Rauðu djöflarnir

Enska úrvalsdeildin

Manchester United 1:2 Norwich City

skrifaði þann | 23 ummæli

Manchester United - NorwichÉg var einn af þeim sem hékk á Moyes vagninum allt of lengi, kallandi eftir því að hann fengi meiri tíma til að setja mark sitt á liðið. Eftir að hann var látinn fara þótti mér það auðvitað deginum ljósara að hlutirnir voru ekki, og voru aldrei að fara að ganga upp hjá honum. Það var ekki endilega leikstíllinn, þó mér hafi aldrei fundist hann ásættanlegur, heldur var það hreinlega vinnuframlag leikmanna á vellinum. Þeir virtust ekkert spenntir fyrir því að spila fyrir Manchester United og um leið og eitthvað á bjátaði gáfust menn bara upp og lögðust í kör, í stað þess að leggja gjörsamlega allt í sölurnar, sem var svo algegnt viðhorf undir stjórn Alex Ferguson.

Hljómar þetta kunnulega? Mér þykir það miður en Manchester United er aftur komið niður eitthvað öngstræti og ég get hreinlega ekki séð að þaðan verði aftur snúið undir stjórn Luis Van Gaal.

Víkjum aðeins að leiknum, ég segi „aðeins“ því ég hef svo sem ekki mikið um hann að segja. Hann var í raun alveg eins og leikurinn gegn Bournemouth í síðustu viku, gegn West Ham nokkrum vikum þar á undan, PSV um miðjan nóvember, Middlesbrough í deildarbikarnum og svo mætti lengi telja.

Svona var liðið:

1
De Gea
17
Blind
12
Smalling
4
Jones
18
Young
16
Carrick
27
Fellaini
7
Memphis
8
Mata
9
Martial
10
Rooney

Varamenn: Romero, Borthwick-Jackson, McNair, Varela, Schneiderlin, Pereira, Herrera (60′).

Norwich City mætti á Old Trafford til að verjast á 10 mönnum, eins og þeir hafa gert síðustu 25 ár. Planið hjá okkar mönnum var það sama og áður, halda boltanum, byggja upp pressu hægt og bítandi og á endanum myndi markið vonandi koma. United sótti og sótti en náði (enn og aftur) ekki að skapa sér nein almennileg færi, fullt af hálf færum, eða réttara sagt „kvartfærum“. Norwich komst í fyrsta skipti framyfir miðju á 38 mínútu þegar Redmond nær að stinga boltanum inn fyrir vörnina (sem var út um allt), Cameron Jerome nær að þvæla boltanum fyrir sig og smellir boltanum yfir De Gea og í markið. De Gea kannski svolítið ólíkur sjálfum sér og lagðist fullsnemma, en þetta var bara eitt af þessum mörkum, höfum milljón sinnum fengið svona blauta tusku í andlitið.

Það voru viðbrögðin við markinu sem valda mér svo miklum vonbrigðum. Menn urðu stressaðir og spilið bara molnaði í sundur. Sendingar voru slappar og allar aðgerðir, í sókn og vörn, voru tilviljunarkenndar. Norwich héldu sínu striki og Alexander Tettey bætti við öðru marki í upphafi seinni hálfleiks. Aftur var vörnin hripleg og aftur var De Gea ekki á tánum. 11 mínútum síðar minnkaði Anthony Martial muninn eftir ágætis tilþrif í teignum. Þar við sat, það gerðist ekkert annað sem vert er að minnast á. Í dag voru allir slakir á vellinum, hver og einn einasti leikmaður. Fyrir utan að eiga aðeins 2 skot á rammann (tveimur færri en Norwich), þá voru menn svo bitlausir að enginn United leikmaður fékk einu sinni gult spjald, sem mér þykir athyglisvert frá liði sem var undir í næstum því klukkutíma.

Áhorfendur voru mikið í mynd í þessum leik og vonbrigðin skein úr hverju andliti. Það er líka mjög sjaldgjæft að sjá fólk streyma út af Old Trafford þegar 5 mínútur eru eftir að leiknum. Baulið þegar lokaflautan gall minnti mann helst á Santiago Bernabeu, ég skil þá gremju vel. Ég er bara ekki að sjá þetta batna, ekki af því að Van Gaal er ekki með reynslu og þekkingu til að snúa þessu við heldur virðist hann vera búinn að missa klefann, menn nenna þessu ekki lengur og þá er ballið alltaf búið. Hvar er annars þessi Van Gaal? Við höfum aldrei séð hann í action!

Ég hef nú ekki trú á því að Van Gaal verði rekinn á morgun eða hinn, það kæmi mér allavega verulega á óvart. Útlitið er hinsvegar ekki bjart fyrir hann því ég er ekki að fara að sjá þetta lið vinna Stoke á útivelli og endurnært Chelsea lið. Ég legg allavega ekki mína peninga á sigra í þeim leikjum. Fari það svo , verður Van Gaal kominn í 8 leiki í röð án sigurs og þá verður kannski tekið í taumana.

Ég ætla að gefa ykkur orðið, en við skulum enda þetta á nokkrum tístum.

https://twitter.com/Squawka/status/678265062298021889

https://twitter.com/stretford_end/status/678274019884445697

https://twitter.com/UnitedPeoplesTV/status/678273568392749057

https://twitter.com/UnitedPeoplesTV/status/678273526193913856

UPPFÆRT:

Viðtal við Louis Van Gaal eftir leikinn:

https://www.youtube.com/watch?v=a6C8fr3THPA

Jóladagatalið

Jóladagatal, 19. desember 2015, 5 dagar til jóla

skrifaði þann | Engin ummæli

19jaapstamjc3b3lac3b0urJaap Stam

Nú er bara rétt ein vinnuvika til jóla. Það er ekki mikið. Eiginlega alveg rosalega lítið. Nú fer að detta í endasprettinn í jólagjafainnkaupum, jólahreingerningum og öðrum jólaundirbúningi og um að gera að njóta þess með jólalögin í botni, jólagleðina í hjarta og jólaöl & piparkökur í munni.

En það er líka bara hægt að fá sér skyr. Jólaskyr eða hversdagslegt skyr, bragðbætt skyr eða hrært skyr, skyrdrykki eða hvers konar búst. Þetta er allt í boði. Og getur alveg verið ljómandi jólalegt þegar rétt er með farið. Það er til dæmis hægt að mylja piparkökur og jólastafi út í skyrið eða hræra jólaöl saman við ef fólk vill vera frumlegt. Svo má nú henda í eins og eina skyrköku líka, þær geta verið alveg frábærar. Vefsíðan gottimatinn.is lumar til að mynda á einni sem kölluð er „krydduð jólaskyrkaka“.

Enska úrvalsdeildin

Norwich í heimsókn á Old Trafford

skrifaði þann | Engin ummæli

Manchester United - NorwichStreð síðustu vikna ætti, ef allt er með felldu, að taka sér smá frí á morgun. Norwich sem vermir þriðja neðsta sæti kemur í heimsókn og ætti undir öllum venjulegum kringumstæðum að verða auðveld bráð, En það eru erfiðir tímar á Old Trafford og sjálfstraustið er ekki beinlínis í hæstu hæðum.

Tveir slæmir tapleikir í röð komu á eftir þremur andlausum jafnteflum og það er vandfundinn United stuðningsmaður sem er enn stuðningsmaður Louis van Gaal sem stjóra. Venjulega myndi brottrekstur stjóra eins helsta keppinautar United í gegnum tíðina hressa United við verulega, en nú er Chelsea svo langt á eftir að það skiptir litlu og að auki er stór hópur sem nú sér José Mourinho á lausu og hugsar sem svo að þarna sé gráupplagt tækifæri að gá betri stjóra. Það er þrátt fyrir að Mourinho er enn á ný að sanna að þriðja tímabil hans hjá félagi sé alltaf slys og aðrir gallar, svo sem bolti sem jafnast á við Louis van Gaal bolta í leiðindum og enginn stuðningur við unglingastarf o.fl. séu í mínum huga nóg til að vilja ekki sjá hann.

Allt þetta þýðir að leikurinn á morgun verður í mesta lagi stund milli stríða hjá Van Gaal og United, áður en við taka erfiðir leikir við Stoke og Chelsea, og í versta falli lokahöggið ef ekki vinnst þokkalegur sigur

Meiðslavandræði United eru frjarri því leyst og við gætum því enn á ný séð óreynda leikmenn í vörninni. Chris Smalling og Wayne Rooney hafa æft í vikunni og ættu að vera góðir fyrir morgundaginn, Herrera hefur sömuleiðis æft en verið lengra frá og því ekki líklegur í lið. Matteo Darmian verður lengur frá. Það verður í það minnsta mikil styrking í að fá Smalling inn ætti í það minnsta að tryggja öruggt jafntefli.

En jafnteflið er ekki nóg. United er nú þrem stigum á eftir City og fjórum á eftir Arsenal, en slagur þessara liða verður einmitt á mánudagskvöldið kemur. Sigur myndi því ekki einasta koma okkur í betra skap fyrir jólatörnina og halda United í toppsætunum, heldur einnig setja pressu á þessi lið fyrir þann leik. Topplið Leicester á svo enn eina þolraunina fyrir höndum, heimsækja Everton og þurfa enn á ný að sanna sig.

Ætli þetta verði þá ekki einhvern veginn svona

1
De Gea
43
B-Jackson
17
Blind
12
Smalling
30
Varela
27
Fellaini
16
Carrick
7
Memphis
10
Rooney
8
Mata
9
Martial

Ashley Young er víst hissa á að fá ekki tækifæri og ég er hissa líka, ef hann er heill heilsu, en skv Van Gaal er svo ekki.

Norwich er búið að tapa síðustu fjórum útileikjum sínum, en hafa að vísu gert jafntefli við Arsenal og Everton á heimavelli ef einhver vill fá ástæðu til að setja X á getraunaseðilinn á morgun. Það þarf ekki að fara mörgum orðum yfir lið þeirra, en þó má nefna að ein af hetjum Íra í undankeppni EM er þeirra skeinuhættastur þegar kemur upp að marki, með þrjú mörk og fjórar stoðsendingar,  en þegar litið er á að Norwich hafa verið afskaplega latir við markaskorun og við vonumst eftir fleiri byrjunarliðsmönnum í vörn United en undanfarið þá leyfi ég mér að búast við að De Gea haldi hreinu.

Hins vegar er það svo að ef undan er skilið 6-2 tap fyrir Newcastle hefur Norwich ekki verið að fá á sig of mikið af mörkum og því verður spá mín fyrir leikinn 1-0. En öruggt 1-0!

Leikurinn er klukkan 3 á morgun, laugardag.

Gestapistill Jóladagatalið Pistlar

Jóladagatal, 18. desember 2015, 6 dagar til jóla

skrifaði þann | Engin ummæli

dagatal

Roy Keane

Góðan hluta af sínum rúmlega 12 ára ferli hjá Manchester United var Roy Keane fyrsti maður á blað þegar átti að velja byrjunarliðið. Þegar ég fékk þá hugmynd að gera þetta litla jóladagatal mér, og vonandi einhverjum fleirum, til jólagleði og ánægju þá var nákvæmlega þessi gluggi, Roy Keane sem Hurðaskellir, fyrstur á blaðið. Það smellpassar svo mikið að það væri eiginlega hægt að láta staðar numið hér. Það þarf ekkert meira. Roy Keane ER Hurðaskellir.

Sjöundi var Hurðaskellir,
sá var nokkuð klúr,
ef fólkið vildi í rökkrinu
fá sér vænan dúr.

Hann var ekkert sérlega
hnugginn yfir því,
þó harkalega marraði
hjörunum í.

Gestapistill Jóladagatalið Lesefni Pistlar

Jóladagatal, 17. desember 2015, 7 dagar til jóla

skrifaði þann | 2 ummæli

dagatal

Joe Jordan

Nú er ekki nema vika til jóla. Það er ekki mikið. En samt er það eitthvað svo langt, þegar beðið er eftir jólunum. Jólasveinninn að þessu sinni er hinn harðskeytti Askasleikir.

Sá sjötti Askasleikir,
var alveg dæmalaus.
Hann fram undan rúmunum
rak sinn ljóta haus.

Þegar fólkið setti askana
fyrir kött og hund,
hann slunginn var að ná þeim
og sleikja á ýmsa lund.