Rauðu djöflarnir

Enska úrvalsdeildin

Manchester United 4:1 Aston Villa

skrifaði þann | 14 ummæli

mata gegn villaÍ dag sáum við United spila gegn Aston Villa á Old Trafford. United vann leikinn með fjórum mörkum gegn einu með mörkum frá Rooney(2), Mata og Chicharito.

Fyrir leik var fólk smeykt fyrir því að leiknum yrði seinkað vegna umferðartafa nálægt Old Trafford. En sem betur kom ekki til þess og leikurinn hófst á eðlilegum tíma. Moyes ákvað að stilla liðinu upp á þennan máta:

De Gea

Rafael Jones Vidic Buttner

Fletcher Fellaini

Young  Mata  Kagawa

Rooney

og á bekknum voru þeir Amos, Giggs, Chicharito, Carrick, Nani, Welbeck, Januzaj. Með öðrum orðum, sama miðja og framlína sem hann notaði í tvö núll sigri United gegn West Ham fyrir viku síðan. Stuttu síðar sá maður þessa tölfræði á Twitter:

 

Fyrri hálfleikurinn byrjaði illa fyrir okkar menn. Ekkert spil að ganga upp, sendingar sífellt að klikka, vörðumst ágætlega en lítið spennandi að gerast. Þetta er til dæmis mjög lýsandi fyrir fyrstu tíu mínúturnar:

 

Svo til að kóróna þessa vondu byrjun þá brýtur Rafael klaufalega af sér á tólftu mínútu , rétt fyrir utan vítateig United og fær gult spjald. Aukaspyrnuna tekur Westmann sem á þessa flottu spyrnu sem De Gea rétt nær að snerta og verja inn í markið. Staðan núll eitt eftir þrettán mínútur. (vídeó).

Eins og við sáum allmikið á síðustu leiktíð, þá þurfti United að lenda undir til þess að vakna og byrja að berjast. Á tuttugustu mínútu fær Kagawa boltann vinstra megin við vítateig Villa, kemur með þessa gullfallegu fyrirgjöf á Wayne Rooney, sem af einhverjum óskiljanlegum ástæðum var aleinn og yfirgefinn inn í vítateig Villa og skallaði hann boltann hnitmiðað inn í mark Villa (Vídeó). Staðan eitt eitt eftir tuttugu mínútur og fyrsta mark Rooney á Old Trafford síðan í október 2013.

Eftir þetta lullaðist leikurinn áfram án þess í raun að eitthvað markvert hafi gerst. Eitt var þó áberandi, Kagawa var að spila sinn besta leik í langan tíma og var svo sannarlega að sýna Moyes að hann á skilið fleiri tækifæri með liðinu. Virkilega sprækur.

Á 44′ mínútu á Kagawa frábæra sendingu á Mata inn í teig sem í kjölfarið var felldur klaufalega af Bacuna. Rooney var maðurinn til að taka spyrnuna og verður að segjast að þetta var alveg frábær vítaspyrna hjá drengnum sem hefur klúðrað allnokkrum fyrir liðið. Algjörlega óverjandi fyrir Guzan. (Vídeó)

Í hálfleik ákvað Moyes að taka Rafael af velli og setja Carrick inn á. Ekki veit ég hvort Rafael hafi verið að glíma við einhver meiðsl en hann var slappur í dag eins og því miður oft á þessu tímabili. Jones tók stöðu Rafael í hægri bak og Carrick stöðu Jones.

Villa byrjaði seinni hálfleik betur og á 49′ mín kemst Benteke í algjört dauðafæri en nær einhvernveginn að hitta ekki boltan þegar hann var kominn einn á móti De Gea. Átta mínútum síðar átti United ágætis sókn sem endaði í miklum darraðadansi inn í teig og boltinn rataði til Mata sem kom honum snyrtilega inn í mark Villa. Fyrsta mark Mata fyrir United og staðan orðin 3-1 fyrir United. (Vídeó)

Eins og kom fram á fréttamannafundinum í gær þá er Moyes búinn að vera hvíla Januzaj síðustu vikur. Drengurinn víst dauðþreyttur og ekki vanur þessu álagi. Það var því gaman að sjá hann koma inn á fyrir Kagawa á 68′ mínútu og spila nákvæmlega eins og áður, óhræddur að taka menn á og ógna. Verður svo gaman að sjá drenginn spila fyrir liðið næstu ár. Stuttu síðar átti Rooney svo dauðafæri sem Guzan varði vel og þá ákvað Moyes að taka hann af velli á 75′ mínútu og setja Chicharito inn í staðinn. Flott frammistaða hjá Rooney í dag og tvö mörk, meira svoleiðis gegn Bayern.

Fyrir leikinn var Rooney með þessa tölfræði:

 

Tvö mörk í viðbót í dag sýna okkur að hann er langmikilvægasti leikmaður liðsins hvað varðar markaskorun á þessu tímabili. Þótt maður hafi gríðarlega gaman af því að sjá leikmann United vera skora mörg mörk og standa sig vel þá er þetta skelfileg tölfræði fyrir liðið. Það á enginn leikmaður að vera með 50% markahlutfall liðsins á einu tímabili (nema hann heitir Ronaldo eða Messi og skori yfir 50 mörk á tímabili).

Á 91′ mínútu á Januzaj alveg frábært hlaup inn í vítateig Aston Villa og sendir þessa laglegu sendingu á Chicharito sem kemur boltanum í netið (Vídeó). Frábært mark en skemmdi smá fyrir mér að sjá Chicharito fagna. Maður fékk þá tilfinningu að hann væri í raun að kveðja liðið (svipað og maður sá þegar Fabio skoraði sitt síðasta mark fyrir United). Tveimur mínútum síðar flautaði dómari leiksins til leiksloka og 4-1 sigur niðurstaðan.

Flott þrjú stig í dag, United tveimur stigum á eftir Tottenham sem á leik til góða og þremur stigum á eftir Everton sem á tvo leiki til góða. Næst sjáum við liðið mæta Bayern Munich (Sem mætir Hoffenheim í dag ef einhver hefur áhuga) á Old Trafford næsta þriðjudag í meistaradeildinni. sá leikur verður svakalegur… úff…

Enska úrvalsdeildin

United tekur á móti Aston Villa

skrifaði þann | 8 ummæli

Manchester United - Aston VillaÉg ætla ekki að nefna niðurlæginguna sem við upplifðum í vikunni. Ég ætla ekki að nefna hluti eins og að byrjunarlið United kostaði £184m á móti £161m hjá City. Ætla ekki að nefna það að United hefur núna tapað tíu leikjum á þessu tímabili og stefnir í lægsta stigafjölda í meira en 22 ár. Ég ætla ekki að nefna það að Fellaini gæti farið í bann fyrir að hrækja á Zabaleta.

Ef þið viljið sökkva ykkur inn í leiðindi þessarar viku þá getið þið til dæmi lesið þetta hér… eða þetta… kannski þetta… jafnvel þetta hér… eða grátið yfir þessu… máski þetta… ef til vill þetta… þetta hér… grátið enn meira yfir þessu… eða þetta… eða horft á þetta… eða liðið illa yfir þessari mynd… eða hlustað á Neville… eða farið að hágráta yfir þessu… eða bara sleppt því?

Nó sörrí bob! Í dag ætlum við að setja slíkar umræður í frystinn. Eða nei, leyfið mér að segja eitt áður en við frystum þetta. Þessi *BEEEEP* fáni og þessi *BEEEEEEEP* flugvél. Ég veit að flest ef ekki allir eru komnir með nóg af hr.Moyes núna og verður sumarið verður eflaust pakkfullt af ömurlegum umræðum um kallinn. En þessi flugvél og þessi fáni er eitthvað kjánalegasta sem ég hef séð í langan tíma! Ef þetta væri einhver annar klúbbur þá væri svo gaman hjá okkur núna að gera grín að þessum stuðningsmönnum. En nei, í þetta skiptið erum við aðhlátursefnið.

Sorrí, þetta er ekkert nema kjánahrollur og er einfaldlega sorglegt að sjá. Enda er fleira fólk en ég að furða sig á þessu. Djöfull erum við illa stödd þegar í hverri viku er gert grín að okkur og það er enn verra þegar grínið snýst að okkur stuðningsmönnum liðsins.

En jæja, lok lok og læs. Þessi umræða komin í frystinn og bíður betri daga (eða verri?). Kemur mér bara í vont skap. Nú hlustar maður bara á það sem MUFC Ticket Exchange skrifaði á twitter:

 

Upphitunin

Sjáum nú til, Aston Villa mætir til leiks á Old Trafford á morgun, sem þeir hafa gert sjötíu og átta sinnum. Í þeim viðureignum hafa þeir unnið níu sinnum, gert sautján jafntefli og tapað fimmtíu og tvisvar sinnum. United hefur semsagt unnið tvo þriðju af öllum viðureignum sínum gegn Villa á Old Trafford. Nú vonum við einfaldlega að við náum að auka þá tölfræði okkur í vil á morgun. United hefur tapað einungis einu sinni í síðustu þrjátíu og sex deildarleikjum gegn Villa þannig að tölfræðin er okkur í hag (Ekki að hún hafi hjálpað okkur í vetur, en við tölum ekki um það í dag).

Aston Villa situr þessa stundina í tólfta sæti, sautján stigum á eftir United en með leik til góða. Í síðustu sex deildarleikjum hafa þeir unnið tvo, gert eitt jafntefli, tapað þremur og fengið sjö stig. Hinsvegar hafa þeir í síðustu sex útileikjum unnið einu sinni, gert tvö jafntefli, tapað þrisvar og fengið fimm stig. Á sama tíma hefur United í síðustu sex deildarleikjum unnið þrjá, gert eitt jafntefli, tapað tveimur og fengið tíu stig. Því miður hefur liðið spilað alveg hræðilega á Old Trafford á þessu tímabili, einungis fengið tuttug og eitt stig af fjörtíu og fimm mögulegum. Hull City er með betri árangur á heimavelli en United (en við tölum ekki um það í dag).

Hjá Aston villa eru Weimann, El Ahmadi, Kozák, Okore og N’Zogbia á meiðslalista en hjá United vitum við að Van Persie mun alls ekki spila og litlar líkur eru á að Vidic, Evans og Smalling mæti til leiks.

Með þá vitneskju að leiðarljósi ætla ég að spá byrjunarliðinu svona:

De Gea

Rafael Ferdinand Jones Evra

Valencia Carrick Fellaini Welbeck

Mata

Rooney

Ég veit þið viljið hakka mig fyrir þetta byrjunarlið en í alvöru, hvernig haldið þið að hann stilli liðinu upp? Chicharito og Kagawa fá aldrei sjensa, Januzaj er búinn að vera dauðþreyttur og því hvíldur, verðum helst að nota Ferdinand, o.s.frv. Frekar ömurleg staða hjá okkur þessa stundina með leikmenn (en við tölum ekki um það í dag).

Sjö leikir eftir að þessum meðtöldum:

  • 29. mars – Aston Villa (H)
  • 5. apríl – Newcastle (Ú)
  • 20. apríl – Everton (Ú)
  • 26. apríl – Norwich (H)
  • 3. maí – Sunderland (H)
  • 6. maí – Hull (H)
  • 11. maí – Southampton (Ú)

sem þýðir að United hefur möguleika á að krækja sér í tuttugu og eitt stig gegn liðum sem það á í raun alltaf að sigra (Everton skiljanlega erfiðasti leikurinn af þessu sjö). Nú vonar maður bara að liðið komist á smá gott ról hérna í lokin svo við förum ekki hágrátandi inn í sumarið. Og þá getum við farið að tala um hlutina!

Moyes á blaðamannafundi

 

 

Leikurinn hefst kl 12:45 á morgun, laugardag.

Enska úrvalsdeildin

Manchester United 0:3 Manchester City

skrifaði þann | 24 ummæli

Svona voru byrjunarliðin:

De Gea

Rafael Rio Jones Evra

Mata Carrick Cleverley Fellaini Welbeck

Rooney

Bekkur: Lindegaard, Büttner, Fletcher, Kagawa, Young, Valencia, Hernandez

Hart

Zabaleta Kompany Demichelis Clichy

Fernardinho Touré

Navas Silva Nasri

Dzeko

Leikurinn byrjaði eins illa og hægt er að ímynda sér. Leikurinn var ekki mínútu gamall þegar Manchester City var komið yfir. Vörnin hjá United var sofandi, Nasri spólaði sig í gegn, skaut í stöng og frákastið endaði hjá Edin Dzeko sem lagði boltann í autt markið. 0-1 fyrir City. Hræðileg byrjun.

United-menn héldu áfram þessum sofandahætti eftir markið. Sendingar voru lélegar, City-liðið pressaði hátt uppi og stressaðir United-leikmenn misstu boltann oft á hættulegum stöðum. City-menn komust 2-3 í álitleg færi vegna þess en voru ýmist klaufar eða David De Gea með sinn súkkulaðiúlnlið hélt okkur inn í leiknum. Á þessum leikkafla hefði City hæglega geta gert út um þennan leik.

Um miðjan hálfleik breyttist þetta þó. Okkar menn þorðu að halda boltanum aðeins og komust smám saman inn í leikinn. Mata, Rooney og Welbeck sáu um sóknarleikinn ásamt Fellaini. Þeir sköpuðu sér nokkur ágæt færi, fyrst fékk Fellaini boltann í fínni stöðu en hann náði ekki koma nægilega góðu skoti á markið. Juan Mata komst svo í mjög fínt færi í miðjum teignum en hann skóflaði boltanum yfir. United-menn stjórnuðu ferðinni það sem eftir lifði fyrri hálfleiks, City-menn ógnuðu þó en Michael Carrick braut upp sóknartilraunir City. Við lok fyrri hálfleiks leit þetta ekki jafn illa út og eftir fyrstu 10 mínútur leiksins. Maður vonaði því að United-menn myndu halda uppteknum hætti í seinni hálfleik.

Sú von var fljót að sigla í burtu. City-menn byrjuðu hálfleikinn betur og uppskáru mark eftir rúmar 10 mínútur. City-menn fengu horn, öll hornin þeirra hingað til höfðu farið á nærstöng og það breyttist ekki í þetta skiptið. Rio Ferdinand slökkti á sjálfum sér og hleypti Dzeko fram úr sér sem skoraði sitt annað mark í leiknum. Eftir seinna markið var þetta nánast búið. United reyndu af litlum mætti af sækja en sóknarleikurinn var ómarkviss og nánast tilviljunarkenndur. City-menn voru þéttir í vörn og drógu í sig alla þá pressu sem United reyndi að setja á þá. Moyes reyndi að hrista aðeins upp í þessu. Kagawa kom inn á fyrir Cleverley í hálfleik, Valencia kom inn á fyrir Fellaini og Hernandez kom inn á fyrir Welbeck. Yaya Touré nuddaði svo salti í sárin á 90. mínútu með því að skora þriðja mark leiksins. 0-3.

Þetta var ekki nóg góð frammistaða og endurspeglar bara í raun muninn á þessum liðum í dag. City-liðið er stútfullt af gæðum og refsaði grimmilega fyrir þau mistök sem okkar leikmenn gerðu í leiknum. Eins og svo oft áður var sóknarleikur United ómarkviss og tilviljunarkenndur. Það er eins og það vanti skipulag í sóknarleikinn og það er einhvernveginn alveg ljóst að Moyes leggur höfuðáherslu á varnarleikinn. Það hefur bersýnilega sést í vetur en það hefur ekki skilað neinu. Liðið spilar ekki góða vörn og áherslan á vörnina bitnar bara á sóknarleiknum.

Ef það var ekki augljóst fyrir þennan leik þá ættu allir að sjá það í kvöld að Rio Ferdinand er löngu búinn að vera sem fótboltamaður á þessu leveli. Hann var hrikalega dapur í þessum leik og það skiptir öllu fyrir David Moyes að finna miðvarðaparið sitt sem fyrst. Ég varð fyrir vonbrigðum með Juan Mata í kvöld, hann átti ekki góðan leik, átti lélegar sendingar og virtist vera hræddur við að taka áhættu í þessum leik. Kannski var það uppleggið og það er reyndar ekki eins og hann hafi haft mikið af möguleikum með sér í sóknarlínunni. Rooney lagði sig fram í leiknum líkt og Welbeck en það skilaði ekki miklu. Þetta lið þarf á mikilli endurbyggingu að halda, á fleiri vígstöðum en inni á vellinum, það er augljóst eftir þennan leik.

Eitt skref áfram, tvo aftur á bak. Það er þema þessa tímabils.

Enska úrvalsdeildin

Manchester-slagurinn

skrifaði þann | 11 ummæli

Framundan er slagurinn um Manchester-borg. Á morgun mætast sigurvegarar siðustu tveggja tímabila Úrvalsdeildarinnar á Old Trafford. Það er auðvitað frekar óvenjulegt að svona leikur sé settur á þriðjudag en upphaflega átti hann að fara fram 1. mars en finna þurfti nýja dagsetningu eftir að City komst í úrslitaleik deildarbikarsins. Undir venjulegum kringumstæðum væri þetta lykilleikur í titilbaráttunni en það er ekkert venjulegt við þetta tímabil fyrir okkur sem halda með Manchester United.

Smá sagnfræði

Síðan að Sheikh Mansour og Sameinuðu arabísku furstadæmin keyptu City árið og liðið fór að blanda sér í toppbaráttuna af einhverju viti hafa liðin skipt stigunum úr þessum viðureignum nokkuð bróðurlega á milli sín eins og sést á þessari mynd:

Bæði lið hafa unnið 2 leiki, tapað 2 og svo slæddist inn eitt jafntefli árið 2010 þegar Mancini hélt að hann gæti unnið titilinn með því að leggja rútunni fyrir framan markið sitt í stórleikjunum og vinna bara öll hin liðin. Ágætis plan en til þess að það virki þarftu auðvitað að ná úrslitum gegn öllum hinum liðunum. Eins og sést hefur City unnið tvo síðustu leiki á Old Trafford sem er betri árangur en liði náði frá árunum 1976-2011 en á því árabili vann City aðeins einn leik gegn United á Old Trafford. Money talks, bullshit walks og það er ekki lengur hægt að hlæja að litla liðinu í Manchester sem flakkaði á milli deilda á meðan titlarnir rúlluðu inn til okkar. Það sést einna best á peningunum sem eigendur City hafa dælt í þetta City-lið. Ég þreytist aldrei á að benda á þennan samanburð hérna að neðan:

Áhugamenn jafnt sem atvinnumenn (og aðrir!) um hvernig saga þessara liða samtvinnast geta svo kíkt á þennan lauflétta pistil sem ég tók saman fyrir leik liðanna í desember 2012

En hvað um það.

Möguleikar United í deildinni

Áður en að við kíkjum á leikinn á morgun skulum við aðeins pæla í stöðunni í deildinni nú þegar 8-9 umferðir eru eftir. Hverjir eru möguleikar United í deildinni?

Þó að tölfræðilega sé ennþá möguleiki á að United endurheimti titilinn er það auðvitað ekki að fara að gerast. Fjórða sætið er fjarlægur draumur og til þess að hægt sé að ná því er ekki óraunhæft að ætla að United þurfi að vinna alla þá 8 leiki sem eftir eru. Þessir 8 leikir eru gegn eftirfarandi liðum:

  • 25. mars – Manchester City (H)
  • 29. mars – Aston Villa (H)
  • 5. apríl – Newcastle (Ú)
  • 20. apríl – Everton (Ú)
  • 26. apríl – Norwich (H)
  • 3. maí – Sunderland (H)
  • 6. maí – Hull (H)
  • 11. maí – Southampton (Ú)

Af þessum leikjum ættu leikirnir gegn City og Everton að teljast strembnir, í öðrum leikjum er eðlilegt að gera kröfu um þrjú stig. Inn í þetta fléttast auðvitað Meistaradeildin. United spilar 1. og 9. apríl gegn Bayern München og ef við skyldum sigra þá viðureign og fara áfram eru undanúrslitin spiluð í lok apríl. Ef við gefum okkur að United nái að sigra alla þessa leiki endum við með 75 stig sem er auðvitað skammarleg stigatala fyrir félag eins og Manchester United. Stigin sem töpuðust á lokamínútunum gegn Southampton og Cardiff hefðu komið sér vel um þetta leyti. En hvað hafa liðin sem hafa endað í 4. sæti í gegnum tíðina endað með mörg stig? Tímabilið 2001/2002 var fyrsta tímabilið þar sem fjögur efstu lið deildarinnar fengu þáttökurétt í Meistaradeildinni á næsta tímabili.

 

Síðan enska deildin fékk fjögur sæti í Meistaradeildinni hefur það aðeins gerst einu sinni að lið í 4. sæti endar með meira en 75 stig, Liverpool, meistari meta sem skipta engu máli, náði þeim árangri árið 2008 með 76 stig. Við erum ansi hinsvegar ansi langt á eftir liðinu í 4. sæti. Þar situr Arsenal með sín 62 stig, aðeins 6 stigum frá meðaltals-stigafjölda 4. sætisins síðustu árin. Það er ansi krefjandi verkefni að ætla að vinna upp 11 stig í 8 leikjum. Til þess þarf Arsenal að tapa 4 leikjum af þessum 8 sem eftir eru á meðan við vinnum alla okkar leiki.

Við erum þó ekki bara að keppa við Arsenal heldur eru bæði Tottenham og Everton fyrir ofan okkur. Tottenham með 56 stig og 7 leiki eftir, Everton með 54 stig og 9 leiki eftir. Tottenham á eftir að spila við Liverpool en aðrir leikir eru þeim í hag, á pappírnum að minnsta kosti. Everton á leik til góða á en eiga hinsvegar eftir að spila við okkur, City og Arsenal.

Við eigum fína möguleika á 5. sætinu en við þurfum að treysta á stórkostlegt klúður hjá Arsenal til þess að stela 4. sætinu af þeim á meðan við megum helst ekki misstíga okkur á neinn hátt. Það er spurning hvernig stórtapið gegn Chelsea um helgina fer í menn og það er alltaf hægt að treysta á einhverskonar Arsenal-klúður á vormánuðunum. Þeir eru mjög líklega búnir að klúðra möguleikum sínum á titlinum, við skulum vona að þeir brotni endanlega saman á endasprettinum.

Leikurinn á morgun

City sýndi muninn á þessum liðum í fyrri viðureign liðanna í september. Sá leikur fór 4-1 fyrir City þar sem þeir sýndu alhliða frammistöðu á móti virkilega dapri frammistöðu okkar manna þar sem Wayne Rooney virtist vera sá eini sem hafði áhuga á leiknum. Þessi leikur var táknrænn fyrir tímabil þessara liða. City hefur spilað gríðarlega vel og skorað ógrynni af mörkum á meðan við erum í sífelldum eltingarleik við andstæðinginn. City er í ágætu færi á að vinna titilinn, liðið er 6 stigum á eftir toppliði Chelsea með 3 leiki til góða og er leikurinn á morgun einn af þeim. Þeir munu því væntanlega mæta mjög ákveðnir til leiks í kjölfar 5-0 sigurs á botnliði Fulham. City-liðinu hefur verið óstöðvandi á heimavelli en hefur hikstað nokkrum sinnum á útivelli á tímabilinu. Af þeim liðum sem eru í efstu fimm sætunum eru þeir með slakasta árangurinn á útivelli. Það kom mér reyndar mjög á óvart að liðið sem er með besta árangurinn á útivelli á tímabilinu heitir Manchester United.

Það hjálpar þó ekki á morgun enda spilað á Old Trafford. United-liðið hefur verið dapurt á heimavelli á tímabilinu og lið eins og Norwich og Hull hafa tekið fleiri stig á heimavelli í vetur. Það er auðvitað langt frá því að vera boðlegt og það er ekki mögulegt að ná árangri í þessari deild án þess að vera með sterkan heimavöll.

Í síðasta leik brenndi Moyes sig illlega á því að láta United-miðjuna vera undirmannaða gegn þessum vélum sem eru á miðjunni hjá City. Yaya Touré, Fernardinho og David Silva munu einfaldlega leika sér að miðjunni hjá United ef þeir munu mæta tveimur miðjumönnum. Þriggja manna miðja á morgun er því lykilatriði. Fellaini hefur allur verið að koma til að undanförnu og getur vonandi þjarmað að Yaya Touré á morgun. Fletcher og Carrick verða væntanlega við hliðina á honum þó að gott hefði verið að nýta sér Phil Jones á miðjunni í þessum leik en það er ekki í boði vegna meiðsla varnarmannana hjá okkur.

Smalling og Evans eru meiddir, Vidic er í banni og Rio er tæpur en ætti þó að ná leiknum. Rafael og Evra verða í bakverðinum og ætti annar þeirra að gegna mikilvægu hlutverki í sóknarleiknum vegna þess að Samir Nasri dregur sig alltaf mikið inn á miðju vallarins. Það ætti að opna pláss fyrir bakvörðin þeim megin eins og við sáum í leik City og Chelsea fyrr á tímabilinu þar sem Branislav Ivanovic var með áætlunarferðir upp og niður hægri vænginn og uppskar mark.

Wayne Rooney, Juan Mata og Kagawa náðu vel saman í fjarveru Robin van Persie gegn West Ham um helgina og þó að Ashley Young sé ekki uppáhald stuðningsmannana stóð hann sig vel í að teygja á varnarlínunni með því að halda sig alveg úti á hægri vængnum á meðan tríóið leitaði meira inná við. Moyes þarf að fórna einum af þessum stöðum fyrir auka mann á miðjuna en við munum væntanlega sjá annan kantmanninn draga sig inn á miðjuna á meðan hinn reynir að teygja á spilinu. Það er algjört lykilatriði að Danny Welbeck spili þennan leik og verði annar þessara kantmanna. Hann var frábær gegn Olympiakos, hann leggur sig alltaf 100% fram, hann er aðdáandi United frá blautu barnsbeini og ætti því að elska það að spila gegn City. Hann er gríðarlega hraður, góður að koma boltanum frá sér og sífellt að reyna að hlaupa á bakvið varnarmennina. Ég vil að hann verði fyrsti maður á blað það sem eftir er tímabilsins Wayne Rooney mun leiða sóknina og ætli Juan Mata verði ekki settur á kantinn, þó að skynsami kosturinn væri ef til vill Antonio Valencia. Ég myndi giska á að liðið verði svona á morgun:

De Gea

Rafael Rio Jones Evra

Mata Fletcher Carrick Fellaini Welbeck

Rooney

Pellegrini staðfesti á blaðamannafundi áðan að Aguero og Nastasic væru meiddir en aðrir leikmenn liðsins væru klárir í leikinn. Gegn Fulham stillti Manuel Pellegrini upp eftirfarandi liði:

Hart

Zabaleta Lescott Demichelis Kolarov

Fernardinho Yaya Touré

Milner Silva Nasri

Negredo

Kompany var í banni, Jesus Navas var hvíldur og má gera fastlega ráð fyrir því að þeir komi inn ásamt því að  mögulega muni Clichy koma í vinstri bakvörðinn. Demichelis heldur eflaust sæti sínu enda staðið sig vel í síðustu tveimur deildarleikjum en hann er þó óumdeilanlega veikasti hlekkurinn í þessu City-liði ásamt vinstri bakvarðarstöðunni og þar liggja tækifærin hjá United. Það þýðir þó lítið að blása til sóknar gegn þessu City-liði sem getur refsað grimmt. Þó að viljum sjá Moyes fara að taka smá sénsa  verður að spila þessa leiki varfærnislega. Það þýðir þó ekki að liðið eigi bara að liggja í vörn heldur þarf að hugsa um hvernig eigi að skora mörkin. Við sáum það undir stjórn Ferguson að þegar hann lagði liðið upp til að spila varnarsinnaðan bolta, eins og í leikjunum gegn Arsenal og oft gegn City var samt sem áður alveg á hreinu hvernig liðið ætlaði sér að skora og það var augljóslega vel æft á æfingarsvæðinu. Það má ekki bara leggja liðið upp til þess að hindra það að það fái á sig mark, lið eins og Manchester United verður alltaf að huga að sóknarleiknum.

Stuðningsmenn United eru að öskra á það að Moyes fari að sýna eitthvað af viti með þetta United-lið og það eru tvo risapróf framundan, leikurinn gegn City og viðureignin við Bayern. Við eigum mjög veika von á 4. sætinu en það þýðir samt ekki að ekki eigi að gera harða atlögu að því. David Moyes segist eiga margt ógert í þessu starfi og ætli sér að vera í því í langan tíma. Nú er tíminn, hann er að berjast fyrir framtíð sinni hjá félaginu og ef það virkar ekki eins og spark í rassinn á honum á hann ekkert erindi áfram á Old Trafford.

Það eru 24 stig í pottinum. Við viljum fá þrjú af þeim á morgun, takk fyrir.

Moyes á blaðamannafundi

Leikurinn hefst klukkan 19.45.

Enska úrvalsdeildin

West Ham 0:2 Manchester Utd

skrifaði þann | 15 ummæli

Þessi leikur kom undirrituðum talsvert á óvart. Það leit ekki vel út í byrjun þegar liðin voru kynnt. Michael Carrick og Marouane Fellaini áttu að skiptast á að hjálpa til í v örninni eða eins og einhver sagði þá áttu þeir að mynda falska fimmu. Svo var Alexander Büttner mættur í bakvörðinn þar sem bæði var verið að hvíla Evra og gefa Büttner leikæfingu ef sky skyldi að hann þyrfti að leika gegn Bayern. Það var samt margt spennandi við byrjunarliðið líka. Wayne Rooney var fremstur og Juan Mata í holunni og hafði Shinji Kagawa og Ashley Young til aðstoðar. Síðan var meistarinn Darren Fletcher kominn í byrjunarliðið eftir smá hlé.

Þessi leikur byrjaði fjörlega en West Ham fengu einn á kjammann á 7.mínútu leiksins þegar Wayne Rooney vinnur boltann á miðjunni, sér að Adrian markvörður West Ham er of framarlega og lætur vaða og skorar þetta glæsilega mark. Það voru margir að bera þetta mark við það sem David Beckham skoraði á sínum tíma gegn Wimbledon en hann var einmitt á þessum leik ásamt syni sínum og virtust þeir skemmta sér konunglega yfir þessu.

Eftir markið virtust United fá enn meira sjálfstraust og á 33. mínútu átti Ashley Young fína fyrirgjöf í teiginn sem fór í West Ham varnarmann og til Wayne Rooney sem skoraði auðveldlega og leikurinn í raun búinn. Staðan í hálfleik var West Ham 0:2 Manchester United.

West Ham byrjaði seinni hálfleikinn af krafti og voru staðráðnir í að minnka muninn sem fyrst en sem betur fer tókst það ekki. United átti kafla í seinni hálfleik þar sem boltinn flæddi á milli manna og opnaði vörn heimamanna nokkrum sinnum en því miður án þess að skila fleiri mörkum. Lokastaðan 0:2.

Eins svekkjandi og það er að missa van Persie aftur í meiðsli þá hlýtur það að vera umhugsunarefni fyrir David Moyes að liðið spilar betur og með meira tempói þegar van Persie er ekki með. Þegar Alex Ferguson lenti í svipuðum málum með Dimitar Berbatov þá vitum við hvernig það fór.

Maður leiksins: að sjálfsögðu þessi gaur:

Svona leit liðið út í dag

De Gea

Rafael Jones Carrick Büttner

Fletcher Fellaini

Young  Mata  Kagawa

Rooney

Bekkurinn: Lindegaard, Evra, Nani, Cleverley, Januzaj, Hernandez, Welbeck.