Rauðu djöflarnir

Enska úrvalsdeildin

Tottenham Hotspur 2:1 Manchester United

skrifaði þann | 28 ummæli

Þegar liðið var birt voru flest frekar ringluð, einhvers konar uppstilling með þremur miðvörðum og Rooney og Carrick á miðjunni. En í staðinn var þetta um það bil svona

1
De Gea
17
Blind
4
Jones
12
Smalling
3
Bailly
38
Tuanzebe
18
Carrick
10
Rooney
14
Lingard
8
Mata
11
Martial

Varamenn voru: S.Romero, Darmian, Mitchell, Ander Herrera(61′), McTominay, Mkhitaryan(61′), Rashford (73′), Demetri Mitchell að fá sitt fyrsta tækifæri á bekknum.

Lið Tottenham var svona

Lloris
Davies
Vertonghen
Alderweireld
Trippier
Wanyama
Dier
Son
Dele Alli
Eriksen
Kane

Leikurinn byrjaði frekar rólega þó að stuðningsmenn Tottenham væru í svakalegu stuði frá því löngu fyrir leik og það tók ekki langan tíma að gleðja þá. Davies fékk boltann eftir horn, sendi inn á teiginn og þar var Victor Wanyama alveg óvaldaður, aðallega vegna slakrar staðsetningar Rooney, og skallaði auðveldlega í netið af markteig.

Leikurinn var tíðindalítill eftir þetta, bæði lið með boltann án þess að gera eitthvað mikð við hann. Anthony Martial var frekar einangraður frammi , átti þó ágætis skot þegar hann fékk boltann úti á kanti og skaut síðan utan teigs, en boltinn fór rétt framhjá.

Á 19. mínútu átti samt Tottenham að skora, Son Heung-min óð óáreittur í gegnum vörnina og inn í teig, en De Gea varði gott skot hans. Christian Eriksen fékk frákastið en skaut framhjá. Skömmu síðar var Kane á undan De Gea í fyrirgjöf en skallaði rétt yfir. Færin komu hvert á eftir öðru, De Gea lenti í vandræðum með skot Eriksen sem breytti um stefnu af sköflungi Tuanzebe. De Gea náði bara að ýta boltanum frá og Dele Alli náði ekki valdi á boltanum þannig Bailly gat komið til bjargar.

Eins og þetta tíst bendir á vörðust United aftarlega og það verður að segjast eins og er að þetta fyllir mig ekki trausti fyrir leikinn gegn Ajax, Bailly kom oftast úr bakverðinum til að bjarga hlutunum

Dele Alli var næstur Tottenham manna til að reyna sig, De Gea varði í horn.

Þessi hasar leið þó hjá og síðasta kortérið í fyrri hálfleik var United liðið búið að koma sér fyrir á eigin vallarhelmingi og varðist. Martial greyið var afskaplega einmana frammi og gat lítið gert. Tottenham fékk samt eitt færi undir lokin en De Gea varði sem fyrr frá .

Það var ótrúlegt en það var samt United sem fékk færi undir lokin og það besta færi sitt í fyrri hálfleiknum. Bailly var í alveg ágætri aðstöðu til að skjóta en ákvað að reyna að gefa boltann í staðinn. Þarna hefði hann mátt vera eigingjarnari!

En fyrri hálfleiknum er best lýst með því að United var heppið að vera ekki þremur eða fjórum mörkum undir eða fleiri þegar leikmenn fóru í klefann. Það tók Tottenham ekki langan tíma að leiðrétta það. Þrjár mínútur voru liðnar af þeim seinni þegar Dele Alli fékk aukaspyrnu vinstra megin, Eriksen tók hana, gaf fyrir og Kane skoraði með fallegu utanfótarskoti af 2 metra færi. Vörnin léleg þó afgreiðslan væri flott. Bæði Son og Kane reyndu langskot á næstu mínútum, De Gea varði frá Son en skot Kane fór framhjá, Tottenham menn komnir í verulegt stuð og vildu bæta við.

Það gerðist samt ekki strax, United fékk meira að segja færi þegar Lingard skaut utan teigs en nokkuð fram hjá. Á 61. mínútu gerði José síðan tvær breytingar, Mkhitaryan kom inn fyrir Lingard og Herrera kom í stað Tuanzebe. Herrera tók þó ekki við hlutverki Tuanzebe sem yfirfrakki á Eriksen, nokkuð sem unglingnum hafði ekki gengið alltof vel með.

Af öllum mönnum var það síðan Wayne Rooney sem minnkaði muninn á 71. mínútu. Martial átti heiðurinn, fór upp vinstra megin, auðveldlega framhjá Trippier og næstum upp að markteig, nett fyrirgjöf, Rooney stakk fætinum fram fyrir Vertonghen til að ná skotinu og boltinn fór af ristinni á Vertonghen og inn, líklega á leiðinni inn hvort heldur er þannig að markið er Rooneys.

Síðasta skiptingin var síðan Rashford fyrir Mata. United var á þessum tímapunkti orðið mun frískari en áður, en það var samt Phil Jones sem þurfti að skalla skot Dele Alli frá þegar boltinn var farinn framhjá De Gea.
Fátt gerðist síðan fyrr en í viðbótartíma að Rashford fékk langa og háa sendingu innfyrir en með varnarmenn í sér gat hann ekki nýtt færið. Þetta var síðasta færið í leiknum og stemmingin síðustu mínúturnar var vissulega frábær þegar stuðningsmenn Tottenham Hotspur sungu kveðjusöng til vallarins.

Sanngjarn sigur Tottenham í þessum síðasta leik á White Hart Lane og United var afspyrnuslakt í 70 mínútur, en örlítið skárri síðustu 20. Besti maður United var Anthony Martial en það eru fáir aðrir sem þarf að minnast á, utan að David De Gea varði nokkrum sinnum mjög vel, svona eins og við erum orðin vön og farin að krefjast af honum. Af hinum eru 2-5 sem fæst okkar verða hissa ef þeir verða ekki á leikmannalista United þegar skiptiglugginn lokar í haust. Þannig er það bara.

Enska úrvalsdeildin

Tottenham á morgun

skrifaði þann | 3 ummæli

Nú vitum við að það er einn leikur eftir í vor sem skiptir máli og það er ekki leikurinn á morgun. Úrslit gærdagsins, þegar Chelsea tryggði sér titilinn. þýða líka að þessi leikur skiptir Tottenham Hotspur engu máli, nema jú, þetta er síðasti leikur liðsins á gamla White Hart Lane. Í vetur hefur hluti af nýja leikvanginum risið í kringum þann gamla og á mánudaginn ráðast vinnuvélar á þann gamla og Spurs fer í eins veturs útlegð á Wembley. Að því loknu flytja þeir aftur á nýja 61 þúsund manna völlinn og vonast til að það færi þeim aukin peningavöld. Það kemur í ljós.

Það má því búast við Spurs í fínu skapi þó titillinn sé farinn, og þeir vilja kveðja völlinn með sigri. Fullskipað lið þeirra mun líklega líta svona út

Lloris
Walker
Vertonghen
Alderweireld
Trippier
Dembélé
Dier
Son
Alli
Eriksen
Kane

Tottenham hafði verið á mikilli sigurgöngu síðustu vikur og mánuði þangað til að West Ham vann þá óvænt á föstudaginn fyrir viku. Í þeim leik voru þeir mest með boltann en vantaði alla ógn uppi við markið. Það var nær sama lið og hér að ofan, utan að Victor Wanyama spilaði fyrir Dembélé. Danny Rose hefur verið lengi frá en á einhvern möguleika í þennan leik. Þetta er lið sem vann 9 leiki í röð í deild áður en kom að West Ham leiknum og það er því ekki annað hægt að segja en þeir séu sigurstranglegri í þessum leik.

Það fer þó mjög eftir því hvernig United og José Mourinho koma að þessum leik. Skv. fréttum þá ætlar Mourinho ekki að nýta þessa leiki til að æfa saman þá miðverði sem munu þurfa að spila úrslitaleikinn gegn Ajax, heldur fær Bailly að spila.

En þegar aðeins eru þrír dagar frá erfiðum Celta leik þá hljóta að verða einhverjar breytingar á liðinu, þó meiðslin setji strik í reikninginn og þetta er mitt skásta gisk.

1
De Gea
36
Darmian
12
Smalling
3
Bailly
25
Valencia
18
Carrick
21
Herrera
11
Martial
8
Mata
22
Mkhitaryan
10
Rooney

Fellaini er auðvitað í banni enn, ég vona að Rashford fái hvíld þó það þýði auðvitað að Wayne Rooney neyðist til að spila. Það væri ekkert leiðinlegt að sjá Axel Tuanzebe byrja í hægri bakverðinum en ég á ekki von á því, frekar að hann spili um næstu helgi.

Faðir Paul Pogba lést í gær eftir langvarandi veikindi og Pogba var ekki í hópnum sem fór til London. Mjög skiljanlegt og nauðsynlegt.

Það eina sem ég get sagt þegar ég horfi á þetta lið sem þyrfti í raun að hafa mun fleiri breytingar er að ég vona svo sannarlega við förum inn í næsta tímabil með stærri hóp og ekki síður að meiðsli verði jafn sjaldgæf allt tímabilið og þau voru.

En, fyrst eru það þrír deildarleikir sem þarf að klára, helst þannig að veiti liðinu kraft og sjálfstraust fyrir úrslitaleikinn, en ekki síður án meiðsla!

Djöflavarpið

Podkast Rauðu djöflanna – 35. þáttur

skrifaði þann | 3 ummæli

Maggi, Halldór og Björn Friðgeir settust niður og ræddu seinni leikinn gegn Celta Vigo. Einnig ræddum við José Mourinho og lauslega um leikina framundan.

Hægt er að hlusta á þáttinn í spilaranum hér fyrir ofan auk þess sem hægt er að hala honum niður í gegnum spilarann eða hér að neðan. Jafnframt má gerast áskrifandi að þættinum í gegnum ýmis podkast-forrit:

Gerast áskrifandi í iTunes
Gerast áskrifandi í öðrum forritum

MP3 niðurhal: 35.þáttur

Evrópudeildin

Manchester United 1:1 Celta Vigo

skrifaði þann | 18 ummæli

Manchester United fer í úrslitaleik Evrópudeildarinnar. Tæpt var það, skrautlegt og dramatískt en það hafðist! Mótherjinn í Stokkhólmi verður Ajax frá Amsterdam sem tapaði fyrir Lyon í kvöld en vann viðureignina samanlagt 5-4.

 

Byrjunarliðið hjá Manchester United í kvöld var:

20
Romero
36
Darmian
17
Blind
3
Bailly
25
Valencia
6
Pogba
21
Herrera
27
Fellaini
22
Mkhitaryan
19
Rashford
14
Lingard

Varamenn:

De Gea, Jones, Smalling (89′), Carrick (77′), Mata, Martial, Rooney (86′).

Liðið hjá Celta Vigo var þannig skipað:

1
Álvarez
19
Jonny
24
Roncaglia
22
Cabral
2
Mallo
8
Hernández
6
Radoja
11
Sisto
18
Wass
10
Aspas
9
Guidetti

Bekkur: Villar, Fontas, Diaz, Bongonda, Beauvue, Jozabed, Gomez.

Leikurinn

Celta Vigo mætti mun sterkar til leiks en Manchester United. Þeir reyndu mikið að sækja upp hægri kantinn og fundu þar fyrir taugaveiklaða Blind og Darmian. Sérstaklega var Aspas hættulegur strax í byrjun.

Eftir rétt um 10 mínútna leik kom Paul Pogba með magnaða takta á miðjunni þegar hann hélt boltanum á loftinni og trukkaði í gegnum alla miðju Celta eins og hún væri ekki þarna. Í kjölfarið stakk hann fallegum bolta innfyrir á Rashford sem náði skoti sem Álvarez í marki Celta varði vel.

Það var eins og þetta eina atvik sneri leiknum. Manchester United tók öll völdin á vellinum og spilaði af krafti og sjálfstrausti á meðan leikmenn Celta Vigo virkuðu óstyrkir. Þessi góði kafli náði hámarki þegar Rashford sendi gull af fyrirgjöf beint á kollinn á Fellaini sem lúrði á fjærstönginni og skallaði boltann í markið. Frábært mark og vel gert hjá Rashford og Fellaini. Eftir þetta vildi maður sjá liðið láta kné fylgja kviði og byggja ofan á þessa sterku frammistöðu.

En í staðinn gerðist það sem við höfum svo oft séð í vetur, Manchester United hélt aðeins áfram af krafti, Lingard átti m.a. flotta háa sendingu inn fyrir vörn Vigo á Mkhitaryan sem skaut hátt yfir, en eftir smá stund missti liðið dampinn og Celta Vigo komst meira og meira inn í leikinn.

Blind virkaði gríðarlega óöruggur í leiknum og fékk klaufalegt spjald eftir hálftíma. Þá mátti greinilega sjá að Mourinho var orðinn verulega pirraður á spilamennskunni. Celta Vigo átti svo restina af hálfleiknum og fengu meðal annars prýðis skallatækifæri í lokin sem fór sem betur fer framhjá.

Seinni hálfleikur byrjaði ekkert betur. Aspas og hægri bakvörðurinn Mallo héldu áfram að hrella vörn United, Mallo komst upp að endamörkum og átti þrusufyrirgjöf sem Romero þurfti að gera mjög vel í að verja í burtu.

Í raun átti Celta Vigo allan seinni hálfleikinn. Liðið fékk sín færi til að gera eitthvað, boltar sem fóru framhjá úr ágætis færum eða Romero gerði vel í að verja. Manchester United virkaði áfram stressað, átti erfitt með að halda boltanum og spila en varðist samt heldur engan veginn nógu vel. Bailly var reyndar góður og þurfti oft að dekka fyrir Blind sem átti slæman dag.

Þegar United vann boltann og reyndi að sækja gekk það oft illa vegna þess hve fáir leikmenn tóku þátt í skyndisóknunum. Mkhitaryan stóð sig kannski ágætlega í að bera boltann upp en hafði svo engan til að gefa á og þurfti að hægja á sér og bíða eftir einhverjum. Marcus Rashford var langbesti leikmaður Manchester United sóknarlega og skapaði besta tækifæri United í seinni hálfleik upp á eigin spýtur þegar hann sólaði tvo varnarmenn Celta glæsilega og komst einn gegn Álvarez markmanni en hann átti annan góðan dag í markinu og varði vel.

Bæði miðað við sögu tímabilsins og spilamennskuna í þessum leik þá hefur það líklega ekki komið mörgum stuðningsmönnum Manchester United á óvart þegar Celta Vigo jafnaði. Það gerðist á 85. mínútu og var alltof einfalt. Celta tók h0rnspyrnu upp kantinn, þar kom fyrirgjöf, skalli og mark. Gegn liði sem skorar nokkuð stóran hluta af sínum mörkum eftir föst leikatriði er ekki góð hugmynd að skilja miðvörðinn þeirra eftir svona frían.

Í kjölfarið upphófst mikill hasar. Wayne Rooney kom strax inn á og það var varla búið að klára að endursýna markið þegar allt virtist ætla að leysast upp í heljarinnar slagsmál. Í kjölfarið á þeim fengu Eric Bailly og markaskorarinn frá Celta, miðvörðurinn Facundo Roncaglia, báðir rautt spjald. Í endursýningum mátti sjá að eftir leikbrot lenti nokkrum leikmönnum saman þar sem þeir rifust. John Guidetti sagði greinilega eitthvað miður fallegt því bæði Eric Bailly og Antonio Valencia brjáluðust á sama augnabliki og fóru í Guidetti. Bailly kom aðeins við hann en Valencia hrinti honum og Svíinn henti sér niður. Í kjölfar þess kom Roncaglia og lagði hendur á Bailly.

Þetta er ekki gott. Besti varnarmaður Manchester United í banni í úrslitaleiknum. Væri fróðlegt að vita hvað hinn arfaleiðinlegi Guidetti sagði við Bailly og Valencia til að kalla fram svona sterk viðbrögð en þetta var sannarlega ekki til fyrirmyndar hjá þeim.

Sex mínútur af uppbótartíma voru lengi að líða. Herrera skoraði mark en það var réttilega dæmt af vegna þess að Pogba braut af sér í aðdraganda marksins. Celta Vigo fékk svo dauðafæri til að skora sigurmark með síðustu snertingu leiksins en Guidetti klúðraði því, sem var afskaplega skemmtilegt að sjá eftir það sem á undan gekk.

Fjúkk!

Kallið mig bara Pollýönnu en ég get tekið nokkra mjög bjarta punkta úr þessum leik:

  • Manchester United er að fara í úrslitaleikinn í Evrópudeildinni!
  • Minn maður, Marouane Fellaini, skoraði markið sem kom liðinu þangað. Þetta er reyndar ekkert nýtt fyrir hann. Hann hefur nú skorað í undanúrslitum deildarbikarsins, FA bikarsins og Evrópudeildarinnar fyrir Manchester United. Hann hefur líka tekið þátt í 3 úrslitaleikjum með Manchester United og unnið þá alla. Hann á fjóra leiki á hlutlausum velli fyrir United, allt sigrar. Hann skoraði í kvöld 100. mark Manchester United á tímabilinu og það var bara ansi vel gert.
  • Marcus bloody Rashford. Hvílíkir hæfileikar, hvílíkt efni! Það sem þessi gutti getur orðið góður fótboltamaður.
  • Sergio Romero gat ekkert gert í markinu en var þess utan traustur og varði jafnvel mjög vel. Það eru ekki mörg lið í heiminum sem eiga betri varamarkmann. Fær hann að spila úrslitaleikinn líka?
  • Eric Bailly var frábær fyrir utan rauða spjaldið.
  • Það er alveg ákveðinn karakter og seigla í að klára þetta þó. Að spila heilt yfir illa en ná þessu samt. Auðvitað er það ekkert nóg fyrir lið eins og Manchester United en það er þó eitthvað, sérstaklega ef það er hægt að byggja ofan á það. En algjörlega gagnslaust til lengdar ef það er ekkert annað að frétta.

En það má alveg taka marga neikvæða punkta úr leiknum líka.

  • Liðið spilar enn of varfærnislega. Það var allt undir í þessum leik. Var liðið of stressað þess vegna? Maður gæti trúað því ef þetta hefði ekki gerst of oft í vetur.
  • Mér fannst Paul Pogba alveg eiga fínan leik. En hann sýndi það þarna snemma í fyrri hálfleik að hann getur tekið leikinn í sínar hendur og gert eitthvað sem breytir leiknum. Hann getur smitað út frá sér og leitt liðið í átt að betri spilamennsku. Ég vil sjá hann gera meira af því. Stundum beinlínis verður hann að gera það. Auðvitað getur hann ekkert gert þetta einn. En það var ástæða fyrir því að Manchester United eyddi svona miklum pening í hann, hann getur þetta.
  • Ég fíla Blind en maður minn sem hann var stressaður í kvöld. Tveir bestu miðverðir liðsins verða ekki með í úrslitaleiknum, hvernig á Mourinho að leysa úr því?
  • Spilamennskan verður að batna. Liðið verður að geta haldið boltanum og spilað honum. Verður að geta leyst úr stöðum og tekið yfir leiki. Það bara þarf að gerast.

Að því sögðu þá er um að gera að fara að peppa sig í úrslitaleikinn. Þetta lið hjá Ajax er gríðarspennandi og það þarf að spila vel til að sigra það. Liðið hefur nú 13 daga til að finna taktískar lausnir, æfa og mótivera sig fyrir þennan leik.

Evrópudeildin

Celta Vigo kemur í heimsókn

skrifaði þann | 1 ummæli

Núna eru í raun bara tveir fótboltaleikir eftir af tímabilinu hjá Manchester United. Þeir eru báðir í Evrópudeildinni. Sá fyrri þeirra er annað kvöld, seinni leikurinn í undanúrslitaviðureigninni gegn spænska liðinu Celta Vigo. Þann leik verður Manchester United að klára til að komast í hinn leikinn, sjálfan úrslitaleikinn í Friends Arena í Stokkhólmi, miðvikudaginn 24. maí næstkomandi. Tímabilið stendur nú og fellur með þessum tveimur leikjum, það er allt undir.

Leikurinn á morgun fer fram á Old Trafford og hefst klukkan 19:05, að íslenskum tíma.

Allt eða ekkert

Manchester United á reyndar eftir þrjá leiki í ensku úrvalsdeildinni. Í raun eru þeir harla merkingalausir, má bara líta á þá sem vaktir sem liðið þarf að skila af sér. Manchester United tapaði síðasta deildarleik, það var fyrsta tapið í deildinni síðan í október. Samt hefur deildin valdið miklum vonbrigðum í vetur. Það voru miklar væntingar fyrir tímabilið. Fullmiklar, kom síðar í ljós. En við viljum meira, það hlýtur að vera eðlilegt að stefna á toppinn miðað við hvaða félag þetta er, miðað við hversu miklu hefur verið eytt í leikmenn, miðað við að Mourinho er í brúnni.

Það er hægt að taka sitthvað jákvætt út úr leik liðsins í vetur, jafnvel þótt liðið hafi oft verið þjakað af svipuðu andleysi og hefur einkennt það að miklu leyti eftir að Ferguson hætti. Vörnin virðist vera að batna og sóknarleikurinn mjakast í rétta átt. Sóknarleikurinn hefur heilt yfir ekki verið góður en þó betri en hjá van Gaal hvað færasköpun og markaskorun varðar. En við viljum meira.

Leikurinn gegn Celta Vigo er mikilvægasti leikur tímabilsins. Samt ekki alveg, mikilvægasti leikur tímabilsins fer fram í Stokkhólmi 24. maí. Sá leikur mun skipta öllu máli upp á það hvernig við dæmum þetta tímabil. Hann mun skipta gríðarlega miklu máli upp á það að komast í Meistaradeildina á næsta tímabili. Það að komast í Meistaradeildina getur skipt afskaplega miklu máli upp á að vera í margfalt betri stöðu til að geta keypt þá leikmenn sem félagið vill og þarf til að halda enn áfram að bæta sig. Við viljum sjá Manchester United í keppni þeirra bestu, aðeins þannig getur liðið orðið það besta aftur. Næsta skref í þá átt er að klára Celta Vigo.

Deildin er farin, Evrópudeildin er málið. Við viljum meira. Við viljum titil!

Góð staða fyrir seinni leikinn, en…

Fyrri leikurinn var góður að því leyti að Manchester United var miklu sterkara liðið, Celta Vigo virkaði aldrei mjög nálægt því að skora eða setja almennilega pressu á United og Manchester United vann leikinn. Þetta var ekkert glimrandi frammistaða en þó á flestan hátt traust. Og sigurmarkið var frábært hjá Rashford.

United gæti verið í ívið betri stöðu ef 2 frábær færi í fyrri leiknum hefðu nýst en þetta er samt sem áður mjög góð staða. Að hafa unnið fyrri leikinn á útivelli og eiga seinni leikinn eftir á Old Trafford. Þrátt fyrir allt og allt þá ættum við bara að vera mjög bjartsýn á þetta. Hér eru nokkrir punktar um það af hverju:

  • Manchester United hefur unnið alla 6 heimaleikina í Evrópudeildinni á tímabilinu, með markatöluna 15-2. Vissulega þurfti framlengingu til í síðasta leik en sigur hafðist þó að lokum, verðskuldaður sigur.
  • Manchester United hefur ekki tapað Evrópuleik á Old Trafford síðan 5. mars 2013. Og þá var það José Mourinho sem kom með Real Madrid og náði sigri. Manchester United hefur spilað 17 Evrópuleiki á Old Trafford síðan þá án þess að tapa.
  • Liðinu nægir jafntefli. Basic 1-1 jafntefli væri nóg. Ekki að við viljum sjá það, við viljum auðvitað sjá sigur. Held að bæði Mourinho og leikmennirnir séu á sama máli.
  • Manchester United á alltaf að vera töluvert betra en þetta Celta Vigo lið.

En! Það borgar sig svo sannarlega ekki að vanmeta þetta spænska lið og þaðan af síður myndi það boða gott að mæta af værukærð inn í þennan mikilvæga leik. Celta Vigo er komið þetta langt í keppninni og það er engin tilviljun.

Það er langt síðan Celta Vigo gaf deildina upp á bátinn, enda er liðið bara í þægilegu miðjumoði og hefur aldrei verið líklegt til að blanda sér í baráttu á öðrum hvorum enda deildarinnar. Það þýðir að félagið hefur getað leyft sér að hvíla menn grimmt fyrir þessa einu keppni. Þannig voru gerðar 9 breytingar á liðinu fyrir deildarleik á sunnudaginn, markmaður og einn útispilari héldu sínum stöðum á meðan aðrir hvíldu og peppuðu sig fyrir ferðina á Old Trafford. Þetta er það eina sem þeir hugsuðu um. Tapið í deildinni skipti þá engu máli.

Celta Vigo hefur líka verið í þessari stöðu áður á tímabilinu. Í 32-liða úrslitum tapaði Celta Vigo fyrri leiknum gegn Shakhtar Donetsk á sínum eigin heimavelli, 0-1. Í seinni leiknum stefndi allt í að Donetsk myndi rúlla sér í gegnum þetta á 0-0 jafntefli þegar Iago Aspas skoraði í uppbótartíma og leikurinn fór í framlengingu. Þar bætti Celta Vigo við öðru marki og sigraði þar með í einvíginu.

En við hljótum nú að gera ráð fyrir því að Manchester United sé betra lið en Shakhtar Donetsk. Og Celta Vigo.

Leikmenn Shakhtar hafa líklega einnig haldið að þeir væru með töluvert betra lið en Spánverjarnir, þeir höfðu jú unnið sinn riðil sannfærandi með fullu húsi stiga og 21 mark skorað í 6 leikjum.

Svo verður líka að taka með í reikninginn að Celta Vigo hefur náð flottum úrslitum í vetur gegn liðum sem standa Manchester United alveg örugglega mun framar þessa dagana. Celta Vigo vann Barcelona 4-3 á heimavelli. Vigo fór líka til Madrid og lagði Real Madrid á útivelli í spænska bikarnum, 2-1. Og það var ekkert varalið sem Real Madrid tefldi fram í þeim leik.

Seinni leikurinn gegn Hull í undanúrslitum deildarbikarsins er líka ákveðið víti til varnaðar fyrir leikmenn Manchester United. Eftir að Fellaini tryggði 2-0 sigur í fyrri leiknum með frábæru skallamarki var eins og liðið héldi að það kæmist upp með að spila varla seinni leikinn. Á meðan leikmenn Hull höfðu engu að tapa og mættu grimmir í þann leik. Að lokum þurfti Manchester United að hanga á 1-2 tapi en það stóð alltof tæpt miðað við getumuninn á liðunum. Þann leik þurfa leikmenn að hafa í huga fyrir þennan leik gegn Celta, staðan er góð en það er alveg hægt að klúðra þessu samt ef hugarfarið er ekki rétt.

Við hverju má búast?

Það hlýtur að vera hægt að búast við að leikmenn beggja liða mæti vel stemmdir í þennan leik. Tímabilið er í raun búið hjá því liði sem tapar þessu einvígi. Það er ekkert annað undir neins staðar.

Það var æfing hjá Manchester United í morgun. Þar gátu allir tekið þátt fyrir utan Ibrahimovic, Rojo, Shaw, Fosu-Mensah og Young. Það er helst Young sem maður bjóst við að gæti mögulega náð þessu en það er ekkert víst að hann hefði endilega spilað fyrir það. Herrera fékk högg gegn Arsenal en virðist vera búinn að jafna sig. Valencia var búinn að virka þreyttur en fékk kærkomna hvíld í síðasta leik.

Ég myndi telja að liðið yrði nokkuð svipað og í fyrri leiknum:

20
Romero
36
Darmian
17
Blind
3
Bailly
25
Valencia
6
Pogba
21
Herrera
27
Fellaini
22
Mkhitaryan
19
Rashford
14
Lingard

Ef ég ætti að benda á líklegustu breytinguna þá gæti ég trúað að Mata dytti inn fyrir Mkhitaryan, hann myndi þá líklega víxla köntum við Lingard.

Romero hefur heilt yfir verið traustur í þessari keppni og ég reikna með að hann klári allavega þessa viðureign. En það verður virkilega áhugavert að sjá hvað Mourinho gerir fari svo að liðið komist í úrslitaleikinn. Er verjandi að spila úrslitaleik í Evrópukeppni og spila ekki besta markmanninum þínum? Er sanngjarnt að kippa markmanni sem hefur verið solid alla keppnina úr liðinu þegar kemur að úrslitaleiknum?

Ég hugsa að Celta Vigo stilli líka upp sama eða svipuðu liði og síðast:

1
Álvarez
19
Jonny
24
Roncaglia
22
Cabral
2
Mallo
8
Hernández
6
Radoja
11
Sisto
18
Wass
10
Aspas
9
Guidetti

Iago Aspas er þeirra hættulegasti leikmaður. Hann er markahæsti leikmaður liðsins bæði í deildinni og Evrópudeildinni. Það er því mikilvægt að passa vel upp á hann. Fremsti leikmaðurinn verður líklega hinn sænski John Guidetti, hann er kominn með 4 mörk í Evrópudeildinni í vetur.

Síðan þarf að passa föstu leikatriðin, leikmenn Celta Vigo geta verið hættulegir í þeim. 22% marka liðsins hafa komið upp úr föstum leikatriðum. Til samanburðar hafa 14% af mörkum Manchester United komið eftir föst leikatriði.

Að lokum

Þessi leikur gegn Celta Vigo er ekki það eina sem á hug okkar Manchester United stuðningsmanna í dag. Í morgun var nýja útivallartreyjan fyrir næsta tímabil opinberuð formlega. Reyndar kom útlitið ekki mikið á óvart eftir að myndir af treyjunni höfðu lekið út en flott er hún. Vísar í 25 ára gamla treyju sem mörgum þykir með flottari útivallartreyjum sem United hefur átt, auk þess sem sú treyja kom fram á ákveðnum tímamótum hjá Manchester United þegar gríðarlega efnileg kynslóð var að mæta til leiks og ævintýralega góður árangur var rétt handan við hornið. Það er því vonandi að þeir leikmenn sem halda áfram hjá félaginu, í bland við þá góðu leikmenn sem bætast við hópinn í sumar, muni nýta sér þessa öflugu treyju sem innblástur til sigurs.