Rauðu djöflarnir

Enska úrvalsdeildin

Arsenal 2:0 Manchester United

skrifaði þann | 18 ummæli

Það kom loksins að því. Manchester United tapaði knattspyrnuleik í deildinni. Enn og aftur er það í London en liðið hefur tapað þar fyrir Chelsea í bæði deild og bikar í ár.

Ofan á allt saman þá var þetta fyrsta tap Mourinho fyrir Wenger á ferlinum. Wenger getur því sest sásttur í helgan stein eftir tímabilið.

Það kom fáum á óvart að Mourinho gerði mikið af breytingum, átta talsins, fyrir leikinn. Hann hafði gefið út eftir jafnteflið við Swansea City síðustu helgi að öll einbeiting liðsins væri nú á Evrópudeildinni. Wayne Rooney kom því inn í liðið ásamt meiðslapésunum Chris Smalling og Phil Jones. Síðan byrjaði Axel Tuanzebe sinn fyrsta leik fyrir félagið en hann lék í stöðu hægri bakvarðar þó hann sé hafsent að upplagi.

Eric Bailly fékk verðskuldað frí en Chris Smalling og Phil Jones eru báðir komnir úr meiðslum. Svo byrjaði Axel Tuanzebe sinn fyrsta leik fyrir Manchester United. Þó hann sé að upplagi hafsent þá var hann í stöðu hægri bakvarðar í dag. Byrjunarliðið var eftir farandi.

1
De Gea
36
Darmian
12
Smalling
4
Jones
38
Tuanzebe
16
Carrick
21
Herrera
22
Mkhitaryan
10
Rooney
8
Mata
11
Martial

Varamannabekkur: Sergio Romero, Eric Bailly, Daley Blind, Paul Pogba, Jesse Lingard, Scott McTominay og Marcus Rashford.

Arsenal stillir upp í 3-4-3 leikkerfi: Cech. Holding-Koscielny-Monreal. Oxlade-Chamberlain-Ramsey-Xhaka-Gibbs. Özil-Welbeck-Sanchez.

Fyrri hálfleikur

Það var nokkuð ljóst að United ætlaði að liggja til baka og nýta hraðann í Anthony Martial og sækja hratt á Arsenal. Gekk það ágætlega til að byrja með en Arsenal tóku völdin hægt og rólega.

Varnarlega voru United fínir en þeir leyfðu Arsenal að ýta sér alltof neðarlega og voru Henrikh Mkhitaryan og Juan Mata nánast orðnir bakverðir þegar þeir eltu vængbakverði Arsenal á meðan Tuanzebe og Matteo Darmian eltu Alexis Sanchez og Mesut Özil eins og skugginn. Ander Herrera hljóp svo á við þrjá leikmenn inn á miðjunni, N’Golo Kante hver segi ég nú bara.

Embed from Getty Images

Annars var hálfleikurinn ekki mjög mikið fyrir augað. Liðin voru svipað mikið með boltann þó manni hafi liðið eins og Arsenal væri miklu meira með hann. Wayne Rooney og Martial fengu bestu færi United en Petr Cech varði vel. Hinum megin varði David De Gea frábærlega frá Aaron Ramsey en hann var ítrekað að hlaupa á blindu hliðina á vörnina hjá United en skapaði það mikinn usla.

Embed from Getty Images

Þrátt fyrir að vera með völdin þá nýtti Arsenal þau ekki í fyrri hálfleik og var staðan 0-0 í hálfleik.

Seinni hálfleikur

Arsenal refsaði United í síðari hálfleik fyrir að vera jafn aftarlega og raun bar vitni en Arsenal komst í 2-0 eftir 10 mínútur. Fyrst lét Granit Xhaka vaða af löngu færi, fór boltinn í bakið á Herrera og í stórum boga yfir De Gea. Strax í kjölfarið skoraði Danny Welbeck (auðvitað) með skalla eftir fyrirgjöf frá Chamberlain. Hvernig Smalling tókst að týna Welbeck í teignum er efni í lögreglurannsókn.

Embed from Getty Images

Mourinho brást við þessu með því að setja Jesse Lingard inn á fyrir Mkhitaryan. Stuttu síðar kom Marcus Rashford inn á fyrir Herrera. Liðið brást hins vegar engan veginn við og voru Arsenal menn mun líklegri til að bæta við heldur en United að jafna. Lokatölur 2-0.

Scott McTominay fékk þó sínar fyrstu mínútur fyrir félagið þegar lítið var eftir af leiknum. Mourinho getur allavega notað sömu afsökun og Van Gaal notaði, hann er að gefa ungum leikmönnum sénsinn … svona þannig séð allavega.

Punktar

  • Þessi lyktur var alltof æfingaleiks-legur. Það virtist sem flestum væri í raun skítsama hvernig leikurinn færi. Ætli Mourinho hafi ekki náð að sannfæra hópinn um Celta Vigo leikurinn væri aðalatriðið.
  • Eftir að hafa lent 2-0 undir þá sýndi United engan vilja til að komast aftur inn í leikinn.
  • Nú þegar liðið hefur loksins tapað þá er kannski hægt að fara í leiki til að vinna þá frekar en til að ná jafntefli.
  • Föstu leikatriði Manchester United eru gjörsamlega skelfileg. Þau ógna mótherjanum lítið sem ekki neitt og í dag fengu Arsenal um það bil 100 skyndisóknir í kjölfarið á hornspyrnum United. Vel þreytt að horfa á þetta.
  • Wayne Rooney og Michal Carrick sem tveir af þremur miðjumönnum er eitthvað sem er ekki líklegt til árangurs. Hraðinn er enginn enda var Herrera að hlaupa á við þrjá stóran hluta leiksins.
  • Axel Tuanzebe leit vel út þó liðið hafi verið lélegt. Vonandi að hann fái fleiri mínútur í næstu leikjum og mögulega í hafsent en hann hefur lítið sem ekkert spilað hægri bakvörð.
  • United hefur ekki skorað mark á útivelli gegn Arsenal, Liverpool né Chelsea. Þetta er eitthvað sem Mourinho þarf að laga en ef til vill stillir hann liðunum sínum aðeins of varnarsinnað upp á útivelli.

 

 

Enska úrvalsdeildin

United mætir Arsenal á Emirates Stadium

skrifaði þann | 4 ummæli

Á morgun, heilum sextíu og sex klukkutímum eftir fimmtudagsleikinn gegn Celta Vigo, heimsækja leikmenn Manchester United Emirates Stadium og mæta þar liði Arsene Wenger í Arsenal.
Leikurinn hefst klukkan 15:00 að íslenskum tíma og verður fyrri leikur dagsins viðureign Southampton og Liverpool sem situr í þriðja sæti með fjórum stigum meira en United en hafa spilað einum leik meira.

Það er orðið ansi langt síðan lesendur síðunnar hafa heyrt í félaga mínum og (fyrir eldri lesendur síðunnar) góðkunningja síðunnar, sem gengur undir nafninu „Spaki maðurinn“. Ástæðan ku vera vegna annríkis í vinnu- og foreldraheimunum sem virðist koma fyrir fólk á hans aldri. En í þetta skiptið náði ég að fá hann til að líta aðeins upp frá tölvuskjánum sínum og yfir á minn til þess að skrifa örfá orð fyrir okkur.

Vithát förþer adú…

Mat á tímabilinu

Sæl og blessuð öllsömul!

Í dag langar mig aðeins að ræða þetta tímabil, okkar væntingar og árangur.

Hefjum þetta á einni spurningu. Spyrjið ykkur, hvert er ykkar mat og tilfinning á árangri liðsins á þessu tímabili? Góður, slæmur, mehh? Eru þið kannski enn óákveðin?

Ef töfraandi í lampa hefði í ágúst boðið ykkur það að á þessu tímabili næði Mourinho einungis að komast í meistaradeildina, hefðuð þið tekið því? Hvað með að vinna einn bikar og komast í meistaradeildina? Hvað með tvo bikara, annan þeirra sem United hefur aldrei unnið, plús meistaradeildina? Ég persónulega hefði sagt já við öllum þrem valmöguleikunum en svo kæmi maður með hærri kröfur fyrir næsta tímabil.

Á þessu tímabili er Mourinho og leikmenn hans búnir að koma sér í þá stöðu að vera ansi nálægt því að láta síðasta valmöguleikann verða að veruleika. Að mínu mati væri það alveg stórkostlegur árangur og með góðum kaupum í sumar kæmi liðið alveg nautsterkt inn í næsta tímabil með ársreynslu af Mourinho við stjórnvölin.

Ég held við séum öllsömul sammála hver helstu vonbrigði tímabilsins hafa verið. Þessi ótalmörgu jafntefli og afspyrnuslæma nýting á færum hafa fengið orsakað ansi mörg pirringsköst og hafa hárin á kollinum fækka í kjölfarið. 58 leikir, 35 sigrar, 16 jafntefli, sjö tapleikir og 60% vinningshlutfall. Síðustu þrjú ár, undir stjórn Moyes og Van Gaal, var vinningshlutfallið 52%.

Maður er algjörlega búinn að missa töluna á því hversu oft maður hefur hugsað „hvað ef við hefðum nýtt þessi dauðafæri“ í vetur. Það sló mig samt örlítið í dag þegar ég sá þá staðreynd að þrátt fyrir að hafa klikkað á svo mörgum dauðafærum þá verður næsta mark sem United skorar það hundraðasta í röðinni. (Frábært, þar bættist við önnur „hvað ef“ pæling).

Það jákvæða nefnilega við vonbrigði liðsins á þessu tímabili er það að þau sýna samt merki um að gott sé í vændum. Við erum að skapa gífurlega mikið af færum (erum bara ekki að ná að slútta mörgum þeirra), erum að spila oft á tíðum alveg glettilega flottan fótbolta (erum þó aðeins of háðir Pogba) erum með marga frábæra leikmenn í ýmsum stöðum (sem mun fjölga í sumar) og fyrir leikinn gegn Arsenal er United taplaust í síðustu 25 leikjum (en næstum helmingur þeirra leikja endaði í jafntefli). Þannig lítur árangur United út þessa stundina.

Við erum því ansi nálægt því að verða aftur topplið í líkingu við það sem við flest vorum orðin góðu vön síðustu tvo áratugi.

Sumsé:

  • góð kaup á leikmönnum √
  • nota unga leikmenn √
  • betri spilamennska √
  • hærra sigurhlutfall √
  • bikar √
  • Evrópubikar ?
  • Meistaradeild ?

Ef liðið nær hinsvegar ekki meistaradeildarsæti, þá tel ég þetta tímabil hafa verið vonbrigði þrátt fyrir marga ljósa punkta. En ímyndið ykkur ef við náum að uppfylla allt sem þið sjáið á þessum lista ásamt því að styrkja liðið í sumar á jafn góða vegu og var gert fyrir ári síðan. Er þá ekki óhætt að segja að Mourinho sé á réttri leið með liðið?

Eru þið ekki spennt fyrir því sem er í vændum?
Ég er það.

Kv,
Spaki Maðurinn

Leikurinn

Nú skuluð þið draga nokkrum sinnum inn djúpt andann og átta ykkur á þeirri staðreynd að deildin er ekki lengur í forgangi. Þið getið alveg gleymt því að ná topp 4 á þessu tímabili nema eitthvað stórkostlegt gerist hjá Liverpool og City. Jafnteflið gegn Swansea um síðustu helgi var það sem endanlega drap þá baráttu og þannig er staðan í dag. Semsagt, deildarleikir eru núna einfaldlega tilneyddir vinnudagar fyrir leikmennina.

Allt byssupúður er núna réttilega nýtt í Evrópudeildina þar sem við eigum mesta möguleika til að komast í meistaradeildina. Við getum því átt von á ansi mörgum breytingum á byrjunarliðinu í þessum leik til að hvíla lykilmenn liðsins fyrir seinni leikinn gegn Celta Vigo næstkomandi fimmtudag. Enda grínaðist Mourinho á fréttamannafundinum fyrir leikinn að Wenger yrði í fyrsta skipti ánægður að sjá sig. Wenger vonast til að vinna sinn fyrsta sigur gegn Mourinho í sextándu viðureign kappanna

Embed from Getty Images

Mourinho staðfesti þó að De Gea muni spila, sem kemur kannski ekki svo mikið á óvart þar sem Romero hefur verið aðalmarkmaður liðsins í Evrópukeppninni. Fellaini verður pottþétt ekki með þar sem hann er ennþá í banni eftir rauða spjaldið sem hann fékk í deildarleiknum gegn Manchester City. Ashley Young verður að teljast ólíklegur eftir að hafa haltrað af velli á fimmtudag. Svo að sjálfsögðu eru Zlatan, Rojo og Shaw frá.

Hinsvegar eru ansi góðar líkur á að leikmenn eins og Phil Jones, Chris Smalling, Juan Mata, Michael Carrick, Anthony Martial og Wayne Rooney muni spila. Verður að segjast að það er frábært að fá Jones, Smalling og Mata aftur í liðið. Hreint útsagt gríðarlega mikilvæg tímasetning og fær þá Bailly vonandi smá hvíld eftir að hafa spilað hátt í 1000 mínútur samfleytt fyrir liðið.

Það er því gríðarlega erfitt að spá eitthvað fyrir um byrjunarliðið og því slembi ég hingað liði sem er algjört gisk en þykir líklegt að sjá á morgun. Innst inni vona ég samt að Tuanzebe fái sjens.

De Gea
Darmian
Blind
Smalling
Jones
Pogba
Carrick
Herrera
Martial
Rooney
Mata
Evrópudeildin

Celta de Vigo 0:1 Manchester United

skrifaði þann | 11 ummæli

Liðið var ekki eins og ég spáði í gær, en það var samt nákvæmlega ekkert sem kom á óvart. Að Fellaini og Lingard sé treyst í stórleik er nákvæmlega það sem við var að búast, Jones var ekki nógu góður til að fara á bekkinn og það er of mikið að hafa báða miðverðina nýstigna upp úr meiðslum.

20
S.Romero
36
Darmian
17
Blind
3
Bailly
25
Valencia
27
Fellaini
21
Herrera
14
Lingard
6
Pogba
22
Mkhitaryan
19
Rashford

Varamenn: De Gea, Smalling, Young, Carrick, Mata, Martial, Rooney

Celta de Vigo spilaði enda 4-3-3 og þétt miðja var það sem sú leikaðferð kallaði á frá United.

1
Álvarez
19
Jonny
Rongaglia
22
Cabral
2
H Mallo
8
Hernández
6
Radoja
18
Wass
11
Sisto
9
Guidetti
10
I Aspas

United byrjaði leikinn enda betur en úr fyrstu sókn Celta á elleftu mínútu kom dauðafæri, sending inn á teiginn fann Wass en skalli hans fór langt framhjá fjær. Virkilega hættulegt og að sama skapi slakt hjá Wass.

Á 17. mínútu kom Paul Pogba með frábært hlaup upp allan völlinn sem varð ekki stoppað fyrr en varnarmaður tökk í veg fyrir hann, einhverra hluta vegna dæmdi dómarinn ekkert, leit svo á að þetta væri ruðningur. En gaman að sjá svona rispur frá Pogba sem sýna vel hversu góður hann er.

Rashford hafði verið mjög frískur í leiknum, var að mestu á vinstri kantinum og stundum á þeim hægri. Hann átti frábært skot frá vinstri um miðjan hálfleikinn sem Álvares þurfti að verja frábærlega í horn.

Annars var leikurinn mjög mikið miðjubarátta, Jesse Lingard hefði kannske mátt gera betur þegar fyrirgjöf Rashford fór gegnum varnarmann en var ekki alveg viðbúinn og náði ekki almennilegu skoti næstum frír á markteig. Snerting varnarmannsins var þarna nóg til að bjarga marki. United var þannig að ógna meira og Pogba átti síðan frábæra sendingu inn á Mkhitaryan sem tók ágætt skot, en Álvarez tókst að verja vel. Það var búið að skjóta Álvarez í gott stuð og næsta varsla frá honum var litlu verri en hinar, Lingard var kominn inn fyrir, en náði ekki að koma boltanum framhjá spænska markverðinum.

Fyrri hálfleikur var þannig góður fyrir United hvað spil og færi varðaði en ekki í fyrsta skipti í vetur var færanýtingin afspyrnuslök.

Fyrsti hluti seinni hálfleiks var frekar jafn, Iago Aspas átti einn skalla framhjá sem var ekki mjög hættulegur. Öllu hættulegra var lúmskt skot Pione Sisto sem var á leið undir slána ef Romero hefði ekki náð að koma fingurgómunum í boltann og ýta honum yfir.

En það var United sem braut ísinn. Marcus Rashford reyndi að stinga sér milli tveggja varnarmanna en þeir bjuggu til mjög snyrtilega samloku úr honum. Dómarinn dæmdi loksins á Celta og úr aukaspyrnunni rétt utan teighorns hægra megin sveiflaði Rashford boltanum frábærlega í markið fjær. Glæsilegt mark!

Celta hefði átt að jafna örskömmu síðar en þegar Aspas fékk boltann utarlega í teignum þá ákvað hann að reyna ekki markskot heldur gaf aftur inn að miðjum teig og þar var hreinsað. Stórhættulegt færi en illa nýtt. Lingard átti síðan þrumuskot úr nokkuð opnu færi í teignum, rétt framhjá.

Fyrsta skiptingin kom á 78. mínútu, Ashley Young kom inná fyrir Mkhitaryan, og sú næsta mínútu síðar, Martial kom inná fyrir Rashford, sem fór haltrandi af velli.

United var með góð tök á leiknum, Sisto átti reyndar ágæta fyrirgjöf sem átti að fara á Guidetti en Eric Bailly setti hausinn í boltann og fékk spark frá Guidetti sem bónus. Bailly feykitraustur í leiknum eins og alltaf.

United var aðeins í því að tefja, Pogba fékk gult fyrir það. Young meiddist síðan og fór útaf á síðustu mí´nutu vengjulegs leiktíma, Chris Smalling kom inná.

Dómarinn bætti fimm mínútum við og United hélt auðveldlega út.

Mjög góður útisigur í höfn og nú höfum við ekki áhyggjur af því ef enn eitt jafnteflið á Old Trafford lítur dagsins ljós.

Þetta var sigur góðrar liðsheildar. Pogba stjórnaði miðjunni alveg og var líklega einna bestur. Rashford var gríðargrimmur frammi og skoraði frábært mark. Lingard var eins og oft áður mjög vinnusamur og hefði svo sem átt að skora eitt mark en það munaði ekki miklu. Eric Bailly var svo kóngur í vörninni.

Evrópudeildin

Undanúrslit Evrópudeildarinnar á morgun

skrifaði þann | 6 ummæli

Lið Manchester United er komið til Spánar og mun á morgun etja kappi við Celta Vigo í undanúrslitum Evrópudeildarinnar, sem eins og staðan er í dag virðist besta leið United að tryggja sér sæti í Meistaradeildinni á næsta ári.

Síðustu leikir hafa sýnt að José Mourinho er líklega á þessari skoðun og hefur stillt upp sterkara liði í Evrópudeildinni en deildinni. Meiðslahrinan undanfarið hefur hins vegar sett strik í reikninginn og gert honum erfitt fyrir. En fréttir hermdu að Smalling, Jones, Bailly og Pogba æfðu allir í morgun og Duncan Castles sem öðrum blaðamönnum fremur ku tengdur José segir að reiknað sé með Bailly og Pogba á morgun. Við stillum því upp liðinu svona

20
Romero
36
Darmian
12
Smalling
3
Bailly
25
Valencia
6
Pogba
21
Herrera
11
Martial
8
Mata
22
Mkhitaryan
19
Rashford

Það er kannske bratt að setja inn fjóra leikmenn nýkomna úr meiðslum en Mata æfði á vellinum eftir leikinn gegn Swansea og er því kominn lengra en hinir í að ná sér.  Luke Shaw verður reyndar frá út leiktíðina samkvæmt Mourinho þannig það eru ekki allt góðar fréttir.

Lið Celta Vigo hefur komið nokkuð á óvart í Evrópudeildinni. Þeir urðu í sjötta sæti í deildinni í fyrra en eru nú í 10. sæti enda hefur þátttaka þeirra í Evrópudeildinni tekið fókus þeirra. Liðið hefur til að mynda aðeins unnið einn leik af síðustu sex, tapað hinum fimm. Það má ekki síst rekja til þess að liðið hefur verið að hvíla lykilmenn, átta slíkir voru ekki í liðinu í 3-0 tapi fyrir Athletic Bilbao um síðustu helgi.

Liðið varð í öðru sæti í sínum riðli í Evrópudeildinni á eftir Ajax, en hefur síðan unnið Shakhtar Donetsk, FC Krasnodar og Genk, og voru á heimavelli í fyrri leik í öll skiptin.

Það er ekki hægt að segja að lið Celta sé skipað þekktum leikmönnum, þeirra bestur er Iago Aspas sem var herfilegt flopp hjá Liverpool, gekk litlu betur hjá Sevilla en er nú kominn til síns heimaliðs og er þeirra helsti markaskorari. Hann er markahæsti Spánverjinn í La Liga í vetur, með 17 mörk í 29 leikjum og fimm að auki í Evrópudeildarleikjum. John Guidetti, 25 ára Svíi er hinn senterinn þeirra og á miðjunni er Pione Sisto sem stóð sig vel á móti United með Midtjylland í fyrra og skoraði í báðum leikjum. Lykilmaður þeirra á miðjunni mun þó vera Daninn Daniel Wass.

Þjálfari Celta er Argentínumaðurinn Eduardo Berizzo. Hann er fyrrverandi aðstoðarmaður Marcelo Bielsa og er undir miklum áhrifum frá honum. Samkvæmt Berizzo ætlar hann að finna innblástur í sigri Athletic Bilbao á United árið 2012, og spila pressubolta, halda boltanum vel og gefa United leikmönnum hvergi frið, leikaðferð sem er vel kunnug þeim sem horft hafa á lið undir stjórn Bielsa. Þetta krefst mikils úthalds hjá leikmönnum, nokkuð sem hvíldin um helgina ætti að gera þeim auðveldara fyrir

Þessi leikur er sýnd veiði en ekki gefin. United liðið ætti undir flestum kringumstæðum að vera sterkara en við höfum séð nóg af leikjum í vetur til að vita að það skiptir ekki öllu máli

Leikurinn hefst kl 19:05 á morgun, fimmtudag.

Enska úrvalsdeildin

Manchester United 1:1 Swansea City

skrifaði þann | 41 ummæli

Jæja. Einn eitt jafnteflið á Old Trafford, það tíunda í deildinni í vetur. Þar sem leikurinn var álíka leiðinlegur og boccia mót eldri borgara þá verður skýrslan eftir því.

Liðið stillti sér í rauninni upp sjálft sökum meiðsla og leikbanna. Ofan á það meiddist Luke Shaw eftir 8 mínútur og Eric Bailly í síðari hálfleik, svona til að fara endanlega úr öskunni í eldinn.

1
De Gea
23
Shaw
17
Blind
3
Bailly
18
Young
16
Carrick
21
Herrera
11
Martial
10
Rooney
14
Lingard
19
Rashford

Varamannabekkur: Romero, Darmian, Tuanzebe, Mata, Mkhitaryan, Valencia, McTominay

Leikurinn

Það er ekki mikið um leikinn að segja. United menn voru í sama gír og gegn Manchester City nú fyrir nokkrum dögum. Það virðist sem allir leikmenn séu gjörsamlega búnir á því en uppspilið var gífurlega hægt, menn misstu boltann, áttu lélegar sendingar og gerðu mest lítið.

Á meðan voru Swansea mjög sprækir en það virtist sem að sigur þeirra í síðustu umferð hafi blásið lífi í liðið. Hafði liðið ekki unnið leik í fimm umferðum þar á undan. Þeir voru mjög sprækir og pressuðu United ítrekað. David De Gea þurfti að halda United í leiknum.

United skapaði sér einstaka færi en ekkert af viti. Það var svo í lok fyrri hálfleiks sem Marcus Rashford þaut inn í teig á eftir boltanum. Lukaz Fabianski kom á móti honum og Rashford fór niður. Að kalla þetta eitthvað annað en dýfu væri lygi svo við köllum þetta dýfu. Persónulega gat mér ekki verið meira sama.

Embed from Getty Images

Wayne Rooney fór á punktinn og skoraði úr vítinu. Þrátt fyrir að nánast allir leikmenn liðsins væru á afturfótunum þá var liðið 1-0 yfir í hálfleik. Anthony Martial var manna sprækastur en það kom lítið út úr honum.

Embed from Getty Images

Wayne Rooney hefði geta komið United í 2-0 í byrjun seinni hálfleiks en hann fékk boltann eftir að Ander Herrera hafði gefið til baka frá endalínunni. Rooney tókst hins vegar að lúðra í Martial sem var að reyna koma sér frá.

Síðari hálfleikurinn var svo alveg eins og fyrri hálfleikurinn. Mjög lítið fyrir augað. Þegar það voru svo nokkrar mínútur til leiksloka ákvað Rooney að brjóta einstaklega heimskulega af sér rétt fyrir utan teig. Það sem gerir það ennþá heimskulegra en raun ber vitni er að Gylfi Þór Sigurðsson er í Swansea.

Og eins og ALLIR sem horfðu á leikinn vissu þá skoraði Gylfi auðvitað úr aukaspyrnunni. Staðan orðin 1-1 og United sem hefði farið upp í 3. sæti með sigri allt í einu komið aftur í 5. sætið.

Embed from Getty Images

United tókst engan veginn að ógna Swansea eftir jöfnunarmarkið en Fernando Llorente hefði átt að tryggja Swansea sigurinn eftir frábæra aukaspyrnu Gylfa en Llorente skaut beint á De Gea.

Enn og aftur enda leikar 1-1 á Old Trafford.

Punktar

  • United liðið virkar örþreytt. Guð hjálpi mönnum gegn Celta Cigo og Arsenal + Tottenham.
  • Þetta jafntefli var síðasti naglinn í líkkistuna, það má endanlega kyssa Meistaradeildarsætið bless. Ef United hvílír ekki stóran hluta hópsins gegn Arsenal og Tottenham skal ég hundur heita.
  • Aukaspyrnur og hornspyrnur Manchester United minna á eitthvað sem 4. deildarlið á Íslandi gerir. Gæðin eru engin. Liðið gæti svo sannarlega gert verri hluti en að kaupa Gylfa Þór Sigurðsson í sumar.
  • Gylfi skorar líka alltaf á Old Trafford – sem er ennþá betri ástæða til að kaupa hann. Hann elskar Old Trafford.
  • Meiðslalisti United er orðinn hálfgert grín. Það virðast allir meiðast en fyrir utan Shaw og Bailly í dag þá var Herrera haltrandi í leiks lok.
  • Þrátt fyrir þreytu og allt það þá var liðið hreinlega ömurlegt í dag. Gæðin voru lítil sem engin. Fyrir utan De Gea og Martial (fram á við) þá var liðið steingelt. Liðið virðist hvorki fugl né fiskur án Paul Pogba (tala nú ekki um fyrst Zlatan Ibrahimovic eða Juan Mata eru ekki með).