Rauðu djöflarnir

Enska úrvalsdeildin

Southampton 1:1 Manchester United

skrifaði þann | 9 ummæli

Sem betur fer er þetta hrikalega tímabili lokið. Síðasti leikurinn endaði í jafntefli 1-1, gegn Southampton. United-liðið endar því í 7.sæti með færri stig en liðið hefur nokkurn tíman fengið í sögu úrvalsdeildarinnar. Ryan Giggs stýrði liðinu í síðasta skipti (í bili) og uppstillingin var eftirfarandi

United

De Gea

Smalling Vidic Rio Evra

Fletcher Kagawa

Januzaj Mata Welbeck

RVP

Bekkur: Amos, Carrick, Cleverley, Lawrence, Young, Valencia, Hernandez

Southampton

Boruc

Clyne Fonte Lovren Shaw

Wanayama Davis

Cork Scheiderlin

Lallana

Lambert

Bekkur: Gazzaniga, Ward-Prowse, Guly, Chambers, Hooiveld, Reed, Gallagher.

Það var afskaplega erfitt fyrir United-menn að brjóta upp þennan miðjupakka hjá Southampton. Þeir stilltu upp 5 miðjumönnum á miðjuna og létu bakverðina Clyne og Shaw sjá um að hlaupa upp og niður kantana. Það var mikið pláss á köntunum en með menn eins og Kagawa og Mata í liðinu sem vilja spila boltanum á miðjunni fóru sóknartilburðir United eingöngu í gegnum miðju vallarins. Það var einfalt fyrir Southampton að stoppa það. Í þau örfáu skipti sem United reyndi að fara upp kantana komst liðið í ágæta stöður sóknarlega en það var mjög fátítt. Þetta var eiginlega algjör andstæða við sóknarleik liðsins undir David Moyes þar sem allt snerist um að fara upp kantana.

Southampton-menn stjórnuðu leiknum í fyrri hálfleik og uppskáru mark um miðjan hálfleikinn sem hefði reyndar aldrei átt að standa. Rickie Lambert olnbogaði Nemanja Vidic í drasl í skallaeinvígi. Vidix lá eftir alblóðugur og óvígur. Lambert fékk boltann einn á móti markmanni og kláraði örugglega. Slök dómgæsla hjá Mike Dean sem átti afskaplega dapran leik fyrir bæði lið. Þetta var að vísu fyllilega verðskuldað mark hjá Southampton. Lallana, Lambert og Shaw voru líklega að spila sig endanlega inn á HM í Brasilíu með Hodgson í stúkunni.

Vidic og allt United-liðið varð alveg brjálað við það að markið fengi að standa og það lifnaði aðeins yfir United-liðinu eftir markið og liðið kláraði fyrri hálfleikinn mun betur en liðið byrjaði hann í það minnsta. Í seinni hálfleik mætti annað lið til leiks. Liðið setti mun meiri pressu á Southampton og uppskárum við mark á 54. mínútu. Juan Mata skoraði eitt af mörkum tímabilsins, beint úr aukaspyrnu, nema hvað. Gjörsamlega frábært mark.

Eftir markið jafnaðist þetta aftur út, það var nánast eins og bæði lið væru sátt við jafnteflið. Það gerðist afskaplega lítið merkilegt það sem eftir var leiks og 1-1 sanngjörn niðurstaða þessa leiks. Lokastaða í deildinni er því eftirfarandi:

Screen Shot 2014-05-11 at 15.59.04

Við gerðum okkur grein fyrir því að að þetta yrði erfitt án Sir Alex en ef einhver hefði sagt mér að þetta myndi enda svona hefði ég sagt viðkomandi að hann væri geðveikur.

Að mörgu leyti var þetta endir á ákveðnu tímabili í sögu félagsins. Eftir þetta tímabil er félagið endanlega búið að segja skilið við Sir Alex Ferguson tímabilið. Á næsta tímabili mun Manchester United ekki taka þátt í Evrópukeppni í fyrsta skipti í aldarfjórðung. David Moyes reyndi að fleyta sér áfram á Sir Alex Ferguson öldunni með engum árangri. Sú alda hefur fjarað út. Á næsta tímabili munu margir af helstu máttarstólpum liðsins undir stjórn Ferguson halda á nýjar slóðir. Nemanja Vidic fer. Ryan Giggs mun líklegast hætta ásamt Rio Ferdinand og Patrice Evra. Næsti stjóri mun á næstu 2-3 árum skapa nýtt lið, lið sem er ekki byggt á leikmönnum sem Sir Alex Ferguson ól upp. Hann mun skapa sitt lið, nýtt Manchester United. Stundum þarf nefnilega að rífa niður til þess að byggja upp. Það er verkefnið fyrir næsta stjóra Manchester United.

Við kveðjum því þessar miklu hetjur í sögu Manchester United. Þá félaga Rio Ferdinand og Nemanja Vidic, eitthvað allra besta, ekki það besta, miðvarðapar sem spilað hefur í þessari deild.

Við kveðjum líklega Patrice Evra, þann frábæra leikmann sem hefur átt vinstri bakvarðarstöðu United síðustu árin. Á hátindi ferli síns var hann besti vinstri bakvörður í heiminum, ótrúlegur varnarlega og frábær sóknarlega, ekki nóg með það, hann spilaði nánast hvern einasta leik liðsins.

Síðast en ekki síst munum við líklega ekki sjá þennan snilling leika listir sínar í hinni rauðu United-treyju á ný. Við förum betur yfir það í sérstakri grein síðar. Takk fyrir allt, Sir Ryan Giggs.

giggs671

Og þar með er þessu afleita tímabili lokið. Liðið brotlenti á tímabilinu á fyrsta tímabilinu eftir lok stjóratíðar Sir Alex Ferguson. Við förum betur yfir þetta járnbrautarslys í sérstakri uppgjörsgrein sem birtist á næstu dögum.

Enska úrvalsdeildin

Loksins, loksins…

skrifaði þann | Engin ummæli

…loksins er þetta tímabil að taka enda.

United fer á ströndina á morgun, nánar til tekið suður til Southampton og spilar þar sinn síðasta leik undir stjórn Ryan Giggs. Í bili a.m.k. Giggs er búinn að vera að rótera nokkuð og gefa mönnum sénsa til að sýna tilvonandi stjóra hvað í þeim býr. Það verður ekki sagt að allir hafi gripið það tækifæri.

Það er því svolítið erfitt að spá hverjir fá aftur tækifæri, en ég spái þessu svona:

De Gea

Rafael Smalling Vidc Evra

Cleverley Fellaini

Nani Mata Januzaj

Van Persie

Lawrence og Wilson sem stóðu sig svo vel síðast verða á bekknum, þeir spila í úrslitleik U-21 deildarinnar gegn Chelsea á miðvikudaginn næsta Það er einhver smá séns á að Rafael verði orðinn góður og ég spái honum því þarna inn. Cleverley fær lokaséns til að sýna sig og Van Persie verður auðvitað á toppnum. Ólíklegt er að Rooney verði tilbúinn, en gæti sést á bekknum.

Ef Giggs kemur ekki inná þá get ég *staðfest* að það er vegna þess að hann hefur ákveðið að gefa þessu eitt ár í viðbót, eins og hann sagði nú í vikunni að hann væri að íhuga. Ef hann verður aðstoðarmaður Van Gaal sé ég enga ástæðu til að hafa hann ekki á leikmannalistanum. En auðvitað á hann að koma inná engu að síður og skora mark, svona til að eyðileggja ekki metið sitt að hafa skorað öll árin sín í deildinni.

Þetta lið á að geta spilað mjög skemmtilegan bolta en hvort það nægir gegn góðu liði Southampton sem mun að hluta verða brotið upp í sumar, enda kemur Shaw vonandi til okkar, og Lallana virðist á leið til Liverpool.

Nú er bara að klára þetta með smá stæl, spila flottan fótbolta, þakka Giggs fyrir að hlaupa í skarðið og reyna að fara inn í sumarið með smá bros á vör.

Svona til að að hressa okkur við er ágætt að lesa þetta viðtal við Juan Mata.Drengurinn er alltaf að koma jafnvel út á opinberum vettvangi, traustur gaur. Eitt það áhugaverðasta í þessu er:

He [Moyes] told me he thought I could play in any of the three positions behind the striker. I said, yes, I’d played in all three during my career.

Þannig að Mata er tilbúinn í að spila þar sem hans er þörf.

Annars var David de Gea í vikunni valinn leikmaður ársins bæði af leikmönnum og stuðningsmönnum

https://twitter.com/D_DeGea/status/464538124312662016

Verulega verðskuldað og verulega ánægjulegt að sjá að stuðningsmenn eru ekki algerlega stjörnublindaðir af Rooney sem hefur verið upp og ofan í vetur. De Gea er besti markmaðurinn í deildinni, á því á ekki að vera neinn vafi.

Saidi Janko, Svisslendingurinn ungi sem keyptur var sama dag og Fellaini í ágúst síðastliðnum var valinn besti varaliðsleikmaðurinn og engum á óvart var James Wilson unglingaliðsleikmaður ársins.

Enska úrvalsdeildin

Manchester United 3:1 Hull City

skrifaði þann | 15 ummæli

Sögulegur leikur á Old Trafford í kvöld. Fyrirliðinn okkar Nemanja Vidic kvaddi Old Trafford auk þess sem að besti leikmaður í sögu félagsins, Ryan Giggs, leikjahæsti og sigursælasti einstaklingur í sögu Manchester United spilaði líklega sinn síðasta leik á Old Trafford. Giggs kom nokkuð á óvart í liðsvalinu, hvíldi alla helstu leikmenn liðsins og gaf þeim félögum Tom Lawrence og James Wilson tækifæri í byrjunarliðinu. Þetta eru efnilegir leikmenn. Lawrence var á láni hjá Yeowil Town og Wilson hefur verið að rífa í sig unglingadeildirnar með unglingaliðum United. Liðið var svona:

De Gea

Valencia Smalling Jones Buttner

Carrick Fellaini

Lawrence Kagawa Januzaj

Wilson

Bekkur: Amos, Mata, Giggs, Vidic, Young, Van Persie, M. Keane

Skemmtilegt liðsval hjá Giggs, sérstaklega í ljósi þess að liðið hefur eiginlega að engu að keppa í deildinni, Evrópudeildarsæti er komið úr greipum okkar og því tilvalið að gefa þessum ungu strákum tækifæri. Það er óhætt að segja að United hafi spilað þennan leik vel. Marouane Fellaini spilaði mjög framarlega til þess að styðja við Wilson í framlínunni, Adnan Januzaj lék lausum hala á kantinum og Lawrence og Wilson nýttu tækifærið vel. United stjórnaði leiknum allan tímann sem skilaði sér í þremum mörkum. James Wilson átti eins mikinn drauma-debut og hægt er að ímynda sér. Fyrsti leikurinn á heimavelli United og strákurinn setur 2 mörk, þessi drengur hefur verið að skora sér til gamans í unglingadeildunum og gaman að sjá að hann lét stærri vettvang hafa engin áhrif á sig.

Bm-oPdfCQAAaCz7

Nemanja Vidic fékk svo heiðursskiptingu í sínum síðasta leik á Old Trafford. Hann hefur verið frábær leikmaður fyrir United öll þessi ár og á skilið allt það besta, við förum nánar yfir feril hans í sérstakri grein, ef til vill. Ryan Giggs, sá mikli meistari, skipti sjálfum sér svo inn á og var afar sprækur og augjóst að hann vildi næla sér í mark. Hann átti a.m.k. skilið að fá eina vítaspyrnu eftir ágætan sprett þegar boltinn fór í hönd varnarmanns Hull eftir skot frá Giggs. Giggs lét sér þó nægja að leggja upp mark fyrir Robin van Persie sem sneri aftur eftir talsvert hlé vegna meiðsla.

Góður sigur, góður leikur og skemmtileg leið til þess að kveðja gömlu snillingina og kynna til leiks þá nýju. Nemanja Vidic og Ryan Giggs, við þökkum ykkur fyrir allt. Tom Lawrence og James Wilson. Framtíðin er ykkar.

Enska úrvalsdeildin

Síðasti heimaleikurinn á tímabilinu

skrifaði þann | 1 ummæli

Á morgun fer fram síðasti heimaleikurinn á Old Trafford í bili. Steve Bruce kemur með lærisveina sína í Hull í heimsókn. Það þurfti að færa þennan leik vegna þess að Hull hefur komið öllum að óvörum og sett saman ótrúlega atlögu að FA-bikarnum þar sem liðið er komið í úrslit.  Í deildinni hefur það lengst af siglt lygnan sjó um miðbil deildarinnar en hefur verið að sogast neðar og neðar að undanförnu, leikmennirnir eru kannski að láta drauminn um bikarinn trufla sig. Eftir úrslit helgarinnar er þó ljóst að liðið getur ekki fallið og því mun Hull spila í Úrvalsdeildinni að ári.

Maður veltir því fyrir sér hvort að nú þegar liðið hefur endanlega tryggt veru sína í deildinni hvort að einbeiting leikmanna verði ekki algjörlega á úrslitin í FA-bikarnum sem fram fara í lok mánaðarins? Steve Bruce er þó líklegur til þess að berja allt svoleiðis út úr mannskapnum enda eflaust æstur í að ná í sinn fyrsta sigur gegn United. Ef David Moyes væri ennþá við stjórnvölinn væri hægt að treysta á það að Bruce myndi brjóta taphrinu sína gegn United á morgun en blessunarlega er Moyes orðinn hluti af fortíð Manchester United.

Sannleikurinn er þó að ef til vill fær Steve Bruce ekki betra tækifæri til þess að ná í eitthvað gegn Manchester United en á morgun.

Frammistaða liðsins í tapleiknum gegn Sunderland um helgina bar öll þess merki um að leikmennirnir væru komnir í sumarfrí. Liðið átti 17 skot að marki en aðeins 2 á markið sjálft. Sunderland skoraði markið sitt eftir að hver einasti leikmaður í vörninni ákvað að slökkva á sjálfum sér á sama tíma. Sóknarleikurinn var dapur og einhæfur. Menn voru hreinlega ekki að nenna þessu.

Ryan Giggs var með yfirlýsingar fyrir þann leik og sagði í raun allt það sem við stuðningsmennirnir viljum heyra:

https://twitter.com/ManUtd/status/462566569630253056

Hann virðist geta talað talið en getur hann labbað labbið?

Það skiptir kannski engu máli, ef blaðamenn Daily Mirror hafa rétt fyrir sér verður Louis van Gaal kynntur til leiks sem næsti knattspyrnustjóri Manchester United eftir leikinn á morgun. Við gætum því verið að sjá Ryan Giggs mæta til leiks sem starfsmaður United á Old Trafford í síðasta skipti á morgun enda hefur hann sagst vera opinn fyrir möguleikanum á því að reyna fyrir sér sem knattspyrnustjóri einhverstaðar annarsstaðar.

Jafnframt gæti þetta verið síðasti heimaleikur ansi margra leikmanna United ef maður trúir öllu því sem sagt hefur verið um leikmannahreinsanir í sumar. Nemanja Vidic er að fara til Inter og því mun fyrirliðinn okkar kveðja Old Trafford á morgun. Patrice Evra, Rio Ferdinand, Javier Hernandez, Ashley Young, Nani og Tom Cleverley hafa allir verið orðaðir burt frá liðinu og því er möguleiki á því að einhver þeirra muni spila í síðasta sinn á Old Trafford. Vonandi virkar það sem amfetatín-stera sprauta á milli tánna fyrir þá.

Wayne Rooney og Robin van Persie virðast vera orðnir nógu góðir af sínum meiðslum til þess að spila leikinn og það er gott, það vantaði þennan neista sem Rooney kemur oft með í leikjum. Þetta hefur verið tímabil vonbrigða fyrir Robin van Persie og hann er líklega æstur í að enda það á háa c-inu. Fyrir utan Rafael eru allir aðrir leikmenn í góðum gír og tilbúnir í þennan leik.

Ég vil sjá eftirfarandi lið hefja leikinn:

De Gea

Jones Rio Vidic Evra

Carrick Fellaini

Mata Rooney Welbeck

RvP

Og ég vil sjá eftirfarandi lið ljúka leiknum:

De Gea

Jones Rio Vidic Evra

Carrick GIGGS

Kagawa Mata Welbeck

Wilson

Leikurinn er á morgun, klukkan 18.45.

Enska úrvalsdeildin

Manchester United 0:1 Sunderland

skrifaði þann | 27 ummæli

Þetta átti að vera svo flottur dagur í dag. Sólin skein og reif ég ófrísku kærustuna upp úr rúminu klukkan 11 í bröns niðrí miðbæ Köben. Svo settist maður eldhress upp í sófa með ískaldan Leffe tilbúinn að horfa á United endurtaka leikinn frá síðustu helgi er þeir völtuðu yfir Norwich á Old Trafford. Því miður gekk ekki allt upp eins og maður hafði planað.

Líkt og í Danmörku þá var sólin að skína fyrir leikmennina á Old Trafford í leik númer tvö af fjórum í stjóratíð Ryan Giggs. Fyrir leikinn skrifaði Giggs:

https://twitter.com/ManUtd/status/462566569630253056

Leikurinn

Giggs stillti liðinu upp svona í dag:

De Gea

Jones Ferdinand Vidic Evra

Nani Carrick Fletcher Young

Mata

Hernandez

og á bekknum voru þeir: Amos, Smalling, Valencia, Fellaini, Januzaj, Welbeck, Van Persie.

Í fyrri hálfleik voru United ágætlega sprækir. Nánast allan tímann með boltann en náðu þó aldrei að skapa sér nein almennileg færi. O’Shea var ekki langt frá því að skora sjálfsmark, Nani átti fína tilraun og svo áttum við hættulegt horn sem Mannone varði. Svo eftir hálftíma sækir Sunderland, Connor Wickham fer með boltann út að hornfána og á þessa stórfínu fyrirgjöf inn í vítateig United þar sem allir varnarmenn voru steinsofandi og horfðu á Sebastian Larsson taka á móti boltanum og smella honum framhjá De Gea í markinu (Vídeó). Svo þegar dómari leiksins flautaði til hálfleiks tók ég eftir því að Chicharito var inn á vellinum. Var búinn að steingleyma því að hann hefði verið í byrjunarliðinu, ósýnilegur var drengurinn.

Í seinni hálfleik reyndi United aftur og aftur að gera eitthvað en það gekk voðalega lítið upp. Ég var á tímabili byrjaður að óska þess að Giggs myndi henda Scholes inn á því 39 ára gamall Scholes hefði verið eitthvað mun betra en það sem ég var að sjá frá United. Ég man eftir tveimur hættulegum sóknum sóknir hjá United, þegar Chicharito potaði boltanum framhjá (gæti hafa verið varnarmaðurinn) og svo átti Vidic skalla framhjá sem virtist snerta höndina á Wes Brown.

Giggs reyndi að hrista aðeins upp í liðinu með því að setja Januzaj inn á fyrir Nani á 52′ mín, Van Persie inn á fyrir Mata á 66’mínútu (hans fyrsta leik síðan nítjánda mars þegar hann skoraði þrisvar gegn Olympiacos) og svo Welbeck fyrir Young á 67′ mín. Af þeim þrem átti Januzaj bestu innkomuna, hristi aðeins upp í liðinu og var oft að skapa færi (þó hann hafi klúðrað líka miklu) en því miður skilaði það ekki marki.

Dómarinn flautaði svo leikinn af á 94’mín og átti þetta hæga, hugmyndasnauða United lið ekki skilið meira en 0 stig í þessum leik. Þessi mynd lýsir því ágætlega hvernig leikmönnunum og manni sjálfum leið eftir þennan leik:

https://twitter.com/RedMancunian/status/462604229064916992

og svo til að nudda salti í sárin:

https://twitter.com/EPLStuff/status/462622575622111232

Nokkrir punktar

1. Giggs var ekki að fara gera nein kraftaverk í fjórum leikjum og það er engin spurning að United mun og þarf að skipta út allnokkrum leikmönnum í sumar. Við öll vitum um ansi marga leikmenn sem hreinlega eru ekki á United kaliberi (í dag voru það t.d. Nani, Young og Chicharito) en meir að segja fastamenn og traustir leikmenn fyrir United eins og t.d. Carrick (sem spilaði alveg hræðilega í dag), eru byrjaðir að spila eins og gamalmenni með slappa sjón (þetta á til dæmis líka við Ferdinand og Vidic). Það þarf uppstokkun og það þurfti hana fyrir nokkrum árum.

2. Það sem þessi leikur sýndi manni þó af hverju United þarf stjóra eins og Van Gaal (Já, ég er byrjaður að sættast við þá ákvörðun). Giggs er félagi allra innan liðsins. Já hann nýtur virðingar (að sjálfsögðu) en er hann það vægðarlaus að segja ansi mörgum leikmönnum að vinsamlegast finna sér aðra vinnu? Ég er ekki viss um það.

3. Þrátt fyrir að United hafi verið arfaslappt, eins og svo oft á þessu tímabili, þá verður maður nú að hrósa andstæðingnum þegar þeir eiga það skilið. Sunderland vörðust hrikalega vel og í þessum fáu sóknum, sem þeir áttu í dag, sköpuðu þeir hættulegri færi en United allan leikinn. Vel gert! Erfitt að skrifa þetta þar sem ég þoli ekki þetta lið (Já, út af helv Poznan þegar City vann titilinn!).

4. Ég veit það eru margir sem ekki þola Wayne Rooney (sorrí, ég er ekki meðlimur). En það eru fáir sem geta neitað því hvað Rooney er mikilvægur fyrir United. Alltaf þegar hann á slappan leik vilja stuðningsmenn selja en alltaf þegar það vantar manninn í byrjunarliðið spilar United eins og í dag. Ég er ekki að segja að þetta sé góð staða en áttum okkur á því að Rooney er langbesti leikmaður liðsins. Nú þarf einfaldlega að styrkja liðið á öðrum vígstöðum og finna kerfi sem fær okkar bestu leikmenn til að spila eins og þeir geta fyrir liðið.

5. Getur sumarið ekki bara byrjað núna? Ég get ekki meir!