Rauðu djöflarnir

Meistaradeild Evrópu

Manchester United 2:1 Wolfsburg

skrifaði þann | 13 ummæli

Lið United var óbreytt frá leiknum gegn Sunderland. Það gladdi marga stuðningsmenn liðsins að sjá Andreas Pereira og James Wilson á bekknum. Ander Herrera og Antonio Valencia voru tæpir fyrir leikinn en Valencia gat þó byrjað leikinn á meðan Herrera var ekki í hóp. Luiz Gustavo leikmaður Wolfsburg var ekki með vegna meiðsla en hann er fastamaður í djúpri tveggja manna miðju.

Fyrri hálfleikur

Leikurinn fór frekar fjörlega af stað. Wolfsburg voru mjög aggresívir og náðu að skora strax á 4. mínútu eftir að spila vörn United sundur og saman alltof auðveldlega. Í endursýningum kom í ljós að Valencia gleymdi sér og var alltof aftarlega á meðan fjórir leikmenn voru allir vinstra megin í teignum. Markaskorari gestanna var Daniel Caligiuri.

Þýska liðið var gjörsamlega frábært fyrstu 20 mínútur leiksins og United virtist vera gjörsamlega á hælunum. Wolfsburg voru ánægðir með liggja aftur eftir markið og beita skyndisóknum sem voru margar ansi hættulegar.

United fór aðeins að sækja í sig veðrið og jók tempóið í spili sínu og náði mörgum frambærilegum sóknum en erfiðlega gekk þó að koma boltanum í markið.

Á 33. mínútu gerðist Caligiuri markaskorari Wolfsburg skúrkur þegar hann setti höndina í boltann inni í teig og fékk dæmda á sig vítaspyrnu. Einnig upskar hann gult spjald.

Á punktinn steig Juan Mata sem skoraði af miklu öryggi framhjá Benaglio.

Staðan í hálfleik 1:1.

Seinni hálfleikur

Louis van Gaal gerði eina breytingu í hálfleik en Ashley Young kom inn fyrir dapran Valencia sem var greinilega ekki alveg 100%. Young fór þá í hægri bakvörðinn.

Wolfsburg byrjaði seinni hálfleikinn vel og ætlaðu sér greinilega að ná öðru marki en Smalling, de Gea og félagar ætluðu að sjá til þess að það gerist ekki.

Á 53.mínútu átti Young hlaup upp kantinn og setti boltann fyrir á Juan Mata sem átti stórkostlega hælsendingu á Chris Smalling sem skoraði laglegt miðvarðarmark. Allt í einu var United komið yfir og var algjörlega í bílstjórasætinu.

Því miður fyrir utan Young gerðu skiptingarnar í seinni hálfleiknum meira ógagn en gagn. Andreas Pereira kom inná fyrir Memphis sem átti fínan leik í kvöld en fékk reyndar dæmt óskiljanlegt gult spjald skömmu áður en hann var tekinn af velli.

Þegar rétt rúmar 20 mínútur voru eftir af leiknum þá var Schweinsteiger orðinn þreyttur. Þar sem enginn Carrick né Herrera voru á bekknum þá var það Phil Jones sem kom inná fyrir hann.

Þessi skipting lukkaðist ekki vel. Allt control og yfirvegun sem United hafði haft í leiknum var alveg farið og gestirnir lágu í sókn meira og minna það sem eftir var leiks og höfðu sett „snillinginn“ Nicklas Bendtner inná til að freista þess að jafna þennan leik.

Sem betur náðu vörnin og David de Gea að sjá við þeim og tryggja United stigin 3 sem voru lífsnauðsynleg.

Maður leiksins

8 Juan Mata
Juan Mata

Byrjunarlið kvöldsins

Manchester United

1
De Gea
36
Darmian
17
Blind
12
Smalling
25
Valencia
31
Bastian
28
Schneiderlin
7
Memphis
10
Rooney
8
Mata
9
Martial

Bekkur: Romero, Jones (Schweinsteiger), Young (Valencia), Wilson, Fellaini, McNair, Pereira (Memphis).

VfL Wolfsburg

1
Benaglio
34
Rodriguez
18
Dante
25
Naldo
15
Träsch
27
Arnold
23
Guilavogui
10
Draxler
11
Kruse
7
Caligiuri
12
Dost

Bekkur: Grün, Bendtner (Dost), Schäfer, Klose, Schürrle (Arnold), Jung (Träsch), Seguin.

Meistaradeild Evrópu

Meistaradeildin: Wolfsburg kemur í heimsókn

skrifaði þann | 4 ummæli

utd vs wolfsburgLoksins, loksins. Það er oft talað um að enginn viti hvað hann/hún eigi fyrr en glatað hefur. Í tilfelli Manchester United og stuðningsmanna liðsins er það Meistaradeild Evrópu. Síðasta tímabil var það fyrsta í ca. 20 ár sem að United var ekki neinni Evrópukeppni hvað þá meistaradeild.

Fyrir ykkur sem viljið vita/rifja upp meira um síðustu leiki og frammistöður ákveðinna leikmanna þá er dottið inn splunkunýr þáttur af hlaðvarpi Rauðu djöflanna og var hann vel mannaður.

Manchester United

Fyrsta umferðin fór eins illa og getað hefði. United missir Shaw í langan tíma og fær ekki einu sinni vítaspyrnuna sem réttilega hefði átt að vera dæmd. Þetta atvik sló leikmenn liðsins alveg útaf laginu og kom því kannski ekki mikið á óvart að svo fór sem fór.

Sem betur fer hefur United haldið dampi í deildinni og er eitt á toppnum að loknum 7 umferðum.

En að leiknum annað kvöld þá verður Michael Carrick fjarri góðu gamni. Ander Herrera og Antonio Valencia munu einnig vera tæpir. Marcos Rojo er svo líka meiddur.

Líklegt byrjunarlið:

1
De Gea
18
Young
17
Blind
12
Smalling
36
Darmian
31
Bastian
28
Schneiderlin
7
Memphis
10
Rooney
8
Mata
9
Martial

Vfl Wolfsburg

VfL Wolfsburg er að keppa í annað skipti í sinni sögu í Meistaradeild Evrópu. Síðast voru þeir einmitt líka í riðli með CSKA Moskvu og Manchester United. Glöggir stuðningsmenn muna kannski eftir þrennu Michael „zzz“ Owen gegn þeim.

Wolfsburg voru næstbesta lið Bundesligunnar á síðasta tímabili og segir það kannski ekki mikið enda er einokun Bayern á titlinum farin að minna á Celtic í Skotlandi. Þeir hafa farið ágætlega af stað í deildinni og meira að segja bara nokkuð vel. Þeir töpuðu reyndar ansi illa gegn Bayern (ótrúlegt, ekki satt?) þar sem hinn magnaði Robert Lewandowski kom inná og gerði sér lítið fyrir og skoraði „fimmu“. Hann jafnaði gamalt met Atla Eðvaldssonar yfir fimm mörk skoruð með stuttu millibili.

Lið Wolfsburg hefur tekið nokkrum breytingu frá því á síðasta tímabili og frægast dæmið er Kevin de Bruyne sem var seldur á metfé til Man City. Einnig voru Ivan Perisic og Aaron Hunt seldir. Perisic til Inter í Mílanó og Hunt til Hamburger SV. Reyndar hafa þeir fengið nokkra sterka leikmenn í staðinn. Bera þar hæst Julian Draxler frá Schalke 04, Max Kruse frá Mönchengladbach og Dante frá Bayern München.

Líklegt byrjunarlið:

1
Benaglio
34
Rodriguez
18
Dante
25
Naldo
15
Träsch
27
Arnold
7
Caligiuri
17
Schürrle
10
Draxler
11
Kruse
12
Dost

 

Djöflavarpið

Podkast Rauðu djöflanna – 15. þáttur

skrifaði þann | Engin ummæli

Þáttur nr. 15 er kominn í loftið. Að þessu sinni ræddu Sigurjón, Magnús, Runólfur og Tryggvi Páll gengi liðsins undanfarnar vikur, Anthony Martial og miðverðina okkar ásamt því að tekinn var léttur snúningur á dagskránni framundan.

Hægt er að hlusta á þáttinn í spilaranum hér fyrir ofan auk þess sem hægt er að hala honum niður í gegnum spilarann eða hér að neðan. Jafnframt má gerast áskrifandi að þættinum í gegnum ýmis podkast-forrit:

Gerast áskrifandi í iTunes
Gerast áskrifandi í öðrum forritum

MP3 niðurhal: 15.þáttur

Enska úrvalsdeildin

Manchester United 3:0 Sunderland

skrifaði þann | 19 ummæli

United tók á móti Sunderland í dag á Old Trafford. Þessi sjöunda umferð byrjaði á leik Tottenham og City og gerðu Spurs menn sér lítið fyrir og unnu toppliðið sannfærandi með fjórum mörkum gegn einu í leik þar sem hvorki meira né minna en þrjú rangstæð mörk voru skoruð.

Þessi úrslit urðu þess valdandi að með sigri í dag gæti United rænt toppsætinu af City og að liðið yrði þá í fyrsta skipti, síðan Ferguson ákvað að hætta sem stjóri, í toppsæti deildarinnar. Það voru því engar ýkjur þegar maður segir að þessi leikur fór úr því að vera mikilvægur yfir að vera algjör MÖST-WIN fyrir Van Gaal og félaga sem horfðu tapleik City.

Van Gaal stillti liðinu svona í dag:

De Gea
Darmian
Blind
Smalling
Valencia
Schneiderlin
Carrick
Memphis
Rooney
Mata
Martial

og á bekknum voru þeir Romero, Jones, Herrera, Schweinsteiger, Pereira, Young og Fellaini.

Ekki hægt að neita því að maður var nokkuð undrandi að sjá Van Gaal láta byrjunarliðið hafa tvo varnarsinnaða miðjumenn á heimavelli gegn liði eins og Sunderland sem eru búnir að vera í alveg skelfilegu formi í deildinni, níu leikir í röð án sigurs (Fjögur jafntefli og fimm töp). En maður nú alveg temmilega bjartsýnn um þrjú stig í dag þó að það hefði verið gaman að sjá Herrera með Schneiderlin á miðjunni. Nú er komin sú tilgáta að Van Gaal sé að láta þá Carrick og Schneiderlin spila saman í svona leikjum til að undirbúa þá fyrir stórleikina þar sem eðilegt er að hafa þá saman á miðjunni. Ég vona að það sé satt því annars er þetta bara undarlegt.

Dick Advocaat stillti liði Sunderland svona:

Pantilimon
Jones
O’Shea
van Aanholt
Kaboul
M’Vila
Cattermole
Toivonen
Lens
Borini
Johnson

Með Larsson, Gomez, Defoe, Coates, Yedlin, Fletcher og Mannone á bekknum.

United byrjaði leikinn nokkuð öflugt en eins og við erum búin að sjá soldið oft með liðið hans Van Gaal, þá nær liðið að halda boltanum vel en á erfitt með sakapa sér nógu mörg góð færi. Oft á tíðum horfði maður á fjóra sóknarmenn United reyna klóra sig í gegnum 6 varnarmenn Sunderland. Það voru ekki mikil gæði í fyrri hálfleik sem virðist vera nokkuð algengt vandamál þessa dagana.

Stuðningsmenn United voru því orðnir ansi órólegir þegar komið var að uppbótartíma fyrri hálfleiks, sem voru fjórar mínútur og staðan enn núll núll. Á 48. mínútu ákvað Blind að koma með alveg fráhábæra sendingu inn í vítateiginn yfir á Mata sem skapaði algjört dauðafæri. Við fyrstu sýn sýndist mér Mata ná að klúðra færinu, sem hann hefur verið að gera soldið undanfarið en kappinn hitti boltann svona laglega og lagði hann fyrir Memphis sem kom á fleygiferð og skoraði sitt fyrsta deildarmark fyrir liðið. Eitt núll alveg í blálokin á fyrri hálfleik.

Það er ekki hægt að hrósa nóg þessari sendingu hjá Blind og óeigingirni Mata því fáir hefðu skammað hann fyrir að skjóta út þessu færi. Með þessari stoðsendingu er Mata kominn með 38 slíkar síðan 2011/12 er það bara David Silva hjá City með fleiri (43). Algjört kjaftshögg á vesalings Sunderland eftir góða frammistöðu en leikmenn United fóru inn í búningsherbergi skælbrosandi.

Van Gaal ákvað að hafa sama lið byrja seinni hálfleik og ákváðu leikmenn liðsins að verðlauna honum með því að byrja þann seinni með sama krafti og þeir enduðu þann fyrri. Martial fékk boltann frá Mata við vítateigslínuna hægra megin, tók gott hlaup inn í teig þar sem hann lék á varnarmann Sunderland og bombaði boltanum á Rooney sem notaði hnéið til að skora annað mark United. Ekki hægt að óska eftir betri byrjun á seinni hálfleik.

Eftir þetta hélst tempóið á nokkuð svipuðu leveli og við erum vön. United mikið með boltann, reyndi að skapa færi með betri árangri en oft áður og svo inn á milli fengu Sunderland ágætis færi en besti markmaður heims varði öll skot. Magnað hvað De Gea ver mikið með löppunum sínum, drengurinn hlýtur að hafa æft ballett á sínum yngri árum.

Á 67. mínútu kom Schweinsteger inn fyrir Carrick. Stuttu síðar fékk Blind vægt höfuðhögg og ákvað Van Gaal að taka engar áhættur og skipta honum út fyrir Phil Jones. Afskaplega gott að fá Jones aftur til baka. Á 76. mínútu notaði Van Gaal sína síðustu skiptingu þegar hann setti Young inn fyrir Memphis. Tólf mínútum síðar náði Young að þakka fyrir sig þegar hann fékk boltann vinstra megin við vítateig Sunderland. Young hljóp inn í teig og kom með fína fyrirgjöf sem endaði hjá Juan Mata sem kom boltanum snyrtilega inn í netið.

Liðin virtust sætta sig við þessi úrslit og ferðist lítið eftir þetta og endaði leikurinn með þremur mörkum gegn engu.

Vangaveltur og pælingar spaka mannsins

1. Við erum í toppsæti deildarinnar eftir sjö umferðir! Það er afskaplega skemmtileg sjón og eins og ég nefndi fyrir ofan þá höfum við ekki séð slíkt síðan Ferguson stjórnaði liðinu. Við skulum njóta þess í smástund en því miður þurfum við að halda kúlinu því núna hefst ansi erfitt leikjaprógramm: Wolfsburg (h), Arsenal (ú), Everton (ú), CSKA (ú), City (h), Middlesborough (h), Crystal Palace (ú) og CSKA (h). Þetta er ansi stíft hjá okkar mönnum og kæmi mér ekki á óvart að liðið missi einhver stig í deildinni. En þangað til skulum við njóta þess að sjá United á réttum stað á töflunni :)

2. Ég verð að taka undir með félaga mínum Runólfi með að það er afskaplega furðulegt hjá Van Gaal að hafa aldrei framherja á bekknum. Og nei, Fellaini er ekki framherji! James Wilson skrifaði undir nýjan samning við liðið í vikunni en hann virðist ekki fá mörg tækifæri með aðalliðinu þessa dagana. Ég trúi ekki öðru en að það sé eitthvað plan í gangi með Wilson en það er satt að segja soldið pirrandi að sjá hann ekki á bekknum, sérstaklega í svona leik þar sem allir vita að hitt liðið mun pakka í vörn í von um að taka með sér eitt stig.

3. Þessi drengur! Þessi nítján ára drengur. Þetta er alveg stórkostleg byrjun hjá Martial hjá United. Hann er búinn að spila fimm leiki fyrir okkur, hefur skorað fjögur mörk og átti svo stoðsendingu í dag. Það er ekki hægt að segja annað en að hafi alveg smellpassað inn í liðið okkar, kemur með kraft og var hraðasti leikmaður liðsins í dag. Þar að auki nær hann að halda boltanum gríðarlega vel, er duglegur að halda spilinu gangandi, er sífellt að leita að góðum sendingum eða þá að hlaupa að marki andstæðingins. Ljómandi, alveg ljómandi! Munið svo að ef fólk er enn að nöldra yfir verðmiða drengins þá getum við bara sagt að árslaun Van Persie, Falcao og Di Maria hafi borgað þann pening ansi auðveldlega og miðað við frammistöðu hingað til þá erum við mun betur settir með Martial.

4. Hvað varð um Energizer kanínuna okkar? Ég hef verið einn af helstu stuðningsmönnum Rooney síðan hann var keyptur til liðsins árið 2004 en það er orðið helvíti erfitt fyrir mig að verja hann. Jú hann skoraði í dag (eftir að Martial bombaði boltanum í hnéið á honum) og átti í raun með sínum betri leikjum á þessu tímabili en ég er hættur að sjá það sem ég dýrkaði mest hjá honum. Það er drifkrafturinn. Rooney hefur verið, nánast frá því hann var keyptur, aðaldrifkraftur liðsins í gegnum árin. Hann er sá sem gafst aldrei upp, hann varð reiður þegar liðið spilaði illa, hann hljóp á eftir öllum boltum, sótti stanslaust, reyndi að skapa fyrir liðið og með hausinn 100% í leiknum. Ég sé þetta ekki lengur, ég sá hann stoppa eftir að sókn hafði klikkað, sá hann sofna (nokkrum sinnum) þegar liðsfélagar hans voru að reyna taka þríhyrningsspil með honum o.s.frv. Þetta er áhyggjuefni.

Að lokum…

Þrjú stig í dag og toppsætið er okkar! Það þýðir bara að við syngjum og dönsum með Van Gaal í kvöld!

https://vine.co/v/eAFOKUWwWWW

Enska úrvalsdeildin

Wes Brown og John O’Shea snúa aftur – Sunderland kemur í heimsókn

skrifaði þann | 4 ummæli

Það eru leikir á þriggja daga fresti núna hjá United, alveg nákvæmlega eins og maður vill hafa það. Í vikunni var það Ipswich, á morgun er það Sunderland og á miðvikudaginn er það Wolfsburg.

Önnur helgi, annar hollenskur stjóri. Dick Advocaat tók við stjórnartaumunum í Sunderland á síðasta tímabili. Hann sneri við gengi liðsins og bjargaði þeim frá falli en eitthvað hefur honum brugðist bogalistin það sem af er tímabili enda eru Sunderland-menn á botninum, rétt fyrir neðan erkifjendurna í Newcastle. Ekki bjartir tímar í norðaustur-Englandi þessa dagana.

Stjórarnir tveir, Van Gaal og Dick Advocaat, ættu að þekkjast ágætlega. Þeir eru á svipuðum aldri og hafa lengst af verið hluti af fótbolta-elítunni í Hollandi. Þegar Ajax-lið Louis van Gaal var upp á sitt besta stýrði Advocaat PSV en alls hafa þessir stjórar mætt hvor öðrum níu sinnum á vellinum, síðast árið 2007 þegar Louis van Gaal stýrði AZ og Advocaat stýrði Zenit. Það hallar reyndar á Van Gaal í þessum viðureignum en hann hefur aðeuns unnið einn af tíu, fimm hafa endað með jafntefli á meðan Advocaat hefur staðið uppi sem sigurvegari í þrjú skipti.

Sunderland

Eins og áður sagði hefur þetta Sunderland-lið ekki farið vel af stað, vægast sagt. Liðið er steindautt á botninum og hefur í raun varla mætt neinu af þeim liðum búist er við að endi í efri hluta deildarinnar. Um síðustu helgi tapaði liðið fyrir nýliðum Bournemouth auk þess sem nýliðar Norwich unni sigur á Sunderland fyrir skömmu. Það er því ekki hátt risið á leikmönnum liðsins þessa stundina en þeir fengu frekar háðulega útreið gegn City í deildarbikarnum í vikunni og var Advocaat hræddur um að stuðningsmennirnir myndu ganga af vellinum eftir að liðið lenti  0-4 undir í hálfleik.

Það gengur hreinlega hvorki né rekur hjá liðinu en þar geta menn ekki verið sáttir eftir að hafa fengið nokkra sterka leikmenn til sín fyrir tímabilið. Það er algjört andleysi yfir leik liðsins þessa dagana og gullið tækifæri til þess að keyra almennilega á þá og brjóta liðið niður í upphafi leiks.

Okkar menn Wes Brown og John O’Shea mega muna sinn fífill fegurri en Younes Kaboul hefur litlu bætt við varnarleik liðsins. Það er helst lánsmaðurinn Yann M’VIla sem getur borið höfuðuð hátt en leikmenn á borð við Jermain Defoe, Ola Toivonen og Jeremain Lens hafa ekki verið að skora hátt að undanförnu.

Advocaat, líkt og Van Gaal, var ekki mikið í því að hvíla leikmenn í deildarbikarnum í vikunni og stillti upp tiltölulega sterku liði, Defoe var á bekknum en að öðru leyti var byrjunarliðið hefðbundið. Þeirra leikmenn ættu því að vera í álíka góðu standi og okkar menn og því fær Sunderland enga forgjöf í þeirri deild.

Fastlega má gera ráð fyrir að Sunderland muni liggja í vörn, leyfa United að stýra leiknum og vona það besta. Það getur gefist vel en í sannleika sagt er þetta Sunderland-lið bara það slakt um þessar mundir að allt annað en þægilegur sigur á morgun verða mikil vonbrigði.

United

Það sem helst angrar United akkúrat núna eru, surprise surprise, meiðsli í vörninni. Luke Shaw er fótbrotinn og það hefur haft ruðningsáhrif á vörnina. Rojo spilaði meiddur gegn Southampton og getur ekki spilað leikinn á morgun, eitthvað sem Louis van Gaal á að vera ósáttur með en sögur segja að Rojo hafi ekki sagt frá því að hann væri eitthvað tæpur. Paddy McNair er svo einnig meiddur og því virðist varnarmeiðslaólukkan gríðarlega að vera að hefjast á nýjan leik.

Fastlega má gera ráð fyrir því að Ashley Young spili vinstri bakvörðinn líkt og gegn Ipswich enda ljóst að Louis van Gaal vill ekki mikið vera að hræra í miðvarðarstöðunni með því að færa Blind til vinstri. Svo má einnig velta því fyrir sér hvort að Darmian víkji fyrir Valencia en Ítalinn okkar hefur, eftir frábærja byrjun, aðeins verið að hiksta.

Að öðru leyti veltur liðið svolítið á því hvernig menn jafna sig eftir Ipswich-leikinn líkt og Louis van Gaal sagði á blaðamannafundi áðan. Carrick kemur líklega inn ásamt Memphis og Martial. Fastlega má gera ráð fyrir Mata sem spilaði ekki allan leikinn í vikunni. Best væri ef Herrera gæti haldið áfram á miðjunni og spilað við hlið Carrick. Það er algjör óþarfi að spila með Schneiderlin í þessum leik og Herrera ætti að nýtast mun betur.

Byrjunarliðið verður líklegast eitthvað á þessa leið:

De Gea
Young
Blind
Smalling
Darmian
Carrick
Herrera
Memphis
Rooney
Mata
Martial

United er í ágætis færi til þess að halda þrýstingnum á City sem á erfiðan útileik gegn Tottenham fyrir höndum. Sunderland mun án efa reyna að fá United til þess að gefa boltann fram og til baka fyrir vörnina án þess að gefa leikmönnum liðsins færi á að skapa neitt. Það mun án efa reyna á þolinmæðina og ég held að þessi leikur muni spilast nákvæmlega eins og þessi viðureign á síðasta ári.

Þá hélt Sunderland út í um klukkutíma þangað til Falcao af öllum fiskaði víti og eftir það var eftirleikurinn auðveldur. Það kæmi mér afskaplega lítið á óvart ef eitthvað slíkt ætti sér stað á morgun. Ég vona þó auðvitað að liðið byrji af krafti og skori snemma leiks, þá gætum við fengið að sjá einhverja veislu enda er korter í brottrekstur Advocaat. Martial hefur komið með nýja vídd inn í sóknarleikinn og spilamennska liðsins er hægt og rólega að nálgast það skemmtanagildi sem við gerum kröfu um.

Allt annað en sigur er skandall. Ég set 4-0 á þetta morgun. Martial skorar tvö, bæði í hægra hornið, Memphis setur opnunarmarkið og væri ekki bara fínt ef Carrick sett eitt?

Leikurinn hefst klukkan 14.00. Dómari er Mike Jones.