Rauðu djöflarnir

Enska úrvalsdeildin

Crystal Palace 0:0 Manchester United

skrifaði þann | 22 ummæli

Crystal Palace - Manchester UnitedEnn eitt 0-0 jafntefli staðreynd í dag gegn annars spræku Crystal Palace liði, þetta er þriðja 0-0 jafnteflið í röð en ansi frábrugðið því fyrsta gegn Man City á Old Trafford. Þar var ákveðinn kraftur í liðinu, menn voru skipulagðir og duglegir í að loka á andstæðinginn. Vissulega var sóknaleikurinn ekkert sérlega glæsilegur þá, en það var nú mest megnis góðri vörn Man City að þakka. Í dag aftur á móti var heldur dapurlegra að horfa á liðið. Crystal Palace eru með asskoti gott lið, sérstaklega fram á við, en þeir eru langt frá því að vera með sterka varnarlínu. Í dag hinsvegar reyndi nákvmælega ekkert á vörn Palace því sóknarleikur United steindrapst um leið og liðið kom fram yfir miðju.

Van Gaal stillti liðinu upp svona í dag:

De Gea
Rojo
Blind
Smalling
Darmian
Schneiderlin
Schweinsteiger
Martial
Herrera
Mata
Rooney

Varamenn: Romero, Tuanzebe, Young, Carrick, Lingard, Pereira, Fellaini.

Þessi uppstilling kemur auðvitað engum á óvart enda varla hægt að stilla þessum hóp upp mikið öðruvísi. Ég er einn af þeim fjölmörgu aðdáendum United sem bíð í ofvæni eftir því að sjá Rooney byrja á bekknum. Ekki var það tilfellið í dag og átti hann auðvitað enn einn slakan leik. Reyndar var hann ekki eins áberandi slakur og eins og gegn City því flest allir sóknarmenn okkar voru frekar daprir í dag, sem og Darmian sem átti í bölvuðu basli með Wilfried Zaha, sem er alltaf mjög æstur í að spila vel á móti okkur. Flest lið átta sig á því að United er frekar viðkvæmt fyrstu 20 mínúturnar og Palace ætlaði sér að nýta það í dag. Þeir pressuðu hátt og keyrðu hratt fram á við. Það skapaði nokkur góð færi fyrir þá, þar helst skot Yannick Bolasie í þverslá eftir sirka 10 mínútur.

Eftir 20 mínútur náði United betri tökum á leiknum en ógnin fram á við var akkúrat engin. Rooney kom nokkrum sinnum svo aftarlega á völlinn til að sækja boltann (þrátt fyrir að spila sem framherji) að hann var kominn aftur fyrir Schneiderlin og Schweinsteiger. Svo var akkúrat ekkert annað í stöðunni fyrir hann en að gefa langa Hollywood sendingu inn í teig, í þeirri von að hinir gríðarlegu sterku skallamenn [footnote]Kaldhæðni[/footnote], Juan Mata og Ander Herrera, myndu gera sér mat út því. Í þau örfáu skipti sem United reyndi að sækja hratt fram á völlinn, þá var það oftar en ekki Martial sem skapaði mestu hættuna, en því miður var hann sjaldan með einhvern með sér.

United fékk eitt alvöru færi í fyrri hálfleik þegar Mata og Martial spiluðu vel saman út á kantinum, Martial sendi inn í teig, beint á einn og óvaldaðan Herrera sem rann til og skaut boltanum framhjá.

Um miðjan seinni hálfleik kom Ashley Young inn fyrir Darmian sem var búinn að næla sér í gult spjald og var enn í vandræðum með Zaha. Fellaini kom svo inn fyrir Schweinsteiger og Lindgard fyrir Mata, sem þýddi að enn of aftur spilar Rooney 90 mínútur. Eftir þessar skiptingar fór liðið að spila einhverja útgáfu af leikkerfi sem ég skildi ekki alveg, en virtist eins og Rooney væri á vinstri kantinum, Martial frammi, Herrera á miðjunni og Fellaini í holunni. Þetta skipti auðvitað engu máli því ekkert gerðist sem ógnaði marki Palace. Leikmenn Palace voru á sama tíma stórhættulegir í föstum leikatriðum og það voru einhver 2-3 skipti þar sem þeir áttu skalla/skot rétt framhjá markinu eftir horn eða aukaspyrnu. Leikurinn fjaraði svo út í hrútleiðinlegt jafntefli.

Ef ég á að horfa á ljósu punktana í þessu öllu saman þá náði United jafntefli í leik sem þeir hefðu alveg týpískt misst í tap fyrir 1-2 árum síðan. Einnig er vörn og miðja samstillt og heldur hreinu, liðið hefur fengið á sig eitt rússneskt mark í síðustu 5 leikjum. Það er auðvitað allt gott og blessað, svo má nú minnst á það að við erum bara 4 stigum frá toppsætinu. Vondu fréttirnar eru auðvitað þær að liðið er gjörsamlega bitlaust fram á við, og þannig hefur það verið í síðustu 4 leikjum (samtals 1 mark). Ég veit að það er vinsælt að kenna Rooney um allt og ekki neitt þessa dagana, en hann er hreinlega að spila of mikilvægt hlutverk þessa stundina. Boltinn fer mikið í gegnum og hann (og oftar en ekki endar þar), og þegar kantmenn liðsins keyra upp völlinn með boltann, þá er aldrei neinn United leikmaður (m.ö.o. Rooney) fyrir framan þá! Þar af leiðandi þurfa þeir að hægja á sér og annað hvort senda þvert eða aftur á bak, en United leiðir deildina í slíkum sendingum, sem er ansi vafasöm tölfræði. Þetta er voðalega einfalt, á meðan hann er upp á toppi og er ekki að spila betur en þetta, þá er ekkert að fara að gerast. Punktur.

Ég ætla að gefa ykkur orðið, en áður en ég kveð í dag, þá eru hér nokkur tíst:

https://twitter.com/samuelluckhurst/status/660512597049905152

https://twitter.com/Squawka/status/660504378000830464

https://twitter.com/OptaJoe/status/660502216084615168

https://twitter.com/ManUtdStuff/status/660502163483938816

https://twitter.com/Squawka/status/660500263204032512

Enska úrvalsdeildin

Crystal Palace á Selhurst Park á morgun

skrifaði þann | 3 ummæli

Crystal Palace - Manchester UnitedÞað er Lundúnaferð í aðsigi fyrir United leikmenn. Næstu tveir mánuðir eru ef litið er á leikjaprógrammið með áratugafordómum „léttir“, aðeins Chelsea um jólin er leikur sem á að reynast United erfiður en ef nánar er að gáð þá eru ljón á veginum. Liðin í þriðja, fimmta og sjöunda sæti heita núna West Ham, Leicester og Crystal Palace en ekki Manchester City, Arsenal og Liverpool eins og á sama tíma í fyrra.

Fyrst þessara liða til að spreyta sig er Crystal Palace. Eftir stórkostlega heimkomu Alan Pardew í fyrra byrjaði Palace þetta tímabil gríðarvel. Núna hafa hins vegar tveir síðustu leikir þeirra í deild tapast, einmitt fyrir West Ham og Leicester. Manchester City rúllaði þeim svo upp í deildarbikarnum í vikunni, 5-1. Það er því sært lið sem tekur á móti Rauðu djöflunum á Selhurst Park á morgun.

Stemmingin á Selhurst Park getur verið skrambi góð eins og sést af videóinu hér að ofan (sem er frá í fyrra) en við vitum öll hvað stuðningsherinn sem fylgir United á útileiki er öflugur. Að auki hefur heimavöllurinn ekkert verið að gera of mikið fyrir Palace í haust, 2 sigrar og þrjú töp er niðurstaðan. Palace hefur heldur ekki gert jafntefli á útivelli þannig að það hlýtur að vera sigur eða ekkert á morgun.

Styrkur Palace hefur hingað til verið fyrst og fremst fram á við. Yohan Cabaye keyptur frá PSG kom sterkur inn í liðið en meiddist á æfingu fyrir leikinn gegn City og vafasamt hvort hann spilar á morgun. Það er lykilatriði fyrir Palace að hann verði heill en að auki eru Marouane Chamakh og og Connor Wickham frá.

Mögulegt byrjunarlið skv Guardian lítur þá svona út

Hennessy
Kelly
Hangeland
Dann
Ward
Ledley
McArthur
Sako
Puncheon
Zaha
Gayle

Þarna verða þeir Zaha og Sako á harðahlaupum á köntunum með fyrirgjafir á Gayle. Gayle er reyndar ekki búinn að skora í deildinni ennþá, Cabaye er þeirra markahæstur með fjögur mörk. Ég segi það satt að ég ætla ekki að hafa áhyggjur af vörn United á morgun, Það verður hins vegar meira spennandi að sjá hvernig sóknin hjá United tekur á vörn Crystal Palace og þar á sannast sagna að verða ójafnvægi

1
De Gea
5
Rojo
4
Jones
12
Smalling
36
Darmian
16
Carrick
28
Schneiderlin
9
Martial
21
Herrera
8
Mata
10
Rooney

Þetta lið velur sig orðið sjálft. Valencia er enn meiddur, James Wilson og Memphis meiddust gegn ‘Boro og Paddy McNair er einnig frá.

Við sleppum því alveg að minnast á að Ashley Young gæti komið inn í liðið fyrir einhvern þarna.

Eftir ófarirnar gegn Middlesbrough er alveg nauðsynlegt að leikurinn á morgun fari vel,  við erum að spila á sama tíma og öll hin topplíðin, City á auðveldan heimaleik gegn Norwich, West Ham tiltölulega léttan útileik gegn Watford og Arsenal fer til Swansea. Sigur á Selhurst Park fær okkur vonandi til að gleyma Capital One bikarnum og kemur leikmönnum í gott skap fyrir leikinn gegn CSKA á miðvikudaginn.
Rooney benched

 

 

Lesefni

Djöfullegt lesefni: 2015:37

skrifaði þann | Engin ummæli

Rauðu djöflarnir

United

Screen Shot 2015-10-29 at 13.13.57

Class of 92

Tíst vikunnar

Mynd vikunnar

Myndband vikunnar

Tónleikar vikunnar

Enska deildarbikarkeppnin

Manchester United 0 (1) – 0 (3) Middlesbrough

skrifaði þann | 9 ummæli

Jæja. Þetta eru tveir klukkutímar sem ég fæ aldrei aftur. Þeir tveir hlutir sem máttu alls ekki gerast, gerðust í kvöld;
a) Leikurinn fór í framlengingu, en leikmannahópur liðsins má ekki við því.
b) Manchester United tapaði.

Sumsé, í kvöld þá datt United úr Carling Cup eftir vítaspyrnukeppni við Middlesbrough. Var þetta fjórða vítaspyrnukeppnin sem Manchester United tapar í röð, og sjaldan hefur liðið skorað meira en eitt mark í hverri keppni fyrir sig.

Byrjunarliðið kom mörgum á óvart en Van Gaal gerði fullt af breytingum, liðið leit svona út;

20
Romero
5
Rojo
17
Blind
12
Smalling
36
Darmian
16
Carrick
25
Fellaini
7
Memphis
44
Pereira
35
Lingard
19
Wilson

Bekkur: De Gea, Young (’60), Schweinsteiger, Herrera, Mata, Martial (’70), Rooney (’45).

Leikurinn

Fyrri hálfleikur leiksins var álíka spennandi og endajaxlatakan mín um árið. Spilaðist hálfleikurinn mjög svipað og leikurinn gegn Manchester City. Eina markverða var í raun varsla Sergio Romero frá Stewart Downing.

Síðari hálfleikurinn byrjaði á því að fyrirliði vors og blóma kom inn á fyrir James Wilson sem hafði verið haltrandi síðustu fimm mínútur fyrri hálfleiks. Middlesbrough menn tóku mjög hart á leikmönum United og gáfu þeim aldrei tíma til að snúa með boltann og Wilson, hafandi ekki spilað í nærri mánuð núna, virtist hafa fengið högg í einum af árekstrum sínum við varnarmenn Middlesbrough.

United virtist hafa tekið skilaboðum Louis Van Gaal frá Manchester City leiknum en í byrjun síðari hálfleiks skutu þeir á markið fyrir utan teig í gríð og erg. Því miður voru skotin flest öll skelfileg.

Svo gerðust tvö atvik með stuttu millibili sem fengu áhorfendur á vellinum til að opna augun og fylgjast aðeins með. Fyrst átti Middlesbrough skot í stöng sem endað með því að hreinsun Daley Blind heppnaðist ekki betur en hann átti þessa rosalegu snuddu í eigið net. Sem betur fer, eftir að hafa gripuð um andlitið, þá sá hann að línuvörðurinn hafði flaggað sóknarmann Middlesbrough rangstæðan. Örskömmu síðar buðu Blind og Romero upp á veislu en þá átti Blind sendingu til baka á Romero sem ætlaði að taka snertingu áður en hann myndi lúðra boltanum upp völlinn. Snertingin var hins vegar það léleg að boltinn lak framhjá Romero, framhjá stönginni og í horn. Kostulegt atvik.

Leikurinn hjakkaðist svo í sama farinu alveg þangað til það voru komnar ’90 á klukkuna. Þá allt í einu var eins og menn risu upp frá dauðum. Fyrst átti Jesse Lingard skot sem minnti á Arnarskotið úr þáttunum Skot Og Mark hérna í gamla daga. Því miður fór Arnarskotið í tréverkið. Middlesbrough brunaði í sókn og fékk tvö mjög fín færi með skömmu millibili en skemmtikrafturinn Romero sá við þeim.

Svo fór leikurinn í framlengingu. Van Gaal breytti um taktík. Anthony Martial fór upp á topp með Marouane Fellaini, Rooney og Michael Carrick á miðjunni með Andreas Pereira og Lingard á vængjunum. Þessi taktíska breyting breytti engu og var framlengingin svipað spennandi og boccia mót eldri borgara. United átti reyndar nokkur skallafæri í lok framlengingar en ekkert þeirra hitti markið.

Í vítaspyrnukeppninni var markmaður Middlesbrough hetjan en hann varði tvær spyrnur. Þá fyrstu frá Rooney en það vissi hver einasti maður, kona og barn á þessari plánetu að Rooney myndi klikka. Svo klikkuðu Englendingarnir Ashley Young og Michael Carrick í þokkabót. Fyrir Middlesbrough þrumaði Englendingurinn Dave Nugent yfir. Allir þessir leikmenn eiga það sameiginlegt að hafa spilað fyrir A landslið Englands. Talandi um bölvun.
Fyndnasta klúðrið kom í raun frá Ashley Young en þá var markmaðurinn búinn að fara í sama hornið þrisvar sinnum og Young ákvað að fullkomna þetta fyrir hann og setja boltann í það horn.

Lokatölur því 1-3 tap í vítaspyrnukeppni.

Punktar

a) Miðað við allar róteringar liðsins þá var augljóst að flæðið myndi vera takmarkað. Að það yrði jafn takmarkað og raun bar vitni var samt ótrúlegt.

b) Ungu strákarnir heilluðu ekki mikið. Pereira og Lingard sýndu fína boltameðferð en aggressíf vörn Middlesbrough virtist koma þeim í opna skjöldu. Hefði verið fullkomið ef Lingard hefði skorað með skotinu sem fór í tréverkið en annan leikinn í röð er hann nálægt því að tryggja sigurinn í blálokin. Meiðsli Wilson voru svo einkar týpísk en drengurinn ekki spilað leik í mánuð. Það var augljóst að skortur á leikæfingu hrjáði þá flesta og virðist sem draugar hollenska landsliðsins hafi elt Memphis til Manchester. Drengurinn var skugginn af þeim leikmönnum sem hann var í fyrstu leikjum liðsins. Það virðist allt á öllu að hann þurfi gott knús og gott pepp frá félögunum í liðinu í þokkabót.

c) Varnarleikur Middlesbrough var upp á tíu. Mjög aggressífur og skipulagður. Eitthvað sem fæstir framherjar United bjuggust við og höndluðu þeir pressuna ekki alveg nægilega vel. Aitor Karanka er búinn að byggja upp mjög skipulagt lið en sóknarleikurinn er þeirra helsta vandamál. Það kom ekki að sök í kvöld. Að því sögðu þá fannst mér dómari leiksins frekar slakur og hefði hann mátt flauta mun oftar á Middlesbrough sem dönsuðu oft á línunni í varnarleik sínum. Að sama skapi er í raun ótrúlegt að United hafi ekki fengið víti en Daniel Ayala virðist hafa fengið hinn fræga „John Terry passa“ en hann gefur mönnum leyfi til að taka boltann með höndum inn í teig þegar þeim hentar. Það gerði Ayala allavega tvisvar í kvöld.

d) Wayne Rooney. Það vissu ALLIR að hann myndi klúðra þessu víti. Held að meira segja hann sjálfur hafi vitað það. Bendi á Mánudagspælingar vikunnar varðandi frekari punkta um drenginn.

e) Groundhog Day sóknarleikur heyrði ég um sóknarleik liðsins í kvöld og undanförnum leikjum. Það er ágætis lýsing. David Moyes var gagnrýndur fyrir að fara bara upp kantana og bomba fyrir, aftur og aftur. Það eina sem ég get sagt um það er að liðið komst þó alla leið upp kantinn. Í dag er þetta útfærsta af hægum handboltarsóknarleik. Sem endar oftar en ekki með fyrirgjöf þegar það eru tíu varnarmenn í teignum. Stórkostlegt alveg hreint. Ársmiðahafar á Old Trafford eru örugglega komnir með afslátt á koddum því fólk er farið að sofna svo oft á leikjum en þetta var þriðji leikurinn af fimm í september mánuði þar sem liðið skorar ekki. 210 mínútur á Old Trafford án þess að skora mark.

Maður leiksins hjá United; Romero (sem segir í raun allt sem segja þarf um þennan leik).
Menn leiksins í heildina;  Mejias og Ayala.

Nokkur tíst

Enska deildarbikarkeppnin

Middlesbrough kemur í heimsókn

skrifaði þann | 5 ummæli

„Long time, no see“ sagði vitur maður eitt sinn.
Það á vel við um mótherja United í kvöld en það er kominn þó nokkuð langur tími síðan liðin mættust síðast. Hartnær sex ár ef við ætlum að vera nákvæm en Middlesbrough féll úr deild þeirra efstu og hafa verið í Championship deildinni síðan.

Middlesbrough

 
Þeir voru þó hársbreidd frá því að komast aftur í Premier League í fyrra en þeir töpuðu 2-0 fyrir Norwich í því sem hefur verið kallað 40 milljón punda leikurinn en það er sú upphæð sem lið græða á því að vera í efstu deild. Sú upphæð fer eflaust hækkandi með nýjum sjónvarpssamningum.

Sem stendur situr Middlesbrough í 4. sæti Championship deildarinnar með 24 stig, en Derby County og Birmingham eru með jafnmörg stig. Á meðan eru Burnley og Hull með einu stigi meira og sitja þau í þriðja og öðru sæti deildarinnar.

Af þeim sem spiluðu síðasta leik milli liðanna eru aðeins Stewart Downing og Wayne Rooney eftir í leikmannahópum liðanna en Downing kom aftur til Middlesbrough frá West Ham fyrir þetta tímabil. Hvað varðar bikarkeppnir þá mættust liðin þegar Middlesbrough var ennþá í efstu deild en það var 23. september 2008. Sá leikur er hvað minnistæðastur fyrir þær sakir að Emanuel Pogatetz gerði í raun út um feril Rodrigo Possebon. Hann virtist í raun aldrei jafna sig eftir þá tæklingu og hefur ekki náð sér á strik síðan. United vann leikinn 3-1 með mörkum frá Cristiano Ronaldo, Luis Nani og núverandi aðstoðarþjálfara liðsins, Ryan Giggs.

Middlesbrough koma inn í leikinn eftir góðan sigur á Wolves um helgina en leiknum á undan töpuðu þeir gegn Cardiff og þar áður gerðu þeir markalaust jafntefli við Fulham.

Middlesbrough á svo heimaleik gegn Jóhanni Berg og félögum í Charlton Athletic nú á laugardaginn klukkan 15:00 og má því reikna með einhverjum breytingum á þeirra liði í kvöld. Hvort þeir geri 11 breytingar eins og Mick McCarthy gerði á Ipswich Town liði sínu í síðustu umferð er ólíklegt en eflaust rótera þeir eitthvað.

Annars er skemmst frá því að segja að Middlesbrough er talið eitt af skipulagðari liðum Championship deildarinnar og eru sem stendur með næst bestu vörn deildarinnar. Þeir hafa aðeins fengið á sig 9 mörk í 13 leikjum. Að sama skapi eru þeir, ásamt Reading, með þriðju bestu sókn deildarinnar. Þeir hafa skorað 20 mörk en aðeins Queens Park Rangers og Fulham hafa skorað fleiri, eða 22 talsins.

Okkar Menn

Okkar menn koma inn í leikinn eftir skítsæmilegt jafntefli gegn Manchester City í nágrannaslagnum um helgina. Þar á undan hafði liðið gert 1-1 jafntefli við CSKA Moskvu og unnið Everton 3-0. Að því sögðu þá á liðið mjög erfiðan útileik gegn Crystal Palace næst komandi laugardag og því má búast við breytingum.

Á blaðamannafundi liðsins í gær sagði Louis Van Gaal sem minnst. Hann virðist þó ætla að rótera eitthvað þar sem hann telur suma leikmenn liðsins vera á rauða svæðinu (e. the red zone) hvað varðar fitness. Ég reikna með því að það verði gerðar þó nokkuð margar breytingar á byrjunarliðinu. Sérstaklega þar sem það vantaði nokkur nöfn í U21 liðið sem vann Sunderland á mánudaginn. Reyndar eru Josh Harrop og Paddy McNair að öllum líkindum meiddir og því ekki með en ég spái liðinu á morgun einhvern veginn svona;

1
De Gea
18
Young
17
Blind
4
Jones
36
Darmian
16
Carrick
25
Fellaini
7
Memphis
44
Pereira
35
Lingard
19
Wilson

Stærsta spurningamerkið þarna er líklega Ashley Young en hann byrjaði að æfa síðasta föstudag, ef til vill verður hann þá varamaður og Rojo áfram í bakverðinum. Hvað varðar James Wilson þá var hann víst smávægilega veikur og fór því ekki með til Moskvu og var svo ekki í hóp hjá U21 á mánudaginn. Ég tel því gefið að hann byrji leikinn. Mig dauðlangar að sjá hann, Memphis og Pereira saman á vellinum og vona að það verði raunin í kvöld.

Van Gaal er reyndar líklegur til að vilja ekki rótera of mikið og missa þar af leiðandi allt jafnvægi úr liðinu en með solid öftustu fjóra (fimm ef þú telur Carrick með) þá ættu fremstu fimm að fá að njóta sín. Mikill hraði ásamt mikilli tæknilegri getu ætti að geta valdið usla. Svo erum við auðvitað alltaf með Fellaini sem plan B ef það gengur ekkert að tæta vörn Middlesbrough í sig á jörðinni, þá förum við bara hálofta leiðina.

Spá fyrir leikinn, nokkuð þægilegur 2-0 heimasigur með mörk í sitt hvorum hálfleiknum. Segjum að Memphis og