Rauðu djöflarnir

Evrópudeildin

Manchester United 3:0 Saint-Étienne

skrifaði þann | 22 ummæli

Manchester United sigraði Saint-Étienne með þremur mörkum gegn engu í leik sem United liðið spilaði ekki sinn besta leik á tímabilinu. Strax í byrjun leiks virkaði vörnin mjög óstýrk og Eric Bailly hefur litið betur út en hann gerði í þessum leik. United liðið sótti mikið en var mjög viðkvæmt fyrir skyndisóknum franska liðsins. Sprækastur þeirra var án efa Henri Saivet sem er á láni frá 1.deildarliði Newcastle United. Enn einu sinni var færanýtingin ekki alveg nógu góð og leit Ruffier markvörður Saint-Étienne út fyrir að vera í hærra gæðaflokki en hann raunveruleg er.

Á 15. mínútu fékk United aukaspyrnu rétt fyrir utan vítateig gestanna. Spyrnuna tók enginn annar en Zlatan Ibrahimovic en boltinn átti viðkomu í varnarmann og lak löturhægt í markið. Í fyrri hálfleiknum vildu leikmenn Saint-Étienne fá vítaspyrnu en ég undirritaður einfaldlega missti af atvikinu og get því ekki sagt til um hvort innistæða hafi verið fyrir tilkallinu. Annars hefur United ekki fengið dæmdar vítaspyrnur á tímabilinu þannig að ég býst ekki við að missa svefn yfir þessu. Staðan þegar flautað var til hálfleiks var 1:0 fyrir heimamönnum.

Embed from Getty Images

José Mourinho var augljóslega ekki ánægður með spilamennskuna í fyrri hálfleiknum og strunsaði inní klefa á 44.mínútu. Í leikhléi gerði hann eina breytingu þegar hann tók Marouane Fellaini af velli og í hans stað kom Jesse Lingard. Þessi breyting var jákvæð enda Lingard töluvert hreyfanlegri en belgíska pálmatréið. Þrátt fyrir þetta virtist sem að United ætlaði ekki skora fleiri mörk og það gerði fólk taugaóstyrkt enda vont að fara bara með 1:0 forystu eða mögulega 1:1 jafntefli á útivöll. Svo hjálpaði ekki að dómarinn fór að spjalda United menn eins og hann  fengi borgað fyrir það en alls fengu fjórir leikmenn gul spjöld í seinni hálfleiknum fyrir mismiklar sakir. Paul Pogba, Anthony Martial, Jesse Lingard og Ander Herra sem verður í leikbanni í seinni umferðinni.

Embed from Getty Images

Loksins á 75.mínútu jók liðið forystuna í 2:0 þegar að Zlatan skoraði líklega sitt auðveldasta mark eftir góðan undirbúning frá Marcus Rashford sem hafði komið inná skömmu áður fyrir Juan Mata. Eftir þetta mark var aðeins hægt að anda rólegar. Áfram hélt United að sækja enda væri nauðsynleg að fara með góða forystu í seinni leikinn og 3:0 myndi vera töluvert mýkri koddi. Það var svo á 88.mínútu þegar stórtíðindi ársins bárust. United fékk dæmda vítaspyrnu eftir klaufalegt brot varnarmanns Saint-Étienne á Zlatan Ibrahimovic. Auðvitað steig Svíinn sjálfur á punktinn og skoraði örugglega eftir að hafa sent markvörðinn í rangt horn. Manchester United vann leikinn 3:0 og er í frábærri stöðu fyrir seinni leikinn þar sem vonandi verður hægt að hvíla einhverja leikmenn.

Embed from Getty Images

Leikmenn

Sergio Romero – Heldur áfram hreinu en hann þurfti reyndar ekki að verja skot í leiknum – 7

Antonio Valencia – Ágætur þó að flestir sóknir Saint-Étienne hafi farið í gegnum hann og fyrirgjafirnar voru slakar í kvöld. – 6

Eric Bailly og Daily Blind – Voru frekar ryðgaðir í kvöld. – 5

Chris Smalling – Voru flottur í kvöld og hreinsaði oft vel. – 8

Juan Mata – Spænski sjentilmaðurinn var flottur í kvöld og óheppinn að hafa ekki náð að skora í fyrri hálfleik. – 7

Maroune Fellaini – Gerði ekki mikið í fyrri hálfleiknum annað en að skora rangstöðumark. – 5

Ander Herrera – Var fínn í kvöld að venju og óheppinn að fá spjald og bann. Það þýðir að hann mun sennilega spila báða bikarleikina. – 8

Paul Pogba – Var flottur í kvöld og virkar alltaf eins og hann þurfi svo lítið að hafa fyrir hlutunum. – 8

Anthony Martial – Átti stórleik í kvöld og átti skilið að skora amk eitt mark í leiknum. – 9

Zlatan Ibrahimovic – Skorar þrennu í leiknum. Er núna búinn að skora 17 mörk í 14 leikjum gegn Saint-Étienne. – 9

Liðið sem byrjaði leikinn:

20
Romero
17
Blind
12
Smalling
3
Bailly
25
Valencia
27
Fellaini
21
Herrera
11
Martial
6
Pogba
8
Mata
9
Ibrahimovic

Bekkur: De Gea, Darmian, Rojo, Schweinsteiger, Lingard, Young, Rashford.

Evrópudeildin

Bræður munu berjast – St. Etienne kemur í heimsókn

skrifaði þann | 2 ummæli

Annað kvöld hefjast 32- liða úrslit Evrópudeildarinnar. Mótherji Manchester United er franska liðið Association Sportive de Saint-Étienne Loire eða St. Etienne í daglegu máli. St. Etienne hefur undanfarin ár verið í topphluta frönsku deildarinnar og tekið reglulega þátt í Evrópukeppni félagsliða. Liðið hefur orðið franskur meistari 10 sinnum og 6 sinnum orðið bikarmeistari. Besti árangur frakkanna í evrópukeppni var að lenda í 2.sæti í Evrópukeppni meistaraliða sem er forveri Meistaradeildarinnar tímabilið 1975-1976.

Embed from Getty Images

Manchester United og St. Etienne tengjast bókstaflega bræðraböndum en Florentin eldri bróðir Paul Pogba er varnarmaður St. Etienne. Ólíkt bróður sínum þá valdi Florentin að leika með landsliði Gíneu en hann og Mathias tvíburabróðir hans eru fæddir þar. Önnur kunnugleg nöfn úr enska boltanum sem leika með St. Etienne eru Jordan Veretout sem er á láni frá Aston Villa, Henri Saivet lánsmaður frá Newcastle United og Kévin Théophile-Catherine sem lék tvö tímabil með Cardiff City.

Embed from Getty Images

José Mourinho hefur gefið það út að Luke Shaw verði ekki með liðinu annað kvöld og framtíð hans með United virðist vera ráðin. Einnig kom fram að Michael Carrick og Wayne Rooney verða hvíldir fyrir bikarleikinn gegn Blackburn um helgina og Phil Jones er ekki orðinn heill heilsu.

Embed from Getty Images

Byrjunarliðinu spái ég svona:

1
De Gea
17
Blind
5
Rojo
3
Bailly
25
Valencia
6
Pogba
21
Herrera
11
Martial
22
Mkhitaryan
8
Mata
9
Ibrahimovic

Hvernig spáið þið að leikurinn fari?

Enska úrvalsdeildin

Manchester United 2:0 Watford

skrifaði þann | 6 ummæli

Áður en leikurinn gegn Watford hófst var ljóst að Arsenal hafði sigrað Hull. Það var því ekki möguleiki að komast í 4. sætið en það var séns að komast í 5. sæti, í það minnsta tímabundið. Auk þess sem sigur væri nauðsynlegur til að halda í við liðin fyrir ofan.

Byrjunarliðið gegn Watford var svona:

1
De Gea
17
Blind
12
Smalling
3
Bailly
25
Valencia
6
Pogba
21
Herrera
11
Martial
22
Mkhitaryan
8
Mata
9
Ibrahimovic

Varamannabekkurinn er þannig skipaður:

Romero, Darmian, Carrick, Fellaini (72′), Lingard (89′), Rashford (80′), Rooney.

Lið Watford var svona:

1
Gomes
3
Britos
5
Prödl
4
Kaboul
15
Cathcart
8
Cleverley
25
Holebas
21
Niang
29
Capoue
20
Zárate
9
Deeney

Varamenn: Arlauskis, Mariappa, Janmaat, Behrami, Doucouré, Success, Okaka.

Fyrri hálfleikur

Leikmenn Manchester United komu til leiks staðráðnir í að hirða öll stigin þrjú. Liðið fór strax að reyna að búa til færi og láta vaða þegar markið var í augsýn. Eftir því sem leið á hálfleikinn fóru sóknartilburðirnir að vera flottari og skemmtilegri en það vantaði þó upp á að ná að klára færin almennilega. Fremstu 6 leikmennirnir áttu allir marktilraunir í fyrri hálfleiknum en til að byrja með fóru þær gjarnan hátt yfir eða Gomes varði auðveldlega.

Watford minntu stundum á sig með sóknartilburðum eða reyndu að setja pressu á vörn Manchester United. En þar munaði afskaplega miklu um að Eric Bailly var mættur aftur í vörnina. Hann nýtti sinn líkamlega styrk mjög vel í baráttunni við sóknarmenn Watford. Stykur hans og geta á boltann er frábær blanda, hann hleypur ekki í stress þótt að sé reynt að pressa á hann heldur leysir málið.

Anthony Martial kom inn í leikinn eftir að hafa verið töluvert í umræðunni. Hann reyndi ýmislegt og var duglegur að hlaupa á vörnina með boltann. Oftar en ekki þurfti Watford að leysa það með því að kæfa Martial með 2-3 varnarmönnum, þar hefði ekki mikið þurft að detta fyrir Martial til að skapa stórhættu.

Pogba og Herrera sátu heilt  yfir frekar aftarlega á vellinum en fóru þó að fikra sig meira fram á við eftir því sem leið á. Þeirra samband virðist vera að þróast mjög vel, þeir vita alltaf vel hvar hinn er og þeirra samvinna með og án bolta eflir báða leikmenn til muna.

Zlatan var mjög mikið í boltanum í fyrri hálfleiknum. Hann datt mikið niður til að sækja boltann og leitaðist við að búa eitthvað til fyrir leikmennina í kring. Hann fékk þó tækifæri í fyrri hálfleiknum sem hann hefði átt að nýta betur, í of mörg skipti hitti hann boltann illa. Í eitt skipti náði hann þó skalla á markið úr dauðafæri en Gomes varði vel.

Juan Mata spilaði þó manna best í fyrri hálfleik. Hann var mjög hreyfanlegur og alltaf að hlaupa í svæði til að skapa pláss fyrir sig og samherja sína. Hann og Mkhitaryan virðast ætla að mynda skemmtilegt sóknarsamband.

Það var líka litli Spánverjinn sem braut ísinn fyrir Manchester United eftir rúmlega hálftíma leik. Það var stuttu eftir dauðafærið hjá Zlatan. Á þessum tíma var United með mikla pressu á Watford og að skapa margar fallegar sóknir. Þetta var ein slík, Mkhitaryan fékk boltann og sendi út á vinstri kantinn þar sem Martial keyrði áfram að endamörkum og sendi góða sendingu fyrir markið. Zlatan og Mata voru þar báðir mættir og það var Mata sem kláraði færið og skoraði. Frábært mark!

Manchester United hafði mikla yfirburði það sem eftir lifði fyrri hálfleiks. Martial átti nokkra góða spretti og Mkhitaryan átti hættulega marktilraun en United náði ekki að bæta við fleiri mörkum. Watford mátti teljast heppið að fara inn í hálfleikinn aðeins 1-0 undir.

Seinni hálfleikur

Martial byrjaði seinni hálfleikinn á stórhættulegum spretti þar sem hann fíflaði vörn Watford og átti svo hættulegt skot sem fór rétt framhjá. En Manchester United náði ekki að byggja á því og halda yfirburðunum sem liðið hafði haft í lok fyrri hálfleiks. Watford sá meira af boltanum og náði að búa sér til tilraunir. De Gea þurfti að verja vel á 53. mínútu þegar Watford átti skot úr aukaspyrnu.

En Watford náði ekki að byggja mikla pressu og þegar hálftími var eftir af leiknum náði United að klára dæmið með öðru marki eftir aðra frábæra skyndisókn. Zlatan fékk boltann og stakk honum inn á Martial sem brunaði eitt sinn sem oftar í átt að marki Watford. Varnarmenn Watford virtust ætla að komast fyrir Martial en þá tók Martial bara eina góða stefnubreytingu og lagði boltann mjög snyrtilega í nærhornið. Zlatan hafði elt Martial inn í teiginn og plantaði sér beint fyrir framan Gomes svo hann gat engan veginn séð boltann frá Martial. Skemmtilega gert hjá báðum og leikurinn búinn.

Watford hefði þó getað skorað. Þeir náðu hættulegri fyrirgjöf sem rúllaði framhjá leikmönnum í opnu færi og bakvörðurinn Janmaat fékk dauðafæri þegar 20 mínútur voru eftir sem hann náði ekki að gera sér mat úr. En heilt yfir var þetta ekki í neinni hættu. Manchester United hélt boltanum og hélt áfram að sækja. Mkhitaryan var sérstaklega sprækur í að búa til færi og Zlatan hefði átt að skora í leiknum, hann fékk t.d. annað dauðafæri þegar skammt var eftir af leiknum. Hann var þá einn fyrir framan opið markið en boltinn var þó í erfiðri hæð. Zlatan hefur samt skorað mörk úr erfiðari færum en þetta.

Mata fékk sína klassísku skiptingu á 70. mínútu þegar Fellaini kom inn á. Martial fór síðan út fyrir Rashford og Mkhitaryan fyrir Lingard í lokin. United hélt stjórn á leiknum og landaði 3 verðmætum stigum. Ólíkt síðustu vikum þá dugði sigurinn til að færa Manchester United upp um sæti á töflunni.

Maður leiksins

Það er skemmtilegt þegar margir leikmenn gera sterkt tilkall til þess að vera valinn maður leiksins. Eric Bailly var frábær í vörninni, engin spurning að það styrkir liðið mjög mikið að hafa fengið hann aftur. Valencia var líka flottur, mikið í boltanum og traustur í vörninni.

Zlatan var mikið að skapa og gera sniðuga hluti en hann hefði átt að skora í leiknum. Sem betur fer kom það ekki að sök í þetta skiptið. Martial kom sterkur inn og nýtti tækifærið vel. Mkhitaryan var afskaplega líflegur. Juan Mata var út um allt, braut ísinn og sífellt að skapa eitthvað skemmtilegt.

En maður leiksins að mínu mati var Paul Pogba. Ég hef lengi verið á því að til þess að fá það besta út úr Paul Pogba þurfi að spila honum í þeirri stöðu sem hann blómstraði hvað mest í hjá Juventus, vinstra megin í þriggja manna miðju í þannig stöðu að hann sé framarlega á miðjunni, frekar en aftarlega. En hann er að leysa þessa stöðu sem annar af tveimur djúpum miðjumönnum mjög vel. Hann er að sinna ákveðinni varnarvinnu en hefur þó fundið leið til að vera ekki niðurnjörvaður af varnarskyldum. Hann er að stýra leikjum aftarlega á vellinum en nær samt líka að búa sér til pláss og tíma til að fara fram á við og taka þátt í sóknaruppbyggingum þar. Stórkostlegur!

Twitter

Enska úrvalsdeildin

Watford kemur í heimsókn

skrifaði þann | Engin ummæli

Ég vil byrja á að minna á greinina sem Björn Friðgeir skrifaði í morgun um skuldamál Manchester United. En vindum okkur þá í hefðbundnari upphitunarmál.

Watford er í fínum málum, félagið hefur ekki að neinu að keppa en jafnframt er það ekki í neinni hættu. Þetta ætti því að vera nokkuð þægilegur leikur fyrir Manchester United en það er hættulegur hugsunarháttur því Watford er taplaust í síðustu 4 leikjum. Síðustu 2 leiki hafa þeir gulklæddu unnið, gegn Arsenal á útivelli og gegn Burnley á heimavelli. Það er því eins gott að leikmenn Manchester United verði með hugann við verkið þegar leikurinn verður flautaður á, klukkan 15:00 á morgun.

Manchester United

Þetta verður síðasti deildarleikur Manchester United í febrúar. Liðið spilar þó 4 leiki til viðbótar í mánuðinum en þeir eru allir í öðrum keppnum. Eftir langan tíma þar sem sigurganga United skilaði góðu peppi en engri hreyfingu á töflunni er staðan núna orðin þannig að sigur í þessum leik gæti skilað liðinu upp um 1-2 sæti. Arsenal hefur tapað síðustu 2 leikjum og tekur á móti Hull-liði sem hefur verið að spila vel í síðustu leikjum. Liverpool spilar svo við Tottenham síðar um daginn. Sigur hjá United þýðir því alltaf að liðið myndi ná að saxa á í það minnsta eitt lið fyrir ofan sig.

Wayne Rooney missti af síðasta leik vegna veikinda. Hann hefur haft tæplega viku til að jafna sig af þeim veikindum og hefur Mourinho staðfest að hann sé tilbúinn fyrir leikinn. Hins vegar er alls óvíst að það breyti miklu þótt hann sé búinn að jafna sig, síðasta innkoma hans af bekknum var nú ekki beint öflug.

Marcos Rojo og Phil Jones þurftu báðir að fara af velli í síðasta leik. Marcos Rojo hefur sést á myndum af æfingasvæðinu sem bendir til þess að hann sé búinn að jafna sig en Jones nær ekki leiknum samkvæmt nýjustu ummælum Mourinho. Meiðslin ættu ekki að vera alvarleg en það er óþarfi að taka sénsinn, sérstaklega þar sem liðið er vel mannað í miðvarðastöðunum núna.

Ég spái byrjunarliðinu um það bil svona:

1
De Gea
17
Blind
5
Rojo
3
Bailly
25
Valencia
6
Pogba
21
Herrera
11
Martial
22
Mkhitaryan
8
Mata
9
Ibrahimovic

Ég ætla að giska á að Martial fái sénsinn í þessum leik. Væri alveg til í að sjá Shaw líka detta inn en hugsa að hann komi frekar inn í einhverjum af næstu fjórum leikjum.

Watford

Watford er að mörgu leyti heldur undarlegt lið þessa dagana. Í deildinni siglir það lygnan sjó, í 10. sæti. Það á að baki frækna sigra í vetur, til að mynda gegn Manchester United í fyrri leik liðanna í deildinni og gegn Arsenal í lok janúar. En jafnframt hefur liðið tapað illa í nokkrum leikjum í vetur, það tapaði t.d. 1-6 í deildinni gegn Liverpool, 1-4 á heimavelli gegn Tottenham og féll úr bikarkeppnunum gegn Gillingham og Millwall.

Það var nokkuð að gera hjá Watford í janúarglugganum. Liðið sendi 6 leikmenn út á lán og seldi 2 til viðbótar. Á móti keypti Watford Argentínumanninn Mauro Zárate frá Fiorentina og fékk lánaða Tom Cleverley frá Everton og M’Baye Niang frá AC Milan. Þessir leikmenn sem komu inn í janúar hafa verið að spila vel og virðast hafa styrkt liðið mikið.

Markvörðurinn Costel Pantilimon er meiddur ásamt þeim Roberto Pereyra, Christian Kabasele og Nordin Amrabat. Bakvörðurinn José Holebas er tæpur en það er búist við að hann nái leiknum.

1
Gomes
25
Holebas
5
Prödl
4
Kaboul
15
Cathcart
8
Cleverley
11
Behrami
29
Capoue
20
Zárate
9
Deeney
21
Niang

Leikurinn

Eins og áður sagði þá vann Watford síðasta leik þessara liða. Manchester United hafði þar á undan unnið 11 leiki í röð gegn Watford. Watford hefur aðeins unnið einn leik á heimavelli Manchester United og það var deildarbikarleikur í október 1978.

Það tímabil var Watford í þriðju deildinni eftir að hafa unnið fjórðu deildina tímabilið á undan. Graham Taylor var á sínu öðru tímabili með liðið og á leiðinni að stýra því upp um deild annað árið í röð. Watford fór alla leið í undanúrslit deildarbikarsins en tapaði þar gegn Englandsmeisturum Nottingham Forest.

Graham Taylor stýrði Watford tvisvar á ferlinum. Fyrra skiptið var á árunum 1977-87 þegar hann kom liðinu úr 4. deild upp í efstu deild á fimm árum. Undir hans stjórn endaði Watford í 2. sæti efstu deildar árið 1983 og komst í úrslit enska bikarsins árið 1984. Seinna skipti Taylor sem stjóri Watford var á árunum 1996-2001. Þá kom hann liðinu upp í úrvalsdeildina, þótt það hafi reyndar aðeins náð einu tímabili þar.

Taylor lést fyrir mánuði síðan og hafa allir sem koma nálægt knattspyrnuklúbbi Watford verið duglegir að minnast hans með hlýhug. Leikmenn hafa verið að tileinka honum frammistöður og sigra síðustu vikna. Ekki í fyrsta sinn sem Graham Taylor hefur fyllt leikmenn Watford innblæstri.

Við kunnum að sjálfsögðu að meta góða knattspyrnukaraktera eins og Graham Taylor en við vonum samt að leikmenn Manchester United minnist hans ekki með því að gefa Watford stig. Þrjú stig til Manchester United er krafan í þessum leik. Áfram og upp á við!

Fjármál

Skuldaaukning um 87 milljónir punda. Ha?

skrifaði þann | 1 ummæli

Manchester United birti í gær fjármálaniðurstöður sínar fyrir annan ársfjórðung yfirstandandi uppgjörsárs, október til desember. Við erum yfirleitt hættir að kafa í svona millibilsuppgjör en í tölunum í gær var tala sem vakti nokkra athygli. Skuldir félagsins hafa aukist um 87,2 milljónir punda á árinu 2017, úr  322,1 milljón punda í 409,3 milljónir.

En það er ekki eins og félagið hafi veirð að taka þessa peninga að láni heldur eru um tap að ræða vegna þess að skuldir félagsins eru allar í dollurum. Félagið skuldar um 504 milljónir dollara og þar sem gengi punds hefur veikst úr 1,4747 pundum per dollar í 1,2293 hækkar skuldin í pundum. Takk Brexit!

Nú er svolítið erfitt að sjá hvort stór hluti tekna United sé í dollurum, en líklegt má telja að þó nokkur hluti sé það, svo sem alþjóðlegu sjónvarpssamningarnir og alþjóðlegu styrktarsamningarnir þannig þetta er þá ekki eins galið og við fyrstu sýn þó vissulega hefði mátt halda að auðvelt væri fyrir félagið að verja sig fyrir svona skakkaföllum.

Í það minnsta væri ég alveg til í að fá að spyrja Woodie um þetta.

En það er ein ljósglæta: félagið hefur ákveðið að af-afskrifa Bastian Schweinsteiger, hann telst nú aftur til eigna félagsins og þar er kominn hagnaður upp á 5 milljónir punda sem afskrifaðar höfðu verið á síðasta ár.

En að öðru leyti er þetta business as usual:

  • Manchester United er skuldsettasta knattspyrnufélag í heimi
  • Manchester United er tekjuhæsta knattspyrnufélag í heimi og ræður við skuldabyrðina.

Halldór mætir á svæðið eftir hádegi með ferska upphitun fyrir Watford leikinn á morgun!