Rauðu djöflarnir

Síðasti leikur Manchester United í Meistardeild Evrópu a.m.k. næsta árið var leikinn á Allianz Arena í kvöld

Varamenn: Lindegaard, Büttner, Ferdinand, Giggs, Januzaj, Young, Hernandez

Bayern leit svona út

Frá fyrstu mínútu sóttu Bayern án afláts. Alaba og Lahm sem að nafninu til voru bakverðir oru komnir á miðjuna til að byggja upp sóknir og halda pressunni á United. Skyndisóknir voru málið fyrir United og á 8. mínútu átti Rooney að gera betur en reyndi að komast í skotstöðu frekar að gefa á Kagawa óvaldaðan. Þetta gaf forsmekkinn að því sem síðar varð, Rooney var hreinlega ekki nógu góður í kvöld. Hvort sem það var meiðslum að kenna eða því að 300 þúsund punda vikulaunin eru honum of þung byrði.

Þegar þessi spenningur var úti voru United fljótlega aftur orðnir 10 inni í eigin teig og Bayern þurfti að reyna hvað þeir gátu til að opna handboltavörnina eins og Robben kallaði hana réttilega eftir siðasta leik. Það gekk þó ekkert mjög vel hjá þeim og næsta skyndisókn United endaði með boltanum í netinu en bara af þvi að varnarlina Bayern hafði skilið Kagawa og Valencia snyrtilega eftir fyrir innan og rangstaðan var augljós.

Þannig gekk þetta áfram. Vörn United var verulega þétt og þó varist væri á mörgum mönnum voru Jones, Smalling og Evra sérlega góðir og voru að hirða maður á mann þegar við átti. Bayern menn náðu helst að taka langskot en þau voru yfirleitt langt uppí stúku. Ekki fyrr en Toni Kroos átti skot á 37. mínútu að eitthvað þeirra var innan við fimm metra frá marki.

Dómarinn var slakur og Bayern í hag. Vidic fékk gult fyrir að vinna skalla og Philip Lahm straujaði Evra rétt utan við teig án þess að dæmt væri svo dæmi séu tekin. Rétt á eftir sleppti hann reyndar Valencia eftir klaufalegt brot rétt utan teigs þannig að það var smá sárabót.

Besta færi Bayern í hálfleiknum var síðan undir lokin þegar Robben fékk að sóla inn í teig og ‘kötta inn’ eins og hann elskar, en skotið fór í bakið á Phil Jones og í horn

Seinni hálfleikurinn byrjaði á tveim hornum United og var það smá fordæmi, United var meira með boltann en í fyrri hálfleik og lá ekki eins á þeim. Kagawa átti fyrsta skotið á rammann í leiknum, Neuer þurfti að vera á tánum að verja skot hans af svona 25 metra færi. Ágæt tilraun þar og United hélt boltanum nokkuð vel áfram. Örskömmu síðar kom sending upp á Valencia. Hann kom upp að endamörkum gaf fyrir, boltinn fór gegnum teiginn og rétt utan teigs hinu megin þar sem Patrice Evra kom á fljúgandi ferð og hamraði boltanum í vinkilinn. 1-0 fyrir United og von vaknaði

En við vorum ekki lengi í Paradís því það tók Bayern 22 sekúndur frá því þeir hófu leik aftur þangað til boltinn lá í neti United. Sókn upp vinstra megin, boltinn inn á teiginn og Mario Mandžukić stakk sér fram fyrir Evra af öllum mönnum og skoraði með skalla.

Eftir þetta opnaðist leikurinn verulega. Rooney var á auðum sjó í teignum en gaufaði og átti að lokum slakt skot. Strax í næstu sókn Bayern þurfti svo De Gea að verja vel. Bayern ákvað að þétta aðeins hjá sér og sendi Rafinha inná fyrir Götze til að færa Lahm framar. Svo komst Bayern yfir á skelfilega klaufalegan hátt. Ribéry var uppi við endamörk vinstra megin, gaf yfir á hinn kantinn þar sem Robben var einn í teignum, Evra á móti honum. Sending Robben fór milli fóta Evra og beint á Müller á markteignum sem hafði komist fram fyrir Vidic og slakt innanfótarskot hans fór inn án þess að De Gea næði að bregðast við.

Á 74. mínútu kom svo fyrsta skipting United, Chicharito kom inn á fyrir Fletcher, enda þurftu United, sem fyrr, mark sem myndi þá nægja til að senda liðið áfram. United átti eina þokkalega sókn en síðan kom Arjen Robben, fékk að spila þvert á vörnina og spila upp á skotið með vinstri eins og hann hefur gert í 99,99% marka sinna á ferlinum. Boltinn lá i netinu og draumurinn var úti. Það var hreinlega viðbjóðslegt að sjá vörnina leyfa þetta. Evra átti að gera miklu miklu betur sem og Vidić

Næstu mínútur voru frekar daprar en svo kom Januzaj inná fyrir Welbeck. Hann fékk litlu breytt og þó United sæktu síðustu mínúturnar kom lítið úr þeim. Rooney var mjög dapur og meiðslin greinilega að hrjá hann. Óskiljanlegt að hann hafi ekki verið tekinn útaf, en Moyes hafði augljóslega ekki kjark í það.

Bayern hélt boltanum síðustu mínútu leiksins og fögnuðu að lokum verðskulduðum sigri.

Áður en þessar viðureignir fóru fram hefðu fáir verið hissa þó að Bayern hefði rústað báðum leikjum þannig að væntingarnar voru litilar. Þess vegna fögnuðum við 1-1 jafntefli á heimavelli og tókum vel við stöðunni 0-0 í hálfleik. Þá hafði Bayern átt tvö skot á rammann í þrem hálfleikjum. En ef við horfum blákalt á þetta þá er niðurstaðan einföld: Það nægði ekki að spila gríðarstífan varnarleik gegn einu besta liði álfunnar. Liðið náði, ef frá eru skildar fyrstu mínútur seinni hálfleiksins í kvöld, aldrei að halda boltanum og spila á milli sín en gekkst í þess stað vel upp í hlutverki lítilmagnans.

Það er hlutverk sem við getum ekki sætt okkur við. Nú taka við nokkrir auðveldir deildarleikir og Everton og þá verðum við að sjá liðið reyna að spila almennilegan fótbolta þegar pressan er ekki á þeim.

Það er svo annarra að ákveða það hvort David Moyes fær að spreyta sig næsta tímabil og reyna þá að standa undir nafni Manchester United og þora kannske að segja eitthvað grimmara fyrir leiki en

We’ll hopefully maybe do something tonight