur mínútu síðar var staðan orðin 2:1. Lukaku sýndi aftur styrk sinn með því að vinna skallabolta og flikka honum aftur fyrir sig; þaðan barst hann til Juan Mata sem átti geggjaða vippsendingu á Marcus Rashford á fjærstönginni sem lét hann skoppa einu sinni áður en hann stýrði hnitmiðuðu skoti í fjærhornið.

Eftir þetta fór Mourinho að huga að næstu helgi. Ander Herrera, Antonio Valencia og Lukaku voru allir teknir af velli með stuttu millibili fyrir þá Scott McTominay, Alex Tuanzebe og Anthony Martial. Það var heldur rólegra yfir þessu síðustu mínúturnar; Sergio Romero þurfti aðeins að taka á honum undir lokin til að verja vel frá Dzagoev áður en Vasili Berezutski skallað framhjá og þar við sat. Manchester United vann riðilinn en Moskvumenn sitja eftir í þriðja sætinu og fara þeir í Evrópudeildina.

Embed from Getty Images

Umræðupunktar eftir leik

Áfallalaus og góður sigur. Þetta var þægilegt, jafnvel þó gestirnir hafi komist yfir, enginn meiddist og hægt var að hvíla nokkra í seinni hálfleik. Það gefur líka byr undir báða vængi að vinna fótboltaleiki og það er gott að mæta í Manchester slaginn næstu helgi með fjóra sigra í röð á bakinu.

Luke Shaw þurfti að sanna sig í kvöld og hann gerði það. Shaw var búinn að spila aðeins 48 mínútur af fótbolta með aðalliðinu fyrir leikinn í kvöld en enski bakvörðurinn var heldur betur sprækur í þessum fimmtugasta leik sínum fyrir Man Utd. Það gleðjast allir góðir menn yfir því og það sást bersýnilega hversu mikið stuðningsmenn á Old Trafford vildu sjá hann spila vel í kvöld. Við fögnum honum í dag án þess að fara fram úr okkur, það er öflugt að vera kominn með annan möguleika á vinstri kantinn. Gleymum ekki Juan Mata. Spánverjinn hefur verið hálf týndur upp á síðkastið en hann var sprækur í kvöld, sérstaklega í síðari hálfleik, og kórónaði frammistöðu sína með geggjaðri stoðsendingu á Rashford í öðru markinu.

https://twitter.com/samuelluckhurst/status/938168217247404038

11. desember. Þá verður dregið um hverjir mætast í 16-liða úrslitunum. Manchester United getur mætt Bayern Munchen, Juventus, Sevilla, Shakhtar, Porto eða Real Madrid eins og staðan er núna; þetta gæti breyst annað kvöld.

Meistaradeild Evrópu

CSKA kemur til Manchester

skrifaði þann | 1 ummæli

Þá er komið að leiknum sem enginn er að hugsa um. Eftir einn skemmtilegasta og mikilvægasta sigur United í nokkur ár um síðastliðna helgi gegn góðvinum okkar í Arsenal fóru allir strax að huga að risaleik næstu helgar þegar ekki svo góðir vinir okkar í Manchester City koma í heimsókn. Þar verður allt undir, á morgun þurfum við bara að hvíla alla og ekki tapa 7:0.

United þarf eitt stig á morgun gegn CSKA Moskvu til að tryggja fyrsta sæti riðilsins en í raun þurfum við einfaldlega að forðast sjö marka tap til að vera öruggir áfram og við munum vinna riðilinn svo lengi sem við fáum ekki á okkur fimm mörk á heimavelli. Gestirnir frá Rússlandi eru sjálfir í bullandi baráttu um að komast áfram og þurfa að sækja fleiri stig en Basel (sem heimsækir Benfica á sama tíma) til að vera öruggir um sæti í 16-liða úrslitum Meistaradeildar Evrópu.

CSKA Moskva

CSKA-liðið þarf enga sérstaka kynningu enda verið áskrifandi að Meistaradeildarsæti um árabil. Liðið er yfirleitt efst eða næstefst í deildinni heimafyrir en núna eru Viktor Goncharenko og félagar í þriðja sæti, sjö stigum frá toppliði Lokomotiv. Leikur CSKA og United í rússnesku höfuðborginni síðastliðinn september fór 4:1 þar sem Romelu Lukaku skoraði tvívegis á meðan Anthony Martial og Henrikh Mkhitaryan settu eitt hvor.

http://gty.im/856270822

CSKA-menn eru ekki skipaðir neinum kannónum í dag; miðjumaðurinn Alan Dzagoev er sennilega þeirra skærasta stjarna og flestir ættu að þekkja kempuna Igor Akinfeev í markinu. CSKA hefur hvorki unnið né haldið hreinu í síðustu fimm leikjum gegn United, tapað þremur og gert tvö jafntefli, en liðið hefur hins vegar unnið báða útileiki sína í keppninni til þessa, gegn Benfica og Basel. Rússarnir komust síðast í 16-liða úrslitin tímabilið 2011/2012.

Þeir eru, eins og svo mörg lið í dag, aðallega að spila kerfið 3-5-2. Pontus Wernbloom og Bibra Natkho hafa báðir verið fastamenn í liðinu í vetur en taka út leikbann á morgun, líklegt byrjunarlið er því svona:

35
Akinfeev
4
Ignashevich
5
Vasin
24
Berezutski
14
Nababkin
89
Kuchaev
17
Golovin
10
Dzagoev
2
Fernandes
11
Vitinho
75
Vitinho

Okkar menn

Eftir frábæran sigur gegn Arsenal horfum við nú öll til næstu helgar þegar grannar okkar í City koma í heimsókn. Fyrst þarf þó að spila þennan leik og áhugavert verður að sjá hvaða leikmenn verða notaðir þar. Jose Mourinho, á blaðamannafundi sínum í kvöld, hélt því staðfastlega fram að hann væri alls ekkert að hugsa um City leikinn, að þetta væri bara spurning um næsta verkefni. Það er að sjálfsögðu haugalygi og ljóst að þó nokkrir leikmenn verða hvíldir annað kvöld en einn þeirra er þó ekki Paul Pogba sem er kominn í þriggja leikja bann í úrvalsdeildinni.

Embed from Getty Images

United hefur aðeins tapað tveimur af síðustu 48 leikjum sínum á heimavelli í riðlakeppni Meistaradeildarinnar (34 sgirar, 12 jafntefli) og verður liðið að teljast ansi líklegt til að koma sér yfir þröskuldinn á morgun.

Í öðrum fréttum staðfesti Mourinho að Nemanja Matic, David de Gea, Marouane Fellaini, Zlatan Ibrahimovic og Michael Carrick verða allir fjarri góðu gamni annað kvöld. Sergio Romero og fyrrnefndur Pogba munu byrja leikinn og þá mun Luke Shaw taka einhvern þátt en Mourinho var torræður að vanda þegar Shaw kom til tals. Eric Bailly og Phil Jones eru enn þá á meiðslalistanum og munu ekki spila. Það er ekki ólíklegt að Juan Mata, Marcus Rashford, Daley Blind og Henrikh Mkhitaryan munu snúa aftur í liðið.

20
Romero
23
Shaw
12
Smalling
2
Lindelöf
36
Darmian
6
Pogba
21
Herrera
19
Rashford
8
Mata
22
Mkhitaryan
9
Lukaku

Leikurinn fer fram klukkan 19:45 á morgun og að algjöru stórslysi frátöldu verður United komið í pottinn þegar dregið verður í 16-liða úrslitum Meistaradeildarinnar seinna í mánuðinum.

Enska úrvalsdeildin

Arsenal 1:3 Manchester United

skrifaði þann | 13 ummæli

Þetta var skemmtilegasti leikur United í mörg ár! Og það var helst varnarvinnu beggja liða að þakka, og frammistöðu David de Gea sem varði 14 skot í leiknum, sem er það mesta sem markvörður hefur varið í einum leik frá því farið var að halda utan um þá tölfræði í úrvalsdeildinni.

Liðið var óbreytt frá Watford leiknum, Matić var heill en enginn Ibrahimović á bekknum

1
De Gea
4
Rojo
12
Smalling
2
Lindelöf
18
Young
31
Matić
6
Pogba
25
Valencia
11
Martial
14
Lingard
9
Lukaku

Varamenn: S.Romero, Darmian 76., Blind, McTominay, Ander Herrera 67., Mata, Rashford 93.

Lacazette hafði eins og Matic verið tæpur fyrir leikinn en var í byrjunarliði líkt og Matić.

Cech
Monreal
Mustafi
Koscielny
Kolasinac
Xhaka
Ramsey
Bellerín
Sanchez
Özil
Lacazette

Embed from Getty Images

United byrjaði betur, vann horn á 2. mínútu og komst yfir á þeirri fjórðu! Antonio Valencia átti það mark skuldlaust. Hann komst inn í sendingu til Koscielny, óð up að teig, gaf á Pogba sem í stað þess að stinga á Lukaku gaf aftur á Valencia. Valencia tók hann ekki í fyrsta og virtist vera of seinn þar sem Monreal var kominn í hann en skot Valencia klobbaði bæði Monreal og Cech í markinu! Arsenal sótti eitthvað en komst ekkert áleiðis og á 11. mínútu bætti United í.

Jesse Lingard pressaði frábærlega á varnarmenn, fyrst Monreal og svo Mustafi, og það endaði á að Mustafi gaf beint á Lukaku. Lukaku lék vel til hliðar, gaf fallega sendingu upp á Martial inn í teig sem gaf frábæra utanfótarsendingu á Lingard sem kom á hlaupinu,  og setti boltann í stöng og inn. Frábær byrjun United.
Embed from Getty Images

Mustafi hafði eitthvað meiðst í markinu og fór útaf fyrir Alex Iwobi og Arsenal breytti í 4-2-3-1 uppstillingu og sótti nokkuð vel. Á sömu mínútunni áttu þeir tvö færi sem David de Gea virtist hálf óöruggur í, fyrra endaði á að Lingard setti hnéð í boltann og setti hann í horn, en það seinna kom úr horninu, Smalling hélt aftur af Lacazette sem náði þó skoti í fót De Gea, þaðan hrökk boltinn í Lacazette og síðan hárfínt framhjá. Ekki mjög traustvekjandi. Þetta munstur hélt áfram. Arsenal sótti en United átti ágætis mótsóknir. Lingard pressaði vel fram þegar Arsenal lék til baka og var frískur.

Embed from Getty Images

Þegar tæpur hálftími var liðinn af leik braut Rojo á Sanchez rétt utan teig, Özil sveiflaði boltanum fallega yfir vegginn en Ashley Young var á stönginni og skallaði vel frá. Nett hjá Young. Rétt á eftir átti Arsenal að skora. Lacazette fékk sendingu inn á markteig, missti boltann í Rojo og fékk hann aftur, lék á Rojo og De Gea var kominn niður. Lacazette átti að gera betur en skot hans fór á endanum í De Gea sem hafði náð að kasta sér áfram fyrir boltann. Þaðan fór boltinn í slána og út og Xhaka átti skot óhindraður en rétt framhjá.

Ekki mínútu seinna var það svo Cech sem varði vel en frá eigin manni, Kolasinac var að reyna að stöðva fyrirgjöf Pogba frá að komast á Lukaku.

Hörkufjör semsé í leiknum ekki síst þar sem varnarleikur beggja liða var ekki upp á það besta. Rojo var sérstaklega slakur hjá United, Arsenal var mun meira í pressunni og Lingard og Matić áttu báðir mikilvæg inngrip þegar Arsenal virtist meira en líklegt til að skora. De Gea var svo maðurinn þegar hann með skömmu millibili varði langskot bæði frá Bellerín og Kolasinac, og var fyrri varslan sérlega góð.

Fyrsta mínútan af þremur í viðbótartíma var síðan einn hasar í vítateig United, De Gea þurfti að verja tvisvar, og aftur var önnur varslan frábær, þegar boltinn hrökk af hnénu á Lukaku.

Embed from Getty Images

United var síðan næstum búið að bæta við á síðustu sekúndu hálfleiksins þegar vandræðagangur í vörn Arsenal endaði með skoti frá Lingard en Cech varði.

Svaðalegur fyrri hálfleikur þar sem United nýtti frábærlega vandræði Arsenal, en náðu síðan alltaf að loka fyrir sóknir Arsenal þó að oft væri aðdragandinn í boði varnarmistaka United.

Seinni hálfleikur byrjaði eins og þeim fyrri lauk með sókn Arsenal og það tók þá innan við fjórar mínútur að minnka muninn. Sending kom inn á teiginn, Lindelöf var staður og Aaron Ramsey stakk sér inn fyrir hann. Enginn elti og United vörnin heimtaði rangstöðu, sem var fjarri lagi. Ramsey reyndi hins vegar ekki skot en tók boltann niður sem reyndist svo vera bara snyrtileg sending á Lacazette sem var eini maðurinn sem hafði fylgt þessu eftir og Lacazette átti ekki í vandræðum með að skora örugglega. Flott hjá Arsenal en hroðalega lélegur varnarleikur.

United var næstum búið að svara skömmu síðar, Lingard komst innfyrir eftir enn ein varnarmistök Arsenal en Cech varði, boltinn fór í háum boga og varnarmenn eltu en boltinn endaði í stöng og skot Martial endaði í varnarmanni. Næsta sókn Arsenal endaði með vörslu De Gea og það var varla hægt að draga andann fyrir hasar.

David de Gea var í ‘besti markmaður í heimi’ hamnum í dag, Lacazette átti flott skot sem De Gea varði frábærlega en út í teig og þar kom Alexis Sanchez en bestu markmannsfætur heims fyrr og síðar sáu við honum, De Gea varði með sólanum.

Embed from Getty Images

Rojo fékk loksins gula spjaldið sitt fyrir að stíga á fót Alexis Sanchez á 58. mínútu.

Eins og í fyrri hálfleik kom það ekki til að United héldi boltanum á miðjunni. Í hvert skipti sem þeir fengu boltann var stímt upp í sókn og ekki að ástæðulausu svo brothætt virtist vörn Arsenal. Og það gaf frábæra niðurstöðu á 63. mínútu.

Jesse Lingard fékk að stíma óáreittur fram allan völinn og gaf síðan út á Pogba sem var óvaldaður og óð inn í teig. Koscielny virtist vera búinn að blokka hann vel en Pogba hreinlega hristi hann af sér eins og hann væri krakki og gaf frábæra sendingu fyrir þar sem Jesse var búinn að koma sér fyrir algerlega óvaldur og sendi boltann í netið. Frábært hjá Pogba og frábært hjá Lingard, sérstaklega var hreyfingin og staðsetningin áður en hann fékk sendinguna eins og hjá besta framherja.

Embed from Getty Images

De Gea bætti einni frábærri skutluvörslu í safnið, frá Sanchez í þetta sinnið, lá við að ég nennti ekki að minnast á það, svo staðlað virðist það vera hjá honum að verja svona.

Fyrsta skiptingin kom skömmu síðar. Tony Martial kom útaf eftir þokkalegan leik en Ander Herrera var ætlað að þjappa enn frekar varnarleikinn. Arsenal setti hins vegar kraft í sóknina, Danny Welbeck kom inná fyrir Granit Xhaka.

Embed from Getty Images

En á 74. mínútu fékk Paul Pogba verðskuldað rautt spjald. Hann var að elta bolta, Bellerín fór niður fyrir framan hann og Pogba traðkaði illa á kálfanum á Bellerín. Kannske finnst einhverjum þetta hafa verið harkalega dæmt, miðað við að dómarinn hafði látið leikinn ganga mjög vel og ekki spjaldað utan Rojo og Bellerín. en þetta var svona ‘yfir boltann’ traðk sem er rautt.

Jesse Lingard var fórnað fyrir Matteo Darmian til að reyna að treysta tíu manna liðið en Arsenal bætti enn einum sóknarmanninum við og sendi Giroud inn fyrir Kolasinac.

Sóknir Arsenal héldu áfram en United liði var nært allt komið inn í teig og ef Arsenal náði skoti var De Gea til varnar.
United fékk þó sókn og Lukaku komst framhjá Koscielny sem henti sér í bakið á Lukaku og tók hann niður. Dómarinn sleppti Koscielny við rautt þar sem þetta var úti á miðjum velli, mjög fagmannlegt brot hjá Koscielny. Hinu megin var Darmian hins vegar stálheppinn að ekki var dæmt

Í uppbótartíma kom Rashford inn fyrir Ashley Young, Arsenal hélt áfram að sækja en United hélt út.

Ef Paul Pogba væri ekki á leiðinni í þriggja leikja bann og missir því af leiknum gegn Manchester City á Old Trafford á sunnudaginn eftir viku værum við gjörsamlega í skýjunum eftir þennan leik. Varnarleikur United var vissulega ekki sá besti en leikaðferð Mourinho gekk alveg upp gegn enn veikari vörn Arsenal. Sigurinn heldur í við City sem á leik til góða, og færir okkur frá Arsenal.

David de Gea var hins vegar maðurinn sem vann þennan leik fyrir United. Arsenal átti 33 skot í leiknum, 15 á mark og sem fyrr segir varði De Gea 14 þeirra, ófá frábærlega. Hann er besti markvörður í heimi.

En það þarf líka að minnast á Jesse Lingard. Hann skoraði tvö mörk og átti að auki stóran þátt í undirbúningi þeirra beggja. Hraði hans gaf liðinu það sem þurfit til að keyra á Arsenal og hvorki Mata né Mkhitaryan hafa þann hraða sem þurfti í þessum leik. Langnæstbesti maðurinn United.

Martial var góður í fyrri hálfleik og Nemanja Matić  er maðurinn sem við þurfum á miðjuna, en ekki síður eins og í þessum leik að taka að sér varnarhlutverk í erfiðum leikjum.

Enn og aftur: Frábær sigur! Njótum hans og höfum áhyggjur af Pogba síðar.

 

Enska úrvalsdeildin

Arsenal á Emirates á morgun

skrifaði þann | 3 ummæli

Það eru tvær vikur síðan einn af uppáhaldsfótboltaskríbentum ritstjórnar, Íslandsvinurinn Jonathan Wilson skrifaði grein fyrir grannaslag Arsenal og Tottenham sem fékk yfirskriftina „The gulf between Arsenal and Tottenham is big – and it is getting bigger“. Það er ekki hægt að segja að þessi fyrirsögn hafi elst vel. Arsenal vann Tottenham og Spurs hefur gengið illa og er nú í 7. sæti en Arsenal hefur gengið jafn vel og rústaði nú síðast Huddersfield á miðvikdaginn, 5-0.

Engu að síður er United fjórum stigum á undan þeim og heimsóknin á Emirates er fyrri leikur af tveimur stórprófum sem verða lögð fyrir José Mourinho og United liðið. Manchester City kemur á Old Trafford um aðra helgi og við vöknum á mánudagsmorgun með ansi miklu betri hugmynd um hvernig tímabilið mun halda áfram. Aðspurður sagði Arsène Wenger að hann byggist ekki við að Mourinho rútan myndi sýna sig á morgun, því United myndi sækja og verjast. Það þarf samt enginn að velkjast í vafa um að José er ekki að fara í erfiðan útileik með það fyrir augum að taka of mikla áhættu.

Leikurinn á þriðjudaginn sýndi hvað United liðið getur í sókninni en um leið var þriggja manna vörnin traust og leyfði vængvörðunum frelsið sem þeir þurfa enda bæði Young og Valencia frekar sóknarmenn en hitt.

Stærsta spurningarmerkið verður við það hvort Nemanja Matic verður heill og miðað við það sem við vitum er það frekar ólíklegt. Þá verður gott ef Fellaini er heill til að takast á við miðjuna. Jesse Lingard hlýtur að hafa spilað sig inn í liðið eftir flotta frammistöðu á þriðjudaginn.

1
De Gea
5
Marcos Rojo
12
Smalling
2
Lindelöf
18
Young
27
Fellaini
6
Pogba
25
Valencia
11
Martial
14
Lingard
9
Lukaku

Ég er á Martial vagninum sem stendur, það er ekki líklegt að það sé vænlegt að reyn að spila með hann vinstra megin og Rashford hægra megin þannig að Rashford fær að hvíla.

En að andstæðingnum aftur. Eftir 3-1 tap á útivelli gegn Manchester City hafa þeir unnið þrjá leiki í röð í deild, fyrst fyrrnefndan leik gegn Tottenham, 2-0, síðan Barnsley 1-0 og loks Huddersfield. Þetta er vissulega ágætur árangur en það er samt ekki ástæða til að óttast um of. Einn besti leikmaður þeirra undanfarið hefur verið Mesut Özil og á morgun er spurning hvort hann ætli að sýna José Mourinho hvers vegna José eigi að kaupa hann í janúar eins og hávært slúður vill meina að sé raunhæfur möguleiki enda er samningur Özil að renna út og eins og með Alexis Sanchez þá eru engar líkur á að Özil verði áfram. Það er hins vegar vonandi að Özil standi ekki undir þessu stressi, og eins að Mourinho sem þekkir hann vel frá Real árunum eigi einhver brögð uppi í erminni til að hefta leik hans.

Cech
Monreal
Mustafi
Koscielny
Kolasinac
Xhaka
Ramsey
Bellerín
Sanchez
Özil
Giroud

Alexandre Lacazette verður ekki með vegna meiðsla en annars er þetta Arsenal lið víst nokkuð öruggt. Ég efast um að Danny Welbeck fái sénsinn frekar en Giroud. Miðja Ramsey og Xhaka er ekki kannske sú sterkasta og ef leikurinn væri á Old Trafford þá væri alveg möguleiki að sjá frekar 4-2-1-3  frá United til að herja á þeim. En þetta er á Emirates og því verður þriggja manna vörnin fyrir valinu.

United er í góðri stöðu í öðru sætinu og við værum mun glaðari ef City væri ekki á svona mikilli siglingu. Liðið hefur bætt við sig 8 stigum frá viðureignum við sömu lið í fyrra og 11 stigum ef miðað er við fjölda umferða. Þrátt fyrir þetta hafa verið óánægjuraddir, aðallega vegna meintrar leiðinlegrar spilamennsku. Á morgun gefst tækifæri til að hækka fyrrgreinda tölu úr 8 í 11 enda tapaði liðið á Emirates í fyrra, og gleðja enn frekar þau okkar sem vilja fyrst og fremst að United gangi vel og komist á meiri sigurbraut en raunin hefur verið síðustu ár. Og það má alveg gerast með sterkum og öguðum varnarleiks

Enska úrvalsdeildin

Watford 2:4 Manchester United

skrifaði þann | 16 ummæli

 

Manchester United átti leik á þriðjudegi á meðan flest hin liðin í efstu sætunum spiluðu daginn eftir. Liðið nýtti það tækifæri vel til að næla í mjög góð 3 stig á erfiðum útivelli. Frammistaðan var heilt yfir góð og að flestu leyti það sem þurfti á þessum tímapunkti.

Fyrir leikinn kom í ljós að Fellaini hafði endað síðasta leik haltrandi af ástæðu, hann missti af þessum leik vegna meiðsla. Mkhitaryan var heldur ekki í hópnum en fyrir því lá hins vegar ekki eins góð ástæða og fyrir fjarveru Fellaini. Byrjunarlið Manchester United í þessum leik var hins vegar svona:

1
De Gea
5
Rojo
12
Smalling
2
Lindelöf
18
Young
6
Pogba
31
Matic
25
Valencia
11
Martial
14
Lingard
9
Lukaku

Varamenn: Romero, Darmian, Herrera, McTominay, Mata, Rashford, Ibrahimovic.

Byrjunarlið Watford var á þessa leið:

1
Gomes
27
Kabasele
5
Prödl
6
Mariappa
22
Zeegelaar
8
Cleverley
16
Doucouré
21
Femenía
11
Richarlison
18
Gray
19
Hughes

Varamenn: Karnezis, Janmaat, Wagué, Capoue, Carillo, Pereyra, Deeney

 

Leikurinn sjálfur

Í þessum leik mættust tveir portúgalskir knattspyrnustjórar sem eru þekktir fyrir að leggja mikið upp úr undirbúningsvinnu og taktískum pælingum. Það var líka ljóst frá byrjun að bæði lið lögðu upp með taktík og höfðu undirbúið leikinn vel.

Bæði lið hófu leik með þrjá miðverði, vængbakverði og þéttar miðjur. Hvorugt liðið vildi tapa miðjuspilinu, það var alveg ljóst. Bæði lið lögðu líka meiri áherslu á sókn en vörn á vængnum. Manchester United setti upp þriggja miðvarða línu með Rojo, Smalling og Lindelöf og það var ljóst að Mourinho ætlaði að treysta á þá línu, frekar en vængbakverðina, til að eiga við mögulegar afleiðingar af vængspili Watford.

Enda gafst það líka vel. Heilt yfir átti varnarlína Manchester United frábæran leik að mínu mati. Hún náði vel saman, virkaði vel samæfð og það hefði verið auðvelt að leiða að því líkum að þessir þrír miðverðir væru alvanir því að spila saman í ensku úrvalsdeildinni.

Fyrstu tæpu 20 mínúturnar af leiknum fékk Watford aðeins að leika sér með boltann, ekkert sem þurfti samt að hafa teljandi áhyggjur af. United varðist vel og hafði svo skýr markmið í skyndisóknum. Á 19. mínútu kom einmitt góð skyndisókn þar sem Lukaku sýndi styrk sinn á miðjunni, vann boltann og kom honum áfram upp völlinn, á Jesse Lingard. Lingard hélt boltanum vel og gaf hann svo fram á vængbakvörðinn Ashley Young, sem allt í einu var orðinn fremsti leikmaður United. Young tók vel við boltanum og átti svo firnasterkt skot milli fóta varnarmanns Watford og beint í bláhorn marksins án þess að Gomes kæmi þar vörnum við.

Embed from Getty Images

Þetta var verulega vel unnið mark af hálfu Manchester United. Miðað við það sem sást hafði af spili United til þessa og í framhaldinu þá má leiða að þvi líkum að þetta hafi einmitt verið taktíska uppleggið, að nýta vængbakverðina mikið auk þess sem Jesse Lingard átti með sinni vinnusemi og hlaupum að styðja vel við sóknina.

Fimm mínútum síðar átti Pogba frábæran sprett upp völlinn þar sem Doucouré sá sér ekki annað fært en að brjóta á honum, ekki langt fyrir utan eigin vítateig. Flestum að óvörum, ekki síst José Mourinho eins og myndbrot hafa síðar sýnt, gaf Pogba aukaspyrnuna eftir þannig að Ashley Young tók hana. Young var auðvitað sjóðheitur eftir markið fyrr í leiknum og pirraður yfir að hafa ósanngjarnt misst markið í síðasta leik þar sem það var af einhverjum ástæðum skráð sem sjálfsmark, svo hann ákvað að frímerkja bara boltann í skeytin úr aukaspyrnunni, gjörsamlega stórkostlegt mark.

Embed from Getty Images

Ashley Young hefur aðeins tvisvar áður skorað tvö mörk í leik fyrir Manchester United. Gegn Arsenal í 8-2 sigrinum og í 3-1 sigri gegn Tottenham Hotspur, hvort tveggja tímabilið 2011-12. Svo það var alveg kominn tími á þetta hjá Young. Þrátt fyrir að Watford hafi náð ágætis spili við og við á köntunum þá átti Young samt flottan leik, enda var hans hlutverk líklega meira að styðja við skyndisóknir og sóknarmöguleika en að eiga við kantspil Watford. Mourinho treysti miðvörðunum sínum til að eiga við hvað sem kantar Watford gætu komið með og heilt yfir gekk það plan vel upp.

Eftir rúmlega hálftíma leik var staðan orðin 3-0 fyrir Manchester United. Eftir sókn Watford kom boltinn skoppandi inn að miðju vallar þar sem Jesse Lingard vann boltann og keyrði með hann á vörn Watford. Þegar boltinn skoppaði upp í loftið þá leiddi þessi pressa Lingard af sér örvæntingarfullan skalla úr vörn Watford sem lenti beint á Lukaku. Lukaku tók við boltanum og bar hann upp áður en hann fann Martial með góðri sendingu. Martial bar boltann aðeins lengur að vörninni og átti svo gott innanfótarskot meðfram jörðinni í bláhornið og staðan orðin 3-0 fyrir Manchester United.

Embed from Getty Images

Þarna hafði miðja og miðvarðarvarnarlína United staðið sig mjög vel. Watford hafði alveg fengið að vera með boltann og mögulega komist upp kantinn en þeir höfðu aldrei náð að gera neitt við þær stöður. Lindelöf, Smalling og Rojo höfðu sérstaklega átt góðan dag og lesið allt sem Watford ætlaði sér að gera.

Fyrirfram hefði maður varla getað sett þetta upp betur í hálfleik, United svo gott sem búið að klára leikinn og gat því sparað orku fyrir leikinn gegn Arsenal næstu helgi. Það fór líka nánast þannig í seinni hálfleik. United leyfði Watford að vera meira með boltann, varðist heilt yfir af öryggi og ætlaði að klára leikinn í 2. gírnum.

En svo kom ansi slæmur kafli. Það versta við þennan kafla var klárlega það þegar Nemanja Matic fór út af vegna meiðsla á 54. mínútu í síðari hálfleik. Það var brútal, ef hann er það meiddur að hann missi af einhverjum leikjum þá er það svakalegur missir fyrir liðið. Sérstaklega þar sem það kom í ljós fyrir leikinn að Fellaini væri líka frá vegna meiðsla.

Watford náði síðan að minnka muninn eftir að Troy Deeney skoraði úr víti. Rojo hafði átt mjög góðan leik fram að þessu en las stöðuna aðeins vitlaust þarna, hélt hann hefði boltann með tæklingu en fékk víti á sig. Fyrst vítið var dæmt var Rojo ansi heppinn að sleppa við seinna gula spjaldið, og þar með rautt (svosem ekki í fyrsta skipti, hann virðist kunna lagið á því að komast upp með rautt). Smalling var þó á milli sóknarmanns og marks, það hefur kannski bjargað spjaldinu en það setur ákvarðanatöku Rojo með tæklinguna í aðeins verra ljós. Deeney skoraði úr vítinu en þetta gæti þó verið verra, kannski hefði Rojo tekið þennan bolta clean ef hann hefði verið í betra leikformi. Við sjáum til. Þrátt fyrir þetta þá er ég samt ánægður með að hann sé kominn aftur.

Embed from Getty Images

Eftir þetta hélt Watford áfram að hanga á boltanum eins mikið og United leyfði þeim það. United varðist bara áfram og reyndi að komast upp með að eyða sem minnstri orku í þennan sigurleik, alltaf mikils virði á þessu stigi móts. Á 84. mínútu endaði þó boltinn í markinu eftir sókn hjá Watford. Fyrir þá neikvæðustu þá mætti eflaustu nöldra og tuða yfir einhverju en fyrir mér þá var þetta aðallega grísamark hjá Watford. Kantmaðurinn André Carillo var þá að leika sér með boltann á hægri kantinum, með varnarmann United vel í sér. Hann náði að senda boltann utarlega í teiginn á Doucouré sem lúðraði honum einhvern veginn í fyrstu snertingu að marki og inn fór hann.

Embed from Getty Images

Þetta var vissulega skemmtilegt mark hjá Watford en að mínu mati þá gerðu varnarmenn Manchester United lítið rangt í þessu. Þess þá heldur De Gea. Carillo og Doucouré mega alveg fá high five, þetta var gott mark hjá þeim. En á þessu stigi leiks fannst mér 2-3 ekki gefa rétta mynd af stöðu leiks. United hafði fengið betri færi til að bæta við mörkum en Watford til þessa. Þetta var þó nóg til að fá sjónvarpsþuli til að æsa sig og neikvæðisraddir til að tuða, enda þurfa þær oftar en ekki lítið til.

United hafði þó hauk í horni, sem var Jesse Lingard. Hann kláraði leikinn með fjórða markinu þegar hann, nánast upp á sitt einsdæmi, sneri skyndisókn í mark með góðu áhlaupi. Stuttu eftir annað mark Watford fékk hann boltann á vallarhelmingi Watford, hljóp að marki og lagði boltann í netið með góðu skoti. Og fagnaði svo duglega eins og Jesse Lingard er einum lagið. Strax í kjölfarið fór hann útaf og Zlatan kom inná. Eftir það var engin alvöru hætta og United sigldi 3 stigunum í hús.

Embed from Getty Images

Umræðupunktar

Fyrir leik í miðri viku í ensku úrvaldeildinni, rétt fyrir desember, þá var þetta nánast fullkomin frammistaða. Liðið tryggði 3 stig með nokkuð þægilegri spilamennsku og þurfti ekkert mikið að fara upp úr 2. gír í seinni hálfleiknum. Þegar tekið er mið af því að leikið var á heldur strembnum útileik þá er þetta ansi gott.

Stóri gallinn er þó það að Matic þurfti að fara af velli meiddur. Það er hrikalegt. Fellaini missti af þessum leik vegna meiðsla (sá leikmaður hefur aðeins fengið á sig 1 mark þegar hann hefur verið inná vellinum með United, bara til að halda því til haga) og ef bæði Matic og Fellaini missa af næstu 2 deildarleikjum þá er það svakalegt skarð sem hoggið er í lið United fyrir mjög stóra leiki.

https://twitter.com/MarkOgden_/status/935634791176826881

Jújú, Manchester United fékk á sig tvö mörk í þessum leik en það skiptir ekki svo miklu máli. Watford var aldrei í alvöru nálægt því að valda United vandræðum. Sem er frábært, það er mikill styrkleiki í því. En það er brútal að missa Matic.

Lindelöf fúnkeraði skemmtilega í þessari þriggja miðvarða línu, eins og ég var aðeins búinn að vangavelta um í upphituninni. Mér fannst þeir allir í öftustu línunni standa sig glimrandi vel. Það var bara þessi eina tækling hjá Rojo þegar Watford fékk víti sem maður gæti sett spurningamerki við. Annars fannst mér þeir vinna vel saman, lesa leikinn vel og almennt koma með öryggi inn í liðið. Ég gæti séð þessa þriggja miðvarða línu fyrir mér spila fleiri leiki og jafnvel gegn mun sterkari andstæðingum.

Lukaku hefur ekki verið að skora eins mikið upp á síðkastið og hann gerði til að byrja með. Engu að síður þá hef ég verið ánægður með það sem hann hefur verið að gera. Það eru ákveðnir hlutir sem hann mætti bæta, sér í lagi kannski fyrsta snerting og það að halda bolta með bakið í markið. En hann er klár leikmaður (þvert á það sem heilt yfir rasísk umræða hefur viljað telja okkur trú um varðandi hann) og mun án efa vinna í þessum hlutum á næstu árum.

Þetta var skemmtilega uppsett lið. Erum við að fara að sjá sama lið á útivelli gegn Arsenal eða viljum við frekar sjá varnarsinnaðra lið? Öðruvísi taktík? Hvernig ætlar Mourinho að tækla mögulegt Matic-leysi?

Maður leiksins

Ég var mjög ánægður með Martial, var ánægður með Lukaku og ég var ánægður með Lindelöf. En topp 3 í þessum leik hjá mér eru:

Embed from Getty Images

Jesse Lingard. Mikil barátta í honum og vinnusemi, studdi vel við sóknina og tók góða hápressu þegar við átti. Skoraði markið sem kláraði leikinn og var, líkt og oftast, taktískt góður.

Embed from Getty Images

Paul Pogba. Gaurinn er bara svo óheyrilega, fáránlega, ótrúlega, skemmtilega góður í fótbolta. Hvílíkur fótboltalegur lúxus að hafa þennan leikmann í liðinu sem maður heldur með í fótbolta.

Embed from Getty Images

Ashley Young. Oft vanmetinn, alltaf góður leikmaður að hafa í hóp. Fékk ekki verðskuldað mark í síðasta leik, af einhverjum fábjánalegum ástæðum, svo hann skoraði bara tvö fáránlega flott mörk í þessum leik. Mourinho virðist fíla hann og það sem hann gerði í þessum leik var líklega flest lagt upp fyrir leik. Hann hefur heilann og hæfileikann í að fylgja því sem Mourinho vill að hann geri, það er dýrmætt. Hann á meirihlutann í þessum 3 stigum.

Þetta voru frábær stig, mögulega rándýr, en gott veganesti inn í næstu leiki. Það verður mjög áhugavert að sjá hvernig liðið stillir upp í næstu leikjum og við krossum putta að mikilvægir leikmenn eins og Nemanja Matic og Marouane Fellaini séu ekki frá lengi vegna meiðsla.