Rauðu djöflarnir

Riðlakeppni Meistaradeildarinnar hefst á morgun þegar United skellir sér í lauflétta heimsókn yfir Norðursjóinn alla leið til Hollands, nánar tiltekið til Eindhoven þar sem hollensku meistararnir PSV ætla að leika hlutverk gestgjafans.

Í gegnum tíðina höfum við hjá United fengið margar góðar gjafir frá PSV og vonandi að ekkert lát verði á morgun. United-legend eins og Park Ji-Sung og Ruud van Nistelrooy komu frá PSV og svo má auðvitað ekki gleyma Jaap Stam sem spilaði mikilvægt hlutverk fyrir United þó að hann hafi kannski ekki yfirgefið United á sem bestan hátt. Svo er það auðvitað Memphisinn okkar, besti leikmaður PSV á síðasta tímabili og algjör lykilmaður þegar liðið nældi sér í sinn fyrsta titil síðan árið 2008.

Hinn lykilmaðurinn var Philip Cocu, knattspyrnustjóri liðsins sem er einn af mörgum fyrrum lærisveinum Louis van Gaal sem eru að gera góða hluti sem knattspyrnustjórar. Í nýlegu viðtali við góðkunningja okkar, Andy Mitten, fór Cocu fögrum orðum um þennan fyrrum lærimeistara sinn.

Hann var frábær þjálfari, hann gerði mann að betri leikmanni. Æfingarnar hans snérust mikið um endurtekningar. Ef leikmaður gerði mistök einu sinni slapp það til, menn gera mistök. Ef leikmaður gerði mistök í annað skiptið fékk hann tiltal. Ef leikmaður gerði svo mistök í þriðja skiptið…

Hann var alltaf vel undirbúinn taktísktlega séð. Stundum varð maður brjálaður en Louis hafði yfirleitt rétt fyrir sér. Ef maður gerði eitthvað vel var hann snöggur að láta mann vita af því. Ég get tekið gagnrýni og mér líkar vel við Louis van Gaal.

 

Cocu er á sínu 6. ári sem þjálfari hjá PSV. Hann kom heim árið 2008, kláraði þjálfararéttindin og þjálfaði yngri lið PSV áður en hann tók við aðalliðinu árið 2012. Ajax var yfirburðarlið og PSV tók þá ákvörðun að leggja áherslu á unglingastarfið, enda ómögulegt að keppa við stóru liðin í Evrópu um leikmenn. Hjá PSV fá ungir leikmenn mikinn stuðning og segir Toon Gerbraands, sem starfaði með Van Gaal hjá AZ á sínum tíma að það sé mikilvægt fyrir unga leikmenn að fá spilatíma.

Unglingaliðið okkar spilar í næst efstu deild. Þar fá ungu leikmennirnir okkar tækifæri á því að spila alvöru leiki gegn alvöru leikmönnum í alvöru liðum.

Einn þeirra leikmanna sem nýtti þetta tækifæri var Memphis Depay sem skoraði 42 mörk á síðustu tveimur leiktíðum fyrir PSV áður en að United keypti hann núna í vor. Cocu segir að þeir hafi þurft að vinna mikið með hann en hann hafi sýnt það hjá þeim að þarna hafi toppleikmaður verið á ferðinni en Cocu var sá stjóri sem gaf honum sitt fyrsta tækifæri í aðalliði PSV, það var ekki erfið ákvörðun að veita honum það tækifæri.

Hann hafði hraðann, tæknina og sprengikraftinn í heilar 90 mínútur. Hann hafði líka viljann og metnaðinn í það að skora og vilja sigra. Stundum var hann þó of ákafur og það vann gegn honum.

Við unnum mikið með andlegu hliðina, að róa hann örlítið niður. Hann lagði það á sig og kom til baka mun sterkari sem leikmaður. Hann þróaðist fljótt í toppleikmann. Við vildum auðvitað halda honum en áttum okkur á því að leikmenn eins og hann munu ekki staldra lengi við hjá okkur.

 

Af þeim sem unnu titilinn í fyrra eru aðeins Memphis og Georgiano Wijnaldium horfnir á braut en Cocu segir að það hafi gengið vel að sannfæra leikmennina um að halda áfram og þar hafi Meistaradeildin spilað sinn þátt. Liðið hefur farið ágætlega af stað í Eredivise á tímabilinu og er með 11 stig eftir 5 leiki í 4.sæti, 2 stigum frá toppliði Ajax.

Um helgina spilaði liðið ansi þægilegan leik gegn Caambur sem fór 0-6 meisturunum í vil. Þeir spiluðu manni fleiri í næstum því 90 mínútur og ættu því að vera úthvíldir. Nú þekki ég ekki þetta PSV lið mjög vel en gegn Feyenoord í síðasta leik fyrir landsleikjahlé stillti liðið svona upp þannig að ég geri ráð fyrir því að þetta sé um það bil þeirra sterkasta lið.

Luuk de Jong er þeirra helsti markaskorari með fimm mörk á tímabilinu. Þarna eru nokkur nöfn sem maður kannast við. Bruma í miðverðinum, Guardado og Maher á miðjunni ásamt Narsingh á kantinum, engar stórstjörnur en Cocu virðist geta náð miklu útúr þessu liði og ljóst að þeir verða sýnd veiði en alls ekki gefin á heimavelli sínum, Phillips Stadion, annað kvöld.

United

Okkar menn hljóta að vera ansi sprækir eftir flottan sigur á erkifjendunum í Liverpool á laugardaginn. Anthony Martial kynnti sig fyrir alheiminum á meðan vörnin okkar steig varla feilspor sem farin að vera venjan, frekar en hitt sem við höfum kannski verið vanari sl. 2-3 tímabil.

Vörnin velur sig sjálf og varla ástæða til þess að hrófla mikið við henni á meðan menn haldast ómeiddir. Vissulega þurfa menn eins og Rojo og Jones að fara fá mínútur en á meðan Blind og Smalling halda áfram að spila eins og Rio og Vidic verða þeir Rojo og Jones bara að bíða átekta.

Næsti leikur er á sunnudaginn þannig að það þarf ekkert að hafa miklar áhyggjur af því að vera að hvíla leikmenn en Morgan Schneiderlin ætti að koma inn fyrir annaðhvort Bastian eða Carrick, það er óþarfi að píska þeim út á gamals aldri. Skemmtilegast væri að sjá Herrera og Schneiderlin á miðjunni en líklega fer bara annar af gömlu mönnunum okkar á bekkinn af miðjunni.

Van Gaal mun líklega ekki taka áhættuna með Rooney og þá er stóra spurningin hvort að Martial fái sénsinn eða hvort að Fellaini haldi áfram að leiða framlínunna. Van Gaal hefur mikið rætt um að vernda þurfi Martial en hann hefur ágæta reynslu af Meistaradeildinni og ég sé enga ástæðu afhverju hann ætti ekki að fá að vera frammi. Memphis verður eiginlega að fá sénsinn gegn sínum gömlu félögum þrátt fyrir dapran leik gegn Liverpool en það verður erfitt að neita Ashley Young um byrjunarliðssæti eftir frábæra innkomu.

Lausnin á því er einföld. Tökum Fellaini út, setjum Mata í sína uppáhaldsstöðu og Memphis og Young á kantana. Byrjunarliðið ætti því að verða einhvernveginn á þessa leið.

Það er mikilvægt að byrja vel í Meistaradeildinni og fínt að byggja á góðum sigri gegn Liverpool. United spilar oft best þegar leikirnir koma í hrönnum og því er frábært að geta notið þess að horfa á United í Meistaradeildinni á nýjan leik. Þetta verður örugglega góður leikur enda er PSV með ungt og spennandi lið. United ætti þó alltaf að taka þetta og þar mun reynsla LvG vega þungt.

Ég vil sjá liðið okkar fara langt í þessari keppni og fyrsta skrefið að því þarf að taka á morgun. Leikurinn hefst klukkan 18.45 og hann mun fara 1-3 fyrir United. Martial, Smalling og Memphis skora mörkin.