Rauðu djöflarnir

Wayne Rooney. Okkar eini framherji [footnote]Wilson er óreyndur, Chicharito er spurningamerki og Memphis er kantmaður að upplagi[/footnote].

Eftir að Louis van Gaal staðfesti að Rooney yrði notaður sem ‘central-striker’ og að hinn óvæntu kaup sem LvG hefur verið að tala um væru ekki í framherjadeildinni er ljóst að Wayne Rooney verðir framherji nr. 1 í vetur. Það eru ekki allir á eitt sáttir við þetta. Wayne Rooney er nefnilega merkilega umdeildur leikmaður, hvort sem það er á meðal stuðningsmanna United eða annara liða.

Vissulega hefur hann kannski ekki orðið sá gjörsamlega frábæri leikmaður eins og efni stóðu til í byrjun en hann hefur staðið fyrir sínu og rúmlega það. Fullt af titlum og það sem meira er, þar sem hann er jú framherji, hann er á góðri leið með að verða markahæsti leikmaður í sögu Manchester United og enska landsliðsins auk þess sem hann er eini leikmaðurinn sem á einhvern möguleika á að nálgast markamet Alan Shearer.

Þetta er svolítið merkilegt vegna þess að yfirleitt hefur Wayne Rooney ekki verið aðalmaðurinn í framlínu United. Nánast alltaf hefur hann þurft að aðlagast öðrum leikmönnum og spilað hlutverk hannað til að styðja við þá. Þangað til nú hefur hann í raun aðeins einu sinni verið aðalmaðurinn í framlínu United. Skoðum þetta aðeins.

Ruud van Nistelrooy – 2004-06

Þegar Wayne Rooney mætti á svæðið var Ruud auðvitað framherji nr. 1. Einhver hæfileikaríkasti framherji sem spilaður hefur fyrir United og liðið var gírað fyrir hann og hans spilamennsku. Hann og Rooney áttu gott samstarf en það fór ekki milli mála hvor þeirra Batman og hvor þeirra var Robin.

Þetta var á þeim tíma sem liðið átti í vandræðum með að elta Chelsea en á þessum tveimur tímabilum skoraði RvN 40 mörk og Rooney skoraði 36. Ronaldo mætti á svæðið 2005 og Ruud var sparkað enda þurfti eitthvað nýtt og ferskt til að keppa við Chelsea.

Cristiano Ronaldo – 2006-2009

Cristiano Ronaldo reyndist vera algjör undramaður. Aðra eins knattspyrnuhæfileika hafði maður varla séð áður og eðlilega stillti Sir Alex Ferguson liðinu þannig upp að hægt væri að mjólka hvern einasta hæfileikadropa út úr Ronaldo.

Það þýddi að Wayne Rooney spilaði frammi en var meira í því að djöflast í andstæðingunum og draga þá frá svo að Ronaldo fengi pláss á kantinum til að leika listir sínar. Vanmetið hlutverk og stór ástæða þess að Ronaldo skoraði öll þessi mörk en engu að síður ekki aðalhlutverkið. Það var í höndum Ronaldo sem skoraði 91 mark gegn 61 marki frá Rooney.

Wayne Rooney – 2009-2012

Ronaldo fór og loksins fékk Wayne Rooney að vera aðalmaðurinn í liðinu. Einhverstaðar þurftu mörkin sem Ronaldo skoraði að koma og Rooney tók það hlutverk mjög alvarlega. Hann var fremsti maður maður og nú snerist spilamennska liðsins einfaldlega um Wayne Rooney. Hann skoraði 34 mörk á sínu fyrstu tímabili sem numero uno.

Það slettist að vísu pínu upp á vinskapinn árið 2010 þegar hann vildi fara frá félaginu en hann kom sterkur inn á næsta tímabili og setti aftur 34 mörk. Frá 2009-2012 skoraði Rooney 84 mörk. Þarna sýndi hann einfaldlega að hann gæti vel verið aðalmaðurinn í liðinu.

Robin van Persie – 2012-2015

Sir Alex Ferguson var þó ekki alveg sammála og greip gæsina þegar hann gat. Þessi gæs heitir Robin van Persie. Rooney var ýtt til hliðar og van Persie varð aðalmaðurinn. RvP skoraði 30 mörk gegn 16 mörkum Rooney og líklega má gera ráð fyrir að Rooney hefði farið frá félaginu ef Sir Alex hefði haldið áfram.

Moyes sannfærði hann þó um að vera áfram en líkt og undir stjórn Louis van Gaal var hvorugur þeirra félaga aðalmaðurinn. Þeir deildu hlutverkinu með mjög misjöfnum árangri. Á síðasta tímabili var Rooney svo löngum stundum á miðjunni sem gekk ekki upp. Hans bestu frammistöður voru undir lok tímabilsins þegar hann fékk að spila frammi eins og Gary Neville og Jamie Carragher fóru yfir á sínum tíma.

Wayne Rooney – 2015-?

Svona er staðan í dag. Wayne Rooney er framherji nr. 1 og það er alls ekki víst að nýr framherji mætti á svæðið. Ég tel að Wayne Rooney geti vel dregið vagninn í framlínu United líkt og hann gerði þegar hann var aðalamaðurinn. Eftir að hafa losnað úr viðjum Nistelrooy og Ronaldo tók Rooney einfaldlega við keflinu af þeim og átti frábær tímabil sem aðalmaðurinn.

Tímabilið 2009/2010 var hann einfaldlega stórkostlegur framherji og skoraði mörk í öllum regnbogans litum.

Hann fór auðvitað í fýlu á næsta tímabili og lét Dimitar Berbatov draga vagninn þegar hann heimtaði að betri leikmenn yrðu keyptir en er það ekki bara nákvæmlega það sama og flestur stuðningsmenn félagsins [footnote]Hann hefði þó getað sleppt því að daðra við City í leiðinni[/footnote] voru að segja þegar Antonio Valencia og Michael Owen gengu til til liðs við félagið sem arftakar Ronaldo og Tevez?

Hann kom sterkur til baka tímabilið eftir þetta og það er alveg á hreinu að þegar Rooney var aðalframherjinn í liði Manchester United skoraði hann helling af mörkum. Hann hefur ekki fengið þetta hlutverk síðan með tilkomu Robin van Persie og síðar Falcao og þurfti að leysa af á miðjunni á meðan þeir félagarnir kepptust um hvor gæti klúðrað fleiri dauðafærum.

„At this moment, we don’t have a striker who scores 20 goals.“ sagði Louis van Gaal í febrúar. Sem aðalframherji á komandi tímabili verður Wayne Rooney þessi 20 marka maður sem van Gaal vill fá. Það er á hreinu.