Rauðu djöflarnir

Samfélagsskjöldurinn

Zamfélagsskjöldurinn: Manchester United 2:1 Leicester City

skrifaði þann | 19 ummæli

 

SamfelagsskjoldurinnMourinho er búinn að vinna sinn fyrsta titil með Manchester United. Zlatan er búinn að skora sitt fyrsta mark fyrir Manchester United. Sigurmarkið í leiknum sem tryggir það að Manchester United eru meistarar meistaranna.

Liðið sem byrjaði leikinn fyrir United:

1
De Gea
23
Shaw
17
Blind
3
Bailly
25
Valencia
27
Fellaini
16
Carrick
11
Martial
10
Rooney
14
Lingard
9
Ibrahimovic

Varamenn: Romero, Rojo, Schneiderlin, Herrera, Mata, Mkhitaryan, Rashford

Byrjunarlið Leicester City:

1
Schmeichel
28
Fuchs
5
Morgan
6
Huth
17
Simpson
11
Albrighton
10
King
4
Drinkwater
26
Mahrez
9
Vardy
20
Okazaki

Það var mikið um dýrðir á Wembley í dag og ekki að undra, upphafspunkturinn á virkilega spennandi tímabili í enska boltanum sem nú er að hefjast. Titill í húfi og bæði lið búin að gefa það skýrt út að það yrði ekki litið á þetta sem neinn vináttuleik.

Leikurinn byrjaði nokkuð varfærnislega en Manchester United var miklu meira með boltann, eins og búast mátti við. Eftir tæplega 20 mínútna leik kom skilti sem sýndi að United hafði verið með boltann u.þ.b. 70% af leiktímanum. Það hafði þó ekki skilað sér í neinum mjög hættulegum marktækifærum. Martial átti góðan sprett af kantinum og skaut í hliðarnetið, Wayne Rooney átti skalla að marki sem olli Kasper ekki miklum vandræðum og Fellaini átti ágætt skot, eftir að Zlatan hafði keyrt yfir Wes Morgan og unnið skallabolta. Aftur varði hins vegar Kasper þótt hann hafi átt í aðeins meiri vandræðum með að halda boltanum í það skiptið.

En Leicester minntu þó á sig og litu oft hættulega út í skyndisóknum. Vardy ákvað að reyna duglega á nýja manninn í vörn United og keyrði grimmt á Eric Bailly þegar tækifæri gafst. Til að byrja með virkaði Bailly stundum óöruggur gegn honum og náði Vardy tvisvar að komast nokkuð auðveldlega framhjá Bailly. Í fyrra skiptið náði Blind að kovera vel fyrir hann og hreinsa með tæklingu. Í seinna skiptið gaf Vardy boltann áfram á Okazaki sem átti lúmskt skot sem fór af Blind og rétt framhjá stönginni. Úr þeirri hornspyrnu náði Okazaki fínum skalla sem endaði í markslánni. Hættulegasta færi leiksins til þessa.

En Bailly hristi þetta vel af sér og spilaði frábærlega eftir það. Blind var flottur við hliðina á honum og báðir bakverðirnir sprækir líka og duglegir að sigla upp teiginn þegar færi gafst. Martial og Lingard voru vinnusamir á köntunum, voru um tíma búnir að skipta um kanta og leituðu inn að miðju þegar færi gafst. Þannig var það einmitt á 32. mínútu þegar Lingard var kominn inn á miðjuna og tók á móti sendingu frá Rooney. Fyrir framan hann var þéttur pakki af varnarmönnum Leicester en Lingard blés á það og tók bara sprett framhjá hverjum varnarmanninum á fætur öðrum þar til hann var allt í einu kominn einn í gegn. Hann lét aðvífandi Kasper Schmeichel ekki slá sig útaf laginu heldur setti boltann laglega framhjá honum með góðu innanfótarskoti. 1-0 fyrir United, Jesse Lingard kann greinilega vel við sig á Wembley.

United kláraði síðan fyrri hálfleikinn nokkuð áreynslulítið. Mourinho lét alveg vera að breyta liðinu í hálfleik en Ranieri gaf 2 nýjum leikmönnum séns þegar Demarai Gray og Ahmed Musa komu inn á fyrir Albrighton og Okazaki. Leicester þurfti að jafna og áfram voru skyndisóknirnar þeirra hættulegustu vopn. Á 52. mínútu keyrðu þeir í eina slíka þar sem þeir freistuðu þess að koma fáti á vörn United. Marouane Fellaini, sem hafði annars átt ágætis leik en spilaði heldur djúpt, komst inn í sendingu Leicester. Hann ætlaði síðan að gefa boltann aftur á De Gea en sendingin var ekki betri en svo að hún endaði beint á Jamie Vardy sem þakkaði fyrir sig, sólaði De Gea og rúllaði boltanum í markið. Hrikaleg mistök hjá Fellaini þar. Mourinho vildi þó meina að vallaraðstæður ættu stóran þátt í þessum mistökum hjá Fellaini.

Stuttu síðar kom fyrsta skipting United í leiknum. Ander Herrera kom inn á. Líklega bjuggust flestir við því að Fellaini færi af velli en í staðinn var það Carrick sem fór af velli. Leicester svaraði með því að setja aðra 2 nýja leikmenn inn á. Frakkinn Nampalys Mendy og innkastsfallbyssan Luis Hernández komu þá inn á fyrir King og Simpson. Stuttu síðar varð markaskorarinn Jesse Lingard fyrir meiðslum og þurfti að fara af velli. Juan Mata kom inn á í hans stað. Það var leiðinlegt að sjá Lingard meiðast, fram að því hafði hann verið einn af bestu leikmönnum United í leiknum. En hann sagði sjálfur í viðtali eftir leikinn að meiðslin væru ekki alvarleg og að hann ætti að ná næsta leik.

Á 69. mínútu kom önnur tvöföld skipting hjá United þegar MR-ingarnir Rojo og Rashford komu inn á fyrir Shaw og Martial. Rojo fór beint í vinstri bakvörðinn, spurning hvort það verði þá hans hlutverk ef hann heldur áfram hjá United, að vera varaskeifa fyrir Shaw. Shaw hafði verið flottur í leiknum og Rojo stóð sig bara vel í hlutverkinu eftir að hann kom inn á.

Ranieri hefur líklega fylgst með íslenska landsliðinu á EM í Frakklandi því þegar sleggjan Hernández var kominn inn á breyttust nánast öll innköst á vallarhelmingi United í kunnugleg föst leikatriði sem greinilega voru þaulæfð. En Bailly og félagar stóðu sig betur í að verjast þeim en enska landsliðið í sumar. Ég myndi þó giska á að Leicester eigi eftir að ná í nokkur mörk eftir innköst í vetur.

Bailly fékk gult spjald eftir baráttu við Vardy, skulum kalla það öxl í öxl með smá kryddi. Vardy fékk síðan gult spjald fyrir harkalega tæklingu á Mata. Wayne Rooney náði að vinna boltann inn í markteig Leicester, gaf stutta sendingu á Zlatan sem var allt í einu í mjög góðu færi en hitti boltann illa svo það var engin hætta þar. Önnur skipting hjá Leicester, Schlupp inn á fyrir Fuchs. Leicester átti hættulegt innkast sem var flikkað áfram á Musa en hann skallaði yfir úr góðu færi.

Þá var kominn Zlatan-tími. Á 83. mínútu var Valencia með boltann úti á kantinum. Hann gaf sér ágætis tíma í að ákveða hvað hann ætti að gera næst. Ákvað svo að keyra upp að endamörkum svo hann gæti gefið fyrir með hægri. Síðan henti hann í þessa líka ljómandi fínu fyrirgjöf beint á Zlatan Ibrahimovic. Zlatan, sem að vísu hafði verið ogguponsu rangstæður þegar fyrirgjöfin kom, stökk miklu hærra en Wes Morgan og náði að skalla boltann. Skallinn var ekki fastur en góður var hann og lak framhjá Kasper Schmeichel, í stöngina og inn í markið. Zlatan var mættur á svæðið og fagnaði markinu vel

Á 87. mínútu fór fyrirliðinn Wayne Rooney af velli fyrir Morgan Schneiderlin. Stoðsendingakóngurinn Antonio Valencia tók þá við fyrirliðabandinu. Hann virtist bara nokkuð kátur með það.

Undir lokin henti Leicester allt í sóknina. Miðvörðurinn Huth var tekinn af velli fyrir sóknarmanninn Ulloa og Kasper Schmeichel var farinn að bruna fram í hornspyrnum. Mourinho ákvað að nota sína síðustu skiptingu til að vinna tíma og bæta smá hæð við liðið. Hann setti því hinn 177 cm háa  Mkhitaryan inn á og tók hinn 170 cm háa Juan Mata af velli. Mata hafði rétt komið inn á völlinn hálftíma áður.  Hætt er við því að það verði blásið upp í fjölmiðlum en Mourinho gerði lítið úr því (no pun intended) eftir leik, sagði einfaldlega að hann hefði þurft að taka minnsta leikmanninn af velli, ekkert flóknara en það.

Þetta dugði og Manchester United vann leikinn og skjöldinn. Fyrsti titill Mourinho með United. Fyrsti titill Zlatan með United. Flott byrjun á tímabilinu. Leikurinn var ekki frábær, hann bar mörg merki þess að vera fyrsti leikur tímabilsins og að United hefur ekki getað fengið alveg það undirbúningstímabil sem það hefði þurft. Enn og aftur vantaði upp á almennilegt flæði í sóknarleikinn og svo var eins og það vantaði eitthvað, einhvern herslumun, eitthvað púsluspil, inn í miðjuna hjá United. Eitthvað sem mætti kannski laga með eins og einum heimsklassa miðjumanni (#pogback). Wayne Rooney var ekki góður. Hann þarf að fara að spýta í lófana ef hann ætlar ekki að missa sitt pláss í liðinu.

En það voru líka ljósir punktar í leiknum. Zlatan skoraði gott mark. Jesse Lingard var frábær þar til hann meiddist. Allir 3 bakverðirnir voru flottir og Blind var solid. Maður leiksins var samt Eric Bailly. Hann hikstaði kannski smávegis í byrjun leiks en var þvílíkt flottur eftir það. Sterkur í föstum leikatriðum, gríðarsterkur í návígjum, fljótur og með fínan leikskilning auk þess sem hann er öruggur á boltanum og virðist vera nokkuð jafnfættur. Hann er vissulega ungur ennþá og reynslulítill, hann mun líklega gera mistök en það er efniviður í eitthvað virkilega öflugt í þessum gutta.

FélagaskiptiSamfélagsskjöldurinn

Samfélagsskjöldurinn 2016: Leicester City gegn Manchester United

skrifaði þann | 8 ummæli

SkjöldurinnÞað er komið að því að henda þessu tímabili í gang. Þrátt fyrir að Evrópumót karlalandsliða hafi svo sannarlega hjálpað til við að stytta biðina í sumar þá getur maður ekki sagt annað en: loksins! Samkvæmt hefðinni byrjar tímabilið á Samfélagsskildinum, leiknum þar sem skorið er úr um hvaða lið er meistari meistaranna. Deildarmeistarar Leicester City gegn bikarmeisturum Manchester United.

Manchester United vann enska bikarinn. Það var auðvitað ekkert nema frábært. Sérstaklega á þann hátt sem liðið gerði það. Tvisvar var liðið með bakið rækilega upp við vegginn, fyrst þegar United lenti undir og skammt eftir af leiknum. En þá brettu leikmenn upp ermarnar og náðu í jöfnunarmark. Svo aftur í framlengingu þegar United missti leikmann af velli. Það skipti engu, United vann bara samt. Karakter!

Undirbúningstímabilið hjá Manchester United hefur ekki verið alveg eins og best er á kosið. Eins gott og EM2016 (*búmm* *búmm* HÚH!) var fyrir okkur fótboltaglápendur þá raska svona stórmót iðulega undirbúningsvinnu félagsliðanna, sérstaklega hjá liðum sem eiga marga leikmenn sem komast langt í stórmótinu og þurfa því frí lengra inn í sumarið. Þessi ferð til Kína var síðan ekki til að bæta á það, aðstæðurnar ömurlegar í flesta staði og missa svo út einn af æfingaleikjunum. En það er þá gott að fá þennan leik til að gefa leikmönnum fleiri mínútur.

Leicester City komu öllum á óvart síðasta vetur með því að vinna ensku deildina. Og það m.a.s. frekar sannfærandi. Allan veturinn var beðið eftir því að Leicester-blaðran myndi springa, að liðið myndi missa dampinn og að önnur lið myndu læra inn á Leicester og stöðva sigurgönguna. En það bara gerðist ekki, eina liðið sem lærði almennilega á Leicesterliðið var Leicesterliðið sjálft, þegar hægðist á markaskorun þá einfaldlega þétti liðið vörnina hjá sér og fann sífellt lausnir þegar á reyndi. En þetta var nú örugglega bara one season wonder, er það ekki? Það er allavega það sem flestir búast við. Sem er kannski akkúrat eins og Leicester vill hafa það.

Leicester missti ekki alveg jafn marga leikmenn í EM eins og Manchester United. Á meðan 10 leikmenn United fóru til Frakklands fóru 4 frá Leicester. Hefðu getað verið 5 en af einhverjum ástæðum ákvað Roy Hodgson bara að skilja Danny Drinkwater eftir heima (HAHAHAHA!). Einn þessara 4 leikmanna var Frakkinn N’Golo Kanté sem er nú farinn til Chelsea. En Leicester hefur að mestu náð að halda í sína sterkustu leikmenn (allavega ennþá) þótt það sé vissulega mjög stórt skarð að fylla þegar Kanté er horfinn á braut. En á móti hafa þeir fengið annan Frakka, Nampalys Mendy. Honum hefur verið líkt við Makélélé, það er alls ekki slæmt. Auk þess hafa þeir fengið nígeríska sóknarmanninn Ahmed Musa. Hann keyptu þeir á metupphæð fyrir Leicester, 16,6 milljón pund (það hefði dugað sem metupphæð hjá Manchester United fram að júní 2001 þegar Ruud van Nistelrooy kom á 19 milljón pund).

Manchester United hefur unnið samfélags-/góðgerðarskjöldinn oftast allra liða, alls 20 sinnum. United vann fyrstu viðureignina um skjöldinn, árið 1908, og það var í eina skiptið sem leiknir voru 2 leikir til að fá niðurstöðu í málið eftir að fyrri leikurinn endaði með jafntefli. Eftir það sögðu reglurnar einfaldlega að lið deildu titlinum ef leikurinn endaði með jafntefli. Því var svo skipt út síðar fyrir vítaspyrnukeppni, enda er ekkert alltof mikið stuð að deila titli með öðru liði, sérstaklega ef það lið er t.d. Liverpool. United hefur 4 sinnum þurft að deila skildinum en 16 sinnum setið eitt að honum. Næstu lið á eftir eru Liverpool með 15 sigra (10 sinnum unnið, 5 sinnum deilt með öðru liði) og Arsenal með 14 (13 sinnum unnið, 1 sinni deilt).

Frá því Manchester United vann úrvalsdeildina fyrst, árið 1993, og þar til Sir Alex Ferguson lagði knattspyrnustjóratyggjóið á hilluna tók Manchester United þátt í 15 leikjum af 20 um góðgerðar-/samfélagsskjöldinn. Liðið vann 9 þeirra en tapaði 6. Af þessum 15 leikjum fóru 6 í vítaspyrnukeppnir, þar sem United vann fyrstu 5 en tapaði svo fyrir Chelsea í vító árið 2009. Mourinho hefur ekki náð jafngóðum árangri í þessari „keppni“. Hann hefur 4 sinnum tekið þátt með Chelsea, tapað 3 sinnum og unnið 1 sinni (2-1 sigur á Arsenal árið 2005).

Leicester City hefur einu sinni tekið þátt í leiknum um skjöldinn áður. Það var árið 1971. Það ár hafði að vísu Arsenal unnið tvöfalt en gat svo ekki tekið þátt í þessari viðureign vegna þess að liðið hafði samið um að spila leiki í æfingaferðalagi á sama tíma. Leicester City, sem hafði unnið 2. deildina um vorið, var því boðið að taka þátt í leiknum í staðinn og spila gegn Liverpool sem hafði tapað fyrir Arsenal í úrslitaleik enska bikarsins. Leicester gerði gott betur en að taka þátt því þeir unnu Liverpool og hömpuðum skildinum það ár.

Dómarinn í þessum leik verður Craig Pawson. Hann er nokkuð ungur dómari, fæddur árið 1979, en hefur þó verið að dæma fótboltaleiki síðan 1993. Hann hefur dæmt í úrvalsdeildinni síðan 2013. Hann hefur til þessa dæmt 7 leiki hjá Manchester United og hefur United ekki enn tapað leik þegar hann er á flautunni. 5 sigrar (m.a. 3-2 sigur gegn Arsenal á síðasta tímabili) og 2 jafntefli. Merkilegt nokk þá kom hann nærri báðum leikjum þessara liða í deildinni á síðasta tímabili. Hann dæmdi þann fyrri, sem fram fór í Leicester, en var svo 4. dómarinn á Old Trafford. Báðir þessir leikir enduðu 1-1.

Leicester hefur getað spilað á nokkurn veginn sterkasta liðinu sínu í undirbúningnum. Bæði þeir sem fóru á EM (utan Kanté auðvitað) og nýju leikmennirnir hafa getað spilað 1-4 undirbúningsleiki. Þessi leikur hefur oft verið kallaður uppblásinn (e. glorified) vináttuleikur en báðir stjórar hafa blásið á slíkar fullyrðingar. Ranieri:

Og Mourinho sagði á móti að leikurinn við Leicester væri ekki æfingaleikur heldur alvöru leikur sem hann vildi vinna. Þetta er í fyrsta skiptið sem United fer í leik um Samfélagsskjöldinn síðan árið 2013 þegar United vann Wigan í fyrsta alvöru leiknum undir stjórn nýs stjóra. Nú er svipuð staða upp á teningnum en það er samt ærin ástæða til að vera spenntari fyrir nánustu framtíð núna en fyrir 3 árum.

Ég held að byrjunarliðið verði svipað og byrjaði gegn Everton. Það eru auðvitað nokkur spurningamerki, sérstaklega þar sem þetta er undirbúningsleikur og allt það. Ég myndi halda að Mkhitaryan kæmi inn fyrir Lingard. Smalling og Fosu-Mensah fá mínútur en þar sem þeir hafa verið meiddir (auk þess sem Smalling missir af leiknum í 1. umferð í deildinni hvort sem er) þá held ég að þeir byrji ekki heldur komi frekar inn á. Svo er spurning með öftustu 2 miðjumennina. Ég held að þar sé Carrick enn það besta sem United hefur, þegar þessi uppstilling er spiluð. Svo er spurning hver verður með honum. Pogba kemst ekki, hann er enn fastur í limbói í landi hinna eilífu 48 klukkustunda svo það verður að bíða betri tíma. Schneiderlin gæti auðvitað byrjað, eða jafnvel Fellaini. Bastian kemur víst ekki til greina, Mourinho er búinn að gera það alveg skýrt. Ætla að tippa á Herrera þar.

1
De Gea
23
Shaw
17
Blind
3
Bailly
25
Valencia
21
Herrera
16
Carrick
11
Martial
10
Rooney
22
Mkhitaryan
9
Ibrahimovic

Leikurinn hefst klukkan 15:00 að íslenskum tíma.

Lesefni

Djöfullegt lesefni: 2016:11

skrifaði þann | 1 ummæli

Af hverju öll þessi svörtu vesti á æfingum?

Adam Bate ræddi við Paul McGuinness, fyrrum þjálfara Paul Pogba, um tímann þegar Pogba var í akademíu United.

Johanna Franden sýnir okkur hvernig Zlatan mun hjálpa öllu liðinu að verða betra.

Crespo með pistil um sína reynslu af að vinna með Mourinho og Zlatan og hvað hann telur að þeir geti komið með til United.

Kaup United á Pogba yrðu fyrsta skrefið í að sýna að Enska úrvalsdeildin er að ná Real og Barcelona í fjárhagslegum styrkleika.

Sir Alex gaf gó á kaupin á Pogba.

Miguel Delaney segir að Meistaradeildin er ekki lengur nauðsynleg til að kaupa bestu leikmennina.

Ítalskir og spænskir klúbbar öfunda ensku deildina af peningunum og vilja breyta Meistaradeildinni til að auka sjónvarpstekjur.

Wayne Rooney spjallaði um tapið gegn Íslandi, Jose Mourinho og nýju liðsfélagana hjá United í ítarlegu einkaviðtali.

David Moyes kvartaði nýlega yfir framkomu United gagnvart sér. Scott hjá ROM var ekki par sáttur við þau orð og svaraði þeim. Moyes er svo víst að eltast við Fellaini og Januzaj.

Jaap Stam, nýráðinn stjóri Reading, var í ítarlegu viðtali við The Guardian. Manchester United var aðalumræðuefnið.

Tölfræðingarnir hjá WhoScored spá United 2. sæti á komandi tímabili (PDF, 19.4MB).

Daniel Storey skrifaði grein um hvað kaupverð á leikmönnum skipti nákvæmlega engu máli.

Wayne Rooney þarf að berjast fyrir framtíð sinni hjá United að mati greinarhöfundar Independent.

Rooney og sonur hans Kai hlógu að frekar máttlítilli tilraun Memhis til þess að skora með hjólhestaspyrnu í góðgerðarleiknum gegn Everton.

Greg Johnson telur það vera rétta ákvörðun hjá Mourinho að selja Schweinsteiger en Scott hjá ROM kom hinsvegar með nokkrar ástæður af hverju við ættum að halda í kappann.

Kevin Strootman er enn á ný á leið til baka eftir þriðju erfiðu meiðslin á tveimur árum.

Myndband vikunnar

Gott vídeó fyrir Memphis að stúdera…
https://twitter.com/FA/status/761479240437071872?ref_src=twsrc%5Etfw

Æfingaleikir

Heiðursleikur Wayne Rooney: Manchester United 0-0 Everton

skrifaði þann | Engin ummæli

Klukkan 19 í kvöld mættust Everton og Manchester United á Old Trafford í sérstökum góðgerðarleik til heiðurs Wayne Rooney.

Byrjunarliðin voru svona

De Gea
Shaw
Blind
Bailly
Valencia
Carrick
Herrera
Lingard
Rooney
Martial
Zlatan

Bekkur: Johnstone, Romero, Darmian, Jones, Rojo, Fellaini, Mata, Mkhitaryan, Schneiderlin, Young, Memphis og Rashford

Hjá Everton spiluðu:
Stekelenburg, Coleman, Baines, Funes Mori, Stones, Holgate, McCarthy, Barry, Barkley, Deulofeu og Lukaku. Og á bekknum eru: Joel, Oviedo, Galloway, Gibson, Cleverley, Besic, Davies, Kone, Mirallas, Lennon.

 

Það gerðist lítið sem ekki neitt í þessum leik sem endaði 0-0. Menn munu líklega helst minnast þessa leiks fyrir að vera fyrsti leikur Mourinho á Old Trafford sem stjóri Manchester United. Auk þess var leikurinn sýndur í beinni á Facebook sem er nú ansi fínt. Það er einmitt hægt að horfa á leikinn aftur hér í spilaranum fyrir neðan. Að öðru leyti er vart hægt að eyða frekari orðum á þennan leik.

Ekki eru fleiri vináttuleikir á dagskrá en um helgina fer fram leikurinn um samfélagsskjöldinn fræga. Þar mæta bikarmeistarar United Englandsmeisturum Leicester. Leikurinn er á sunnudaginn og hefst klukkan 15.00.