Rauðu djöflarnir

Félagaskipti Opin umræða Slúður Yngri liðin

Fréttir & slúður

skrifaði þann | 16 ummæli

Tökum smá skurk í fréttum og slúðri varðandi United.

Í gær staðfesti Arsene Wenger að United væri eitt af þeim liðum sem hefði boðið í Thomas Vermaelen, í gærkvöldi komu svo fregnir af því að Barcelona hefði tryggt sér kaupin á honum vegna þess að Wenger vildi ekki selja til liðs í sömu deild. Gott fyrir Arsenal að Wenger virðist vera búinn að læra sína lexíu. Í dag kom þó staðfesting á því að Arsenal hefði viljað fá leikmann í skiptum frá United fyrir Vermaelen. Engin staðfest nöfn en menn telja að Wenger hafi annaðhvort viljað fá Smalling eða Jones. Auðvitað gat United ekki samþykkt það enda allur tilgangurinn með kaupunum á Vermaelen að auka breiddina í vörn United.

United þarf því að leita annarstaðar ef þeir ætla sér að styrkja vörnina. Hummels?

Vidal-sagan er farin að líkjast Fabregas- og Thiago-sögunum frá því í fyrra óþægilega mikið. Í vikunni bárust fregnir að því frá ítalska blaðinu La Stamp…nei andskotinn ég nenni þessu ekki.

Que sera, sera. Ef Vidal kemur þá kemur hann. Þetta mál er búið að fara svo fram og til baka í allt sumar að ég nenni varla að pæla í því lengur.

Annað slúður segir að United hafi sigrað Barcelona í keppninni um Cuadrado. Dani Alves er ekki á förum frá félaginu og því hafi félagið ekki efni á því að eltast við Cuadrado. Cuadrado er leikmaður sem myndi smellpassa inn í bæði leikkerfi Louis van Gaal og hann er svo fáranlega fjölhæfur að í samanburði lítur John O’ Shea út eins og Antonio Valencia að reyna að komast framhjá varnarmanni.

cuadrado

Svona leit síðasta tímabil út hjá honum hjá Fiorentina, það skiptir engu máli hvar hann spilar. Hann stendur sig vel. Á þessu tímabili myndi hann smellpassa í hægri kantvarðarstöðuna og þegar Louis van Gaal fer að færa sig yfir í sitt hefðbundna 4-3-3 er hægt að nota Cuadrado báðum megin í kantframherjastöðunum. Fergie, Fergie, sign him up!

Þetta er svona það helsta hvað varðar leikmannafréttir. Það er lítið að frétta af brottförum og þetta fer væntanlega að skýrast fljótlega. Louis van Gaal sagðist ætla að setjast niður með þeim leikmönnum sem hann vildi losna við. Leikmennirnir fengu stutt frí eftir leikinn gegn Liverpool og mæta til æfinga aftur í dag. Þeir sem verða sendir í burtu fá því væntanlega fljótlega kallið inn á skrifstofuna til Louis van Gaal.

United spilar svo sinn síðasta vináttuleik á þriðjudaginn gegn Valencia á Old Trafford.

Í öðrum fréttum er tvennt:

Í fyrsta lagi. U-21 liðið spilaði við Elite Development Squad Manchester City um hinn eftirsótta Manchester Senior Cup í gærkvöldi. Það er skemmst frá því að segja að James Wilson pakkaði saman þessum Elite City mönnum og skoraði öll mörkin í 4-1 sigri United. United lenti 1-0 undir og var í þónokkrum vandræðum mest allan fyrri hálfleik þangað til Wilson ákvað að klára leikinn upp á eigin spýtur. Hann sólaði 3-4 varnarmenn City og jafnaði leikinn rétt fyrir lok fyrri hálfleiks. Hann kláraði svo leikinn algjörlega í seinni hálfleik.

Mörkin má skoða hér: 1 – 2 – 3 – 4.


James Wilson er fáranlegt efni eins og við sáum í leiknum gegn Hull undir lok síðasta tímabils. Hann  er með frekar sæmilega tölfræði:

Þeir sem fylgjast reglulega með yngri liðum United spara líka ekki stóru orðin þegar kemur að James Wilson:

Engin pressa?

Louis van Gaal á svo afmæli í dag, hann er 63 ára í dag og óskar ritstjórn Rauðu djöflanna honum innilega til hamingju með afmælið. Megi þetta aldursár hans vera honum einstaklega gæfuríkt.

becks

Opnum þessa umræðu og veltum fram einni spurningu: Raunhæft séð, hverjar eru væntingarnar fyrir tímabilið?

Orðið er frjálst.

Æfingaleikir

Manchester United 3:1 Liverpool

skrifaði þann | 18 ummæli

Það er ALDREI leiðinlegt að sigra Liverpool hvort sem það er í u-14 leik, deildarleik, bikarleik eða leik á undirbúningstímabilinu. Verkefnið í nótt var úrslitaleikurinn í THE INTERNATIONAL CHALLENGE CUP, afar vel heppnuðu undirbúningsmóti fyrir tímabilið. Louis van Gaal stillti liðinu upp svona til að byrja með:

de Gea

Smalling Jones Evans

Valencia Fletcher  Herrera Young

Mata

Rooney Chicharito

og Liverpool-liðið var svona:

Mignolet

Kelly Sakho Skrtel Johnson

Henderson Gerrard Allen

Coutinho Lambert Sterling

Þetta voru tvo bestu lið mótsins, sigurvegarar riðlanna sinna, bæði með tvo sigra og einn vítósigur. 8 stig. Það er eitthvað alrangt við það að mæta Liverpool í Bandaríkjunum á undirbúningstímabilinu á mánudegi á miðnætti. Markaðsmenn mótsins og ensku úrvalsdeildarinnar hafa þó líklega verið alveg slétt sama um það. Erkifjendur að mætast í úrslitaleik THE INTERNATIONAL CHAMPIONS CUP.  Það gerist ekki einu sinni í Meistaradeildinni.

Það er hefð fyrir því að United-menn mæti óstyrkir til leiks gegn Liverpool, það skiptir einhvernveginn engu máli hvernig gengi liðsins er fyrir leiki gegn Liverpool, það fýkur allt út um gluggann þegar dómarinn flautar til leiks. Það var engin breyting á því. Fyrir utan eina laglega sókn í upphafi leiks þar sem leikmenn liðsins spiluðu boltanum frábærlega á milli sín upp allan völlinn sem endaði í dauðafæri fyrir Hernandez voru menn frekar slappir í fyrri hálfleik.

Liverpool-menn pressuðu okkar menn og það var ákveðinn hálfkæringur yfir öllum aðgerðum liðsins. Menn voru að gefa lélegar sendingar, að taka illa á móti boltanum. Darren Fletcher og öftustu þrír varnarmennirnir okkar voru oft svolítið út á túni í hálfleiknum og Liverpool gekk á lagið með nokkrum hröðum sóknum. Það var úr einni slíkri sem fyrsta mark leiksins leit dagsins ljós. Raheem Sterling, sprækasti leikmaður Liverpool átti góðan sprett inn í teiginn þar sem Phil Jones fór í klaufalega tæklingu gegn honum. Jones snerti vissulega boltann en fór duglega í Sterling og vítaspyrna dæmd. Gerrard steig á punktinn og skoraði af öryggi. 0-1.

Eftir markið settust Liverpool-menn aðeins aftar á völlinn og við héldum boltanum betur. Það gekk þó lítið að sækja á markið og aðalhættan kom frá fyrirgjöfum fyrir mark Liverpool enda áttu bakverðir þeirra frekar dapran dag. Miðverðirnir voru þó klárir í slaginn og skölluðu allt í burtu. Þetta var frekar Moyes-legt allt saman og ekki vænlegt til árangurs. Staðan var því 0-1 í hálfleik Liverpool í vil.

Það er ekki erfitt að ímynda sér að Louis van Gaal hafi grafið upp hárþurrkuna góðu í hálfleik. Liðið var að spila sinn langslakasta hálfleik á undirbúningstímabilinu. Hvað sem hann sagði í hálfleik svínvirkaði. Cleverley og Blackett komu inn á fyrir Fletcher og Evans. Leikur liðsins snarbatnaði í seinni hálfleik og okkar menn voru ekki lengi að því að jafna metin. Ander Herrera gerði afar vel í að standast pressu Liverpool-manna á miðjunni, kom boltanum á Chicharito, sem hafði annars hægt um sig í leiknum, hann átti þrusufyrirgjöf sem fór beint á Rooney sem sneiddi hann laglega framhjá Mignolet. Þrælfínt mark.

Eftir það stjórnuðu okkar menn leiknum og það var eiginlega einkennilegt að sjá muninn á Liverpool í seinni hálfleik, þeir voru mun slakari. Við gengum á lagið og komumst yfir fljótlega eftir mark Rooney. Luke Shaw kom boltanum á Mata sem átti bylmingsskot fyrir utan teiginn. Skotið hafði viðkomu í Sakho og fór þaðan í netið. 2-1 og allt í bullandi gangi.

Í kjölfar þessa marks stjórnuðu okkar menn leiknum að mestu og skoruðu ansi skrautlegt mark sem fékk þó ekki að standa. Ashley Young átti skot/fyrirgjöf langt utan af velli sem hafnaði í burðarvirki marksins og þaðan barst boltinn aftur inn á völlinn til Rooney sem potaði honum í markið. Upphaflega fékk markið að standa enda við fyrstu sýn leit það út fyrir að boltinn hefði farið í slánna. Dómarinn gat þó séð það á stórum skjá að boltinn fór ekki í slánna og dæmdi því markið af, réttilega.Louis van Gaal skipti svo Nani, Kagawa og Lingard inn á fyrir Mata, Chicharito og Herrera. Lingard fékk tækifæri á miðjunni aldrei þessu vant og stóð sig vel þar, hann náði meira að segja að tryggja sigurinn endanlega á lokamínútum leiksins þegar hann setti boltann inn með laglegu skoti eftir fyrirgjöf Ashley Young sem átt enn einn stjörnuleikinn og augljóst að hann er búinn að spila sig inn í hópinn hjá Louis van Gaal fyrir tímabilið.

United stendur því uppi sem sigurvegari The International Champions Cup 2014 og fékk fyrir vikið frekar laglegan bikar og 1 million dollars.

Liðið spilaði 5 leiki í Bandaríkjunum, skoraði 16 mörk og fékk aðeins á sig fjögur mörk, þrjú úr vítum og hitt markið var af 50 metra færi. Það eru jákvæðir punktar. Louis van Gaal getur verið ánægður með stóran hluta hópsins og nokkuð ljóst að hann hefur fengið góða mynd af því hverjir verði áfram hjá félaginu og hverjir fari. Næsta skref framundan er tiltekt á hópnum þar sem við munum væntanlega sjá 3-4 leikmenn fara og vonandi náum við að bæta við 2-3 gæðaleikmönnum við hópinn.

Næsti leikur er svo gegn Valencia á Old Trafford þann 12. ágúst. Svo hefst ballið fyrir alvöru. Endum þetta á nokkrum myndur úr fagnaðarlátunum:

Æfingaleikir

Liverpool á miðnætti í kvöld

skrifaði þann | 1 ummæli

Young fagnar marki í leiknum á laugardag
Young fagnar marki í leiknum á laugardag

Á miðnætti í kvöld mætum við Liverpool í úrslitum Guinness bikars alþjóðlegu meistaranna. Eitthvað hefur einhverjum auglýsingameistaranum orðið hált á nafngiftinni, því hvorugt liðið er jú meistari. En það getur jú öllum skrikað fótur af og til.

Það er ekki mikið að segja um æfingaleikina hingað til sem hefur ekki þegar verið sagt. Liðið hefur verið að spila fantavel, allir eru í skapi til að leggja sig alla fram fyrir nýja stjórann og allt er í himnalagi (a.m.k. þangað til alvaran hefst).

Á æfingunni í nótt kláruðu Rooney, Shaw, Michael Keane, Young, Valencia, Jones, Evans, Fletcher, Herrera, Mata, Chicharito og Cleverley fyrr en aðrir og ég ætla því að leyfa mér að skjóta á byrjunarliðið:

De Gea

M Keane Jones Evans

Valencia Fletcher Herrera Young

Mata

Rooney Hernandez

Sem er líklega sterkasta lið sem hægt er að stilla upp úr hópnum. Smalling er ekki að æfa á fullu og Welbeck æfði ekki.

Á fréttamannafundinum eftir æfingu sagði Louis van Gaal að eftir að hópurinn kæmi aftur til Manchester væri tilbúinn að taka ákvörðun um hvaða leikmenn yrðu látnir fara. Hann myndi byrja á því að segja viðkomandi það, augliti til auglitis áður en það fréttamenn fái nokkuð um það að vita.  Miðað við allt og allt er lílkegt að á þeim lista séu Anderson, Nani og Hernandez ef ekki fleiri. Van Gaal er búinn að senda þjálfarann Marcel Bout heim til Englands til að koma Fellaini, Januzaj og Van Persie í form en þeir tveir fyrrnefndu hafa verið að æfa í viku en Van Persie kemur í dag. Van Gaal þykir líklegt að Belgarnir verði í standi fyrir fyrsta leikinn gegn Swansea 16. ágúst, en mjög tæpt verður með hvort hann mun treysta Van Persie í þann leik.

Liverpool hafa auðvitað verið að spila í Bandaríkjunum eins og við, léku fyrst gegn Roma og töpuðu 1-0, en í Alþjóðlegameistarabikarnum hafa þeir unnið Olympiakos 1-0, Manchester City á vítum eftir 2-2 jafntefli og loks AC Milan 2-0.

Þeir hafa verið að sanka að sér mönnum í sumar, aðallega frá Southampton og liðið hefur verið að slípast saman. Helsti veikleiki þeirra í kvöld verður líklega sóknin enda báðir stjörnuframherjarnir eru frá, Suárez beit sig í að fara til Barcelona og Daniel Sturridge er meiddur. Það verður því líklega Ricky Lambert sem verður fremstur hjá þeim. Að öðru leyti verða þeir með mjög svo frambærilegt lið, Raheem Sterling sýndi vel síðasta vetur hvað hann getur og stuðningsmenn virðast nokkuð ánægðir með Jordon Ibe. Aðra ættum við að þekkja frá fyrri árum.

En þetta verður enginn venjulegur æfingaleikur í kvöld, það er ekki hægt þegar þessi lið mætast. Þetta verður harkan sex og ég efast ekki um að þau sem hafa sig í að vaka eftir leiknum, sem eins og fyrr segir byrjar á miðnætti, muni ekki sjá eftir því.

Yngri liðin

Mjólkurbikarinn

skrifaði þann | Engin ummæli

Milk Cup sigurvegararFyrir fólk á besta aldri þýðir Mjólkurbikarinn deildarbikarkeppnina sem eitt sinn var, en um áratugaskeið hefur The Milk Cup verið keppni unglingaliða á Norður Írlandi. United hefur alltaf sent unglingalið sitt til keppni þar og í ár unnu þeir keppnina sem þeir voru í. BBC á Norður Írlandi fylgdist með og birti fréttir og öll mörk.

Í fyrsta leik burstuðu þeir ástralska liðið Gold Coast Academy 11-0, í næsta leik unnu þeir Norður-Írana í County Armagh 3-0 og síðasta leiknum í riðlinum var jafntefli nóg gegn CSKA Moskvu, 2-2.

Úrslitaleikurinn var gegn Vendée frá Frakklandi og þar dugði eitt mark til sigurs.

Væri gaman ef einhver þessara ungu manna fari alla leið. Mér skilst að unglingaliðið í ár sé frekar lítill hópur, en nokkuð vel mannaður.

Æfingaleikir

Manchester United 3:1 Real Madrid

skrifaði þann | 4 ummæli

kagawa_chicharitoÍ kvöld spilaði United sinn fjórða æfingarleik í þessum Bandaríkjatúr og halda þeir áfram að spila vel og gefa okkur góða von fyrir næsta tímabil. United með sanngjarnan sigur á Real Madrid, 3-1. Ashley Young með tvö mörk í fyrri hálfleik og Chicharito bætti einu við í seinni hálfleik. Gareth Bale skoraði mark Real Madrid.Það þýðir semsagt að United mætir Liverpool á mánudag og verður sá leikur spilaður á miðnætti. Ekki oft sem maður fær slíka stórleiki á æfingartímabilinu.

Fyrir leikinn sigraði Inter Roma með tveimur mörkum gegn engu þar sem Vidic skoraði eitt og var valinn besti leikmaður leiksins. Með sigrinum komst Inter upp fyrir United og þurftu okkar menn semsagt eitt stig út úr þessum leik til að ná efsta sætinu í riðlinum og tækifæri til að mæta Liverpool.

Samkvæmt Mark Ogden hjá Telegraph, þá er þetta mesti fjöldi sem hefur mætt á leikvöll í Bandaríkjunum til að horfa á fótboltaleik, 109 þúsund manns takk kærlega fyrir.

Van Gaal stillti liðinu svona upp í fyrri hálfleik:

De Gea

Keane Jones Evans

Valencia Herrera Fletcher(C) Young

Mata

Rooney Welbeck

Liði Real var hinsvegar stillt upp svona:

Casillas

Ramos Pepe Nacho

Arbeloa Illaramendi Alonso Carvajal

Modric Bale

Isco

Ég hef ekki náð að horfa mikið á United í þessari æfingarferð og var þetta fyrsti leikurinn sem ég horfi á frá upphafi til enda. Get ekki sagt annað en að maður sé afskaplega kátur með það sem Van Gaal er að gera.

Í fyrri hálfleik spilaði United oft á tíðum alveg glimrandi fótbolta og stjórnuðu spilinu. Það var svo á tuttugustu mínútu sem þetta flotta spil skilaði marki. Leikmenn United hófu stórkostlega sókn (sem tók um það bil tuttugu sendingar) sem endaði með að Fletcher sendir boltann á Rooney sem gefur hann til baka með laglegri hælsendingu, Fletcher kemur svo boltanum til Welbeck og hann yfir á Young sem á þetta laglega skot framhjá Casillas í marki Real. Það dugar ekkert að lýsa þessu með orðum, þetta mark þarf að sjá með eigin augun.

Leikmenn Real voru samt fljótir að jafna metin. Bale nýtti sér reynsluleysi Michael Keane í vörn United og náði að komast framhjá honum og gerði Keane þau klaufamistök að brjóta á Bale inn í vítateig (Verð að taka það fram að Keane lét þetta ekki á sig fá og spilaði þrusuvel fyrir liðið eftir þessi mistök). Bale steig svo á vítapunktinn og skoraði framhjá De Gea.

Tuttugu og átta mínútur liðnar og staðan 1-1. Stuttu síðar átti Bale stórhættulega hjólhestaspyrnu, sem hefði auðveldlega geta endað með marki en De Gea stóð sig vel og varði örugglega. Á þrítugustu og sjöttu mínútu skoraði Young sitt annað mark og annað mark United í leiknum. Young á þessa stórfínu fyrirgjöf á Rooney sem reynir að skalla boltann en rétt missir af boltanum. Það kom ekki að sök því boltann fór svona glæsilega framhjá Casillas og annað mark Young í leiknum staðreynd.

Welbeck meiddist stuttu síðar og var honum skipt út af fyrir Zaha. Rooney og Mata enda svo fyrri hálfleikinn með skemmtilegri aukaspyrnu þar sem Mata hleypur framhjá varnarveggnum, Rooney vippar boltanum til hans og Mata á skot framhjá. Staðan í hálfleik þarmeð 2-1.

Van Gaal gerði svo þrjár skiptingar í hálfleik. Luke Shaw, Tyler Blackett og Cleverley komu inn á fyrir Evans, Young og Herrera. Fjarvera Herrera hafði mikil áhrif á spilamennsku liðsins í byrjun seinni hálfleiks. United ekki að ná sama spili með Cleverley á miðjunni. Á sama tíma fannst mér Phil Jones meir og meir áberandi góður í vörn United. Það var svo á 80′ mínútu sem United innsiglaði sigurinn með flottu marki frá Javier Hernandez. Kagawa átti glæsilega fyrirgjöf inn í teig og náði Chicharito að skalla boltann laglega inn í markið.

Fyrir mann eins og mig, sem hafði ekki séð mikið af United eftir ráðningu Van Gaal, þá var þetta stórkostleg viðbrigði á spilamennsku liðsins frá því sem maður sá á síðasta tímabili. Allir leikmenn liðsins öruggari með botltann, alltaf að reyna spila boltanum framhjá andstæðingnum, mikið af flottum margar þversendingum yfir völlinn og „einnar-snertingar“ fótbolti. Leikmenn í sífellu að skipta um stöður, gera sig fría fyrir næstu sendingu o.s.frv. Á sama tíma voru varnarmenn liðsins að njóta sín einnig, Phil Jones þá sérstaklega (Evans var líka frábær). Svo er langt síðan maður hefur séð Fletcher spila svona vel og Young átti prýðisleik fyrir liðið. Það er alveg greinilega að allir leikmenn liðsins eru að reyna sanna sig fyrir nýja stjóranum og það eru gleðifregnir fyrir okkur sem styðja liðið.

Það er smá munur á þessari æfingarferð og þeirri síðustu:

Semsagt góður sigur í kvöld og ansi margir jákvæðir punktar. United er að ná betri tökum á þessu 3-4-3 leikkerfi Van Gaal og stefnir allt í stórskemmtilegt tímabil í vetur eftir ansi dapurt gengi á því síðasta. Næst er það hinsvegar Liverpool í úrslitunum á mánudag. Það verður sko enginn venjulegur æfingarleikur!