Rauðu djöflarnir

Það var ekkert verið að flækja hlutina. Sama byrjunarlið og síðast nema Schweinsteiger kom inn fyrir Schneiderlin

Leikurinn fór fram á Soldier Field í Chicago, búist var við að hann yrði þéttsetinn, sem var raunin. Og við hjá Rauðu Djöflunum vorum meira að segja með okkar eigin mann á vellinum en fréttaritari okkar í Bandaríkjunum keyrði alla leið frá New York til að sjá leikinn.

 

Mættur í sætið! Fellaini og Januzaj að haga sér eins og kærustupar í upphitun. Sætt. pic.twitter.com/ISwv6Asmx3

— Sigurjón Guðjónsson (@manndjofull) July 30, 2015

 

Byrjunarið PSG var þannig skipað að Kevin Trapp var í markinu. Í vörninni voru Gregory Van Der Wiel, Serge Aurier, Thiago Silva og Maxwell. Þriggja manna miðja taldi Benjamin Stambouli, Marco Verratti og Blaise Matuidi. Frammi voru svo Lucas Moura, Jean Kevin Augustin og sjálfur Zlatan Ibrahimovic.

Zlatan var ekki lengi að valda usla en strax eftir tvær mínútur vippaði hann boltanum inn fyrir United vörnina en David De Gea var á tánum og náði til boltans á undan leikmanni PSG. Upp úr því gerði David De Gea sig næstum að fífli en hann sendi boltann beint á Zlatan sem skaut sem betur fer yfir markið. Annars fór leikurinn rólega af stað og liðin skiptust á að hafa boltann, það var þó nokkuð ljóst að United ætlaði sér að fara upp hægri vænginn en helsta ógn liðsins fyrstu 10 mínúturnar var nýr hægri bakvörður liðsins, Matteo Darmian. Fyrirgjafirnar hefðu þó mátt vera örlítið betri. Fyrsta alvöru skot United kom svo á 11. mínútu þegar Memphis átti slakt skot sem markmaður PSG átti í litlum vandræðum með.

Á 15 mínútu leiksins fékk Memphis talsvert betra skotfæri en Wayne Rooney fékk boltann yfir toppinn frá Bastian Schweinsteiger. Rooney gerði mjög vel að snúa á varnarmann og leggja boltann út á D-bogann þar sem Memphis kom aðsvífandi en hamraði framhjá markinu. Mjög vel spiluð sókn hjá United þarna, einföld og góð. Aðeins tveimur mínútum síðar átti Michael Carrick eina af sínum trademark sendingum yfir á hægri vænginn þar sem Darmian komst upp að endalínu og átti fína sendingu á Memphis sem virtist ekki alveg átta sig á hvar boltinn væri að koma og missti hann því til varnarmanna PSG.

Á 20 mínútu leiksins átti PSG sitt fyrsta alvöru færi þegar Zlatan Ibrahimovic skallaði framhjá eftir hornspyrnu. Það sem kom hvað mest á óvart við þessa hornspyrnu var að sjá Luke Shaw dekka Zlatan. Minnti mjög á það þegar Rafael var að dekka Didier Drogba síðastliðinn vetur, mjög ójafnar viðureignir ef þú spyrð mig. Tveimur mínútum síðar skoraði svo Juan Mata með mjög snyrtilegri afgreiðslu en því miður var hann flaggaður rangstæður.

Á 25 mínútu átti Zlatan sendingu á miðjum velli inn fyrir United vörnina þar sem Phil Jones réð ekki við Blaise Matuidi ásamt því að David De Gea hikaði í markinu. Þetta endaði með því að Matuidi náði að pota í boltann, þrátt fyrir að vera umkringdur De Gea, Jones og Shaw, og boltinn lak yfir marklínuna. Staðan 1-0 fyrir PSG!

https://vine.co/v/eX6Dx0qqUEJ

Eftir um það bil hálftíma leik áttu Shaw og Memphis flottan þríhyrning úti vinstra megin sem endaði með því að Memphis lagði boltann á Rooney sem hamraði honum yfir markið af 20 metra færi. Fín sókn sem hefði mátt enda með betra skoti. Skömmu síðar vann Shaw boltann og óð upp völlinn, lagði hann út á vinstri vænginn á Ashley Young sem átti þessa fínu „Valencia fyrirgjöf“ meðfram grasinu og varnarmenn PSG hreinsuðu í horn.

Hornspyrnan endaði hins vegar í höndunum á Kevin Trapp og PSG fór í skyndisókn. Zlatan fékk boltann á miðjunni, með nóg af plássi fyrir framan sig þá setti hann stefnuna beint á markið, þegar nær dró vítateignum þá renndi hann boltanum út til vinstri á æskuvin sinn Maxwell sem rak boltann aðeins lengra upp vænginn áður en hann sendi þessa fínu „Valencia fyrirgjöf“ beint inn á markteig þar sem Zlatan kom aðsvífandi og setti boltann á milli fóta David De Gea. Búmm.

Staðan orðin 2-0 fyrir PSG og United menn í vondum málum. Allur varnarleikur frá A-Ö í þessu marki var hrein og bein skelfing. Engin pressa á Zlatan, engin pressa á Maxwell og enginn tók ábyrgð á Zlatan þegar hann kom inn í teiginn.

https://twitter.com/PeoplesPerson_/status/626569443594928129

United gerði sitt besta til að svara strax en þeir fengu aukaspyrnu úti á vinstri kanti sem endaði með því að Memphis átti fínt skot sem Kevin Trapp varði út í teiginn. Leikmenn United voru ekki á tánum og varnarmenn PSG bægðu hættunni frá. Á 41 mínútu áttu PSG svo góða sókn sem endaði með því að boltinn fór til Lucas Moura á vinstri vængnum, hann kom inn á völlinn og átti fínt skot rétt fyrir utan vítateig sem De Gea varði.

Staðan 2-0 í hálfleik.

Í hálfleik gerðu bæði lið þónokkrar breytingar. Sam Johnstone kom inn á fyrir David De Gea. Morgan Schneiderlin kom inn á fyrir Bastian Schweinsteiger og Andreas Pereira fyrir Ashley Young.
Hjá PSG komu David Luiz, Marquinhos, Lucas Digne og Edison Cavani inn á fyrir Van Der Wiel, Serge Aurier, Maxwell og Jean Kevin Augustin. Vegna fjölda leikmanna sem ég hef aldrei heyrt um og einstaklega flókinna nafna þá verður ekki farið nánar í skiptingar PSG í síðari hálfleik.

Pereira var ekki lengi að koma sér inn í leikinn en það var ekki mínúta liðin þegar hann fékk boltann úti vinstra megin og átti fína sendingu fyrir sem Memphis náði ekki að vinna nægilega vel úr. Með því að fá Schneiderlin á völlinn þá færði Carrick sig neðar, í það hlutverk sem Schweinsteiger hafði verið í og Schneiderlin fékk að etja kappi við þá Verratti og Matuidi en Carrick og Schweinsteiger höfðu ekki beint ráðið við þá félaga í fyrri hálfleik enda báðir með einstaklega öfluga hlaupagetu á meðan hæfileikar Carrick og Schweinsteiger liggja á öðrum sviðum.

Á 51 mínútu átti PSG enn eina langa sendinguna inn fyrir vörnina hjá United og Zlatan var við það að komast einn á einn gegn Johnstone þegar Darmian tókst að stinga sér fram fyrir hann og pota boltanum til Johnstone. Frábær varnarleikur hjá hægri bakverðinum en þessi sókn var ískyggilega lík fyrra marki PSG þar sem Jones tókst hvorki að hindra að Matuidi kæmist í boltann eða þá að komast í boltann á undan honum. Þarna kom Darmian hins vegar til bjargar. Annars byrjaði United síðari hálfleikinn eins og það endaði þann fyrri en þeir áttu erfitt með að skapa færi ásamt því að þeim gekk hálf brösuglega að halda boltanum.

Eftir um klukkutíma leik þá sýndi Pereira snilldar takta úti á vinstri vængnum til að halda boltanum. Boltinn barst svo af vinstri yfir á hægri og aftur til vinstri þar sem Pereira endaði á því að flengja boltanum fyrir markið til þess eins að horfa á Thiago Silva stanga knöttinn í burtu. Stuttu síðar fór United aftur upp vinstri kantinn þar sem Shaw fíflaði þrjá leikmenn PSG með léttum snúning, hann sendi síðan knöttinn á Pereira sem kom honum inn fyrir vörnina á Rooney sem flikkaði knettinum áfram til Memphis sem því miður náði ekki nægilega góðu skoti á markið. Fín sókn hjá United en enn og aftur vandaði þennan umtala endahnút.

https://twitter.com/FourFourTee/status/626581657496195072

Sóknarleikur United hafði þarna augljóslega færst af hægri vængnum yfir á þann vinstri en bæði Shaw og Pereira voru líflegustu leikmenn United fyrsta korterið í síðari hálfleiknum. Stuttu síðar sundurspilaði framlína PSG varnarlínu United en sem betur fer ákvað Zlatan að vera kærulaus og United bægði hættunni frá.

Eftir 64 mínútur komu Chris Smalling og Antonio Valencia inn fyrir Luke Shaw og Phil Jones. Við það færðist Darmian yfir í vinstri bakvörðinn. Lítið sem ekkert gerðist næstu mínútur leiksins. Hvorugt lið var að skapa sér færi og virtust margir leikmenn United alveg búnir að tæma tankinn á meðan PSG var að fóta sig eftir að hafa gert mikið af skiptingum á þessum tíma.

Á 77 mínútu gerði Carrick sjaldséð mistök þar sem hann sendi einn leikmann PSG nánast einan í gegn úti hægra megin í vítateignum en Johnstone lokaði markinu vel og skotið fór framhjá. Stuttu síðar bauð Valencia upp á klassískt Valencia móment þar sem hann gjörsamlega hamraði Lucas Digne niður og fékk gult spjald fyrir ómakið. Í kjölfarið gerði Van Gaal tvær skiptingar; Carrick kom útaf fyrir Sean Goss, sem var að spila sinn fyrsta leik fyrir aðallið United, og Mata fór sömuleiðis útaf fyrir Jesse Lingaard.

https://twitter.com/PeoplesPerson_/status/626585662041522176

Liðið leit þá svona út síðustu 10 mínúturnar:

Síðustu 10 mínúturnar fara ekki beint í sögubækurnar en það eina sem gerðist var að Sam Johnstone sýndi mikla yfirvegun þegar hann þurfti að koma út úr vítateignum til að taka á móti löngum sendingum PSG manna. Ein var sérlega glæsileg þegar hann tók boltann einfaldlega á bringuna, rak hann aðeins áfram og sendi hann svo innanfótar upp völlinn beint á Memphis. De Gea hefði mátt sína svipaða takta í fyrra marki PSG.

Þegar tvær mínútur voru svo eftir fékk Pereira aukaspyrnu um það bil 25 metrum frá markinu eftir gott hlaup í gegnum vörn PSG manna. Því miður var aukaspyrnan algjör skelfing hjá Pereira og endaði boltinn fyrir aftan endamörk. Lokatölur 2-0 fyrir PSG og þeir því sigurvegarar í International Champions Cup.

Ekki var spilamennskan glæsileg í kvöld, en andinn var góður. Chicago er klárlega rauð! #djöflarnir pic.twitter.com/PN3Gc0jYYF

— Sigurjón Guðjónsson (@manndjofull) July 30, 2015

Þar sem þetta var fyrsti heili leikurinn sem ég sé hjá United á þessu undirbúningstímabili þá hef ég ákveðið að taka saman nokkra punkta sem ég tók eftir:

• Það er nokkuð ljóst að það á að spila út frá markmanni og út úr vörninni almennt. Hins vegar þegar menn fóru að þreytast í síðari hálfleik þá varð það erfiðara og erfiðara og lentu leikmenn oft í smá basli. Hefði verið gaman að sjá Van Gaal nota Fellaini eins og var gert á síðustu leiktíð. En sökum þriggja leikja bannsins sem Fellaini byrjar tímabilið á þá fékk hann ekki að spila með í dag.
• Þegar United liðið pressaði hátt í fyrri hálfleik þá var allt sett á fullt. Þeir færðu sig nánast yfir í 4-2-4 og pressu alla öftustu línu PSG. Það voru nokkur móment þar sem þeir voru mjög nálægt því að vinna boltann á góðum stöðum og unnu hann 1-2x á góðum stað en tókst því miður ekki að nýta það. Verður áhugavert að sjá hvort þeir haldi þessari pressu áfram þegar tímabilið er byrjað en eina liðið sem mér dettur í hug sem hefur tekist að fullkomna svona skyndilega hápressu þegar liðið tapar boltanum ofarlega á vellinum er Barcelona.
• Á alltof löngum köflum í síðari hálfleik var liðið einfaldlega alveg eins og í fyrra. Þeir héldu boltanum löngum stundum en það gerðist gjörsamlega ekki neitt sóknarlega. Þeir fundu engar glufur. Þetta leiddi svo til þess að Wayne Rooney, helsti sóknarmaður liðsins, var kominn langt niður á miðjuna að sækja boltann til þess að gefa sendingar á menn sem ættu svo að geta sett framherja liðsins í gegnum vörnina. Nema hvað að það var enginn framherji til að gefa á.

https://twitter.com/_Rob_B/status/626584635410137088

• Bakverðir liðsins litu einstaklega vel út en bæði Darmian og Shaw voru flottir. Vantaði ef til vill aðeins meira end product á síðasta þriðjung en þeir virðast ætla að vera ill viðráðanlegir í vetur. Einnig kom Andreas Pereira vel inn í þetta og sýndi að hann er efni í alvöru leikmann. Að því sögðu þá spyr ég, hvar er Ander Herreira? Hefði haldið að hann væri fullkominn kostur til að berjast við leikmenn á borð við Matuidi og Verratti en miðjumenn United voru full staðir gegn þeim félögum. Ég hefði viljað sjá hann fá einhverjar mínutur í kvöld og í raun sjá hann fá mun fleiri mínútur á undirbúningstímabilinu. Vona að hann sé ekki á leiðinni í frystikistuna umtöluðu.
• Jones-Blind parið er dauðadæmt. Ég samþykki alveg tilraunina að spila Blind í hafsent en spilaðu þá Chris Smalling með honum í guðanna bænum. Hann er einfaldlega ljósárum á undan Phil Jones. Ég, ásamt fleirum, einfaldlega skil ekki þá pælingu að bekkja Smalling fyrir Jones. Hvað Van Gaal er að reyna hér skil ég ekki og býð spenntur eftir að hann verði spurður út í þetta á blaðamannafundi.
• Skortur á skiptingum. Ég skyldi ekki alveg af hverju fleiri leikmenn voru ekki notaðir. Sérstaklega þegar upprunalega uppleggið gegn jafn illa og raun ber vitni. Sumir leikmenn voru gjörsamlega búnir á því og sóknarleikurinn var einstaklega einhæfur. Kantmenn liðsins voru að dæla svipuðum fyrirgjöfum og í fyrra inn í vítateig andstæðinganna en það sem vantaði var stóri belginn með krullaða hárið sem sá um að vinna þessar fyrirgjafir á síðasta tímabili. Án hans eru þessar fyrirgjafir barnaleikur fyrir alvöru varnarmenn.

Lokaniðurstaða eru einfaldlega gífurleg vonbrigði en sem betur fer komu þau í þessum leik og vonandi verður búið að laga allt þegar Tottenham Hotspur koma í heimsókn á Old Trafford þann 8. ágúst.