Rauðu djöflarnir

Enska úrvalsdeildin

United tekur á móti Norwich í fyrsta leik Giggs sem stjóri

skrifaði þann | 9 ummæli

Í sínum fyrsta blaðamannafundi sem knattspyrnustjóri Manchester United byrjaði Ryan Giggs á því að þakka David Moyes fyrir að hafa gefið sér sitt fyrsta tækifæri í þjálfun og og minntist á hvað hann væri stoltur að stýra Manchester United í þeim leikjum sem eftir eru. Hann talaði einnig um það að snúa aftur til United-hugmyndafræðinnar þar sem leikið er af ástríðu og hugrekki og þar sem leikmenn njóta sín á vellinum. Honum er mikið í mun að gefa aðdáendum eitthvað til að brosa yfir í þessum 4 leikjum sem eftir eru. Giggs segir að hjá sér sé sama tilhlökkun og sem leikmaður til næsta leiks og leikmenn hafi staðið sig vel á æfingum og séu einnig spenntir fyrir leiknum á morgun.

Samkvæmt orðum Giggs þá vissi hann fyrst um að hann ætti að taka við á þriðjudaginn en ekki á sunnudaginn eftir leikinn gegn Everton eins og sumir fréttamiðlar héldu fram. Spurður hvort hann vildi starfið til langframa sagðist hann einungis vera að einblína á þessa 4 leiki sem eru eftir. Hann sló líka á létti strengi og sagðist hafa notað tækifærið til að gefa sér 5 ára samning á meðan hann getur. Hann kom aftur inná að hann vildi að liðið spilaði eftir sinni hugmyndafræði sem sé auðvitað bara Manchester United hugmyndafræðin, hann vill að menn spili af ástríðu, með hraða, háu tempói og eins og hann orðaði það „brave with imagination.“

Undir lokin talaði hann um að þetta tímabil hafi verið mikil vonbrigði fyrir alla og að liðið ynni saman og tapaði saman og í þessum 4 leikum vill hann fá jákvæðnina tilbaka. Þrír leikir á Old Trafford þar sem frammistaðan hefur ekki verið góð, hann vill sjá mörk, tæklingar, menn taka menn á og gefa áhorfendum eitthvað til að fagna. „I want the passion that should come with being a Manchester United player“. Að lokum var hann spurður hvort hann ætlaði að vera í æfingagalla eða jakkafötum, sagði hann að menn yrðu bara að bíða og sjá.

Í viðtali við MUTV sagði stjórinn að allir værir leikfærir nema Rafael og Robin van Persie. Ekki má gleyma að Norwich eru að berjast fyrir lífi sínu deildinni og eru einmitt með sinn eigin „interim“ stjóra og vilja eflaust ná úrslitum. Erfitt er að spá fyrir byrjunarliði undir nýjum stjóra eins og þegar Moyes tók við á sínum tíma. En ég ætla að fara eftir því sem Giggs sagði og gera ráð fyrir hraða á köntum og reyna að geta upp á líklegu byrjunarliði.

1
De Gea
3
Evra
15
Vidic
4
Jones
12
Smalling
16
Carrick
24
Fletcher
17
Nani
8
Mata
25
Valencia
10
Rooney
Pistlar Stjórinn

Brottrekstur David Moyes

skrifaði þann | 3 ummæli

Bless, bless, strákar!
Bless, bless, strákar!

Nú er rykið aðeins farið að falla til jarðar, en og helstu staðreyndir á bak við brottrekstur David Moyes að koma í ljós, þó að það bíði sjálfsævisagna komandi ára til að allt verði staðfest og rétt. Smá samantekt er því við hæfi.

Eftir tapið gegn Olympiakos í fyrri leiknum sagði ég „Ei meir, Dave“ og stökk á #MoyesOut vagninn. Nú er ljóst að það sama gerðu Glazerar. Eftir þann leik lögðu eigendurnir blessun sína yfir að reka mætti Moyes. Það var bara eitt smáatriði: Hann var með sex ára samning.og fimm ára starfslokagreiðsla er ekkert smá. En þar var ljós við enda ganganna: Það var „break-clause“, eins og það heitir á góðri bankamannaíslensku, í samningnum. Tækist United ekki að komast í Meistaradeildina. Moyes var því á dauðadeild tvo mánuði, á meðan eigendur og stjórn biðu, og vonuðu væntanlega líka, að hann klúðraði tímabilinu endanlega.

Um leið og það var frágengið, með Everton tapinu þá var allt ljóst og þá byrjum að greina frá aðeins óljósari atburðum. Red Issue stendur fast við það að Ryan Giggs hafi vitað strax á sunnudagskvöldið að hann yrði nýr bráðabirgðastjóri United og að það hafi Woodward sjálfur sem lak í mánudagshádeginu að Moyes yrði rekinn.

Manchester United hefur gefið út yfirlýsingu um að félagið líti ekki svo á að uppsögnin hafi verið gerð á óviðeigandi hátt. eftir að Félag framkvæmdastjóra gagnrýndi United formlega fyrir slíkt. Í yfirlýsingu Félags framkvæmdastjóra er auðvitað sérstaklega vitnað til þessara frétta sem settu allt á hliðina á mánudag.  Þá birtu, svo til á sömu sekúndunni, allir helstu blaðamenn og fréttastofur fréttina „Moyes verður rekinn“. Síðan þá hafa menn verið að skjóta aðeins, aðallega þannig að blaðamenn hafa verið að hrósa þessum blaðamennum fyrir næmt fréttanef og góða blaðamennsku, í því samhengi að þetta séu sko engir bloggarar heldur menn að vinna vinnuna sína.

United staðhæfir þó að ákvörðun um brottrekstur hafi ekki verið tekin fyrr en á mánudagskvöld. Eitthvað hefur verið talað um pappírsvinnu í þessu sambandi, þeas að það hafi þurfti fundi og eitthvað fleira til að hægt væri að segja að ákvörðun hafi verið tekin (og þá fyrst mætti lögformlega segja Moyes frá) en lekinn virðist samt svo skelfilega viljandi. Það er ekki möguleiki að þarna hafi Rio Ferdinand verið að leka einhverju sem hann hleraði óvart á göngunum, sá sem lak hlýtur að hafa verið einhver af toppunum, og hver sem ástæðan er þá er þetta ekki sæmandi Manchester United. Meira að segja Sir Alex er sammála og í The Times í morgun er vitnað í hann að honum þyki umgjörð brottrekstrarins slæm.

Ég persónulega tek því fullkomlega undir að United hafi staðið verulega illa að brottrekstrinum. Slúðrið sem gekk á mánudeginum um að þetta hafi verið sett í gang til að fá Moyes til að segja upp til að þurfa ekki að borga upp samninginn virðist þó ekki rétt fyrst það var ekki nema ár sem þurfti að greiða. Hvað um það, þetta var svolítið skítlegt.

Aðeins að öðru. Eftir að Moyes er nú farinn eru sögurnar um stjóratíð hans og endalaus mistök að koma í röðum. Engum þarf að koma á óvart að Renè Meulensteen fannst Moyes vonlaus frá fyrsta fundi þeirra og öll plön Moyes vita gagnslaus. Einnig þau plön hans að taka með Everton mennina í stað þjálfaranna sem fyrir voru. Svo eru fréttirnar um óánægju leikmanna og hvernig þeir fengu að leika lausum hala. Aginn sem Sir Alex hafði haldið upp var horfinn og eins og skólakrakkar sem fá lélegan kennara varð allt viltlaust. Gott dæmi eru lekarnir um liðsuppstillinguna: Þar var ekki Rio á ferð heldur einhver ónefndur ungur leikmaður sem var að leka liðsuppstillingu í Mirror. Ekkert var gert til að siða þann til og ólíkt Sir Alex sem bannaði farsíma í búningsklefanum fyrir leik eftir svipað tilfelli fyrir nokkrum árum, þá gerði Moyes ekkert frekar í þessu.

Eins í leiknum herfilega gegn Olympiakos lenti Moyes saman við fjórða dómarann og heyrðist þá rödd af bekknum „Rekt’ann bara útaf, við verðum betri án hans“. Ef rétt er að það hafi verið Tom Cleverley þá hefur hann svo sem ekki leikið mikið meira á leiktíðinni, nema í smáleikjunum gegn Liverpool og City. Ha?

Þannig að nú vita menn hvað gerist þegar hópur af fótboltastrákum sem eru vanir heraga fá að leika lausum hala undir stjórn manns sem skilar ekki þeim árangri sem gæti fengið þá til að virða hann. Lokaniðurstaðan úr þessu er sú að eigendurnir hafa lofað að vandræðagemsarnir fá að fjúka í sumar. Gerum þá ráð fyrir að Rooney sé ekki vandræðagemsi…

 

Lesefni Slúður Stjórinn

Stjóralausir djöflar lesa

skrifaði þann | 7 ummæli

Nú streyma inn á alnetið greinar um hitt og þetta tengt stjóraleitinni hjá United. Við tókum saman þær helstu:

Traustvekjandi fréttir frá Manchester Evening News. Þó að þjálfarar eins og Klopp og Guardiola hafi sagt að þeir ætli að vera áfram hjá sínum félögum ætli stjórn United ekki að gefast upp á þeim þrátt fyrir það. Jafnframt mun Sir Alex Ferguson taka virkan þátt í því að finna næsta stjóra Manchester United ásamt því að Glazerarnir virðast vera að fara að mæta á svæðið til þess að taka þátt í stjóraleitinni. Er ekki hægt að gera einhvern raunveruleikaþátt úr þessu?

Írski blaðamaðurinn Miguel Delaney veltir fyrir sér 10 spurningum sem stjórn United þarf að spyrja þá knattspyrnustjóra sem hún hyggst ræða við.

Gabriel Marcotti er á því að United þurfi að ráða til starfa Director of Football. Ekki svo galin hugmynd, sérstaklega ef ráðinn verður stjóri sem kemur ekki frá Bretlandseyjum eins og allt lítur út fyrir. Það er ekki jafn sterk hefð fyrir því fyrir utan Bretland að knattspyrnustjórar sjái um leikmannakaup, Sir Alex Ferguson style. Réttur maður sem Director of Football myndi líklega létta starf nýs knattspyrnustjóra til muna.

Samkvæmt fregnum virðist Louis van Gaal vera einn af líklegustu kandídötunum. Írskir miðlar segja frá því að hann vilji fá Roy Keane til liðs við sig sem aðstoðarþjálfari. Það er eiginlega of fyndin tilhugsun og ég hugsa að ef leikmennirnir sjái þessa frétt verði viðbrögðin eitthvað á þessa leið:

gifstache.com_1226_1344481207-2

Þó það væri auðvitað algjör draumur að Ryan Giggs gæti tekið við liðinu til frambúðar er það auðvitað ekki að fara að gerast. Ryan Giggs var þó ekki lengi að taka sína fyrstu ákvörðun sem knattspyrnustjóri Manchester United. Paul Scholes er kominn í þjálfaraliðið! Class of 92′ is in session! Það er afskaplega mikilvægt að meðlimir Class of 92′, gullkynslóðar þessa félags fái hlutverk hjá nýjum stjóra, þeir eru verndarar félagsins.

Giggs var líka ekkert að skafa af því fyrst þegar hann hitti leikmennina eftir að hafa verið skipaður tímabundinn knattspyrnustjóri United:

We will go back to playing like Manchester United.

Spurningin bara hvort hann meinar eins og United áður en Ronaldo fór eða eins og Sir Alex spilaði stundum síðustu árin!

Við hér á síðunni birtum yfirferð yfir helstu kandídata í starfið í gær. Hér eru nokkrar greinar um þá félaga Klopp, Simeone og Louis van Gaal:

vangaalkickLouis van Gaal: Almennt um kappann og svo grein um hvernig fótbolta hann vill að liðin sín spili

Jürgen Klopp: Klopp á það til að reiðast, hér eru 7 reiðustu augnablikin hans og viðtal við kappann þar sem hann útskýrir hugsunina á bak við Dortmund-liðið hans

Diego Simeone: Andy Mitten útskýrir hvernig Diego Simeone hefur náð árangri með Atletico Madrid.

Það er er rétt að enda þetta á fréttum af leikmannakaupum. Eitt af því jákvæða sem stjóratíð David Moyes hafði í för með sér er að allt njósnakerfi United var nútímavædd og fært úr kollunum á Sir Alex Ferguson og yfirnjósnaranum og gert aðgengilegra fyrir þá sem þurfa að nýta sér þetta kerfi. Það er ljóst að frá því í janúar unnu Moyes, þjálfarar, njósnarar og stjórn félagsins hörðum höndum að því að finna og skoða leikmenn fyrir komandi félagsskiptaglugga. Það er möguleiki að nýr stjóri taki ekki til starfa fyrr en eftir HM og því er frábært að búið sé að vinna þessa grunnvinnu.

Árangurinn af þessu virðist vera að koma í ljós því að í gær bárust fregnir um að United telur sig vera búið að tryggja sér hinn 18 ára gamla Luke Shaw, vinstri bakvörð Southampton og einn efnilegasta bakvörðinn í boltanum í dag. Það er ljóst að óháð því hvaða stjóri tekur við að sá maður ætti alltaf að geta nýtt sér þennan leikmann. Önnur skotmörk eru jafnframt að koma í myndina, Edinson Cavani og Cesc Fabregas virðast vera á radarnum fyrir sumarið.

Sjáum hvað setur.

Pistlar Ritstjóraálit Slúður Stjórinn

Hver tekur við af David Moyes?

skrifaði þann | 2 ummæli

Allir helstu miðlar Bretlandseyja hafa birt einhverjar vangaveltur um hver verði næsti knattspyrnustjóri Manchester United. Í gærkvöldi greindu bæði The Guardian og The Telegraph frá því að þrír stjórar væru á listanum: Carlo Ancelotti, Louis van Gaal og Diego Simeone, því miður virðist Jürgen Klopp vera staðráðinn í því að halda áfram með Dortmund, í bili. Þá var jafnframt greint frá því að Sirarnir Alex Ferguson og Bobby Charlton myndu fá að koma að ráðningu nýs stjóra en lokaákvörðunin yrðu alfarið í höndum Ed Woodward, Yfiraðstoðarvaraformanns stjórnar United. Þeir blaðamenn sem birta þessar greinar, Daniel Taylor og Mark Ogden eru einna áreiðanlegastir þegar kemur að United og ljóst að þeir fá þessar upplýsingar beint frá einhverjum aðilum innan klúbbsins.

Hvað sem því líður vonum við einfaldlega að vandað verði til verks þegar kemur að því að finna næsta stjóra, þessi ráðning mun móta framtíð Manchester United um ókomin ár. Við á ritstjórninni höfum tekið saman lista yfir öll helstu nöfnin sem nefnd hafa verið til sögunnar undanfarna daga og þá stjóra sem við myndum vilja sjá taka við stjórnartaumunum á Old Trafford.

Jürgen Klopp

kloppmeisterJürgen Norbert Klopp fæddist í Stuttgart 16.júní 1967. Klopp er fyrrverandi leikmaður og lék allan sinn feril hjá uppeldisfélagi sínu 1.FSV Mainz 05. Hann byrjaði feril sinn sem sóknarmaður og endaði hann sem miðvörður en Klopp er stór og stæðilegur, 1,93 á hæð. Hann lék með Mainz á árunum 1989-2001 og lék 337 leiki og skoraði í þeim 52 mörk.

Þegar Klopp lagði skóna á hilluna var hann ráðinn knattspyrnustjóri Mainz og stjórnaði þeim í 7 ár. Á tíma hans með liðið komst það í fyrsta sinn í sögu félagsins í Bundesliguna og liðið komst í UEFA Cup tímabilið 2005-2006. 2006-2007 tímabilið féllu Klopp og félagar úr Bundesligunni en hann ákvað að halda áfram með liðið. Klopp sagði af sér eftir 2007-2008 tímabilið þegar Mainz mistókst að vinna sér aftur sæti í efstu deild. Klopp stjórnaði liðinu í 270 leikjum.

Í maí 2008 ráku Borussia Dortmund þjálfarann Thomas Doll eftir að liðið hafði endað í 13.sæti. Ráðinn var Jürgen nokkur Klopp sem fékk nú tækifæri á stóra sviðinu enda Dortmund eitt af stóru liðunum í Evrópu. Á fyrsta tímabili sínu með liðið sigruðu Dortmund meistara Bayern München í bikarnum og endaði liðið í 6. sæti og svo 5. sætinu tímabilið eftir það. Það var svo 2010-2011 tímabilið þegar hlutirnir fóru að gerast en það tímabil enduðu Dortmund sem meistarar. Þetta var bara upphafið því næsta tímabil enduðu þeir einnig í 1.sæti með 81 stig sem var stigamet í sögu Bundesligunnar og 47 stigin á seinni hluta tímabilsins var líka met. Liðið sigraði 25 leiki sem jafnaði met Bayern frá 1972-1973 en 28 leikir í röð ósigraðir var met sem þeir átti einir. Til að toppa tímabilið þá unnu Dortmund líka bikarinn með 5-2 sigri á Bayern München. Það var fyrsta (innlenda) tvennan í sögu félagsins.

2012-2013 tímabilið var ekki jafn árangursríkt hjá Klopp og félögum og vilja margir meina að liðið hafi saknað Shinji Kagawa sem hafði verið einn besti leikmaður deildarinnar en hann var eins og margir muna seldur til Manchester United. Klopp sjálfur hefur viðurkennt að ástæðan hafi líka verið sú að liðið lagði mikið kapp á meistaradeildina eftir vonbrigði í keppninni tímabilið á undan. Dortmund lentu þar í riðli með Real Madrid, Manchester City og Ajax í riðli sem fékk hið ljóðræna nafn „dauðariðillinn.“ Dortmund töpuðu ekki leik í riðlinum og mættu einmitt Real Madrid aftur en þá í undanúrslitum keppnarinnar og gerðu sér lítið fyrir og slógu stórveldið út sem var að stærstum hluta vegna glæsilegs 4-1 sigurs á heimavelli þar sem Robert Lewandowski fór á kostum.

Klopp er ekki ókunnugur því hversu óþolandi það er að fá á sig mörk frá Arjen Robben seint í leik því í úrslitaleiknum skoraði hann sigurmark leiksins á 89.mínútu. Það sumar fór annar máttarstólpi úr liðinu hann Mario Götze sem fyrr á árinu hafði verið keyptur til Bayern München sem eru byrjaðir að sanka að sér öllum bestu leikmönnum í Þýskalandi. Klopp skrifaði undir nýjan samning sem gildir til 2018. Okkar maður fékk 10.000 evru sekt eftir að hafa verið rekinn upp í stúku í leik gegn Mönchengladbach. Hann hafði látið dómara leiksins vel heyra það. Dortmund endar líklega í 2.sæti deildarinnar annað árið í röð en þegar þetta er ritað eru enn eftir 3 umferðir. Jürgen Klopp hefur stjórnað Dortmund í 263 leikjum og er enn og aftur að missa einn besta leikmann sinn en Robert Lewandowski fer á frjálsri sölu til? Jú, mikið rétt. Bayern München.

Þegar Jürgen Klopp tók við Dortmund var hann ekki með langan feril að baki eða einhverja titla en það sem hefur einkennt Dortmund lið Jürgen Klopp er það að leikin er falleg knattspyrna. Hraðar og árangursríkar sóknir og sterkur varnarleikur. Það er ljóst að allir meðlimir ritstjórnar þessarar síðu og meirihluti stuðningsmanna United vildu fá hann strax í fyrrasumar og það hefur ekki breyst neitt. Þetta hlýtur að vera sá maður sem á að fá starfið, punktur. Borgið Dortmund það sem þeir vilja og meira til.

X-Klopp á Old Trafford.

Louis van Gaal

LVGAloysius Paulus Maria van Gaal er 62 ára Hollendingur. Af þeim stjórum sem orðaðir eru við United er hann auðvitað með langsamlega lengstan feril sem rétt er að rekja aðeins. Hann hóf framkvæmdastjóraferill sinn hjá Ajax árið 1991 og stýrði félaginu gegnum seinni gullaldarár þess. Undir hans stjórn varð Ajax þrisvar meistari, vann UEFA bikarinn og komst í úrslit í Meistaradeildinni og vann hana loks 1995. Hirtu síðan bæði Ofurbikar Evrópu og heimsbikar félagsliða.

Eftir þetta sigurtímabil þar sem hann var að láta allar þessar tilvonandi stórstjörnur spila dúndurskemmtilegan fótbolta tók hann við Barcelona árið 1997. Tveir titlar komu í hús en honum fannst erfitt að koma sínu leikskipulagi fram gegn ‘Barcelona stílnum,’ samband hans við blaðamenn var stirt og eftir að hafa tapað titlinum til Deportivo vorið 2000 sagði hann upp störfum og tók við hollenska landsliðinu.

Ekki gekk það sem skyldi, hollenska landsliðinu mistókst að komast á HM í fyrsta sinn í 16 ár og Van Gaal hætti. Vorið 2002 var uppi orðrómur að hann myndi taka við United þegar Sir Alex hætti þá um vorið eins og áætlað var. Sir Alex hætti auðvitað ekki og af þessu varð ekki. Í stað þess fór Van Gaal til Barcelona og var þar í tvö önnur ár, og skildi við liðið 3 stigum frá fallsæti.

Þá var komið að smá endurnýjun, næsta stopp AZ Alkmaar og endaði á að skila deildartitli þar 2009. Þá bankaði næsta stórlið uppá, München var næsta stopp. Fyrra ár hans var gott, hann notaði unga leikmenn, skilaði meistaratitli og tapaði Meistaradeildarúrslitum fyrir Inter. En næsta vetur gekk ver, og endaði á að honum var sagt upp störfum.

Þá var bara að taka við Hollandi aftur, og í þetta sinn gekk betur, Holland vann alla leiki utan einn í undankeppni HM og Van Gaal verður með þá á HM í sumar.

Tottenham hefur verið að bera víurnar í Van Gaal í vetur og í þeirra herbúðum finnst mönnum sem Van Gaal hafi aldri gefið svar af því hann hafi verið að bíða eftir akkúrat þessu: Að Moyes verði rekinn og Van Gaal fái tækifærið sem gekk honum úr greipum 2002. Van Gaal leggur mikið upp úr að hafa einn þjálfara með sér úr fyrra þjálfarateymi og nema Giggs klúðri þessu alveg þá verður það Giggs.

Ef horft er á feril Van Gaal standa nokkrir hlutir upp úr. Hann kann að vinna titla, óhræddur við að nota unga leikmenn og hefur haldið tryggð við sitt leikskipulag, sem byggir á sóknarbolta og miklu spili. Allt þetta er eitthvað sem við viljum að stjóri Manchester United hafi. Van Gaal er að auki þekktur fyrir að lenda upp á kant við a.m.k. eina stórstjörnu í hverju liðið (Rivaldo, Luca Toni) og persónlega mætti hann alveg rífast svolítið í Rooney. A.m.k. sýnist manni ólíklegt að Rooney verði fyrirliði, enda leggur Van Gaal mikið uppúr því að fyrirliði hafi persónuleika sem honum líkar við. Óhollendingslegri leikmann en Rooney er erfitt að ímynda sér.

Á hinn bóginn er ljóst að ferill hans er fjarri því laus við galla og jafnvel þó hann væri yngri en 62ja ára sæi ég ekki fyrir mér að hann yrði langtímastjóri með haug af titlum. Van Gaal er þekktur fyrir að nýta 4-3-3 með senter og tveim köntum og leggur áherslu á tíuna, annað hvort sem annan senter eða þriðja miðjumann og svo tvo á miðjunni. Mata og Rooney ættu að berjast um tíuna, en eitt er víst: Robin van Persie mun ekki þurfa að kvarta.

Sem stjóri í 2-3 ár þangað til Klopp eða Guardiola, nú eða einhver annar sem sannar sig næstu ár, er tilbúinn í starfið þá er hann ágætur kostur. Það þarf mann til að rétta af dallinn, það gæti vel verið Van Gaal. Jafnframt gæti það verið áhugaverður kostur að fá Van Gaal inn með einhvern efnilegan stjóra sér við hlið sem gæti lært af honum og tekið við þegar Van Gaal stígur til hliðar.

Stærsti ókosturinn er auðvitað sá að Louis van Gaal er að fara að eyða sumrinu í Brasilíu. Eftir klúður síðasta árs þegar Moyes sat slakur á skrifstofunni í Liverpool þar til samningur rann út og hann mætti á Carrington 1. júlí, alltof seint til að hafa góðan tíma í leikmannakaup, þá væri það hroðalegt ef ekkert gerðist í þeim málum fyrr en eftir HM. Dílar á HM árum verða að klárast fyrir HM, annars hækka góðir leikmenn á sér verðmiðann, og misgóðir leikmenn slá tímabundið í gegn og eru keyptir út á það (Karel Poborský, einhver?). Þannig að ef Van Gaal verður fyrir valinu sem vissulega er líklegt, þá þurfa þau mál að vera í lagi. Fréttir í morgun gefa til kynna að United búist við að Van Gaal geti séð af þrem vikum fyrir HM í vinnu áður en Holland kallar.

Carlo Ancelotti

carlo-ancelottiÖllum að óvörum eru ensku blöðin núna að segja að Carlo Ancelotti sé efstur á óskalista United. Ancelotti er flestum okkar að góðu kunnur, hefur komið víða við sem stjóri og leikmaður. Hann var lykilmaður hins frábæra Milan liðs á seinni hluta níunda áratugarins, var síðan framkvæmdastjóri Reggiana og Parma. Tók við Juventus 2001. Vann þar Intertoto bikarinn en varð tvisvar í öðru sæti í deild og var rekinn í hálfleik í síðasta leik tímabilsins þó enn væri smá möguleiki á titli. En þá um haustið tók hann við Milan og stjórnaði þeim í átta ár. Hann varð ekki ítalskur meistari með þeim nema einu sinni en vann Meistaradeildina tvisvar og ýmislegt annað smálegt.

Hann tók síðan við Chelsea, vann tvöfalt með þeim 2010, lenti síðan í öðru sæti á eftir United 2011 sem var auðvitað næg ástæða til að reka hann. Reyndar hefðu kaupin á Torres verið næg ástæða. Veturinn þar á eftir tók hann svo við Paris Saint-Germain á miðju tímabili og fékk enn að eyða olíupeningum þar sem skilaði fyrst 2. sæti í deild og svo Frakklandstitlinum. En Real Madrid var í símanum og Ancelotti svaraði kallinu í fyrrasumar. Peningarnir þar eru aðallega að láni en það skiptir litlu, Isco, Illaramendi og Bale kostuðu sitt en komu samt. Real er nú þegar búið að vinna spænska bikarinn og á í harðri baráttu um Spánartitilinn við Atlético og Diego Simeone sem við tölum um hér fyrir neðan. Svo spila þeir við Pep Guardiola og Bayern í kvöld í undanúrslitum Meistaradeildarinnar.

chelsea2010
Undir stjórn Ancelotti spilaði Chelsea blússandi sóknarbolta og þegar liðið varð meistari tímabili 2009/2010 varð það fyrsta liðið til þess að skora meira en 100 mörk á einu tímabili í Úrvalsdeildinni.

Sem fyrr segir þá er enska pressan með það á tæru að United viji Ancelotti og ljóst að þeir fá þær upplýsingar beint frá félaginu. Það eru því einhverjir inann félagsins sem telja það mögulegt að Ancelotti sé fáanlegur. Daniel Taylor, blaðamaður Guardian greindi frá því í gær að spænskir blaðamenn gætu alveg séð Ancelotti yfirgefa Real Madrid. Það kæmi þó verulega á óvart ef sú yrði raunin að eftir aðeins eitt ár í Madrid ákveddi hann að söðla um. Eitt er víst, það eru fáir jafn hoknir af reynslu í að eyða peningum og Ancelotti og gæti verið spennandi að sjá hvað hann vill í þeim efnum. Við nefnum engin nöfn en það er nú kannske einhver í Real sem við vildum sjá í rauðu treyjunni…

Ancelotti er ekki nema 54 ára og gæti þess vegna verið í nokkur ár hjá United ef hann vildi og undan spilamennsku liða hans er ekki hægt að kvarta og reynsluleysi er ekki vandamál. Líkurnar á að hann segi já við United hljóta hins vegar að teljast litlar.

Diego Simeone

simeÞað var ekki fyrr en David Moyes var rekinn að ég áttaði mig á því að ég var ekki enn búinn að fyrirgefa Diego Simeone fyrir að hafa lokkað David Beckham útaf með rautt spjald á HM 1998. Beckham var hataðasti maður Bretlandseyja árið eftir og var púaður niður í 90 mínútur á hverjum einasta útivelli á eitt ár, þökk sé Simeone. Beckham fékk þó uppreisn æru þegar Inter kom í heimsókn á Old Trafford í 8 liða úrslitum Meistaradeildarinnar. United rúllaði yfir Mílanó-menn í leiknum og hver einasti leikmaður United-liðsins virtist hafa það sem takmark að taka a.m.k. eina lífshættulega tæklingu á Diego Simeone.

Síðan þá eru liðin 15 ár og þó svo Giggs hafi spilað enn einu sinni í 8 liða úrslitum Meistaradeildarinnar fyrir 3 vikum síðan, þá er hinn virti þjálfari Diego Simeone kominn með lið sitt, Atlético Madrid, í undanúrslit Meistaradeildarinnar og spænski titillinn virðist einnig blasa við þeim. Allt frá því Simeone byrjaði fyrst í þjálfun, árið 2007 með Racing í Argentínu, hefur verið tala um hann sem mikið þjálfara-talent, „hinn nýji Mourinho“ segja þeir sem þekkja til. Hann var fljótur að næla sér í titla í Argentínu og eftir stutt stopp á Ítalíu með Catania var hann ráðinn þjálfari Atlético árið 2011. Á þeim tíma var liðið að klára spænsku deildina í 7-9 sæti og nákvæmlega ekkert í kortunum sem virtist ætla að trufla risana tvo, Real Madrid og Barcelona, í að einoka deildina næstu áratugi. Simeone hefur umturnað Atlético á stuttum tíma, á þremur árum hefur hann unnið UEFA Super Cup tvisvar, spænska bikarinn einu sinni og Evrópudeildina einu sinni. Núna er hann, eins og áður hefur komið fram, 90 mínútum frá úrslitum Meistaradeildarinnar og með 4 stiga forustu á toppi spænsku deildarinnar.

En myndi Simeone henta Manchester United? Það er auðvitað erfitt að segja til um, eitt er ljóst að hann er harður í horn að taka og mikill leiðtogi. Atlético Madrid spilar gríðarlega agaðan varnarleik, eru mjög hreyfanlegir án bolta, og rota andstæðinga sína með blússandi syndisóknum. Þeir hafa sýnt mikinn karakter í vetur, þrátt fyrir að hafa misst sinn besta mann (Falcao) síðasta sumar, eru vinna leiki eitt-tvö núll þrátt fyrir að vera kannski að spila illa. Þó Atlético sé frábært lið þá er Manchester United allnokkrum númerum stærri klúbbur, þannig að það væri töluverð áhætta í að ráða Simeone, en á sama tíma spennandi kostur fótboltalega séð.

Ryan Giggs

giggsyRyan Giggs er núverandi stjóri Manchester United. Að vísu bara tímabundið en hann heldur engu að síður um stjórnartaumana. Hann fær að stýra liðinu í þeim fjórum leikjum sem eftir eru af tímabilinu. Það er eitthvað sérstaklega heillandi við það að Ryan Giggs taki við liðinu. Tilhugsunin um að leikjahæsti og sigursælasti leikmaður liðsins frá upphafi stýri liðinu er einfaldlega frábær og ótrúlega rómantískt, hið fullkomna framhald á hinum fullkomna ferli.

Sannleikurinn er hinsvegar sá að Ryan Giggs er líklega engan veginn tilbúinn til þess að taka við Manchester United. Menn hafa líkt honum við Pep Guardiola en í raun eiga þessir menn fátt sameiginlegt nema það að þeir eru báðir goðsagnir hjá sínum liðum sem leikmenn. Guardiola sannaði sig hjá B-liði Barcelona áður en hann tók stóra skrefið upp. Giggs hefur enga reynslu sem knattspyrnustjóri og takmarkaða reynslu af því að vera þjálfari. Ef liðið spilar vel í næstu fjóru leikjum munum við heyra frá einhverjum að hann eigi að fá tækifæri til þess að spreyta sig en það verður lítið að marka þessa fjóra leiki. Það verður engin pressa á Giggs og leikmönnum liðsins og að engu að keppa. Það er afskaplega lítið sem Giggs mun geta gert í þessum fjórum leikjum sem eftir eru og engin leið til þess að dæma hæfni hans sem knattspyrnustjóra að þeim liðnum.

Það er mun vænlegri kostur að Ryan Giggs haldi áfram í þjálfaraliðinu, taki jafnvel að sér aðstoðarþjálfarastöðu þar sem hann getur axlað ábyrgð og lært fræðin af einhverjum reynslumeiri stjóra. Ef Louis van Gaal verður fyrir valinu myndi ég segja að Ryan Giggs við hlið hans væri góður kostur. Van Gaal myndi aldrei stýra liðinu lengi og hann og Giggs gætu undirbúið framtíðina í sameiningu með það að markmiði að Giggs tæki svo við af van Gaal þegar sá síðarnefndi myndi hætta. Í öllu falli á Giggs að halda áfram hjá félaginu, að minnsta kosti sem þjálfari.

Aðrir stjórar sem koma til greina

José Mourinho

Þið vitið ALLT um José sem við vitum. Er einhver raunverulegur séns á því að hann myndi taka við? Hann er til í það, enginn vafi á því, en tímasetningin er hörmuleg fyrir hann, Að auki má efast um að United nenni að díla við hann en samt er nafn hans sterkt inni akkúrat núna.

Carlos Queiroz

United-menn þekkja Carlos Queiroz ágætlega. Hann vann frábært starf við hlið Sir Alex Ferguson þegar hann var aðstoðarþjálfari liðsins. Queiroz ber að miklu leyti ábyrgð á því liði sem United var með á árunum 2006-2008, líklega skemmtilegasta liði sem United hefur átt í seinni tíð. Hann þekkir félagið út og inn og líklegt að leikmennirnir treysti honum. Það væri hægt að leita til hans til þess að rétta við skútuna í 1-2 tímabil áður en að leitað yrði á önnur mið. Sem knattspyrnustjóri hefur Queiroz aðallega náð árangri með unglingalið. Hann hefur þó tekið að sér tvo stór störf. Hann þjálfaði Real Madrid tímabilið 2003-2004 og stýrði landsliði Portúgal á HM 2010. Það verður seint sagt að hann hafi náð einhverjum blússandi árangri með þessi lið og stýrði hvorugu liðinu í langan tíma. Hann mun stýra liði Íran á HM í sumar. Hann verður að teljast ólíklegur kostur í stöðuna, einfaldlega vegna þess að það eru betri menn en hann á lausu.

Roberto Martinez

Hvernig væri bara að sækja næsta stjóra til Everton fyrst það gekk svona vel síðast? Martinez hefur unnið frábært starf með Everton á tímabilinu. Hann lætur liðin sín spila blússandi sóknarbolta og virðist vera alveg afskaplega fær taktísklega séð. Hann vann FA-bikarinn með Wigan og er það með t.d. með stærri bikara á ferilskránni en Moyes getur státað af. Það er ótrúlegt afrek ef honum tekst að koma Everton í Meistaradeildina enda liðið að keppa í umtalsvert lægri deild fjárhagslega en hin hefðbundnu topplið. Líklega er tímaspursmál hvenær hann fer til stærra liðs og spurning hvort að hann væri til í að stökkva á tækifærið til þess að stjórna liði þar sem til er nóg af peningum og væntingarnar í takti við þær væntingar sem hann virðist gera til sjálfs síns og leikmanna sinna?

Antonio Conte

Líkt og Klopp, Martinez og Frank de Boer er Conte einn af þessum þjálfurum sem eru leiðandi í taktískri þróun í fótboltanum í dag. Conte hefur stýrt Juventus-liðinu af mikilli festu heimafyrir. Frá því að hann tók við liðinu árið 2011 hefur liðið sigrað Serie A í tvígang og er á góðri leið með að sigla þriðja titlinum í land. Hann hefur þó ekki ná að setja mark sitt á Evrópu. Hann er mjög taktískur þjálfari sem leggur áherslu á sóknarleik. Hann lætur þó lið sín spila taktík sem sést varla á Englandi. Juventus stillir oft upp í 3-5-2 og snýst leikur liðsins um að stýra miðjunni. Conte þyrfti líklega sinn tíma til þess að gera hugmyndum sínar veruleika hjá United.

Frank de Boer

Frank de Boer hefur smám saman unnið sig upp hjá Ajax, uppeldisfélagi sínu. Hann hóf störf sem þjálfari árið 2007 eftir að hann lagði skónna á hilluna. Hann vann einnig með hollenska landsliðinu á HM í Suður-Afríku. Eftir að Martin Jol var látinn fara frá Ajax árið 2010 tók hann við liðinu og stýrði því til sigurs í hollensku deildinni á sínu fyrsta tímabili. Hann lét ekki þar við sitja og hefur hann stýrt liði Ajax til sigur í deildinni síðustu þrjú tímabil og er á góðri leið með að vinna fjórða titilinn í röð á þessu tímabili. Hann hefur verið orðaður við stærri lið, Liverpool hafði áhuga á honum árið 2012 og líklega er það aðeins tímaspursmál þangað til hann fer til stærra liðs.

De Boer spilar mjög Ajax-legan bolta sem er byggður á þeim prinsippum sem Johan Cruyff og Louis van Gaal lögðu áherslu á þegar þeir stýrðu Ajax. Einnar-snertingar sóknarbolti þar sem allt snýst um að menn hreyfi sig án bolta og að menn spili fyrir liðsheildina. De Boer þykir einnig hafa staðið sig vel í að byggja upp liðið ár eftir ár enda Ajax eitt af þessum liðum sem missir leikmenn sína ansi oft til stærri liða. Hann er líklega að komast á endastöð með Ajax-liðið enda aðeins hægt að ná vissum árangri með það lið. Það er spurning hvort að hann væri tilbúinn til þess að starfa við hlið Louis van Gaal sem aðstoðarmaður hans til nokkurra ára með það að markmiði að hann tæki við félaginu. Það er margt vitlausara, ekki satt? Það er þó kannski erfitt fyrir knattspyrnustjóra að sætta sig við að vera allt í einu aðstoðarmaður einhvers annars.

Pistlar Ritstjóraálit Stjórinn Uppgjör

Ári seinna

skrifaði þann | 21 ummæli

Það er ótrúlegt að fyrir nákvæmlega einu ári síðan hafi leikmenn og stuðningsmenn Manchester United verið að fagna meistaratitli nr. 20 eftir glæsilegan sigur á Aston Villa. Allt var eins og það átti að vera. United á toppnum, langt á undan öllum hinum liðunum. Besta liðið, besti stjórinn. Business as usual.

Það er ótrúlegt að ári seinna standi varla steinn yfir steini hjá þessu sama knattspyrnufélagi. Liðið er í 7. sæti og aumasta titilvörn í sögu Englands síðan Manchester City féll tímabilið eftir að hafa unnið titilinn er óumflýjanleg. Við erum stödd í skemmtilegasta hluta tímabilsins, þar sem úrslitin eru að ráðast og öllum keppnum að ljúka. Við erum stödd á heimavelli Manchester United. En Manchester United er ekki í baráttu á neinum vígstöðum og ef félagið myndi sleppa því að senda til leiks í þessum fjórum leikjum myndi það ekki skipta einu einasta máli. Leikirnir sem skipta máli tengjast Manchester United ekki á neinn hátt. Ótrúlegt.

Maðurinn sem er talinn ábyrgur fyrir þessu hruni var sagt upp störfum í dag. David Moyes er farinn. Eftir að fregnir þess efnis bárust í gær um að hann væri á förum barst tístið sem stuðningsmenn liðsins hafa beðið eftir snemma í morgun:

Stuttri stjóratíð David Moyes er lokið, enda komst hún aldrei á flug.

Stuðningur okkar

Ég og ritstjórn þessarar síðu studdum Moyes lengst af. Við gerðum okkur grein fyrir því að þrátt fyrir að liðið hefði unnið deildina á þægilegan hátt tímabilið áður væri ýmislegt sem betur mætti fara í leikmannahóp liðsins. Við gerðum okkur grein fyrir því að Sir Alex Ferguson skilaði ekki af sér jafn sterku búi og hann hélt að hann væri að gera. Við gerðum okkur grein fyrir því að það hefði verið erfitt fyrir nánast hvaða knattspyrnustjóra sem er að taka við af mesta knattspyrnustjóra allra tíma. Um þetta skrifaði ég langa grein fyrr í vetur þar sem ég fór yfir afhverju Moyes beið eitthvað það erfiðasta starf sem nokkur knattspyrnustjóri hefur þurft að glíma við.

Við gerðum okkur grein fyrir því að engar líkur væru á því að David Moyes myndi ná árangri um leið. Það var alveg ljóst frá byrjun að hann hefði enga reynslu sem myndu gagnast honum í að stýra einum af heimsins stærstu íþróttafélögum þar sem allar væntingar eru þúsundfaldar á við það sem hann upplifði hjá Everton. Manchester United er þó félag sem hefur í gegnum tíðina verið byggt á því að gefa mönnum tækifæri á að axla ábyrgðina sem fylgir því að vera í Manchester United, sumum höndla það og ná gríðarlegum árangri, aðrir ekki og verða lítið annað en neðanmálsgrein í sögu félagsins.

Stuðningur okkar við David Moyes var byggður á þeirri von að hann myndi verða einn þeirra sem myndi axla ábyrgðina. Gary Neville, einn af þeim sem veit einna mest um hvað þetta félag snýst sagði í byrjun tímabilsins að Manchester United myndi breyta Moyes, Moyes ætti engan séns á því að breyta Manchester United. Í þessu lá stuðningur okkar við Moyes. Hann var falinn í því að David Moyes myndi vaxa í starfinu og að hann myndi einmitt ekki láta liðið spila þann tröllabolta sem skóp árangur hans hjá Everton. Við vorum alltaf að bíða eftir því að það myndi gerast og á köflum leit þetta ágætlega út. Stundum glitti í eitthvað sem lofaði góðu fyrir framhaldið eins og leikurinn gegn Leverkusen á útivelli í Meistaradeildinni. En þegar liðið tók eitt skref fram á við, tók það tvö skref aftur á bak. Í kjölfar sigursins á Leverkusen komu tvö töp gegn Everton og Newcastle. Svona gekk þetta allt tímabilið og það varð alltaf erfiðara og erfiðara að réttlæta áframhaldandi veru David Moyes á knattspyrnustjórastólnum.

Fallið

Eftir áramót varð það svo endanlega ljóst að David Moyes réði engan veginn við það að stýra Manchester United. Svona var staðan þegar tímabilið var hálfnað, þann 29. desember sl.

Screen Shot 2014-04-22 at 14.39.22

Liðið var tveimur stigum frá núverandi toppliði Liverpool og 8 stigum frá Arsenal í fyrsta sæti. Þetta er kannski ekki besta staða í heiminum en algjörlega ljóst að liðið var að minnsta kosti í bullandi séns á því að ná einu af meistaradeildarsætunum.

Gengi liðsins í deildinni á seinni helming tímabilsins er það sem gerði út um stjóratíð David Moyes. Eftir því sem vorið nálgaðist varð alltaf deginum ljósara að Moyes var að synda í djúpu lauginni með enga hjálparkúta nálægt sér. Fyrir mér og líklega mörgum af þeim sem voru tilbúnir til þess að gefa Moyes tíma var leikurinn á heimavelli gegn Fulham vatnaskilin. Þar kristallaðist hugmyndaleysi í sóknarleik liðsins og segja má að þarna á þessum vetrardegi í Manchester hafi liðið orðið gjaldþrota undir stjórn David Moyes.

Moyes náði að blása einhverju lífi í liðið með ágætum sigrum á minni spámönnum eins og WBA, Crystal Palace og svona en jarðarförin fór endanlega fram fyrir og eftir leikina gegn Liverpool og Manchester City. Fyrir leikinn gegn Liverpool viðurkenndi David Moyes að Liverpool væri sigurstranglegra liðið í leiknum og eftir leikinn gegn City sagði Moyes að City væri að spila á því stigi sem United væri að reyna að komast á. Tvær heilagar syndir og eitthvað sem enginn knattspyrnustjóri Manchester United má nokkru sinni viðurkenna eða láta út út sér.

Á þessum tímapunkti voru flestir búnir að missa trúnna á því að David Moyes myndi nokkurn tímann ná einhverjum árangri með þetta lið og ef fregnir eru réttar virðast eigendurnir hafa gert það líka. Eftir tapið var svo endanlega ljóst að liðið myndi ekki spila í Meistaradeildinni í fyrsta skipti síðan 1993. Þar með virðist klásúla í samningi Moyes um að hægt væri að rifta samningnum hans hafa virkjast og því fór sem fór. Stjóratíð David Moyes er því runnin sitt skeið á enda og þungu fargi virðist vera létt af stuðningsmönnum Manchester United.

Það sem David Moyes virðist ekki hafa áttað sig á er að Manchester United er miklu meira en knattspyrnufélag, þetta er stofnun, heimsfrægt íþróttafélag sem hefur ákveðin gildi. Hér á að spila leiftrandi sóknarbolta þar sem hið óvænta ræður ríkjum, helst með uppöldum leikmönnum þar sem allt snýst um sókn og ekkert annað en sókn. Manchester United er félag þar sem gerð er krafa um að liðið sé ávallt í fremstu röð á öllum sviðum.

David Moyes náði þessu aldrei, fregnir frá æfingarsvæðinu segja að liðið hafi nánast ekkert æft sóknarleik í allan vetur, öll áherslan hafi verið á varnarleik. Sóknarleikur liðsins undir stjórn Moyes var alveg einstaklega einhæfur, út á kant, gefa fyrir. Rinse and repeat. Þegar kom að stórleikjum snerist allt um að vonandi myndi liðið reyna að sigra leikinn eða að liðið myndi reyna að gera andstæðingunum erfitt fyrir. David Moyes er einfaldlega neikvæður þjálfari sem virðist ekki hafa skilið það hugarfar sem þarf til þess að stjórna stórliði á heimsmælikvarða. Svo sem ekkert skrýtið, maðurinn hafði auðvitað enga reynslu á því sviði. Þessi tækni hafði virkað ágætlega hjá Everton en með fullri virðingu fyrir Everton, þá er það ekki Manchester United.

Svona fótbolti eins og Moyes lét United-liðið spila virkar ágætlega hjá minni liðum sem hafa það að markmiði að vera um miðja deild en í dag er ómögulegt að byggja upp meistaralið með þessum hætti. Árangur í deildinni næst með því að spila hugmyndaríka knattspyrnu sem byggist á sóknarleik. Hvergi er þetta augljósara en þegar gengi Everton og Liverpool á tímabilinu er skoðað. Everton er að mestu leyti byggt upp á sömu leikmönnum og Moyes hafði stýrt áður en spilar nú með allt öðruvísi áherslum. Það hefur tekið Roberto Martinez eitt tímabil að ná fleiri stigum en Moyes náði nokkurntíman.

David Moyes er ágætur knattspyrnustjóri og er örugglega fínasti náungi. Því miður fyrir hann snýst knattspyrnan hans um að verjast andstæðingum, í staðinn fyrir að sækja á þá. Þannig knattspyrna er fín fyrir minni lið þar sem ekki er gerð krafa um titil á hverju einasta tímabili. Það er glerþak á þessari tegund af knattspyrnu, hún virkar ekki hjá liðunum sem sækjast eftir titilinum, og þessvegna var David Moyes líklega aldrei að fara að ná árangri með Manchester United. Því miður.

Framtíðin

Ryan Giggs tekur við liðinu tímabundið og er það frábær leið fyrir hann að ljúka því sem er líklega hans síðasta tímabil sem leikmaður liðsins. Hann og Moyes voru á andstæðum pólum hvað varðar leikskipulag og æfingar og fregnir herma að Giggs hafi verið á útleið. Hann fær nú tækifæri til þess að sigla skútunni heim áður en að nýr stjóri verður valinn. Nú munu hefjast miklar vangaveltur. Nú í morgun voru Guardiola og Mourinho orðaðir við starfið auk þess sem að í kaupbæti komu fregnir um að United ætli sér að kaupa Messi. Líklega hefur einhver farið fram úr sér í þessum efnum og ólíklegt að einhverjir þessa muni spila á Old Trafford næsta tímabil. Líklegt er að stjórnin taki sér einhvern tíma í þetta og íhugi alla kosti. Klopp virðist hafa sagt nei en það þýðir ekki endilega að hann sé þar með útilokaður, ég myndi veðja á að menn væru að reyna að sannfæra hann, þrátt fyrir að hann hafi lýst yfir tryggð sinni við Dortmund í morgun. Louis van Gaal virðist þó vera líklegastur og það kæmi mér ekki á óvart ef að Hollendingurinn fengi það verkefni að rétta skipið við.393869_heroa

Hvaða stjóra sem tekur við bíður þó erfitt verkefni, þó kannski ekki alveg jafn erfitt og það sem beið Moyes. Nýr stjóri þarf að taka á leikmannahóp sem virðist hafa tekið sér meiri völd um hvað gerist innan félagsins en nokkurn tíman hefur þekkst hjá United. Ef nýr stjóri er ekki nógu kraftmikill til þess að ná stjórn á leikmönnum liðsins mun sagan bara endurtaka sig.

Við erum kannski laus við David Moyes, en það er ekki þar með sagt að allt sé orðið gott á ný og félagið geti sett titilinn aftur í áskrift. Það er ýmislegt að hjá félaginu sem þarf að laga. Vonandi ber stjórn félagsins gæfu til þess að ráða stjóra sem hefur reynslu og ræður við verkefnið. Stjórnin klikkaði á því síðast, ekki bregðast okkur aftur. Við viljum að titill nr. 21 sé væntanlegur í bráð.