Rauðu djöflarnir

Herrera og Shaw í morgunslúðrinu.

Björn Friðgeir skrifaði þann 24. júní, 2014 | 7 ummæli

Munið þið eftir Ander Herrera? Ég var næstum búinn að gleyma honum, enda gerði hann lítið hjá Athletic Bilbao í vetur til að minna á sig. Hann var þó fastamaður í liðinu.. En núna fullyrðir spænska blaðið Marca að hann sé búinn að skrifa undir fjögurra ára samning við United. Þetta verði tilkynnt opinberlega í dag. United á að hafa greitt upp klásúluna góðu upp á 36m. Upphaflega á þetta sér rætur í frétt Cadena Ser útvarpsstöðvarinnar.

Þessir verða samherjar á næstu leiktíð. — Þessir verða samherjar á næstu leiktíð… sögðum við fyrir nokkru

Daily Mirror segir að við séum svo búnir að hækka boðið í Luke Shaw í 34m punda. Shaw er á leiðinni heim frá HM næstu nótt og getur því einbeitt sér að því að ganga frá framtíð sinni. Það gæti því stefnt í viðburðaríka viku, en þegar Edward Woodward er viðloðandi málið er rétt að gera ekki ráð fyrir neinu sem gefnu fyrr en leikmaðurinn er kominn inn á völl í United treyju.

Leikmenn

Antonio Valencia skrifar undir nýjan samning

Björn Friðgeir skrifaði þann 21. júní, 2014 | 5 ummæli

Þau sem vildu einhvers konar Football Manager úthreinsun, 10 út, 10 inn verða fyrir vonbrigðum. En það var svo sem vitað, þó þurfi að endurnýja liðið þá verður það frekar að taka menn inn frekar en selja. Antonio Valencia er búinn að skrifa undir nýjan þriggja ára samning þannig að hann fær tækifæri til að rífa sig uppúr þeirri lægð sem hann hefur verið í undanfarin tvö tímabil. Honum til varnar var hann í erfiðum meiðslum þar á undan og í fyrra missti hann besta vin sinn úr ekvadorska landsliðinu, Chucho Benítes.

Valencia sýnir tattúið til heiður Benítez vini sínum

Nú er hann hins vegar staðráðinn í að sanna sig fyrir Van Gaal og Ryan Giggs aðstoðarþjálfari er ánægður með þessa niðurstöðu enda sé Valencia kraftmikill og fljótur leikmaður og afbragðsduglegur við æfingar.

Sjálfur er ég ánægður með þetta, ef einhver af þessum þremur kantmönnum okkar sem allir hafa leikið langt undir getu undanfarið, ætti að fara þá væri það helst Ashley Young.

Enska úrvalsdeildin Leikjadagskrá

Leikjadagskrá fyrir næsta tímabil

Tryggvi Páll skrifaði þann 18. júní, 2014 | 1 ummæli

Leikjadagskráin fyrir komandi tímabil kom út í morgun. Það er ljóst að Louis van Gaal fær umtalsvert þægilegri byrjunarleiki en David Moyes fékk á síðasta tímabili. Í fyrstu fimm leikjum tímabilsins spilum við gegn öllum liðunum sem komu upp úr Championship fyrir þetta tímabil.

Fyrstu fimm líta svona út:

16. ágúst – Swansea (H)
23. ágúst – Sunderland (Ú)
30. ágúst – Burnley (Ú)
13. september – QPR (H)
20.september – Leicester (Ú)

Eins og frægt er orðið spilar liðið ekki í Evrópukeppni í vetur og því tilvalið að finna sér eitthvað annað hobbý með enska boltanum því að fram að nóvember eru aðeins 9 leikir á dagskrá hjá United (10 með deildarbikarnum).

RvP og LvG þegar þeir sáu leikjadagskránna

Í lok október byrjar þó ballið því og ljóst að nóvember verður stór mánuður enda mætum við Chelsea, Arsenal og City á tímabilinu 25.október – 22. nóvember:

25. október – Chelsea (H)
1.nóvember – Manchester City (Ú)
8.nóvember – Crystal Palace (H)
22. nóvember – Arsenal (Ú)

Í desember kemur Liverpool í heimsókn á Old Trafford og jólaleikirnir verða gegn Newcastle, Tottenham og Stoke:

13.desember – Liverpool (H)
20.desember – Aston Villa (Ú)
26. desember – Newcastle (H)
28. desember – Tottenham (Ú)
1.janúar – Stoke (Ú)

Síðari fjórir stórleikirnir fara svo fram á síðari hluta tímabilsins, í apríl spilum við gegn bæði Chelsea og City og við fáum Arsenal í næstsíðasta leik tímabilsins:

21. mars – Liverpool (Ú)
11. apríl – Manchester City (H)
18. apríl – Chelsea (Ú)
16. maí – Arsenal (H)

Síðustu fimm leikir tímabilsins koma svo eftir vikunni þar sem við spilum bæði gegn City og Chelsea og ljóst að þeir tveir leikir munu skipta sköpum í titilbaráttunni. Síðasti leikur tímabilsins er svo gegn Hull City á útivelli:

25. apríl – Everton (Ú)
2. maí – WBA (H)
9. maí – Crystal Palace (Ú)
16. maí – Arsenal (H)
24. maí – Hull (Ú)

Þetta lítur ágætlega út á blaði og ljóst að Louis van Gaal fær mun þægilegri byrjun en forveri hans David Moyes sem fékk Chelsea og Liverpool strax í andlitið í fyrstu leikjum síðasta tímabils.

Nú erum við auðvitað ekki í neinni Evrópukeppni og ættum því vonandi að græða vel á því líkt og Liverpool gerði á síðasta tímabili. Leikmenn munu yfirleitt fá góða viku á milli til þess að hvíla sig og það sem mikilvægast er, Louis van Gaal og þjálfarateymi hans munu fá nógan tíma á æfingarsvæðinu á milli leikja til þess að kenna leikmönnunum þau leikkerfi sem á að nota í vetur.

Til gamans kíkti ég á leikjadagskránna í Meistaradeildinni og bar hana saman við leikjadagskránna okkar til að sjá hvort að við myndum mæta einhverjum af erkifjendum okkar í kjölfar leikviku í Meistaradeildinni. Það er svo í tveimur tilvikum:

25. október gegn Chelsea (H) – 21./22. október spilar Chelsea í Meistaradeildinni
13. desember gegn Liverpool (H) – 9./10. desember spilar Liverpool í Meistaradeildinni

Svo má auðvitað bæta því við að 8-liða úrslit Meistaradeildarinnar eru sett á akkúrat á milli leikja okkar gegn Chelsea og City í apríl. Það má fastlega gera ráð fyrir því að að minnsta kosti annað af þessum liðum muni spila þar.

Þetta lítur því bara ágætlega út fyrir okkar menn og ég er viss um að Louis van Gaal getur ekki beðið eftir að sýna þessari deild hvar Davíð keypti ölið.

Það er auðvitað rétt að taka fram að sjónvarpsstöðvarnar eiga eftir að velja sér leiki og bikarkeppnir hafa sín áhrif á þetta og þá munu leikirnir færast eitthvað til en í meginatriðum helst þessi dagskrá.

Slúður

Sjóðheitt morgunslúður

Björn Friðgeir skrifaði þann 16. júní, 2014 | 5 ummæli

Þar kom að því, nýtt og ferskt og þokkalega áreiðanlegt slúður!

Og þá er það að Thomas Vermaelen hafi samþykkt samning við United og nú eigi bara eftir að ganga frá kaupverði við Arsenal. Vermaelen á ár eftir af samningi og því ætti Arsenal ekki að geta heimtað mikið.

Það er ekki hægt að segja að þetta séu flottustu fréttirnar. Vermaelen er búinn að vera fimm ár hjá Arsenal, stóð sig vel í fyrstu en hefur verið nokkuð meiddur undanfarið. Hann var valinn fyrirliði liðsins eftir að Van Persie fór, en hefur ekki átt fast sæti í liðinu í vetur.

Ef satt er þá er þetta í mesta lagi þokkalegur díll, Van Gaal að vonast til að fá hann í sitt fyrra Arsenal form og þá líklega þannig að þessi þrír yngri miðverðir okkar nái að læra eitthvað og taka svo skrefið upp. En hann er ekki alveg þessi heimsklassa miðvörður sem flestir eru að vonast eftir, amk ekki síðustu tvö ár. Sagt er að lykilatriði í þessu sé að Vermaelen sé með sama umboðsmann og Van Persie. Úff…

Landsleikir

Heimsmeistarakeppnin

Tryggvi Páll skrifaði þann 14. júní, 2014 | 2 ummæli

Vá, þessi heimsmeistarakeppni er að byrja svo vel og er strax orðin mun betri en Vuvuzela-leiðindin frá árinu 2010. Veislan er rétt að byrja.

Einhver skemmtilegasti leikur sem ég hef horft á í sögu HM fór fram í gær þegar okkar menn, Robin van Persie og Louis van Gaal pökkuðu gjörsamlega saman ríkjandi heimsmeisturum Spánar í opnunarleik B-riðils. Það var hrein unun að fylgjast með útpældu leikkerfi Hollendinga gjörsamlega núlla út allt sem Spánverjar reyndu að gera. Er einhver sem getur ekki beðið eftir að sjá Louis van Gaal spreyta sig með Manchester United eftir þennan leik?

Spánverjar voru með hverja stórstjörnuna á fætur annari í byrjunarlið og á bekk á meðan hollenska liðið var stútfullt af minni spámönnum. Pælið í muninum á þessum byrjunarliðum:

Casillas

Azpilicueta Ramos Pique Alba

Xabi Alonso Busquets Xavi

Iniésta Costa Silva

Cillesen

Martins Indi Vlaar de Vrij

Blind de Jong de Guzmán Jaanmat

Sneijder

van Persie Robben

Það voru líklega einungis 30 manns í öllum heiminum sem trúðu því að Holland væri að fara að vinna Spánverja í gær. Leikmannahópur Hollands á HM, þjálfararnir og aðstoðarmennirnir í kring. Sigurinn í gær þýðir að Hollendingar ættu að eiga nokkuð greiða leið að 8-liða úrslitunum og sleppa að öllum líkindum við að mæta Brasilíumönnum í 16-liða úrslitum. Þetta var því risasigur fyrir Hollendinga og nokkuð ljóst að Louis van Gaal er ekkert að fara að mæta til vinnu strax. Það er kannski ekki alveg það besta fyrir United en ef það þýðir að við fáum hann stútfullan af sjálfstrausti eftir gott mót með Hollendingum ætla ég ekki að kvarta. Ég veit að stuðningsmenn annara liða í enska boltanum svitnuðu grimmt yfir leiknum í gær og tilhugsunini um að þessi maður sé að fara að stýra Manchester United á næsta tímabili.

Við munum öll hvað Robin van Persie var glaður þegar hann vissi greinilega, á undan öllum öðrum, hver myndi taka við af Þeim-Sem-Ekki-Má-Nefna-Á-Nafn:

Það er alveg morgunljóst að Louis van Gaal og Robin van Persie eru nokkurn veginn eins og ristað brauð og smjör. Fullkomið par. Van Persie kann ágætlega að spila undir stjórn Louis van Gaal enda var hann markahæsti leikmaður evrópsku undankeppninnar og Louis van Gaal kann ágætlega við Robin van Persie enda gerði hann van Persie að fyrirliða hollenska landsliðsins.

Robin van Persie spilaði í gær á þann hátt sem maður sá aldrei glitta í á síðasta tímabili. Ef Louis van Gaal getur kveikt svona rosalega í þessum manni eins og hann er að gera með hollenska liðinu verður næsta tímabil svo skemmtilegt. Ég meina, hvaða rugl er þetta eiginlega:

Þetta er hið fullkomna sending, hinn fullkomni skalli á hinum fullkomna tíma. Eins og rennblautur sokkur í andlitið á Spánverjunum. Þetta mark verður bara betra eftir því sem maður horfir oftar á það. Það var vinstri bakvörður Hollendinga, Daley Blind sem átti þessa sendingu. Ég treysti því að Louis van Gaal mæti með hann á svæðið ásamt svona 5-6 öðrum leikmönnum hollenska liðsins. Fjandinn hafi það, komdu bara með þá alla. Þeir geta ekki verið mikið verri en það sem er nú til staðar hjá Manchester United.

Allir hinir

Það eru víst fleiri lið á HM en Holland og fleiri United-menn en van Gaal og van Persie. Í gær var Javier Hernandez fyrsti leikmaður United til að spila á þessari heimsmeistarakeppni þegar hann kom inn á í 1-0 sigri Mexíkóa á Kamerúnum. Hann fékk einhverjar 10 mínútur og stimplaði sig rækilega inn með því að dúndra yfir af tveggja metra færi.

David de Gea og Juan Mata sátu á bekknum gegn Hollandi og gátu lítið gert annað að horfa upp á glænýjan stjóra sinn niðurlægja landslið sitt. Þeir hljóta að vera spenntir fyrir komandi tímabili. Vicente del Bosque gæti get margt vitlausara en að skipta út Casillas fyrir de Gea í komandi leikjum enda átti sá fyrrnefni alveg hroðalegan leik í gær.