Manchester United er svo gott sem komið áfram úr A-riðlinum í Meistaradeild Evrópu eftir öruggan sigur á Benfica í kvöld. Á meðan vann CSKA frá Moskvu útisigur á Basel sem þýðir að United þarf núna 1 stig úr næstu tveimur leikjum til að tryggja sér sigur í riðlinum.
Þessi leikur var ekki tekinn í fimmta gírnum en sigurinn var heldur ekkert sérstaklega mikið í hættu, sérstaklega ekki þar sem Manchester United er með besta markmann heims á milli stanganna.
Byrjunarlið Manchester United í leiknum var svona:
Varamenn: Romero, Lindelöf, Shaw, Herrera, Mkhitaryan, Young, Rashford
Byrjunarlið gestanna frá Benfica:
Varamenn: Cesar, Lisandro, Eliseu, Lopez, Cervi, Jonas og Seferovic.
Fyrri hálfleikurinn
Benfica var meira með boltann framan af í fyrri hálfleik og höfðu nokkuð gott sjálfstraust í miðjuspilinu. Scott McTominay virkaði örlítið óöruggur rétt til að byrja með en óx mikið eftir því sem á leið leikinn. Benfica reyndi að ná góðu spili og hafði til að byrja með ákveðin tök á miðjunni en það jafnaðist út með tímanum.
Dómarinn hefði alveg getað dæmt þrjú víti í fyrri hálfleiknum. Bailly teygði hugtakið „öxl í öxl“ út í ansi súrrealískar víddir og varnarmaður Benfica hljóp Mata niður í hinum vítateignum. En dómarinn dæmdi vissulega víti, það kom eftir einn af þó nokkrum frábærum sprettum Anthony Martial í leiknum, þar sem hann dansaði sig í gegnum varnarlínu Benfica og fór svo illa með einn varnarmann Benfica að hann bókstaflega datt um koll og bæði greip boltann og felldi Martial.
Martial fór sjálfur á vítapunktinn. Vítið var ekkert frábært en ekkert glatað heldur. Það var meðfram jörðinni og út í hornið en hefði mátt vera fastara. Markvörðurinn Svilar náði einu skrefi óséðu og las svo vítaspyrnuna vel. Maður hefur séð töluvert betri víti en líka töluvert slakari vítaspyrnur. Svilar fékk þarna tækifæri til að sýna hvað hann getur eftir að hafa átt mikla sök í marki Manchester United í síðustu umferð.
Stuttu seinna fékk David De Gea líka að minna á sig. Þá varði hann hörkuskot frá sprækasta leikmanni Benfica, Diogo Goncalves. Skotið var utan teigs en stefndi í fallegum boga upp í markvinkilinn þegar De Gea varði.
David de Gea’s world class save! #DaveSaves
— United Report (@ManUtdReport_) October 31, 2017
Martial hélt áfram að vera besti leikmaður Manchester United fram á við og átti fleiri spretti sem sköpuðu hættu. Manchester United náði líka stundum skemmtilegum skorpum af samspili en heilt yfir var þetta bara rólegt. Það stefndi í að liðin færu markalaus inn í leikhlé en þá var Nemanja Matic farið að leiðast þetta svo hann tók til sinna ráða. Hann lét einfaldlega vaða af 30 metra færi, boltinn söng í stönginni, fór svo aftan í Svilar markmann og þaðan í markið. Gríðarleg óheppni hjá Svilar að fá þetta skráð sem sjálfsmark en skotið flott hjá Matic. Hann lætur ekki oft vaða en þegar hann gerir það…
Lukaku fékk svo dauðafæri til að koma United í 2-0 stuttu seinna eftir gjafasendingu frá varnarmanni Benfica en þá kom Svilar vel út á móti Lukaku og náði að verja.
Seinni hálfleikur
Jesse Lingard þurfti að fara af velli í hálfleik eftir að hafa meiðst við samstuð í fyrri hálfleik. Inn á fyrir hann kom Mkhitaryan. Manchester United hafði tök á leiknum fyrstu 10 mínútur síðari hálfleiks og það virkaði eins og liðið ætlaði bara einfaldlega að drepa leikinn alveg og taka 1-0 sigurinn bara.
En eftir 10 mínútna leik komust Benfica meira inn í leikinn. Á 60. mínútu fengu þeir dauðafæri upp úr engu þegar Goncalves fíflaði Smalling og komst innfyrir vörnina, þetta minnti eiginlega helst á gegnumbrot í handbolta. Goncalves átti fínt skot sem stefndi neðst í markhornið en De Gea varði frábærlega. 5 mínútum síðar var komið að Bailly að reyna að rétta Benfica hjálparhönd með jöfnunarmarkið. Þá átti hann hörmulega sendingu á Smalling sem Jimenez komst inn í. Smalling gerði hins vegar vel í því að trufla hann en engu að síður náði Jimenez fínu skoti sem endaði í stönginni. Þarna sluppu United, og þá sér í lagi Bailly, með skrekkinn.
Mourinho leist ekkert á þetta og setti Ander Herrera inn á fyrir Juan Mata til að reyna að ná aftur tökum á miðjunni. Við það breytti Manchester United úr 4-2-3-1 í 4-3-3 þar sem McTominay fór að spila framar en hann hafði verið að gera.
Þegar rétt um korter var eftir af leiknum var Martial tekinn af velli og afmælisbarn dagsins, hinn tvítugi Marcus Rashford, kom inn á í hans stað. Hann hélt áfram þar sem Martial skildi við og átti strax hættulegan sprett inn í vítateig Benfica. Þar var brotið á honum og réttilega dæmd vítaspyrna. Lukaku steig upp og ætlaði að taka vítið. En þá kom Herrera að og sagði að hann ætti að taka vítið. Að endingu var það samt Daley Blind sem átti að taka vítið. Svilar hafði lesið Martial vel en í þetta skipti var það Blind sem las markvörðinn og sendi öruggt víti í mitt markið þar sem Svilar var farinn í annað hornið.
Þar með var þetta komið. Benfica reyndi svosem aðeins en hafði ekki mikið í það að vinna bug á United vörninni, hvað þá klettinum í markinu þar fyrir aftan. 2-0 sigur staðreynd, sanngjarn sigur þrátt fyrir að spilamennskan hafi ekki verið nein sérstök flugeldasýning.
Pælingar eftir leik
Scott McTominay kom inn í liðið í þessum leik. Ekki ósennilegt að Ander Herrera hafi verið hvíldur sérstaklega þar sem hann á væntanlega fyrir höndum mikil hlaup og mikla vinnusemi á sunnudaginn þegar Manchester United mætir Chelsea í London. McTominay komst heilt yfir mjög vel frá sínu. Hann reyndi aldrei að fela sig, hann tók þátt í öllu og það var ekkert í hans fasi sem gaf til kynna að hann væri þetta lítið reyndur. Hann á alveg eitthvað í land ennþá en ef hann heldur áfram að sýna svipaða takta og svipað swagger þá verður mjög gaman að sjá hvað verður úr honum.
https://twitter.com/StatmanDave/status/925508395112845313
Anthony Martial hefði rúllað upp titlinum maður leiksins ef hann hefði skorað úr þessari vítaspyrnu. Eða náð að skora/leggja upp þar fyrir utan. Hann var samt langsamlega hættulegasti sóknarleikmaður Manchester United í leiknum. Það er er svo gaman að fylgjast með honum þegar hann hleypur af fullum krafti á ringlaða varnarmenn.
David De Gea er einfaldlega bestur í marki. Við þreytumst seint á að segja það enda er það bara svo satt og svo skemmtilegt. Hann var maður leiksins í kvöld að mínu mati. Stundum reyndi ansi skyndilega og óvænt á hann en hann lokaði þessu bara. David De Gea hefur núna haldið hreinu í 14 leikjum af 18 á tímabilinu, með lands- og félagsliði. Veggur!
Næsti leikur er svo stórleikur gegn Chelsea. Chelsea skíttapaði gegn Roma í kvöld en þetta verður engu að síður hörkuleikur. Næsti leikur í Meistaradeildinni er svo útileikur gegn Basel. Eins og áður sagði þarf United aðeins 1 stig til viðbótar til að tryggja sigurinn í riðlinum. Það er um að gera að klára það bara sem fyrst.
#UCL games under the Old Trafford lights ❤️ pic.twitter.com/6I4h4nlUb2
— Manchester United (@ManUtd) October 31, 2017
Eftir þrjá sigra í jafnmörgum leikjum er Manchester United í mjög góðri stöðu á toppi A-riðils og hefur í þokkabót klárað tvo af þremur útileikjum sínum í riðlinum. Seinni helmingur riðlakeppninnar hefst á heimavelli gegn liðinu sem er nokkuð óvænt í neðsta sætinu, stigalaust. Flest bjuggust við að Benfica myndi veita Manchester United hörðustu samkeppnina um efsta sætið en annað hefur komið á daginn. Sigur í þessum leik tryggir sæti í útsláttarkeppnina og ætti að fara langleiðina með að tryggja Manchester United efsta sætið í riðlinum. Það væri afskaplega huggulegt ef liðið gæti verið búið að tryggja þetta fyrir lokaleikinn í Meistaradeildinni því þá væri hægt að hvíla leikmenn fyrir erfiðan leik gegn Manchester City helgina eftir lokaumferðina.
Loksins er fjögurra leikja útileikjahrinunni lokið. Um var að ræða Benfica í Meistaradeildinni, Swansea í deildarbikarnum og Liverpool og Huddersfield í úrvalsdeildinni. Leikirnir gegn Benfica og Swansea unnust en fyrrnefndi sigurinn var afskaplega ósannfærandi og í raun aðeins mistökum ungs markvarðar Benfica að þakka. Deildarleikirnir tveir voru nóg til að sumt stuðningsfólk snerist gegn knattspyrnustjóranum en þessir leikir voru minna ánægjulegir en þreföld rótarfylling án deyfiefna.