Yfirferðin yfir síðasta tímabil heldur áfram. Við podköstuðum og við skoðuðum nýju leikmennina en núna eru það stóru spurningarnar sem svarað verður

Hver er ykkar skoðun á þessu tímabili með United?

Tryggvi:

Svo að það sé alveg á hreinu þá er 4. sætið enginn árangur fyrir félag eins og Manchester United og ekkert til þess að stæra sig af. Undir venjulegum kringumstæðum myndi þetta tímabil flokkast undir: „Gleymist“. Kringumstæðurnar hafa þó auðvitað ekki verið venjulegar. Louis van Gaal tók við algjöru skipbroti eftir langt tímabil vanfjárfestingar og svo auðvitað David Moyes. Annað sumarið í röð tók nýr stjóri við og það tekur bara sinn tíma fyrir nýjan stjóra að ná áttum, meta hópinn og svo framvegis. Ólíkt Moyes fékk Louis van Gaal góðan stuðning á leikmannamarkaðinum og ólíkt Moyes hafði van Gaal tök á verkefninu. Við náðum 4. sæti þrátt fyrir talsverða leikmannaveltu og algjörlega fordæmalausa tíðni meiðsla hjá leikmönnum liðsins, sérstaklega varnarmönnum félagsins. Með þetta á bakinu náði van Gaal markmiðum tímabilsins. Það besta við tímabilið hefur líklega verið frammistaða liðsins gegn liðunum sem við erum í helstri samkeppni við og það er það sem hefur fleytt okkur í þetta fræga 4. sæti.

Maggi:

Maður er náttúrulega sáttur við að ná aðalmarkmiði tímabilsins. Auðvitað hefði verið skemmtilegra að fara lengra í bikarkeppnunum. Eina svekkelsið er að fylgja ekki eftir stórkostlegum kafla þar sem keyrt var yfir Liverpool, Tottenham og City. Tíð meiðsli settu auðvitað strik í reikninginn á tímabilinu og þá sérstaklega í vörninni.

Bjössi:

Þokkaleg. Þetta er auðvitað næst versta tímabil félagsins síðan 1991, en það sem skiptir auðvitað mestu máli í því að versta tímabilið var í fyrra. Það er sama hvað hrópað er hátt um eyðslu United, hún var svo gersamlega nauðsynleg til að byrja endurnýjun á lið sem var komið á algera endastöð. Og það sem meira er, það var fullkomlega vitað strax í fyrrahaust að annað eins þurfti til nú í sumar. Og þá fáum við það vonandi.

Byrjunin var auðvitað skelfileg og það er alveg rétt hjá Van Gaal að ef við hefðum byrjað betur þá hefði þetta þróast öðruvísi. En svo fór sem fór og því var liðið alltaf tveim skrefum á eftir toppsætinu. Tvær góðar sigurhrinur voru það sem skiluðu loks fjórða sætinu en inn á milli og í lokin komu leikir sem voru skelfileg vonbrigði.

Van Gaal var lengi að finna leikaðferð sem hentaði liðinu ekki síst auðvitað vegna mikilla meiðsla. Þegar hún fannst loksins gekk vel gegn betri liðum en við eigum nokkuð í land með að geta unnið meðalgóð lið án þess að hafa of mikið fyrir því. Það verður líka að segja alveg eins og er að oft var alls ekki spiluð nógu skemmtileg knattspyrna og kom það til bæði vegna leikmanna og leikaðferðar.
Sumarið er tíminn, nú þarf að kaupa 5 leikmenn sem þurfa allir að vera byrjunarliðsmenn. Við vitum að það er til mikils ætlast að öll kaup takist en til að við stöndum uppi með topp hóp í haust þá vantar okkur bæði hraða og styrk

Ellioman:

Ánægður og dáldið svekktur á sama tíma, eins furðulegt og það hljómar. Markmið tímabilsins var meistaradeildarsæti, því takmarki var náð og því er ég vel sáttur með þann hluta. Ástæðan af hverju ég er dulítið svekktur líka er sú að frammistaða United gegn Spurs, Liverpool og City fékk mann til að halda að allt væri nú búið að smella saman og að við gætum jafnvel tekið annað eða þriðja sætið.

Hrunið sem kom í kjölfarið með töpunum gegn Chelsea, Everton og WBA.  Þessir tapleikir, ásamt tapinu gegn Arsenal í FA Bikanum, sitja enn í mér og gáfu mér smá “reality-check”. Þetta er ekki komið hjá okkur en maður fær þó tilfinninguna að við séum á réttri leið, ólíkt því sem maður upplifði með Moyes við stjórnvölinn. Nú fer maður að gera meiri kröfur til liðsins sérstaklega ef United kaupir einhverja klassaleikmenn í sumar. Spennandi tímar.

Runólfur:

Mjeh. Fær 6.5 í einkunn. Þannig séð var öllum markmiðum liðsins náð (fjórða sætið) en maður hefði nú viljað sjá betri árangur í bikarkeppnum og sjá liðið gera alvöru atlögu að öðru sætinu þegar það var mögulegt.

Sigurjón:

Fyrir tímabilið vildi ég sjá tvo hluti gerast: Númer 1 var að komast aftur í Meistaradeildina og númer 2 var að enda fyrir ofan Liverpool (sem ég taldi þá líklegasta til að berjast við okkur um 4 sætið). Það voru ansi margir þarna úti sem töldu það alveg fáránlegt að United skyldi vera spáð ofar en Liverpool, viðbrögð sem mér persónulega þótti fáránleg. Það var því skemmtilegt að sjá United uppfylla þessa tvo hluti, en eins og tímabilið spilaðist þá bjóst ég við smá meira trukki eftir áramót, og þá sérstaklega eftir leikina þrjá gegn Tottenham, Liverpool og Manchester City. Hefði liðið haldið dampi þá hefðum við hæglega getað endað í 2-3 sæti. Það var því margt gott en það var líka ýmislegt í leik liðsins sem augljóslega þarf að laga fyrir næsta tímabil. Við eigum svolítið í land ennþá til að keyra almennilega á lið eins og Chelsea, en við skulum sjá til hvernig sumarið spilast á leikmannamarkaði.

Hvernig líst ykkur á Van Gaal núna eftir tæplega 1 ár í starfi?

Tryggvi:

Mér líst ágætlega á hann. Hann talar og lætur eins og stjóri Manchester United. Það er 50% af starfinu hans og eitthvað sem forveri hans í starfi réði aldrei við. Hann er svolítið að færa okkur inn í nýja tíma og það hefur ekki verið auðvelt að horfa á þetta á köflum. En eins og komið hefur fram tekur það alltaf tíma fyrir liðin hans LvG að fara á fullt og það er það sem við höfum séð á þessu tímabili. Gríðarleg meiðsli og skammur tími til undirbúnings hafa sett strik í reikninginn en þrátt fyrir það er búið að koma skipinu á flot á nýjan leik eftir algjört skipbrot á síðasta tímabili. Verkefni Louis van Gaal er núna að koma skipinu á fulla ferð á nýjan leik og ég tel að hann sé algjörlega rétti maðurinn í það.

Maggi:

Þegar Louis van Gaal tók við liðinu var sjálfstraust í sögulegu lágmarki. Hann gaf flestum leikmönnum sjensa til að sanna sig á undirbúningstímabilinu og fyrstu leikjunum í deildinni. Svo má ekki gleyma MK Dons leiknum. Hann gerði svo það sem David Moyes gat/þorði ekki að gera. Hann losaði sig við leikmenn sem voru ekki tilbúnir í verkið. Hann hefur þurft að breyta uppstillingum oftar heldur en hann kærir sig um en það var alltaf gert til að finna rétt jafnvægi í liðinu. Hann virðist vera búinn að detta á réttu taktíkina en það myndi alls ekki koma á óvart að sjá United spila 4-2-3-1 og 4-3-3 á næstu leiktíð.

Bjössi

Ég er sáttur. Þetta er maður sem ég var alltaf tilbúinn að gefa séns svo fremi sem hann skilaði lágmarksárangri. Það gerði hann. Þegar ekki gekk vel var maður stundum frekar stressaður yfir því sem hann var að reyna en nú held ég að með fyrrgreindum viðbótum þá geti spilamennskan sem hann ætlar að bjóða upp á verið sú sem maður krefst af Manchester United.

Ellioman:

Ég er alveg afskaplega afskaplega afskaplega ánægður með að sjá Van Gaal við stjórnvölinn. Viljið þið vita af hverju? Það er ekki bara það að hann virðist höndla djobbið, að hann viti hvað hann er að gera, að leikmennirnir beri virðingu fyrir honum, að hann er óhræddur að gera kröfur til stjórnar United (varðandi æfingarferðir, æfingaraðstöðu o.s.frv.) og að hann gefi ungu leikmönnunum tækifæri. Það sem heillar mig svo gasalega við manninn ofan á það sem ég taldi hér, er að við erum með alvöru karakter að stjórna liðinu. Eitthvað sem við upplifðum svo lengi með Ferguson en sárvantaði á síðasta tímabili, einhvern sem þolir ekkert kjaftæði og veit hvað hann vill. Ég hef örugglega horft ca. tíu sinnum á BBC viðtalið við hann eftir tapið gegn Chelsea og ég tárast enn úr hlátri þegar hann segir “Okay, that’s good … that you are interested.” . Munið þið hversu vandræðalegt það var orðið að hlusta á Moyes tala á fréttamannafundum?

Ég er sumsé alveg skínandi kátur með kappann og hlakka alveg gríðarlega til að sjá hann stjórna liðinu á næsta tímabili.

Runólfur:

Óvenjulega vel. Svona miðað við það að ég vissi lítið sem ekkert um hann fyrir tímabilið. Jú ég var vissulega pínu þreyttur á hversu þrjóskur hann var í byrjun tímabils en þetta er karakter og virðist vera sú týpa sem Manchester United þarf að hafa í brúnni. Þessi ræða á lokahófi liðsins er heldur ekkert að skemma fyrir.

Sigurjón:

Mér finnst Van Gaal frábær stjóri og það sem mér þykir hvað mikilvægast er að hann ber sig eins og stjóri Manchester United. Ég tel að United hafi misst af ákveðnu tækifæri þegar Ferguson hætti að ráða ekki annað hvort Mourinho and Guardiola, sem ég tel að hafi verið raunhæfur möguleiki. Eftir að hafa klúðrað málunum og ráðið David Moyes í maí 2013 þá er ég mjög sáttur með þá staðreynd að Louis Van Gaal sé stjóri í dag. Hann hefur tekið leikmannamál föstum tökum, sem var ansi nauðsynlegt, þó verður að segjast að þetta sumar verður lokaprófið fyrir hann í þeim efnum. Hann er svolítið þrjóskur, sem er bæði gott og slæmt, til að mynda fannst mér hann hanga full lengi í 3 manna varnarpælingunum sínum og það kostaði okkur einhver stig, en við skrifum það á reynsluleysi hans á Englandi og ég held að næsta tímabil muni fara mun betur af stað en það síðasta.

Flottasta markið?

manutd.com sýnir okkur topp 10 mörkin á síðasta tímabili

Tryggvi:

Fallegasta markið eitt og sér er mark Ángel di Maria gegn Leicester en ef maður tekur mið af aðstæðum og mikilvægi leiksins er erfitt að toppa seinna mark Juan Mata gegn Liverpool.

Maggi:

Di María gegn Leicester og Mata gegn Liverpool á Anfield.

Bjössi:

Algerlega borðleggjandi topp 2

1.  Juan Mata gegn Liverpool. Sturlað mark í sturlað skemmtilegum leik
2. Ángel di María gegn Leicester. Sú tæknin! Þetta var það sem við keyptum og ætluðum að fá í vetur. Í staðinn verðum við að bíða til næsta vetrar.
3. Ander Herrera gegn Yeovil. Boom!

Ellioman:

Mata á þetta gjörsamlega. Að skora svona mark á Anfield, sheize!

Runólfur:

Ég held að þetta sé engin spurning. Eins flott og markið hans Angel Di Maria gegn Leicester var þá var markið hans Juan Mata gegn Liverpool hreinlega í öðrum gæða flokki. Hér er átt við markið þar sem hann klippti boltann í netið en hann skoraði vissulega þrjú mörk gegn Liverpool í vetur.

Sigurjón:

Juan Mata gegn Liverpool. Markið var flott en mómentið var enn betra, nagli á bólakaf í kistuna.

Besti leikurinn?

Tryggvi:

Það er erfitt að gera upp á milli sigranna gegn Tottenham, Liverpool og City núna undir lok tímabilsins. Spilamennska liðsins gegn Tottenham var nánast fullkomin og eitt það besta sem maður hefur séð frá liðinu í ansi langan tíma. Það var frábært að sjá liðið koma til baka eftir að hafa lent undir gegn City og valta svo yfir þá enda hefur City haft yfirhöndina í leikjum þessa liða síðustu tímabilin.

Liverpool-leikurinn á Anfield hlýtur þó að standa upp úr. Í fyrsta lagi var mikið undir, Meistaradeildarsæti og allt sem því fylgir. Í öðru lagi hef ég aldrei séð Manchester United lið mæta á Anfield og spila af slíkum yfirburðum og þennan sunnudag í mars.

Maggi:

Það er rosalega erfitt að gera upp á milli Tottenham, Liverpool og City. Það sem rétt hefur vinninginn hjá mér er Liverpool á Anfield. Þetta var svoleiðis langbesta spilamennska United á Anfield og lokastaðan 2-1 var frekar villandi miðað við hvernig leikurinn spilaðist.

Bjössi:

Liverpool. Sigur, frábær bolti, glæsileg mörk og rúsínan í pylsuendanum, glassúrinn á kökuna, kórónan á leiknum. $tevieMe!

Ellioman:

Leikurinn gegn City, nó dát. Fáum á okkur mark snemma og liðið frussar því einfaldlega í burtu og gjörsamlega valtar yfir City liðið. Skemmir svo ekki fyrir að maður var í Íslandsheimsókn og gat horft á leikinn með hinum pennunum hér á rauðudjöflarnir.is. Fullkominn dagur!

Runólfur:

4-2 á móti Manchester City. Hefði viljað sjá hann enda 4-1. Smá hefndar tilfinning yfir því. Verst hvað liðið spilaði svo illa eftir þann leik.

Sigurjón:

Leikurinn gegn Tottenham á Old Trafford. Þó svo leikirnir á eftir gegn Liverpool og Man City hafi líka verið frábærir þá var slátrunin gegn Tottenham held ég besta frammistaða liðsins. Tottenham litu út fyrir að vera áhugamannalið og það var eingöngu vegna þess að United setti þá á þann stall.

Helstu vonbrigði þessa tímabils?

Tryggvi:

Þau eru þríþætt. Í fyrsta lagi er það Falcao. Sár vonbrigði að hann skyldi ekki raða inn mörkum fyrir félagið en þetta gekk ekki upp af ýmsum ástæðum. Í öðru lagi er það Angel di Maria. Leiðinlegt að sjá hvernig spilamennska hans datt niður eftir frábæra byrjun. Fyrir 60 milljónir punda er eðilegt að gera kröfu um að hann spili betur. Ég hef þó fulla trú á honum og geri ráð fyrir því að hann verði lykilmaður á næsta tímabili. Í þriðja lagi olli það mér vonbrigðum hvað menn virtust slaka á eftir frábæra sigurhrinu í mars og apríl. Við hefðum getað endað tímabilið af krafti og komið í veg fyrir að þurfa að fara í umspil í águst.

Maggi:

Mestu vonbrigðin voru þau hvað Radamel Falcao gekk illa. Hann var einungis á lánsamningi en samt. Reyndar galt hann fyrir það hvað færasköpunin á tímabilinu var léleg en samt virtist eitthvað vanta uppá hjá honum. En hann lagði sig alltaf fram og ég vona að hann brilleri í því liði sem hann endar í.

Ángel Di María hefði mátt sýna meira sérstaklega miðað við hann kostaði. Til að vera sanngjarn lenti hann í erfiðleikum heima fyrir og aldrei að vita nema hann hristi þetta af sér og sýni hvað hann getur í haust.

Svo er líka vonbrigði hversu slakur Jonny Evans er orðinn en ég tel hann hafa spilað sinn síðasta leik fyrir Manchester United.

Bjössi:

Radamel Falcao nefna sumir, en það var samt alltaf vitað að hætta var á að hann næði ekki fyrri hæðum vegna erfiðra meiðsla og, jú, Suður Ameríkupiltarnir eiga stundum erfitt uppdráttar í Englandi þannig ekki yrði það til að hjálpa. Á móti kom kemur að væntingarnar til hans ef að allt smylli í gír voru himinháar. En, möguleikinn á svona tímabili var alltaf til staðar.

Ángel di María, dýrasti leikmaður Englands. Hvað er hægt að segja? Byrjaði vel en hvarf svo. En! Hann mun koma til baka á næsta tímabili og það er engin ástæða til afskrifa hann.

Svo er það Adnan Januzaj. Second-season-syndrome, new-contract-syndrome, hver sem ástæðan er þá var grey drengurinn ekki svipur hjá sjón í vetur. En! Hann er nú bara tvítugur og við gefumst ekki upp á ungum leikmönnum svo glatt. Í viðtali nú eftir tímabilið segir hann alla réttu hlutina. Hann segist leggja hart að sér til bæta sig, er að vinna mikið í að styrkja líkmann og að það taki tíma. Hann hefur ekki áhuga á vera lánaður út og ég veit ekki hvort er betra, að halda honum hjá United þar sem gæti verið að hann fengi ekki nægan leiktíma eða lána hann út. Það er alltaf áhætta þegar leikmenn eru lánaðar, þeir þurfa í raun að sýna það í láninu að þeir séu það góðir að ef þeir væru ekki á samningi hjá United þá væru þeir þess virði að kaupa. Það gerist ekki alltaf. Það kemur í ljós hvaða leikmenn koma inn í sumar og svo hvort við komumst í riðlakeppni Meistaradeildarinnar og eftir það sjáum við hvert leikjaálagið verður og hvort að Adnan verði lánaður

En þessi langloka er í raun mínar hugsanir um það að persónlega var ég að vonast eftir miklu meira frá honum í vetur, ef til vill of mikils og að það voru gríðarleg vonbrigði að honum gekk ekki betur. En það er fátt sem ég vil sjá meira en að hann verði framtíðarstjarna liðsins

Ellioman:

Gæti nefnt Falcao en ég einfaldlega var aldrei sérstaklega með í hæpinu varðandi hann. Di Maria hinsvegar… óboj. Alltaf fundist hann einn af mest spennandi leikmönnum í heimi og var maður ansi öfundsjúkur út í Real Madrid. En svo allt í einu var hann leikmaður United! Vúhú! Og ekki byrjaði kallinn illa, skorandi glæsimörk og að hala inn stoðsendingum. En svo kom eitthvað furðulegt hrun hjá kappanum sem hann náði ekki að komast upp úr. Ég vona svo sannarlega að hann verði ekki seldur í sumar (eins og margir orðrómar virðast ýja að) því ég hef tröllatrú á kappanum plús hann er á príma aldri, 27 ára. Aðrir kandídatar: Januzaj & Jonny Evans

Runólfur:

Frammistaða í bikarkeppnum og það að gera ekki meiri atlögu að öðru sætinu þegar það var hægt.

Sigurjón:

Það eru auðvitað vera Falcao í Manchester. Þrátt fyrir heiðarlega tilraun þá gat hann því miður ekkert. Ég er mjög vonsvikinn yfir því og verð ennþá vonsviknari ÞEGAR hann fer að raða inn mörkunum á næsta tímabili fyrir eitthvað annað lið. Varðandi liðið í heild sinni þá var United í góðu færi að fara langt í bikarnum en datt því miður út gegn Arsenal. Hefði liðið klárað þann leik þá værum við að spila á Wembley á laugardaginn, engin spurning. Svo eigum við kannski mestu vonbrigðin eftir ef David De Gea hverfur á braut, en við sjáum þó til með það!

Hvaða leikmenn sýndu mestar framfarir?

Tryggvi:

Varla hægt að gera upp á milli Marouane Fellaini og Ashley Young. Tveir leikmenn sem maður hélt fyrir tímabilið að ættu enga framtíð hjá United. Þeir hafa þó lagt mikið á sig til þess að koma sér aftur inn í myndina. Fellaini var lykilinn að mörgum góðum sigrum á tímabilinu og það er mjög gott að hafa jafn eitraðan leikmann í hópnum. Það segir allt sem segja þarf um Young að hann hélt Di Maria út úr liðinu á seinni hluta tímabilsins. Hann spilaði ótrúlega vel á kantinum og skoraði og lagði upp fáranlega mikilvæg mörk. Ég er þó á því að hvorugur þessara leikmanna sé nógu góður til þess að vera í byrjunarliði United leik eftir leik ef liðið ætlar sér að vinna deildina eða Meistaradeildina. Það er þó gott að hafa þá í hópnum.

Maggi:

Þrír leikmenn koma upp í hugann. Ashley Young, Marouane Fellaini og Chris Smalling. Engin af þeim er í heimsklassa en hafa sýnt sitt gildi. Það er svo mikilvægt að hafa squad leikmenn sem geta komið inn og skilað hlutverki þegar þarf. Fellaini og Young spiluðu í alvörunni Ángel Di María úr liðinu. Að lokum hefur Chris Smalling stigið upp eftir leikinn á Etihad sem hann vill klárlega gleyma sem fyrst.

Bjössi:

Ashley Young. Hann tók upp á því á gamals aldri að verða lykilmaður í liðinu.

Í öðru sæti, Chris Smalling sem ég vildi hreinlega burt frá klúbbnum eftir rauða spjaldið móti City, og í þriðja sæti Marouane Fellaini, sem kemur reyndar að hluta til af því að loksins voru hæfileikar hans nýttir eins og átti að gera

Ellioman:

Ashley-beeeping-Young! Í hvaða kreisí heimi erum við þegar Ashley-beeeeping-Young er auðveldlega að halda Di Maria út úr byrjunarliðinu, skorandi mörk gegn liðum eins og City og að brillera í öllum leikjum sem hann spilar á þessu tímabili? Alveg ótrúlegt og á kappinn svo sannarlega skilið mikið hrós fyrir sína frammistöðu. Hann var hreint útsagt frábær. Fellaini á einnig skilið klapp á bakið fyrir sína frammistöðu.

Runólfur

Chris Smalling.

Ástæðan fyrir að ég vel hann fram yfir til dæmis Ashley Young og Marouane Fellaini er sú að Young og Fellaini hafa báðir sýnt nákvæmlega sama getustig áður. Young gerði þetta trekk í trekk hjá Aston Villa og Fellaini var baneitraður með Everton í svipaðri stöðu á vellinum áður en hann kom til Manchester United. Hins vegar þá hefur Smalling ekki sýnt þetta getustig áður. Eftir útileikinn gegn Manchester City, þar sem Smalling var rekinn útaf, þá hélt ég að hann ætti ekki aftur snúið í liðið en viti menn, hann snéri ekki bara aftur heldur fékk hann fyrirliðabandið nú í lok leiktíðar og tók við af Marcos Rojo sem eini meiðslalausi og áreiðanlegi hafsent liðsins. Þó að ég reikni með að það verði keyptur hafsent í sumar þá reikna ég líka með því að Smalling muni gefa hverjum sem er ágætis samkeppni um þessa hægri hafsenta stöðu.

Sigurjón

Ashley Young reis eins og Fönixinn á þessu tímabili undir stjórn Van Gaal. Hann fyrst fór að sýna góða takti í æfingaferðinni síðasta sumarið, þá í stöðu vinstri bakvarðar. Hann hélt dampi og vann sig framar á völlinn og endaði á því að henda Di María út úr liðinu. Það væri hægt að minnast á Fellaini líka, en ég ætla að segja að síðasta tímabil hafi ekki verið marktækt á ferli hans, hann var einfaldlega að spila eins og hann á að sér á þessu tímabili.

Hver var besti leikmaður United?

Tryggvi:

Það þarf ekki að fara mörgum orðum um þetta. David de Gea átti stórkostlegt tímabil og bjargaði liðinu oftar en ég hef tölu á. Hann tekur stórstígum framförum með hverju tímabilinu sem líður og það er bara ekkert annað en ömurleg tilhugsun að missa hann til Real Madrid.

Maggi:

David de Gea. Hann bjargaði svo mörgum stigum fyrir okkur í vetur og hann á mestan heiðurinn á að koma okkur í þessa blessuðu meistaradeild. Ég mun gráta söltum tárum ef hann fer til Real Madrid.

Bjössi:

David de Gea á allan heiður af því að United lenti í fjórða sæti.
Aðra þarf varla að nefna.

Ellioman:

Deivíd de Heyyyja! Engin spurning. Plís ekki fara. Plís plís plís plís plís plís plís plís plís!

Runólfur:

David De Gea. Frekar útskýring er óþörf.

Sigurjón

David De Gea var frábær og vann all nokkur stig fyrir okkur í vetur, hann er því óumdeilanlega leikmaður ársins.

Hvað viljið þið sjá gerast í leikmannamálum núna í sumar?

Tryggvi:

Ég vil fá meiri gæði. Ég vil fá leikmenn sem eru betri en þeir sem fyrir eru. Ég vil fá toppklassa miðvörð og ég vil fá 1-2 toppklassa miðjumenn. Líklega þarf að kaupa hægri bakvörð og jafnvel einn framherja, þeir mega vera ungir og efnilegir en miðvörðurinn og miðjumennirnir þurfa að vera í hæsta gæðaflokki. Ég vil líka að þetta gerist sem fyrst svo að menn geti farið að stilla saman strengi sína fyrir næsta tímabil.

Maggi:

Hægri bakvörður, 1-2 miðverðir, 2 miðjumenn, hægri kantmann og framherja. Einn miðvarðanna og annar miðjumaðurinn verða að vera leikmenn í þeim gæðaflokki að þeir myndu labba inn í hvaða lið sem. Myndi telja það vonbrigði mest af þessu verður ekki afgreitt í sumar.

Bjössi:

Þetta sem allir vita: Haffsent, hægri bakk, miðjutröll og/eða miðjuskapara (helst einn með hvoru tveggja eiginleikana). 20 marka maskínu.

Svo er líka alveg spurning hvort að hægri kantmaður myndi ekki nýtast vel. Mata er ágætur sem slíkur en mætti alveg við samkeppni.

Og að De Gea verði áfram. ElskubestigóðiDavid, ekki fara!

Ellioman:

Halda í De Gea! Það væru án efa bestu kaup sumarsins. Annars þá þarf United einfaldlega að uppfæra nokkrar stöður með betri leikmönnum. Einn eða tvo miðverði, hægri bakvörð, einn eða tvo miðjumenn og svo framherja. Þetta er afskaplega augljóst fyrir þá sem horfa á United og verður fróðlegt að sjá hvaða leikmenn koma inn í sumar. Erum nú þegar búnir að gera ein virkilega góð kaup í Memphis Depay. Vonandi heldur það áfram.

Runólfur:

Úff. Þegar stórt er spurt. Ég er almennt á móti öllum breytingum allstaðar svo ég vill bara fá Vidic, Fletcher og Anderson til baka. Ef það er ekki hægt þá væri ég til í að sjá einn hafsent koma inn þar sem ég reikna með því að einn verði seldur. Ég vill sjá Antonio Valencia fara svo Van Gaal neyðist til að nota Rafael í hægri bakverði. Einnig vill ég sjá liðið kaupa einn ef ekki tvo miðjumenn (hverja hef ég ekki hugmynd um, Joey Barton er á Free Transfer). Hvað varðar framherja mál þá treysti ég alveg Wayne Rooney, Robin Van Persie og James Wilson til að leysa þá stöðu. Sérstaklega ef liðið spilar eingöngu 4-3-3.

Ég reikna þó með því að það verði keyptur hægri bakvörður, hafsent, einn eða tveir miðjumenn og framherji (og líklega markvörður). Á móti kemur að Anders Lindegaard, Ben Amos, Jonny Evans (líklega), Rafael, Tom Cleverley og Nani fara örugglega allir í sumar svo það verður að fylla inn í hópinn.

Sigurjón

Við fórum nú nokkuð vel yfir þetta í síðasta podkasti en ég ætla að segja að United vanti nauðsynlega einn hægri bakvörður, einn heimsklassa miðvörð og tvo miðjumenn (þar af a.m.k einn í heimsklassa). Ég veit að margir vilja sjá framherja á þessum lista en ég hef ekki trú á því að það muni gerast. Rooney verður framherji númer eitt og ég hef enga trú á því að Van Persie sé að fara eitthvað, mér þykir því ólíklegt að einhver stjarna komi inn í þá stöðu, t.d. eins og Karim Benzema sem hefur verið orðaður við okkur undanfarið.

 

Hverjar eru væntingar ykkar til næsta tímabils?

Tryggvi:

Í fyrsta sinn síðan 2012 er United að fara inn í sumar þar sem ekki verður skipt um sjóra. Louis van Gaal fær því heilt sumar og rólegt æfingarferðalag til þess að undirbúa liðið fyrir komandi átök. Ef það gengur vel að ná í nýja leikmenn í sumar sé ég enga ástæðu til annars en að ætla að liðið verði í titilbaráttu og það verður að segjast að það er einfaldlega lágmarkskrafan. Einnig býst ég við góðum árangri í Meistaradeildinni.

Maggi:

Þetta fer rosalega eftir því hvað gerist hjá United á leikmannamarkaðinum í sumar. En ég held að rökrétt krafa sé að liðið geri atlögu að titlinum, komist langt í meistaradeildinni og vinni bikar.

Bjössi:

Þær fara algerlega eftir leikmannakaupum. Ef réttu mennirnir eru keyptir eins og að ofan er lýst, þá eigum við að vera í titilbaráttu fram á síðasta dag.

Ef einhver af ofangreindum aðalstöðum verður ófyllt, þá yrði annað sætið alveg ásættanlegt.
Vil sjá okkur amk í 8 liða úrslitum Meistaradeildarinnar. Og hirða annan hvorn bikarinn.

Semsé, ef leikmannakaupin ganga vel í vetur þá á Manchester United að vera komið á sinn rétta stall í knattspyrnuheiminum

Ellioman:

Sjá United spila í hverjum leik eins og þeir gerðu gegn Spurs, Liverpool og City. Það væri æði! Ef liðið gerir það þá er það sjálfkrafa að fara keppa um alla titla sem í boði eru. Við þurfum að fara sjá United spila skemmtilegan fótbolta aftur. Þetta er ekki búið að vera nógu gott síðustu tímabil.

Runólfur:

Gefa Chelsea alvöru samkeppni um dolluna. Vinna Deildarbikarinn eða FA bikarinn og fara í 8 liða úrslit í Meistaradeildinni.

Sigurjón

Sko, mikið er að talað um að United eigi að berjast um titilinn á næsta ári og get ég svo sem tekið undir það að einhverju leyti. Ég tel þó að þessi endurnýjun á liðinu undir stjórn Van Gaal taki í raun 3 ár, ég ætla því ekki beint gera þá kröfu um að United fari í alvöru titilbaráttu á næsta ári. Það sem ég vil sjá er framför frá þessu tímabili, meiri stöðugleika frá upphafi til enda og klára helst ekki neðar en 3. sæti. Komast upp úr riðlinum í Meistaradeildinni (gef mér að við komust í gegnum umspilið) og gera alvöru atlögu í bikarkeppnum. Tímabilið 2016/2017 verður vonandi það tímabil sem Manchester United mun vinna sinn 21. Englandsmeistaratitil!