Rauðu djöflarnir

Enska úrvalsdeildin Leikmenn Pistlar Yngri liðin

Kjúklingarnir frá Manchester

skrifaði þann | 5 ummæli

Eftir að hafa lent í gífurlegum meiðslum á síðasta tímabili tók Louis Van Gaal þá ákvörðun að það væri betra að skera hópinn niður. Þrátt fyrir að liðið væri að fara í Meistaradeildina og reikna mátti með að hörmungin gegn Mk Dons myndi ekki endurtaka sig. Því kom það mörgum á óvart að Van Gaal ætlaði sér að minnka hópinn, sérstaklega eftir meiðslavitleysuna sem átti sér stað í fyrra.

Framan af tímabilinu virtist sem þetta hefði verið hárrétt ákvörðun, einu meiðslin framan af vetri voru þrír varnarmenn. Luke Shaw fótbrotnaði í leik gegn PSV í Meistaradeildinni, Antonio Valencia þurfti að fara í aðgerð sökum þrálátra meiðsla og Marcos Rojo var sendur í aðgerð eftir að hafa farið aftur úr axlarlið. Þetta voru í rauninni allt meiðsli sem Van Gaal gat ekki haft áhrif á, en á síðasta tímabili voru flest öll meiðsli liðsins svokölluð vöðvameiðsli, sem gerðust á æfingu.

Þegar þetta er skrifað eru sex leikmenn sem spiluðu í áðurnefndum leik gegn PSV á meiðslalistanum. Það virðist því sem breyttar æfingaraðferðir Van Gaal hafi ekki verið nóg. Hvort um sé að ræða ofspilun á tilteknum leikmönnum er ekki mitt að segja en núna í febrúar voru allt í einu komnir 14-15 leikmenn á meiðslalistann. Verandi með lítinn hóp hefur Van Gaal þurft að teygja sig ofan í unglingastarf félagsins og hefur hann dregið hverja kanínuna á fætur annarri upp úr hattinum.

Hér að neðan rennum við yfir þá leikmenn liðsins sem höfðu ekki spilað fyrir félagið fyrr en í vetur en flestir þeirra eru það ungir að þeir eru ekki með sína eigin Wikipedia síðu og margir þeirra varla spilað fyrir u21 lið Manchester United. Tekið skal fram að greinin var skrifuð áður en Juan Mata tryggði liðinu 1-0 sigur á Watford í gær.

Markmenn

Þrátt fyrir að hafa ekki spilað þá hafa tveir ungir markmenn félagsins verið á bekknum núna undanfarið. Eftir að David De Gea meiddist á hné gegn Midtjylland í Evrópudeildinni þurfti Svissneski Portúgalinn Joel Castro Pereira (f. 1996) að skella sér á bekkinn á meðan Romero stóð í búrinu. Þar sem Pereira hafði spilað í FA bikarnum með Rochdale fyrr í vetur þá var ákveðið að kalla Dean Henderson (f. 1997) úr láni frá Stockport County. Þrátt fyrir að allir þjálfarar beggja markmanna tali einstaklega vel um þá þá er ekki líklegt að þeir eigi mikla framtíð fyrir sér hjá félaginu, nema þá sem varamarkmenn fyrir David De Gea.

Varnarmenn

Meiðslalisti félagsins byggist að mestu á varnarmönnum, svo skiljanlega hafa þó nokkuð margir varnarmenn fengið að spreyta sig í vetur.

Cameron Borthwick-Jackson

Einn af þeim fyrstu sem fékk að spreyta sig var Cameron Borthwick-Jackson (f. 1997) en hann kom inná fyrir Marcos Rojo í 2-0 sigri gegn West Bromwich Albion þann 7. nóvember 2015. Síðan þá hefur fengið að spreyta sig reglulega og var hann í byrjunarliðinu gegn Wolfsburg í leiknum sem flestir vilja gleyma.

Eftir gífurlega þroskaðar frammistöður ásamt því vera með eitraðar fyrirgjafir hafa menn velt fyrir sér af hverju drengurinn fékk ekki sénsinn strax eftir að Shaw og Rojo duttu út en hann hefur staðið sig mjög vel þrátt fyrir að vera aðeins á öðru tímabilinu sínu með u21 liði félagsins. Það helsta sem menn geta sett út á drenginn er undarlegur hlaupastíll en það gleymist fljótt ef frammistöðurnar verða svipaðar og undanfarið.

Guillermo Varela

Annar bakvörður sem fékk eldskírn gegn Wolfsburg er Guillermo Varela (f. 1992), hægri bakvörður frá Úrúgvæ sem minnir um margt á minn ástkæra Rafael. Varela á þann vafasama heiður að vera fyrstu kaup David Moyes sem stjóra félagsins. Í fyrra var hann lánaður til varaliðs Real Madrid þar sem Zinedine Zidane hrósaði honum í hástert.

Eftir mikla bekkjarsetu þá kom Varela mjög sterkur inn gegn Derby og sýndi svo gífurlegan þroska og yfirvegun í leiknum gegn Arsenal en eftir að hafa fengið gult spjald eftir aðeins 9 mínútur bjuggust margir við því að Alexis Sanchez myndi gera honum lífið leitt en Varela tók Sanchez og stakk honum hreinlega í rassvasann.

Michael Carrick, sem spilaði við hlið Varela í vörninni, ákvað að minnast sérstaklega á frammistöðu drengsins eftir leikinn. Hans helstu kostir eru svipaðir og hjá Rafael en hann er mjög góður sóknarlega en varnarlega er fullt sem má bæta. Sem stendur finnst höfundi hann þó talsvert betri kostur en Antonio Valencia eða Ashley Young.

Timothy Fosu-Mensah

Í áðurnefndum leik gegn Arsenal fór Marcos Rojo útaf fyrir leikmann að nafni Timothy Fosu-Mensah (f. 1998) inná. Hans fyrsti leikur gegn liðinu sem var í 2. sæti í deildinni en Fosu-Mensah virtist slétt saman og átti í rauninni frábæra innkomu. Drengurinn kom frá Ajax sumarið 2014 og hefur spilað með u18 og u21 liðinu síðan þá.

Þrátt fyrir að hafa komið inn á í vinstri bakvörð gegn Arsenal þá hefur hann spilað þó nokkrar stöður síðan hann kom til Englands. Hann hefur spilað allar stöður í vörninni, ásamt því að hafa verið djúpur á miðju bæði fyrir United og Holland.

Hann er meira að segja það fjölhæfur að hann hefur leyst af í holunni svokölluðu en sem stendur virðist sem hans besta staða sé í vinstri bakverði eða hafsent. Hans helstu kostir eru helst þeir að drengurinn minnir á fullvaxta karlmann frekar en 18 ára gutta. Eitthvað segir mér að hann og Memphis gætu orðið fínustu vinir í lyftingarsalnum.

Joe Riley

Í leiknum gegn Shrewsbury þá kom Joe Riley (f. 1996) inn á fyrir Borthwick-Jackson í hálfleik. Verandi á sínu fyrsta tímabili með u21 liðinu þá tók það hann smá tíma að finna sína stöðu en í mjög góðu liði þá endaði þessi réttfæti leikmaður sem hefur spilað bakvörð, hægri kant og miðju í vinstri bakverði! Þrátt fyrir það þá hefur hann fengið mikið lof frá þeim sem fylgjast vel með u21 félagi liðsins á Twitter.

Verandi sóknarsinnaður leikmaður að upplagi þá hentar það honum vel að spila bakvörð með u21-liði sem vill helst spila blússandi sóknarbolta. Það kemur því ekki á óvart að hann hafi byrjað í 5-1 sigrinum á Midtjylland þar sem United varð hreinlega að vinna. Þar spilaði hann 79 mínútur áður en Rojo kom aftur til baka úr axlarmeiðslunum sínum.

Donald Love

Eftir að hafa byrjað tímabilið á láni hjá Wigan í League One (Þriðju efstu deild) þá kom hinn 21 árs gamli Donald Love (f. 1994) inná þegar Matteo Darmian meiddist gegn Sunderland. Fékk Love annan séns gegn Midtjylland í Danmörku en því miður fyrir hann þá töpuðust báðir þessir leikir og í síðasta u21 leik þá meiddist hann og má því reikna með að hann fái ekki marga sénsa í framtíðinni. Hann var samt sem áður í miklum metum hjá Warren Joyce og Paul McGuinnes en Love var mjög fjölhæfur og hafði spilað þó nokkrar stöður áður en það var ákveðið að festa hann í hægri bakverði.

Regan Poole

Á einhvern ótrúlegan hátt taldi akademía Cardiff að Regan Poole (f. 1998) væri ekki nægilega góður og losuðu sig við hann. Eftir það fór hann á reynslu bæði hjá Liverpool og United, á jafn ótrúlegan hátt endaði hann í Newport County þar sem hann spilaði 15 leiki í League Two (Fjórðu efstu deild) áður en United keypti hann þaðan.

Það tók sinn tíma fyrir hann að fá alþjóðlega leikheimild en þegar það komst í gegn þá var Poole skráður í leikmannahóp United, bæði fyrir deild og Evrópudeildina en kom Poole, sem hefur verið United aðdándi frá blautu barnsbeini, inn á fyrir Ander Herrera í títtnefndum 5-1 sigri á Midtjylland. Þrátt fyrir að hafa komið inn á miðjuna þá er Poole að upplagi varnarmaður, spurning hvar United sjá hann fyrir sér í framtíðinni.

Miðjumenn og framherjar

James Weir

Eftir frábæra frammistöðu gegn Arsenal var Herrera tekinn útaf í lok leiks fyrir James Weir (f. 1995). Hann er einn af mörgum fínum miðjumönnum sem hefur komið upp úr akademíu félagsins en því miður virðist sem fæstir séu alveg í þeim klassa sem menn vilja sjá frá miðjumönnum United.

En sumir blómstra seinna en aðrir og er Danny Drinkwater gott dæmi um einn slíkan. Hvað varðar Weir þá er hann metinn mikils hjá þjálfurum félagsins og talið að hann eigi bjarta framtíð fyrir sér. Hann er sóknarsinnaður miðjumaður með gott auga fyrir spili og mjög góður að slútta.

Marcus Rashford

SÍÐAST EN EKKI SÍST þá er það drengurinn, undrið og kraftaverkið Marcus Rashford (f. 1998). Eftir gífurleg meiðsli í framlínu liðsins þá var Rashford hent í byrjunarliðið í téðum 5-1 sigri á Midtjylland eftir að Martial meiddist í upphitun. Fæstir vissu hver Rashford var enda hefur hann aðeins byrjað u21 leiki í vetur og er í raun ennþá í u18 liði félagsins. Okkar manni var eiginlega slétt sama um það og ákvað að smella í tvo mörk og hjálpa við að koma United áfram í Evrópudeildinni.

Ekki nóg með það heldur var Rashford aftur í byrjunarliðinu gegn Arsenal. Bjuggust fæstir við því að drengurinn myndi eiga séns gegn hafsentapari sem innihélt Gabriel, oftar en ekki kenndur við mannætu, og Laurient Koscielny sem er af mörgum talinn einn besti hafsent deildarinnar í dag.

Enn og aftur þá var Rashford alveg drullu sama, hann heimtaði boltann, hann keyrði á vörnina hjá Arsenal og var næstum búinn að fiska víti með góðu hlaupi. Hann stoppaði reyndar ekki þar heldur kom hann United yfir í leiknum með mjög yfirveguðu slútti eftir að boltinn datt til hans í teignum. Það var reyndar ekki nóg og nýtti hann fyrirgjöf frá Jesse Lingard til hins ítrasta þegar hann stangaði knöttinn í netið framhjá Petr Cech.

Til að fullkomna nú þegar fullkominn leik þá stakk hann sér innfyrir vörn Arsenal eftir sendingu frá Juan Mata, hélt boltanum og lagði hann svo út á Herrera sem kom United í 3-1.

Enska úrvalsdeildin

Manchester United 1:0 Watford

skrifaði þann | 16 ummæli

Erfiður en alveg afskaplega mikilvægur sigur á Watford staðreynd. Juan Mata skoraði sigurmarkið á 83. mínútu. Liðin fyrir ofan okkar töpuðu öll stigum í þessari umferð þannig að United nær að saxa vel á.

Skoðum hvernig leikurinn gekk fyrir sig.

Byrjunarliðið var svona ca. eins og búist var fyrir utan það að Timothy Fosu-Mensah byrjaði leikinn í fyrsta sinn á sínum United-ferli. Juan Mata bar fyrirliðabandið og Marcus Rashford, Memphis og Martial mynduðu framlínu United. Þetta var ansi ungt lið og ekki var bekkurinn eldri.

1
De Gea
5
Rojo
51
Fosu-Mensah
17
Blind
30
Varela
28
Schneiderlin
21
Herrera
7
Memphis
8
Mata
9
Martial
39
Rashford

Bekkur: Romero, McNair, Darmian, Riley, Lingard, Rothwell, Weir.

Watford

Gomes; Nyom, Britos, Prödl, Holebas; Capoue, Watson, Behrami; Abdi, Deeney, Ighalo.

Bekkur: Pantilimon, Cathcart, Paredes, Ake, Suarez, Anya, Amrabat.

Fyrri hálfleikur

Leikurinn byrjaði nokkuð rólega. Bæði lið voru að þreifa fyrir sér og þetta var svona hin klassíska stöðubarátta fyrsta korterið. Watford-menn voru þó örlítið skeinuhættari og fékk Ighalo tvö hálffæri, fyrst eftir lélega sendingu frá Fosu Mensah og svo aftur eftir slappa sendingu frá Blind.

Fyrir utan þetta var ekkert endilega hægt að sjá að Fosu-Mensah væri að spila sinn fyrsta byrjunarliðsleik fyrir United. Hann átti nokkrar mjög góðar tæklingar, sérstaklega á 20. mínútu þegar Ighalo prjónaði sig í gegnum vörnina en okkar maður gjörsamlega át hann í tæklingunni inn í teignum og náði boltanum af framherjanum hættulega.

Skömmu áður hafi Schneiderlin átt besta færi og líklega eina færi United í fyrri hálfleik. United fékk aukaspyrnu á kantinum eftir að Rashford gerði vel í að komast framfyrir varnarmann Watford. Mata gaf fyrir og boltinn barst út í teiginn til Schneiderlin sem tók hann viðstöðulaust. Boltinn rétt smaug framhjá stönginni og þetta var í raun bara millimetraspursmál.

Eftir þetta kom smá hraði í leikinn og United komst nokkrum sinnum í hættulegar stöður án þess þó að mikið kæmi út úr því. Memphis átti tvo hrottaleg skot eftir að hafa gert vel fyrir utan teiginn. Það var mjög hvasst á Old Trafford í kvöld og það spilaði sína rullu, í það minnsta í fyrri hálfleik.

Um miðbik hálfleiksins náði samt Watford tökum á leiknum. Í fyrsta lagi lokuðu miðjumennirnir gríðarlega vel á sóknarbyggingu United þannig að hún fjaraði út í nánast hvert skipti og aftur og aftur þurftu varnar- og miðjumenn okkar að negla boltanum fram án þess að neitt kæmi úr því.

Gestirnir voru svo mjög skeinuhættir í skyndisóknum og voru í tvígang mjög nærri því að skora og í bæði skiptin var það Ighalo.

Á 37. mínútu slapp hann í gegn eftir innkast að mér sýndist. Rojo var sofandi í bakverðinum og Ighalo náði að stinga sér í gegn. Fosu-Mensah gerði hinsvegar gríðarlega vel í því að hlaupa hann uppi og náði unglingurinn okkar að þröngva Ighalo í þröngt færi sem David de Gea gat varið.

Á 42. mínútu varð svo misskilningur á milli Blind og De Gea sem varð til þess að Ighalo, sem var mjög öflugur í fyrri hálfleik, komst einn á móti De Gea en Spánverjinn varði feykilega vel.

Staðan var hinsvegar 0-0 í hálfleik og manni leist ekki á blikuna enda saga þessa tímabils að þegar United er slakt í fyrri hálfleik er það slakt í seinni hálfleik.

Seinni hálfleikur

Hálfleikurinn hófst raunar eins og sá fyrri endaði. Watford menn voru gríðarlega þéttir og náðu að stoppa alla sóknaruppbyggingu United. Þeir pressuðu grimmt á vörn United og strax á 46. átti Blind, í þriðja sinn í leiknum, skelfilega sendingu sem varð til þess að Ighalo fékk boltann einn inn í vítateig United. Að þessu sinni var þó Fosu Mensah mættur og náði að trufla Ighalo nægilega.

Rashford bjargaði svo á línu þegar Sebastian Prödl skallaði að marki eftir hornspyrnu. Þetta leit ekkert sérstaklega vel út fyrir United.

Louis van Gaal er þó eldri en tvævetur í bransanum og hann setti Rashford úti á hægri kant og Martial upp á topp í kringum 60. mínútu og þá fóru hlutirnir að gerast.

Aftur og aftur keyrði Rashford á bakvörðinn sem var í stökustu vandræði með hann. Við þetta virtist United skipta upp um gír og United tók öll völd á vellinum.

United tókst reyndar ekki að skapa sér afgerandi færi en loksins tókst að þrýsta Watford niður á völlinn og það varð til þess að á endanum skoraði United mark. Áður en það kom fékk Mata gott skotfæri inn í teignum og skömmu áður hafði Gomes varið vel eftir að Mata átti bylmingsskot fyrir utan teiginn. Þetta var miklu betra frá United og markið lá í loftinu.

Það kom hinsvegar ekki fyrr en á 83. mínútu þegar Martial, sem hafði frekar hægt um sig í leiknum, fiskaði aukaspyrnu fyrir utan teiginn. Það var fyrirliðinn sjálfur Juan Mata sem steig upp og skoraði líklega eitt af mikilvægustu mörkum tímabilsins beint úr aukaspyrnu. Alveg stórkostlegt mark.

Skömmu áður hafði Watford verið nærri því að skora þegar Prödl skallaði boltann nanómillimetra framhjá stönginni. United sigldi svo sigrinum heim fyrir rest.

Hvað þýðir þessi sigur?

Í stuttu máli. United er hreinlega aftur komið í baráttuna um efstu fjögur sætin. Manchester City tapaði, Arsenal tapaði, Tottenham tapaði og Leicester gerði jafntefli. Við erum búin að jafna City að stigum sem á reyndar leik til góða. Svona er staðan í deildinni.

Screen Shot 2016-03-02 at 22.20.48

Allt í einu munar bara 4 stigum upp í 3. sæti og 7 stigum upp í 2. sætið. United is back in business!

Nokkrir punktar og pælingar

Marcus Rashford

Það er í raun honum að þakka að United vann þennan leik. Það var hans kraftur og hans áræðni, hans hræðsluleysi við að hlaupa á varnarmenn sem kveikti í United í seinni hálfleik. Það hafði raun ekki mikið sést til hans í fyrri hálfleik þegar hann var frammi en það var afskaplega vel gert hjá Louis van Gaal að færa hann á hægri kantinn, það breytti í leiknum. Framtíðin er hans.

Timothy Fosu Mensah

Hann komst merkilega klakklaus frá þessum leik og var í raun mun betri en samherji hans í miðvarðarstöðunni Daley Blind. Fosu Mensah kom Blind raunar til bjargar í tví- eða þrígang eftir slakar sendingar Hollendingsins. Okkar maður var að spila sinn fyrsta byrjunarliðsleik og stóð sig virklega vel þó auðvitað hafi hann gert sín byrjendamistök. Heilt yfir var þetta þó mjög jákvæð frammistaða. Það er líka mikill kostur að maðurinn er byggður eins og skriðdreki og ótrúlega snöggur í þokkabót.

Seiglusigur

United spilaði þennan leik í raun ekkert sérstaklega vel. Watford-menn komust í góð færi og með smá heppni ef þeir átt að ná forystu í leiknum. United var dapurt í fyrri hálfleik og þegar hefur gerst á tímabilinu hefur sú frammistaða smitast yfir í seinni hálfleikinn.

Ekki í þetta sinn. Það má hrósa leikmönnum United fyrir að stíga upp í seinni og sækja þennan ótrúlega mikilvæga sigur. Þetta var vinnslusigur og lið þurfa að eiga nokkra svona á hverju tímabili ætli þau sér eitthvað. Það er ekki hægt að yfirspila andstæðinginn í hverjum leik. Manni finnst eins og United vinni bara leikina þegar það spilar vel og það er styrkleikamerki að sigla sigrinum heim þrátt fyrir að hafa ekki verið að spila neitt frábærlega.

Ég ætla að enda þetta á tveimur tístum sem mér finnst eiga vel við stöðuna eins og hún er í dag.

Það er mikið til í þessu. Það er aftur orðið gaman að horfa á United spila. Eins og ég sagði áðan var United ekkert að spila neitt frábærlega í kvöld en það er allt annað yfirbragð yfir öllu hjá United. Hlekkirnir eru farnir af liðinu og menn spila með meira frjálsræði. Það er uppsveifla í gangi hjá United og ef liðinu tekst loksins að halda þessari sigurhrinu áfram gæti tímabilið endað á hinn þokkalegasta hátt.

Það er líka margt til í þessu. Og það er hægt að horfa lengra aftur í tímann. United gekk í gegnum eitthvað það daprasta tímabil sem ég hef orðið vitni að sem stuðningsmaður í nóvember og desember. Ímyndið ykkur ef 1-2 af þeim leikjum hefðu unnist. 

Allavega. Fjórir sigurleikir í röð, leikmenn úr akademíunni að brillera. Þetta er United eins og það á vera og við viljum meira svona.

Enska úrvalsdeildin

Watford sækir Old Trafford heim

skrifaði þann | 4 ummæli

Leikirnir koma hreinlega á færibandi þessa dagana alveg nákvæmlega eins og það á að vera þegar komið er fram í það sem menn kalla ‘The business end‘ tímabilsins.

Það er nokkuð bjart yfir okkar mönnum þessa dagana eftir það sem ég vil meina að sé besti sigur United frá þvi að Sir Alex Ferguson steig til hliðar. Það var eitthvað við það að sjá alla þessa krakka sem hafa verið hjá United frá 7-8 ára aldri pakka einu sterkasta Arsenal-liði seinni ára saman.

Ólíkt því sem Woodward heldur þá er það þetta, ungir uppaldir leikmenn, sem félagið snýst um og allt það sem félagið á að einbeita sér að, frekar en að heilla einhver núðlufyrirtæki og eltast við kaup á ofurstjörnum sem munu hvort sem er aldrei ganga til liðs við félagið.

Marcus Rashford og félagar hafa kveikt nýtt líf í mannskapnum og í fyrsta sinn á þessu tímabili finnst manni eins og eitthvað sé á réttri braut, loksins. Eftir þrjá fína sigra og mjög skemmtilega leiki er komið að Watford á Old Trafford.

Watford

Ef ekki væri fyrir hið undraverða ævintýri Leicester væri Watford hiklaust spútnik-lið deildarinnar. Nýliðirnar hafa staðið sig frábærlega á tímabilinu og sitja í 10.sæti með 37 stig, einu minna en Liverpool og 7 stigum á eftir okkar mönnum. Það er afar fátítt að nýliðar nái svona góðum árangri og Watford-menn eru því góð klisja: Sýnd veiði en ekki gefin.

Það verður hinsvegar að segjast eins og er að Watford er ekki að næla í stig gegn liðunum í efsta þriðjungi deildarinnar, þ.e. liðunum sem raða sér í efstu sjö sætin. Af þeim 10 leikjum sem liðið hefur spilað við United, City, Leicester, Spurs og hin liðin hefur það aðeins unnið einn og gert eitt jafntefli, rest hafa tapast. Sigurinn kom gegn West Ham og jafnteflið gegn Southampton.

Eigendurnir og leikmannakaup

Það er hin ítalska knattspyrnufjölskylda Pozzo sem á Watford. Fjölskyldan er ýmsu vön enda á hún einnig í spænska liðinu Granada og ítalska liðinu Udinese. Það er Gino, sonur Giampaolo Pozzo, sem sér um rekstur Watford. Nýta þeir feðgar tengslin við hin liðin óspart til þess að hjálpa Watford á markaðinum og sem dæmi um þá nefna að Odion Ighalo, helsta stjarna liðsins, spilaði áður bæði fyrir Granada og Udinese.

Þeir virðast vita hvað þeir eru að gera með þetta lið og það verður að segjast eins og er að hin fjölmörgu leikmannakaup liðsins fyrir tímabilið hafi heppnast ansi vel. Liðið fékk til sín nokkuð stór nöfn, að minnsta kosti miðað við Watford. Leikmenn eins og Etienne Capoue, Jose Juarado og Valon Behrami mættu á svæðið.

Meðaleinkunn leikmanna á tímabilinu, fjölmargir af nýju leikmönnunum eru í efri hlutanum.
Meðaleinkunn leikmanna á tímabilinu, fjölmargir af nýju leikmönnunum eru í efri hlutanum.

Stjórnendur og þjálfarar bættu svo bara í í janúarglugganum og fengu til liðs við félagið fjóra nýja leikmenn, þar á meðal Mario Suarez sem varð Spánarmeistari með Atletico fyrir ekki svo löngu síðan. Það er því ágætur metnaður í gangi hjá Watford og ljóst að þetta lið er komið til að vera í Úrvalsdeildinni eftir nokkuð jójó á milli deilda undanfarin ár.

Helstu leikmenn

Þeirra bestu menn mynda hið stórskemmtilega og líklega eitraðasta framherjapar deildarinnar. Troy Deeney og Odio Ighalo spila frammi og hafa sýnt að það þarf ekki alltaf að spila 4-2-3-1 með djúpa miðjumann og mann í holunni, nei. Stundum svínvirkar það einfaldlega að vera bara með 4-4 fokking 2.

Ighalo er búinn að skora 14 mörk og er með markahærri mönnum í deildinni. Deeney þessi er hinsvegar meira í stoðsendingunum með 8 mörk og 6 stoðsendingar. Þeir eru alveg eitraðir saman frammi og ljóst að vörn United mun þurfa að eiga býsna góðan leik til þess að hemja þessa drengi.

Í markinu er svo góðvinur okkar Herheulo Gomes að ganga í gegnum endurnýjun lífdaga en hann hefur staðið sig mjög vel og verið besti maður Watford ásamt framherjunum tveimur. Hann hefur haldið hreinu tíu sinnum á tímabilinu, aðeins Hart og Cech eru með betri árangur.

Gomes virðist þó sjaldan eiga góðan dag gegn United. Það er ekki langt síðan hann fékk á sig fimm mörk í einum hálfleik gegn United og hver getur svo gleymt þessu marki sem Nani skoraði á hann fyrir ekki svo löngu?

United

Meiðslataflan er enn sem fyrr frekar svakaleg en sem betur fer talaði Louis van Gaal í dag um að nokkrir leikmenn á töflunni frægu gætu mögulega verið með á morgun. Það virðist þó reyndar ekki skipta neinu máli, það er alltaf hægt að sækja í hinn óendanlega sjóð sem unglingastarf United er.

Af þeim sem eru meiddir ber helst að nefna að Anthony Martial og Matteo Darmian séu klárir í slaginn. Ég myndi þó segja að það sé alls ekki víst að þeir labbi í liðið eftir frammistöðu Rashford og Varela í síðustu leikjum.

Bæði Chris Smalling og Marcos Rojo eru í kannski-flokknum en stjórinn sagði líklegt að Rojo yrði klár í slaginn.

Screen Shot 2016-03-01 at 18.41.36

Stóra spurningin er einfaldlega hvort Rashford eigi að fá að byrja eftir frábæra frammistöðu gegn Arsenal. Ég myndi segja að hann ætti það skilið auk þess sem að það gæti verið hyggilegt að ganga úr skugga um það að Martial sé 100% klár í slaginn áður en hann snýr aftur. Leikjaprógrammið framundan er ansi stíft og við viljum hafa okkar mann heilan fyrir það.

Varela á að mínu mati hiklaust að fá sénsinn áfram. Mér þótti það mjög aðdáunarvert hvernig hann náði að núlla út Alexis Sanchez gegn Arsenal um helgina, sérstaklega miðað við það að fyrstu 10 mínúturnar leit út fyrir að Sanches myndi valta yfir Varela. Okkar maður er einnig mjög góður í að styðja við sóknina sem er jákvætt, mér finnst United aldrei spila betur undir stjórn LvG en þegar bakverðirnir eru mættir til að hjálpa til í sókninni.

Ég vona að LvG geti nýtt tækifærið núna á Old Trafford með því að nota þá sem eru að koma úr meiðslum sparlega á morgun. Strákarnir sýndu að þeir ráða fyllilega við verkefnið og því ómetanlegt að geta notað þá til þess að hjálpa til við þetta ruglaða leikjaprógram sem framundan er.

De Gea
Blind
Rojo
Carrick
Varela
Schneiderlin
Herrera
Memphis
Mata
Lingard
Rashford

Leikurinn á morgun er ansi mikilvægur. Liðið er í ákveðinni uppsveiflu og umræðan í kringum liðið er loksins orðið jákvæð. Þetta er hinsvegar eitthvað sem við höfum séð áður. Allt frá því að Louis van Gaal tók við höfum við séð þetta ganga svona, það skiptast á skin og skúrir og alltaf þegar liðið er búið að setja saman smá sigurhrinu og maður heldur að nú sé allt að fara á blússandi siglingu kemur tapleikur.

Leikurinn á morgun er ansi mikilvægur. Eftir hrottalegt gengi fyrir áramót er staðan einfaldlega þannig að ef liðið ætlar sér að ná 4. sætinu má það einfaldlega ekki við þvi að tapa mikið fleiri stigum. Það er algjör frumskylda að vinna leikina á Old Trafford og þá sérstaklega þessa leiki gegn nýliðunum, sama hversu vel gengur hjá þeim. United á alltaf að vinna Watford á Old Trafford, sama hvað.

Það er gott og blessað að vinna Arsenal en sá sigur skiptir nánast engu máli ef liðið sigrar ekki á morgun.

Þrjú stig, takk.

Leikurinn er á morgun, miðvikudag og hefst klukkan 20.00

Enska úrvalsdeildin

Manchester United 3:2 Arsenal

skrifaði þann | 11 ummæli

Það var ekki bjart yfir fólki þegar byrjunarliðið kom i ljós og að miðverðirnir yrðu Carrick og Blind. en það var lítið hægt annað að gera í stöðunni, eins og sést á bekknum voru allir menn með einhverja reynslu í liðinu inná.

1
De Gea
5
Rojo
17
Blind
16
Carrick
30
Varela
21
Herrera
28
Schneiderlin
7
Memphis
8
Mata
35
Lingard
39
Rashford

Varamenn: Romero, McNair, Riley, Fosu-Mensah, Weir, Januzaj, A.Pereira

Arsenal gerði tvær breytingar frá því sem verið hafði í undanförnum leikjum, Danny Welbeck kom inn fyrir meiddan Alex Oxlade-Chamberlain og Gabriel Paulista kom í bakvörðinn

Čech
Monreal
Koscielny
Gabriel
Bellerín
Ramsay
Coquelin
Walcott
Özil
Sanchez
Welbeck

Leikurinn var ekki gamall þegar Monreal fékk fína sendingu frá Özil án þess að Carrick gæti eitthvað gert en Monreal skaut beint á De Gea. Þetta lofaði ekki góðu fyrir miðverðina okkar. Hraði Arsenal nýttist nokkuð fyrstu mínúturnar en United menn komust síðan betur inn í leikinn og héldu boltanum og komust hjá því að fá hraðar sóknir á sig. Memphis átti ágætt skot úr aukaspyrnu sem Čech varði vel en önnur færi létu á sér standa.

Um miðjan fyrri hálfleikinn fóru Arsenal að færa sig upp á skaftið og halda boltanum betur og sækja á en það var United sem skoraði á 26. mínútu. Walcott missti boltann á miðjunni, boltinn gefinn upp á Varela á kantinum, hann gaf góða sendingu fyrir, Koscielny setti fótinn í boltann en gerði ekki betur en að senda út í teiginn og þar lúrði Marcus Rashford og smellti boltanum í netið.

Við vorum varla hætt að fagna þegar United kom í næstu sókn, aftur upp hægra megin, boltinn upp á Varela sem skallaði til baka á Lingard og Jesse gaf frábæra sendingu og Marcus Rashford var óvaldaður á markteig. Frábær skalli og 2-0.

United sótti nokkuð en það var annar drengur úr unglingastarfi United sem skoraði næsta mark. Özil tók aukaspyrnu úti á velli, gaf inn á teiginn og þar var Danny Welbeck laus og minnkaði muninn fyrir Arsenal fimm mínútum fyrir hlé. Marcos Rojo var að dekka annan og náði ekki að stökkva í boltann og Welbeck var alveg frír, Schneiderlin átti að vera dekka hann en hafði skilið hann alveg eftir.

Þetta var hrikalegt tímasetning að fá á sig mark og Arsenal sótti nær stöðugt síðustu mínútur hálfleiksins en náðu ekki að lát kné fylgja kviði.

Seinni hálfleikur byrjaði á því að Rashford lenti í samstuði og virtist meiddur en hann hélt samt áfram, Arsenal hélt upp pressu frá upphafi sem minnkaði svo aðeins. En meiðslavandræðin eru endalaus. Marcus Rojo var að hreinsa þegar Welbeck tæklaði hann og Rojo sneri sig í skotinu og gat ekki haldið áfram. Varamennirnir voru sem fyrr segir ekki beint hoknir af reynslu og inn á kom Timothy Fosu-Mensah í sínum fyrsta leik, 18 ára Hollendingur sem hefur verið að spila við góðan orðstír í unglingaliðunum, að mestu á miðjunni, en líka í vörninni. Likt og fyrri hálfleik var United fljótlega farið að halda boltanum betur, oftast var það Memphis úti á kanti að halda boltanum og reyna að finna leiðir gegnum vörnina.

Á 62. mínútu kom Giroud inn fyrir Walcott sem hafði verið slakur í leiknum en nær strax eftir það kom United í hraðaupphlaup, Mata gaf upp á Rashford sem var kominn með tvo menn á sér inn í teig, beið sallarólegur og gaf svo út á Herrera sem átti frítt skot utan teigs, nelgdi í kassann á Koscielny og boltinn fór í þveröfuga átt við Čech, og United var aftur komið með tveggja marka forskot.

En aftur varði sú sæla ekki lengi. Arsenal kom upp kantinn, gáfu fyrir, Welbeck fékk skotið og De Gea varði mjög vel, en boltinn bars út og þar var Özil aleinn, nelgdi í jörðina og boltinn sveif upp í markhornið.

Mínútu síðar varð allt vitlaust þegar Ramsey og Herrera lenti saman, Báðir fór með hendur í andlit hvors annars og Ramsey hrinti Herrera. Báðir sáu þó bara gult spjald frá annars slökum dómara leiksins, Craig Pawson, sem hafði dæmt mun frekar á United og sleppt Arsenal frekar við spjöldum.

Louis van Gaal var ekki ánægður með þetta og fór út að hliðarlinu og sýndi fjórða dómaranum nákvæmlega hvernig Arsenal menn væru að henda sér niður og fá gefins aukaspyrnur.

Rashford var aldrei búinn að vera alveg 100% eftir meiðslin í upphafi hálfleiks og á 80. mínútu fór hann útaf fyrir Adnan Januzaj.

United lagði allt kapp á það síðustu mínúturnar að halda boltanum uppi á vallarhelmingi Arsenal, en þegar þeir misstu boltann komu Arsenal í sóknir. Dómarinn bætti fimm mínútum við leikinn og það var gríðarleg spenna í leiknum, bæði lið sóttu vel.

Van Gaal ákvað síðan að henda James Weir fyrirlliða U21 liðsins inná síðustu mínútuna fyrir Ander Herrera, enn einn leikmaður að leika sinn fyrsta leik fyrir Manchester United.

Það var pressa á United þessa síðustu mínútu en þeir gátu síðan losað boltann og komið upp í sókn sem nægði til þess að dómarinn flautaði leikinn af, glæsilegur sigur í höfn. Þetta gefur góða von um framhaldið, og að þegar leikmenn komi til baka þá haldist þessi leikgleði í liðinu.

Í dag var Memphis áfram sprækur og hélt áfram þar sem hann skildi við gegn Midtjylland og alveg þess virði að sjá þessa skemmtilegu takta frá honum.

https://twitter.com/footbalIfights/status/703970303647604739

Mata og Herrera voru flottir á miðjunni og Schneiderlin var líka nokkuð traustur þó það megi vissulega saka hann um mistök í fyrra marki Arsenal. Þegar Varela fékk gult spjald eftir níu mínútur fyrir fáránlegt brot á Sanchez fór um mig, en hann átti síðan alveg fínan leik. Fosu-Mensah var bara góður í bakverðinum og átti stöku rispur sem sýndu að hann á heima á miðjunni.

En það þarf ekkert að ræða það hver er maður þessa leiks. Maðurinn sem á innan við þrem dögum er búinn að skora jafn mörg mörk og Falcao gerði fyrir United, og er jafngamall upp á dag og Wayne Rooney var þegar Rooney skoraði sína fyrstu deildartvennu (fyrir Everton).

Marcus Rashford

Enska úrvalsdeildin

Arsenal kemur í heimsókn

skrifaði þann | 3 ummæli

Manchester United - ArsenalEftir að hafa komist áfram í bikar og Evrópudeildinni er komið að alvörudeildinni og alvöruandstæðingum. Arsenal kemur á Old Trafford á morgun. Það er farið að fækka í hópi þeirra sem telja að United eigi möguleika á Meistaradeildarsæti þó að liðið sé enn í fimmta sæti einhverra hluta vegna. 

Gengi United gegn toppliðinum í vetur hefur verið nokkuð gott, ólíkt frammistöðunni gegn liðum í neðri hluta deildarinnar og það hentar liði Van Gaal mun betur að spila gegn betri liðum. Það er hins vegar ekki hægt að segja að fyrri leikur liðanna haf verið samkvæmt þessu. Arsenal pakkaði United saman á Emirates 3-0  og leikurinn var hreinlega búinn eftir 7 mínútur.Það er erfitt að horfa á meiðslalistann okkar núna og vonast eftir miklum viðsnúningi frá þeim leik. 

Sigur Arsenal gegn Leicester fyrir tveim vikum opnaði titilbaráttuna verulega en Leicester vann Norwich í dag þannig að Arsenal þarf nauðsynlega á stigunum að halda. Reyndar hafa Arsenal gert jafntefli við Hull og tapað sanngjarnt fyrir Barcelona síðan sigurinn gegn Leicester en það ætti ekki að hafa mikil áhrif á leikinn á morgun, Arsenal kemur til að vinna leikinn og miðað við spilamennsku United undanfarið og títtnefnda meiðslalista hljóta þeir nú að teljast sigurstranglegri.

The Guardian býst við Arsenal liðinu svona

Cech
Monreal
Koscielny
Mertesacker
Bellerín
Ramsay
Coquelin
Welbeck
Özil
Sánchez
Giroud

Þetta er eins og liðið hefur verið undanfarið, nema Danny Welbeck kemur inn fyrir Alex Oxlade-Chamberlain sem  er meiddur. United verður hins vegar eins og í undanförnum leikjum að stilla upp liði sem markast aðallega af því hverjir eru ómeiddir

1
De Gea
17
Blind
5
Rojo
33
McNair
49
Riley
16
Carrick
28
Schneiderlin
7
Memphis
8
Mata
35
Lingard
39
Rashford

De Gea kemur vonandi til baka sem og Rojo, en það er líklega til lítils að vonast eftir öðrum. Síðan er spurning hvort Paddy McNair verði treyst í miðvörðinn eða hvort Blind og Rojo verði látnir spila þar og Varela þá úti á kanti. Í fyrri leiknum í haust spilaði Sánchez vinstra megin og spurning hvort það verði á morgun ef Joe Riley er í hægri bakverðinum.

Þetta verður erfiður róður á morgun, og mjög spennandi að sjá hvernig Memphis og Rashford standa sig þegar mótherjarnir eru af alvöru kaliberi.

Leikurinn byrjar 14:05 á morgun, sunnudag