Rauðu djöflarnir

Enska úrvalsdeildin

Manchester United 3:1 Sunderland

skrifaði þann | 9 ummæli

Það verður seint sagt að endurkomu David Moyes á Old Trafford hafi verið beðið eftir með mikilli eftirvæntingu. Flestir vilja sjálfsagt gleyma því að hann hafi nokkurn tímann stýrt Manchester United. En hann hefur það víst á ferilskránni og var mættur á sinn gamla heimavöll í dag með John O’Shea og félaga í Sunderland. Gamli squadplayerkóngurinn O’Shea var þó á bekknum í dag. Byrjunarlið Manchester United í leiknum var á þessa leið:

1
De Gea
17
Blind
5
Rojo
4
Jones
25
Valencia
6
Pogba
16
Carrick
21
Herrera
14
Lingard
9
Zlatan
8
Mata

Varamenn: Romero, Darmian, Smalling, Fellaini, Mkhitaryan, Martial, Rashford

Lið Sunderland var þannig skipað:

13
Pickford
3
van Aanholt
5
Djilobodji
23
Koné
2
Jones
17
Ndong
4
Denayer
7
Larsson
9
Borini
18
Defoe
28
Anichebe

Varamenn: Mannone, Love, Asoro, O’Shea, Khazri, Embleton, Honeyman

Leikurinn

Það kom lítið á óvart hvernig leikurinn spilaðist til að byrja með. Manchester United var mun meira með boltann en Sunderland lá til baka og freistaði þess að ná snöggum sóknum.

Eftir fyrstu 20 mínúturnar voru liðin með álíka margar marktilraunir en Sunderland þó með fleiri á rammann. Sunderland fékk hættuleg færi um miðjan hálfleikinn en United endaði hálfleikinn betur, sótti töluvert og lét vaða á markið. Sérstaklega var Paul Pogba duglegur í sókninni, hann virtist staðráðinn í að skora í leiknum.

Reyndar hefði Manchester United getað fengið vítaspyrnu eftir u.þ.b. 20 mínútna leik er Juan Mata var straujaður niður þegar hann var við það að komast einn í gegn. En Manchester United hefur aðeins fengið eitt víti í deildinni í vetur og þau virðast ekki ætla að verða mikið fleiri, þrátt fyrir að þau hefðu nú þegar átt að verða mun fleiri.

Á 39. mínútu náði United þó að brjóta ísinn. Marcos Rojo bar boltann þá vel upp völlinn, gaf hann á Zlatan vinstra megin í teignum og hélt hlaupinu áfram inn í teiginn. Daley Blind fylgdi í humátt á eftir Rojo og tók hlaupið innan á Zlatan. Zlatan sá það betur en varnarmenn Sunderland og gaf hárfína sendingu inn í hlaupaleið Blind. Hollendingurinn tók eina snertingu með hægri þar sem hann lagði boltann fyrir skotfótinn og átti svo þéttingsfast skot meðfram jörðinni, í gegnum þvöguna í teignum og alveg út við stöng. Flott mark og vel gert hjá Rojo, Zlatan og Blind.

Manchester United fór því inn í leikhléð með verðskuldaða forystu.

Seinni hálfleikurinn hófst með látum þegar Zlatan vann boltann af harðfylgi af varnarmanni Sunderland og fann Pogba á hættulegum stað en sendingin á Frakkann var ekki nægilega góð svo hættulegt tækifæri rann út í sandinn. En þetta gaf tóninn fyrir seinni hálfleikinn.

Áfram héldu leikmenn United að skapa sér færi, sérstaklega þeir Zlatan og Pogba. En ýmist náðu þeir ekki alveg að setja boltann á rammann eða Pickford í marki Sunderland varði. Þegar tæpur hálftími var eftir af leiknum kom Henrikh Mkhitaryan inn á fyrir Jesse Lingard. Armeninn var ekki lengi að minna á sig og átti strax skot sem fór rétt framhjá marki Sunderland. Stuttu eftir það átti hann góða stungusendingu inn á Zlatan en Pickford varði mjög vel.

Juan Mata entist í 74 mínútur í þessum leik áður en hin hefðbundna Mataskipting kom. Martial kom inn á fyrir Mata og Mkhitaryan fór við það yfir á hægri kantinn. Pressa United þyngdist jafnt og þétt og ljóst að eitthvað varð undan að láta.

Það gerðist loks á 82. mínútu. Þá skilaði pressa United sér í því að Pogba vann boltann og brunaði fram völlinn. Zlatan gerði vel í að halda sér réttstæðum og fékk svo flotta stungusendingu frá Pogba og afgreiddi boltann snyrtilega í netið. Ekkert sem Pickford gat gert í þessu. Zlatan var greinilega búinn að lesa Pickford í markinu eftir markvörsluna stuttu áður. Pickford settist aftur og teygði út lappirnar en í þetta skiptið setti Zlatan boltann yfir löppina á markmanninum.

Eftir þetta velkomna annað mark tók Mourinho Herrera út af vellinum og setti Fellaini inn á. Því miður mátti enn heyra eitthvað um baul frá barnalega og óþroskaða hluta stuðningsmanna United en einhverjir brugðust við með því að syngja nafn Belgans. Flott hjá þeim.

Mkhitaryan hafði verið mjög sprækur eftir að hann kom inn á. Stuttu eftir að Fellaini kom inn á kórónaði Mkhitaryan góðan leik sinn með stórkostlegu marki. Zlatan átti þá sendingu utan af hægri kantinum inn á Mkhitaryan sem var kominn einn í gegn. Sendingin kom fyrir aftan Mkhitaryan sem tók þá bara hælspyrnu á lofti og stýrði boltanum þannig í markhornið fjær. Með flottari mörkum ársins. Hann var að vísu rangstæður í markinu en aðstoðardómarinn tímdi ekki að flagga svona flott mark af svo það stóð.

Leikurinn var löngu búinn en Sunderland náði aðeins að klóra í bakkann í uppbótartíma þegar Borini slummaði tuðrunni upp í skeytin. Algjör óþarfi að fá á sig þetta mark, það hefði verið sterkur leikur að halda hreinu og bæta markatöluna. En það var í sjálfu sér lítið hægt að gera við þessu, einfaldlega þrusuvel gert hjá Borini.

Sigur staðreynd, 3-1 fyrir Manchester United. 11 leikir án taps og 5 sigurleikir í röð. Þetta gleður.

Umræðupunktar

Minn maður leiksins í þessum leik er Paul Pogba. Hann var allt í öllu, alls staðar á vellinum. Það sást langar leiðir að hann ætlaði sér að skora í þessum leik, hann ætlaði sér að leiða liðið til sigurs. Honum tókst ekki að skora sjálfum en hann lagði upp mark og leiddi liðið svo sannarlega til sigurs.

Það sem þessi maður er góður í fótbolta. Og samt á hann ennþá fullt inni. Það er líka enginn efi í mínum huga um að við munum sjá Pogba bera fyrirliðabandið hjá United í ekki svo fjarlægri framtíð.

Zlatan var líka góður í þessum leik. Það er oft talað um að hann sé að klúðra mikið af færum. Hann átti 4 marktilraunir í þessum leik. Fyrsta tilraunin fór ekki á rammann. Tilraun númer 2 var mjög vel varin af Pickford. Tilraun númer 3 var mark. Fjórða tilraunin var svo alveg í lok leiksins, hana varði Pickford. Svo þetta er nú engin hræðileg tölfræði hjá Zlatan. Auk þessara marktækifæra þá bjó hann til 5 færi fyrir samherja og átti 2 stoðsendingar.

Með þessu marki er Zlatan kominn með 50 deildarmörk á árinu. Búinn á því? Ekki aldeilis!

Sem mikill stuðningsmaður Daley Blind þá fannst mér gaman að sjá hann fá tækifærið í liðinu. Hann átti fínan leik og skoraði mjög gott mark. Kollegi hans hægra megin átti þó betri dag, var mikið í boltanum, þaut upp og niður eftir hægri vængnum og varðist vel.

Henrikh Mkhitaryan! Hvað er hægt að segja eftir svona mark? Og bara þessa innkomu. Að vera að fá hann inn, í þessu stuði, á þessum tímapunkti leiktíðarinnar, er frábært. Lofar virkilega góðu.

Twitterhornið

Enska úrvalsdeildin

Sunderland kemur í jólaheimsókn

skrifaði þann | 1 ummæli

Manchester United - SunderlandRauðu djöflarnir óska öllum lesendum síðunnar gleðilegra jóla.

Það er komið að jólafótboltanum. Annar dagur jóla og það verða spilaðir 8 leikir í 18. umferðinni. Fyrri hluti tímabilsins er að klárast og þessi leikur er upphafið að leikjatörn þar sem Manchester United spilar 3 leiki á viku. Hin liðin gera það auðvitað líka og fá mislangan tíma á milli leikja eins og gengur og gerist.

Manchester United á leik kl. 15:00 á öðrum degi jóla og það eru Sunderland sem mæta í heimsókn.

Jólaboltinn

Enski boltinn er ómissandi hluti af jólahátíðinni fyrir ansi marga, enda hafa jóladagarnir og áramót verið nýttir fyrir knattspyrnuleiki í Englandi frá því fótboltinn byrjaði fyrst að rúlla þar í landi. Í mörgum öðrum löndum eru sérstök vetrarfrí en hreint ekki í Englandi, þar er álagið aukið á knattspyrnumennina. Enda hafa ófáir leikmenn og knattspyrnustjórar farið illa út úr því hafa þurft að tækla enska jólaboltann eftir að hafa vanist öðru fyrirkomulagi.

Það er algengt umfjöllunar- og kvörtunarefni knattspyrnustjóra að það sé stutt á milli leikja í jólatörninni. Þeir ættu þá að þakka fyrir að búið er að leggja niður jóladagsleikina en það var lengi vel hefð að spila fótbolta á jóladag. Raunar var það svo að fram á 6. áratug síðustu aldar var það nokkuð algengt að lið þyrftu að spila leik bæði á jóladag og annan í jólum. Liðin þurftu jafnvel að ferðast landshorna á milli til að komast í seinni leikinn. Fótbolti var, og er, jólaskemmtun í Englandi.

Þegar leikjahæstu dagar hvers mánaðar ársins eru skoðaðir í sögu Manchester United kemur í ljós að í flestum mánuðum tímabilsins eru þeir frá 25 leikjum og upp í 31 leik. Maí er ein undantekning, þá fara yfirleitt færri leikir fram vegna þess að tímabilið er að klárast. Í maí eru fjórir dagar þar sem Manchester United hefur spilað 15 leiki.

Þegar tölurnar fyrir desember eru skoðaðar sjást greinilega áhrifin sem jólatörnin hefur. Þar koma fjórir dagar í röð þar sem Manchester United hefur spilað yfir 30 leiki. Það eru 25.-28. desember. Það er merkilegt að hugsa til þess að Manchester United hefur spilað 33 leiki á jóladag þegar það er haft í huga að síðasti leikur liðsins á þeim degi var árið 1957. Annar í jólum sker sig samt út og er langefstur þegar kemur að þessari tölfræði. Manchester United hefur spilað 93 fótboltaleiki á öðrum degi jóla.

Þetta verður 7. árið í röð sem Manchester United spilar leik á þessum degi. Á síðustu 33 árum hefur liðið 31 sinni spilað deildarleik 26. desember. Ef frá er tekið tap gegn Stoke City í síðasta leik hefur United átt góðu gengi að fagna í leikjum á þessum degi síðustu ár. Frá stofnun ensku úrvalsdeildarinnar hefur United spilað 22 leiki á annan í jólum. 18 þeirra hefur United sigrað, 2 enduðu með jafntefli og 2 töpuðust.

Í heildina er tölfræðin á þessum degi þannig:

  • 93 leikir spilaðir
  • 51 sigurleikur
  • 15 jafnteflisleikir
  • 27 tapleikir
  • 187 mörk skoruð
  • 134 mörk fengin á sig

Þess má til gamans geta að sá dagur sem kemur næst á eftir 26. desember er nýársdagur. Í gegnum tíðina hefur Manchester United spilað 55 leiki á þeim degi. 34 hafa endað með sigri.

En þrátt fyrir að desembertörnin hafi verið að skila svona mörgum leikjum þá er desember ekki efstur á blaði þegar kemur að leikjahæstu mánuðunum. Manchester United hefur spilað 662 leiki í desember en bæði september (684) og apríl (727) eru leikjahærri mánuðir.

Hinn útvaldi snýr aftur

Síðast þegar David Moyes stýrði liði í leik á Old Trafford þá mættust Manchester United og Bayern Munchen í fyrri leik 8-liða úrslita Meistaradeildar Evrópu 1. apríl 2014. Það var líklega viðeigandi dagsetning fyrir lokaleik Moyes því hann var dálítið eins og lélegt 1. apríl grín hjá United.

Það var þó ákveðin bjartsýni ríkjandi þegar hann tók við. Manchester United var meistari. Sir Alex Ferguson sjálfur hafði handvalið Moyes sem arftaka sinn og fáir hvoru jú betri í að finna hæfileika. Upp fóru fánarnir og upphrópanirnar sem merktu David Moyes með orðunum hinn útvaldi.

En þó voru alltaf einhverjar efasemdaraddir. Og þeim fjölgaði eftir því sem leið á sumar David Moyes. Síðan byrjaði tímabilið sjálft og eftir því sem leið á það urðu efasemdaraddirnar fleiri og háværari. Enda var það þannig að Moyes réð ekki við starfið og á endanum var hann rekinn, eftir aðeins 51 leik í starfi.

Síðustu daga, í aðdraganda þessa leiks, hefur Moyes verið að tjá sig um Manchester United. Hans helstu punktar virðast vera annars vegar:

Manchester United hefur snúið baki við hefðir sínar og það sem félagið hefur staðið fyrir með því að eltast við stærstu og dýrustu bitana á leikmannamarkaðnum.

og svo hins vegar:

Ég hefði keypt stærstu og dýrustu bitana á markaðnum ef ég hefði fengið tíma/tækifæri til þess.

Þetta er auðvitað mikið til endurorðað hjá mér en nokkurn veginn sá skilningur sem ég legg í þetta tuð hjá Moyes. Hann lætur þetta hljóma eins og hann hafi verið nálægt því að gera eitthvað af viti hjá Manchester United, að hann hafi verið við það að búa til nýtt meistaralið. Að hann hafi ekki verið vandamálið. En sannleikurinn er auðvitað allt annar.

Moyes má þó eiga það að hann er að henda sér á fullu í einhvers konar sálfræðistríð fyrir þennan leik. Þetta er betra sálfræðistríð af hans höndum en við sáum nokkurn tímann þegar hann stýrði Manchester United. En það segir nú reyndar ekki mikið.

Sunderland

Sunderland réð David Moyes til sín eftir að Sam Allardyce var ráðinn landsliðsþjálfari síðasta sumar. Moyes byrjaði strax að peppa sitt lið og sagði öllum stuðningsmönnum að búa sig undir fallbaráttu. Það varð og raunin, Sunderland hefur verið að verma neðstu sæti deildarinnar í vetur. Fyrir þessa umferð er Sunderland í 18. sætinu með 14 stig eftir 17 leiki og -13 í markatölu.

Aðeins þrír leikmenn liðsins hafa náð að skora í deildinni í vetur. Markamaskínan Jermaine Defoe er með 8 mörk og þeir Victor Anichebe og Patrick van Aanholt hafa skorað 3 mörk hvor. Defoe og Duncan Watmore eru stoðsendingahæstir, báðir með 2 stoðsendingar.

Samkvæmt nýjustu meiðslatíðindum eru þeir Steven Pienaar, Javier Manquillo og Billy Jones allir byrjaðir að æfa aftur með liðinu eftir meiðsli. Það er þó ekki víst að þeir nái allir leiknum.

Adnan Januzaj má ekki spila þennan leik þar sem hann er á láni frá Manchester United.

Paddy McNair er frá vegna meiðsla, sömuleiðis þeir Lee Cattermole, Lynden Gooch, Jack Rodwell, Duncan Watmore og Jan Kirchhoff.

Það má því búast við að lið Sunderland verði einhvern veginn svona:

13
Pickford
3
van Aanholt
5
Djilobodji
23
Koné
2
Jones
28
Anichebe
4
Denayer
17
Ndong
20
Pienaar
9
Borini
18
Defoe

Manchester United

Okkar menn eru hafa verið á góðu skriði. Síðustu 10 leikir hafa verið taplausir og síðustu 4 hafa allir endað með sigri Manchester United. Lykilmenn virðast vera farnir að finna sig ansi vel og það smitar út frá sér. Pogba er farinn að stjórna miðjunni, Carrick slær varla feilnótu, vörnin fyrir aftan þá hefur verið solid (fyrir utan einstaka glæfratæklingu) og fremst hefur Zlatan verið að skora grimmt. Sjö mörk úr síðustu 8 tilraunum, það er frábær tölfræði hjá Svíanum.

Meiðslalistinn er farinn að líta mun betur út. Mourinho staðfesti að bara Luke Shaw væri alveg frá vegna meiðsla. Henrikh Mkhitaryan og Eric Bailly eru báðir farnir að æfa aftur eftir meiðsli.

Möguleg útfærsla á byrjunarliðinu gæti því verið á þessa leið:

1
De Gea
17
Blind
5
Rojo
4
Jones
25
Valencia
6
Pogba
16
Carrick
21
Herrera
10
Rooney
9
Ibrahimovic
22
Mkhitaryan
Lesefni

Djöfullegt lesefni: 2016:18

skrifaði þann | 1 ummæli

Samstarf Mourinho og United virðist vera vera virka vel og samkvæmt Jamie Jackson hjá Guardian íhugar United að bjóða honum nýjan samning.

Næsta sumaræfingarferð United mun að öllum líkindum vera í Bandaríkjunum.

United er að spila mun skemmtilegri knattspyrnu en þegar Van Gaal stjórnaði liðinu að mati Paul Ansorge.

Samuel Luckhurst fer yfir hugsanleg janúar kaup á nokkuð raunsæjan hátt.

Daley Blind gæti verið besta skammtímalausnin á því að leysa Michael Carrick af. Þannig gæti liðið haldið áfram að spila 4-3-3 leikkerfið sem hefur gefist vel.

United hefur ráðið meira en 40 þjálfara, njósnara og aðra starfsmenn fyrir öll lið United, allt frá akademíunni til aðalliðsins. Þar með talið tvo af helstu unglinganjósnurum City.

Daily Mail telur að það sé ekki langt þangað til United jarði lið í deildinni eins og í öðrum keppnum.

Nooruddean rifjar upp ástæðurnar fyrir því að við elskuðum öll Roy Keane.

Þegar Henke Larsson lítur til baka yfir flottan feril er aðeins eitt sem hann sér eftir: að hafa ekki verið lengur hjá Manchester United.

Phil Jones hefur aðeins einu sinni leikið fleiri leiki í röð fyrir United og vonast eftir að þetta marki nýja tíma.

Paul Pogba spilar sífellt betur fyrir Manchester United. Einn lykill að því er að hafa Carrick og Herrera með honum á miðjunni. Chris Flanagan hjá FourFourTwo fór í tölfræðilega greiningu á því hvers vegna það er að virka svona vel.

Vefsíðan The Set Pieces fer yfir yngsta Meistaradeildar lið Manchester United.

Allt um stóra Lindelöf málið.

United á tvo leikmenn á listanum yfir mest gúgluðu leikmenn ársins.

Enska úrvalsdeildin

West Bromwich Albion 0:2 Manchester United

skrifaði þann | 14 ummæli

West Bromwich Albion - Manchester UnitedLoksins kom að því að maður horfði á þægilegan deildarleik með Manchester United. Þeir hafa ekki verið margir svona leikir í vetur, síður en svo, en í dag hafði maður í raun aldrei áhyggjur af stöðu mála. Eitthvað sem ég bjóst ekki við þegar ég vaknaði í morgun enda hafa WBA verið að spila ágætan (vöðva)bolta í vetur.

Mourinho stillti upp liðinu svona í dag:

1
De Gea
36
Darmian
5
Rojo
4
Jones
25
Valencia
6
Pogba
16
Carrick
21
Herrera
14
Lingard
9
Ibrahimovic
10
Rooney

Ég set liðið hér inn sem 4-3-3 en það skipti reglulega um ham í leiknum í dag. Fannst ég sjá 4-3-3, 4-1-4-1 og jafnvel 4-2-3-1. Ég held að það segi meira um hversu vinnusamir menn voru í dag. WBA eru vanir að mæta með sína fimm manna miðju og það var ljóst að Mourinho ætlaði ekki að tapa baráttu þar í dag.

Eins og í flestum leikjum hingað til þá réðu okkar menn öllu á vellinum en munurinn í dag var sá að United setti mark snemma leiks, eftir aðeins 4 mínútur. Það var ekkert smá mark, líklega það besta sem ég hef séð frá United í vetur. Liðið var með boltann aftarlega á vinstri kantinum og 13 sekúndum seinna er Zlatan búinn að skora með skalla eftir stórkostlega sendingu frá Lindgard af hægri kantinum! Minnti mann á gömlu dagana, bæði hraðinn upp völlinn og svo „Beckham sendingin“ frá Lindgard sem skóp markið. A plús!

Embed from Getty Images

Zlatan bættu svo við öðru marki snemma í seinni hálfleik, nánast upp úr engu þegar hann stakk sér milli tveggja varnarmanna og smellti boltanum í fjærhornið. 11 markið hans í deildinni í vetur (16 í öllum keppnum) og spekingarnir geta haldið áfram að tala um að hann sé orðinn of gamall og að enska deildin sé of sterk fyrir hann. Það eflaust hjálpar honum við að skora öll þessi mörk.

Eftir seinna markið (og bara allan leikinn) var ekkert fát á liðinu. Maður einhvern veginn hafði aldrei trú á því að WBA myndi skora, þeir fengu vissulega einhver færi hér og þar en ekkert af þeim reyndust hættuleg. United liðið hélt áfram að vinna vel saman og virtust alltaf hafa stjórn á hlutunum. Það átti enginn leikmaður slæman dag, ekki einu sinni Rooney sem hefur oftar en ekki verið manna slakastur. Hann var sprækur í dag og ekki langt frá því að jafna markamet Bobby Charlton þegar Ben Foster varði skot hans í þverslá. Metið verður að bíða betri tíma.

Ég ætla að vona að sjálfstraustið í liðinu sé að styrkjast þessa dagana. Það var auðvelt eftir leikina gegn Arsenal, West Ham og Everton að halda að einhver æðri máttarvöld væru að sjá til þess að United myndi ekki vinna fótboltaleiki. Núna hinsvegar, eftir fjóra sigurleiki í röð, finnst manni eins og leikmenn séu aðeins farnir að fatta hvað þarf að gera til að klára þessa leiki. Ég er því spenntur fyrir jóla- og áramótatörninni sem er framundan, held að það sé vel hægt að fá þar 9 stig af 9 mögulegum og það gæti breytt stöðunni í deildinni verulega.

Endum þetta á nokkrum velvöldum tístum!

https://twitter.com/matchofthedave/status/810207724684406784

https://twitter.com/squawka/status/810189068797624320

https://twitter.com/utdreport/status/810203978189389824

https://twitter.com/StatmanDave/status/810211072418390016

https://twitter.com/ManUtdStuff/status/810229150476709888

https://twitter.com/i/moments/810215734206988288

 

Enska úrvalsdeildin

Heimsókn til Tony Pulis

skrifaði þann | 1 ummæli

Á morgun fer José Mourinho með sína menn í heimsókn á The Hawthorns. Þar munu þeir etja kappi við Tony Pulis og lærisveina hans. Pulis hefur verið í fréttunum undanfarið útaf dómsmáli sem tengist veru hans hjá Crystal Palace.

Embed from Getty Images

Það verður þó ekki sagt að dómsmálið hafi haft áhrif á hans menn í West Bromwich Albion en þeir eru aðeins sæti neðar en Manchester United í töflunni, með fjórum stigum minna. Markatala liðanna er líka keimlík en W.B.A hefur skorað einu marki meira en fengið á sig tveimur mörkum meira en United liðið. Það er því hörkuleikru framundan!

West Bromwich Albion

Það er ekki beint hægt að segja að United hafi riðið feitum hesti gegn W.B.A á undanförnum árum. Forveri Mourinho, Louis van Gaal, vann aðeins einn af fjórum leikjum gegn Tony Pulis. Tveir þeirra töpuðust og í einum bjargaði Daley Blind stigi með marki í lokin.

Síðasti leikur gegn W.B.A á The Hawthorns fór einmitt 1-0 fyrir heimamönnum þar sem hinn stóri og stæðilegi Salomón Rondón skoraði sigurmarkið. Sóknarmaðurinn frá Venezuela hefur verið óstöðvandi í vetur og er kominn með sjö mörk í 16 leikjum í vetur.

Embed from Getty Images

Þar á meðal skoraði hann þrennu, öll með skalla, gegn Swansea City í síðasta leik. Tvö af mörkunum komu eftir fyrirgjafir frá Chris Brunt sem lék í stöðu vinstri bakvarðar svo það verður mikilvægt fyrir hægri vængmann United að pressa Brunt í hvert skipti sem hann fær boltann.

Meiðslalistinn hjá W.B.A er mjög stuttur en það er talið líklegt að fyrrum United maðurinn Jonny Evans gæti náð leiknum á morgun eftir að hafa verið meiddur gegn Swansea. Annars er varamarkvörðurinn Boaz Myhill meiddur ásamt því að Saido Berahino er of feitur til að spila í efstu deild. Hann er bókstaflega ekki leikfær því hann er ekki í standi til að spila samkvæmt Tony Pulis.

Embed from Getty Images

W.B.A kemur inn í þennan leik á fínu skriði eins og áður sagði. Þeir hafa unnið þrjá af síðustu fimm leikjum en þeir töpuðu 1-0 gegn Chelsea í leik sem þeir hefðu í raun átt að fá stig út úr en varnarmistök kostuðu þá. Síðan gerðu þeir klaufalegt 1-1 jafntefli við Hull City. Annars lögðu þeir bæði Swansea og Watford 3-1 ásamt því að pakka Burnley saman 4-0.

Tony Pulis spilar mikið á sama byrjunarliðinu og treystir hann sínum mönnum vel. Helsta breytingin fyrir morgundaginn gæti verið sú að Craig Gardner eða James McClean komi inn í liðið fyrir James Morrison. Sömuleiðis gæti Jonny Evans komið inn. Annars má búast við óbreyttu liði frá því gegn Swansea.

Manchester United

Það virðist sem okkar menn séu loksins að finna taktinn. Eftir að hafa fengið á sig enn eitt svekkjandi jöfnunarmarkið gegn Crystal Palace þá tókst United að finna sigurmarkið þökk sé frábæru slútti Zlatan Ibrahimovic eftir stórgóða sendingu Paul Pogba.

Embed from Getty Images

Það er einhver rosaleg tenging á milli þeirra og maður er hálf svekktur að Zlatan sé ekki fimm árum yngri svo þetta samstarf gæti blómstrað í framtíðinni.

United kemur inn í leikinn á góðu skriði eins og áður sagði. Liðið hefur ekki tapað í níu leikjum núna og tókst loksins að vinna tvo leiki í deildinni í röð en það hafði ekki gerst síðan í byrjun tímabils.

Sigurinn gegn Palace var jafn sætur og gegn Tottenham þó maður hefði viljað sjá liðið halda hreinu. Nú verður liðið samt að halda dampi en það verður að segjast að jólatörnin er góð við okkar menn í ár.

Eftir leikinn á morgun taka við heimaleikir gegn Sunderland og Middlesbrough áður en haldið verður á Ólympíuleikvanginn í London til að etja kappi við West Ham United enn einu sinni. Það má því alveg setja þá kröfu á liðið að ná í allavega 13 stig í þessum fimm leikjum, þó 15 stig ættu í raun að vera eina markmiðið.

Hvað varðar liðsuppstillingu á morgun þá gæti Mourinho freistast til að spila nánast sama byrjunarliði og gegn Palace því það eru níu dagar í næsta leik eftir þennan. Mig grunar þó að uppáhalds Belginn okkar allra komi inn í liðið til þess að gefa United aukna hæð gegn mótherja sem elskar fátt meira en að hengja einn langan upp í loftið og sjá hvað gerist.

Embed from Getty Images

Meiðslalistinn er svipaður og venjulega en Luke Shaw, Henrikh Mkhitaryan og Eric Bailly missa allir af leiknum en Chris Smalling er orðinn leikfær og verður líklega á bekknum.

Það því nokkuð ljóst að Antonio Valencia kemur aftur inn í hægri bakvörðinn fyrir Bailly en Valencia var í leikbanni gegn Palace. Stóra spurningin er hvort Daley Blind eða Matteo Darmian verði í vinstri bakverðinum. Ég myndi stilla Blind upp þar.

Leikurinn hefst klukkan 17:30 á morgun.