Rauðu djöflarnir

Enska úrvalsdeildin

Stoke City 2:1 Manchester United

skrifaði þann | 41 ummæli

Það ömurlegasta sem ég veit um er að þurfa skrifa leikskýrslu fyrir leiki þar sem ég öskra af reiði á imbakassan í leikslok. Leikskýrslan í dag fellur í þann flokk.

Byrjum á staðreyndunum. Stoke sigraði United með tveimur mörkum gegn einu. Charlie Adam skoraði bæði mörk Stoke í leiknum (á 38′ og 52′ mín) en Van Persie fyrir okkar menn (á 47′ mín). Moyes var ekkert að tefla neinu miðlungsliði gegn Stoke. Það má alveg halda því fram að þetta hafi nú einfaldlega verið eitt af betri byrjunarliðum United í langan tíma, Rooney, Van Persie og Mata í framlínunni og Carrick óvænt mættur á miðjuna. Svona leit liðsuppstillingin hjá okkar mönnum í dag:

De Gea

Jones Smalling Evans Evra

Carrick Cleverley

Young Rooney Mata

Van Persie

Á bekknum voru svo: Lindegaard, Rafael, Hernandez, Welbeck, Fletcher, Valencia, Januzaj.

Rafael látinn vera á bekknum vegna fæðingargalla, þ.e.a.s hann er ekki nógu hávaxinn drengurinn og fékk því Jones það hlutverk að spila sem hægri bak. Á Britannia vellinum var leiðindavindur sem hafði nokkur áhrif á spilamennsku liðanna í dag. Eins og flest lið sem hafa mætt United á þessu tímabili, þá var dagsskipunin að pressa leikmenn United frá fyrstu mínútu. Af hverju gera lið það? Því það svínvirkar! Leikmenn United hafa í vetur átt í stökustu vandræðum með að refsa liðum sem spila þannig gegn þeim en ólíkt fyrri leikjum þá gerðu leikmenn United slíkt hið sama. Um leið og Stoke náði boltanum þá voru leikmenn United byrjaðir að hlaupa í átt að þeim í von um að ná boltanum aftur. Þetta var ánægjulegt að sjá og fékk maður þá tilfinningu að þetta yrði góður dagur fyrir okkar menn.

Byrjuðu þá ósköpin. Eftir tíu mínútur þurfti Moyes að gera breytingu þegar Evans byrjaði að haltra. Inn á kom Rafael í hægri bakvarðarstöðuna og fór Phil Jones færði sig yfir í miðvörðinn. Fyrsta færi United kom á 14. mínútu þegar Rooney fékk góða sendingu inn í teig frá Evra en skot hans vel framhjá. Fyrri hálfleikur var frekar jafn en United þarf að sjálfsögðu alltaf að byrja á því að fá á sig mark. Smalling fær dæmt á sig afskaplega vægt brot langt fyrir utan vítateig United. Charlie Adams þrumar í átt að markinu og lendir boltinn klaufalega í Carrick og gjörbreytir um stefnu þannig að hann lekur framhjá De Gea í markinu. Eitt núll fyrir Stoke eftir 38 mínútur. Hlutirnir voru svo ekkert að fara skána því stuttu síðar lendir Jones í samstuði við leikmann Stoke sem gaf honum heilahristing og þurfti að bera drenginn út af vellinum í kjölfarið. Inn á kom Welbeck, sem átti einn sinn allra slakasta leik fyrir United á þessu tímabili, sem þýddi það að Carrick þurfti að spila sem miðvörður út leikinn.

Í hálfleik voru United einu marki undir, búnir að gera tvær skiptingar og tveir leikmenn komnir á meiðslalistann. Fólk getur haft hvaða skoðun sem er á David Moyes en það verður ekki tekið af honum að þetta er alveg skelfileg óheppni. Þrátt fyrir þetta hélt maður í trúna því við höfðum alveg með nógu gott lið til að snúa þessu við í seinni hálfleik.

Seinni hálfleikur hófst og það tók United ekki meira en 90 sekúndur til að skora. Boltinn datt til Mata fyrir utan vítateig Stoke og kemur hann með þessa snyrtilegu sendingu á Van Persie sem klárar færið eins og sönnum framherja sæmir. Tveir leikir og tvær stoðsendingar fyrir Mata og sjöunda mark Van Persie í röð gegn Stoke. Staðan eitt eitt og nánast allur seinni hálfleikur eftir. Það hefur eitthvað hinsvegar verið eitthvað hrikalega gott í matnum hans Charlie Adam um morguninn því á 51 mínútu á hann alveg stórkostlegt skot, eftir skelfilega varnarvinnu hjá United, sem var algjörlega óverjandi fyrir De Gea markinu. Tvö eitt fyrir Stoke.

Moyes ákvað að taka Van Persie út af á 79. mín og setti Chicharito inn. United sótti vel að marki Stoke síðustu 10-15 mínútur leiksins en vörn Stoke stóð sig vel. Besta færið féll til Cleverley stuttu fyrir leikslok en eins og svo oft áður náði hann að þruma boltanum langt yfir markið.

Eins og gengur og gerist þá voru nokkur umdeild atvik í leiknum sem mætti alveg spyrja sig hvort dómarinn hefði ekki mátt gera betur. Þau sem ég tók eftir voru t.d.
– Brotið á Van Persie inn í vítateig Stoke í fyrri hálfleik
– Brotið á Mata inn í vítateig Stoke í seinni hálfleik
– Gula spjaldið sem Walters fékk fyrir brot á Smalling í seinni hálfleik

Staðreyndin er samt sú að United spilaði ekki nógu vel og Stoke vinnur deildarleik gegn United í fyrsta skipti síðan 1984.

Lokaorð

Ef Liverpool vinnur sinn leik á morgun gegn West Brom, sem verður nú að teljast ansi líklegt, þá verður alveg skelfilega erfitt fyrir United að ná fjórða sætinu. Liðið verður að fara spila betur og fara vinna sína leiki ef það á að eiga einhver möguleika á meistaradeildarsæti. Svo á sama tíma og við töpum gegn Stoke nær Everton þremur stigum gegn Villa og Spurs gera jafntefli gegn Hull sem þýðir að nú eru fjögur stig í sjötta sætið og fimm í það fimmta. Svo á sama tíma spilar Zaha fyrir Cardiff og nær tveimur stoðsendingum. Það er jafnmargar stoðsendingar og Antonio Valencia, Nani og Ashley Young hafa náð í sínum fjörtíu og einum leik á þessu tímabili.

Það er alveg einstaklega þreytandi að sjá liðið vera sífellt að koma með þessar löngu sendingar fram á völlinn (Já, ég er að horfa á þig Smalling) sem skila nákvæmlega engu. Ég hreinlega nenni ekki að fara yfir tölfræði leiksins en þetta voru nokkrir tugi sendinga sem leikmenn Stoke elska að fá og taka á móti. Þú vinnur ekki Stoke með þessari taktík því þetta er akkurat það sem þeir gera virkilega vel og vilja sjá frá andstæðingum sínum.

Maður er byrjaður að hljóma eins og biluð plata en að sjálfsögðu þarf að gefa Moyes meiri tíma en eitt tímabil. Það þarf sérstaklega að minna sig á þetta þegar það gengur illa því það er rosalega auðvelt að segjast vera þolinmóður stuðningsmaður þegar liðinu gengur vel. United er ekki að fara reka manninn og er ég persónulega ánægður með það því ég vil ekki sjá okkar lið fara breytast í sirkus eins og sést svo oft hjá Real Madrid, Man City og Chelsea. Áður en einhver fer að tala um hversu góð lið það eru, þá bendi ég á fílinn í herberginu, eigendur liðanna. Frekar þigg ég erfiða tíma sem gefur Moyes tækifæri til að byggja upp sitt lið og koma okkur á sigurbraut. Þrátt fyrir að styðja manninn 100% þá er hann ekki hafinn yfir gagnrýni. Takið eftir orðinu: „gagnrýni“, það er ekki þetta leiðinda drull sem maður sér allt of oft. Stundum fær maður þá tilfinningu að fólk hreinlega vilji sjá Moyes mistakast því hann var ekki sá sem það vildi sjá taka við Ferguson.

https://twitter.com/ProudRed85/status/429687761407201281

Eftir þennan leik þarf samt að spyrja Moyes af hverju í ósköpunum hann setur Welbeck inn fyrir Jones í stað t.d. Fletcher? Af hverju lætur hann Chicharito inn fyrir Van Persie þegar liðið er ekki að skapa neitt af viti, Chicharito skorar bara þegar United nær að skapa færi án þess að skora en ekki þegar liðinu vantar aðstoð við að skapa færin. Januzaj hefði að mínu mati verið skynsamlegri kostur ef það á að taka Van Persie út. Af hverju erum við sífellt að koma með háar sendingar langt fram á völlinn gegn Stoke? Af hverjum höldum við áfram að senda háar sendingar fram á við eftir að það er löngu orðið ljóst að það sé ekki virka?

Átta dagar í næsta leik sem spilaður verður á Old Trafford gegn Fulham. Eftir það ferðumst við til London og heimsækjum Arsenal á Emirates. Nú vonar maður að þessir átta dagar verði nýttir til hins ítrasta og að eitthvað stórkostlegt fari að gerast í spilamennsku liðsins.

Maður getur vonað.

Enska úrvalsdeildin

United kíkir í heimsókn til Stoke

skrifaði þann | 3 ummæli

Stoke City - Manchester UnitedTuttugasta og fjórða umferð ensku úrvalsdeildarinnar verður spiluð um helgina og vonum við til eiga jafn fína umferð og þá síðustu. Í síðasta leik fengum við í fyrsta skipti að sjá nýja leikmanninn, Juan Mata, spila með United er United sigraði Cardiff á Old Trafford með tveimur mörkum gegn engu. Á sama tíma fengu liðin næstu tveimur sætum fyrir ofan United algjöra rasskellingu í sínum leikjum, Spurs tapaði 1-5 gegn Man City og Everton 4-0 gegn Liverpool, sem hleypti United þremur stigum nær þeim og munar nú einungis þremur stigum á milli United og Spurs í fimmta sæti deildarinnar.

En betur má ef duga skal því stefnan á þessu tímabili er að ná meistaradeildarsæti. Ekkert flóknara en það. Staðreyndin er sú að þetta tímabil þurfum við í hverri umferð vona að United sigri sína leiki og komist á almennilegt skrið á meðan Everton, Spurs og Liverpool misstígi sig. Erkifjendurnir í Liverpool verða okkur án efa erfiðastir viðureignar en munurinn er einungis sex stig og það er aldeilis nóg eftir, þar á meðal leikur á milli liðanna á Old Trafford 16. mars. Skemmtilegt að hugsa til þess að tímabilið þar sem Liverpool er að spila stórkostlega og United ömurlega, þá er munurinn á liðunum ekki meiri en sex stig.

Þó að við vitum að það þurfi að stokka upp í mannskapnum þá erum við samt með feikinógu gott lið til að ná í meistaradeildarsæti. Moyes er búinn að gefa tóninn, loksins byrjaður að hljóma eins og knattspyrnustjóri Manchester United þegar hann sagði að þeir leikmenn sem ekki leggja sig 100% fram og spila eins og leikmenn United, verður skipt út fyrir leikmenn sem eru tilbúnir til þess. Ekkert bull frá Moyes sem er vel tímabært og þetta ætti að vera fín vítamínsprauta fyrir drengina. Á sama tíma hjálpar það svo óneitanlega að tveir af okkar bestu mönnum, Rooney og Van Persie, séu komnir til baka ásamt Fellaini sem er svo sannarlega betri leikmaður en hann hefur sýnt á þessu tímabili. Nú þarf bara að fara varlega og passa að þeir haldist heilir.

Liðið sem við mætum á morgun, Stoke City, situr í sextánda sæti deildarinnar með 22 stig og eru búnir eiga erfitt uppdráttar í síðustu leikjum. Fjórir tapleikir í röð, og aðeins fengið eitt stig úr síðustu sex deildarleikjum. Það þarf ekki mikið að kynna þetta lið fyrir lesendum síðunnar. Það vita allir hvernig fótbolta Stoke City spilar, það hefur enginn gaman því að horfa á Stoke spila fótbolta. En þrátt fyrir hörmulegt gengi í síðustu leikjum þá hefur þeim gengið ágætlega á Brittania vellinum, í síðustu sex heimaleikjum hafa þeir tekið ellefu stig (þrír sigrar, tvö jafntefli og eitt tap) og eru fá lið sem njóta þess að heimsækja Stoke á Brittania. Síðasti heimaleikur þeirra var mikill markaleikur og voru átta mörk voru skoruð í leik þar sem Liverpool sigraði Stoke með fimm mörkum gegn þremur. Vonandi nær United að nýta sér veika vörn Stoke manna án þess að hleypa þeim of mikið yfir á sinn vallarhelming.

Það hefur mikið verið rætt og skrifað um veikleika United á þessu tímabili, miðjan, vörnin, sóknin, þjálfarinn, o.s.frv. Eitt af því sem hefur farið mest í taugarnar á mér er hversu illa liðið nær að halda boltanum sín á milli (undantekning að maður sjái United með þá tölfræði sér í vil) og hversu staðnað liðið getur verið sóknarlega. Mér þykir ólíklegt að United muni á morgun allt í einu ná að halda boltanum meira en vanalega en ég hef grun um að United nái að skapa sér fleiri og betri færi en í undanförnum leikjum. Það skiptir engu máli hvaða lið um ræðir, það myndi hvaða lið sem er styrkjast gífurlega við að fá þrjá sóknarmenn af kaliberi Rooney, Van Persie og Mata inn í liðið sitt. Þess vegna ætla ég að vera bjartsýnn í dag og spá United 0-3 sigri á Brittania vellinum með mörkum frá sóknarmönnunum okkar.

Hér er liðið sem ég býst við að sjá spila í dag:

De Gea

Rafael Evans Vidic Evra

Jones Fletcher

Valencia Mata Young

Rooney

Moyes mun líklega vera varkár með framherjana tvo og láta annan þeirra byrja á bekknum eins og var gert í síðasta leik. Mín spá er að það verði Van Persie í dag. Samkvæmt Moyes þá eru Carrick og Ferdinand líklegir til að vera með á morgun en mér þykir ólíklegt að þeir fari í byrjunarliðið. Einnig sagði Moyes að Fellaini yrði líklega í hópnum á morgun en vondu fréttirnar eru að það er líklega mánuður í að við fáum að sjá Nani spila þar sem hann er enn að glíma við meiðsli.

Að öðru leyti trúi ég ekki öðru en að Mata haldi sínu sæti í byrjunarliðinu. Það verður nú ekki sagt annað en að það verður hriiikalega spennandi að sjá hvernig hann stimplar sig inn í liðið á næstu vikum. Ég á satt að segja ennþá erfitt með að trúa því að hann sé leikmaður United, svipað og þegar við keyptum Van Persie af Arsenal. Þessi kaup hafa svo sannarlega vakið upp spennu fyrir seinni hluta tímabilsins og verður að hrósa Moyes fyrir að stökkva á þetta tækifæri. Meira svona í sumar takk (Plís Plís Plís kaupa Kroos!).

Tölfræði

  • Stoke hefur aldrei unnið United í ensku úrvalsdeildinni – Ellefu leikir í röð.
  • Mark Hughes hefur átján sinnum stjórnað liði gegn United og aðeins unnið tvo af þeim.
  • United hafa aðeins tvisvar sinnum náð að halda hreinu á útivelli í deildinni á þessari leiktíð.
  • Van Persie hefur skorað í síðustu sex leikjum sem hann hefur spilað gegn Stoke.
  • Í síðustu fimm leikjum á Brittania hefur United unnið fjórum sinnum og gert eitt jafntefli. Í þessum fimm leikjum hefur United skorað átta mörk gegn tveimur hjá Stoke.
  • í síðustu tuttugu leikjum á útivelli hefur United fjórtán sinnum skorað fyrsta mark leiksins.
  • í síðustu tuttugu leikjum gegn liðum neðar í deildinni hefur United skorað að meðaltali 2.35 mörk en fengið á sig 1.2 mörk.

Tilvitnanir

Mata um Stoke

„It has always been difficult to play against Stoke. But if you try to play quickly, you can get chances to score and put yourself in a good position, They like to play long balls and they are a physical team, but we just need to play our own game with the quality players we have. No, we won’t be intimidated, the thing I like the most is to play. No matter what the stadium. I like to play in a stadium like this because it helps me to improve and I hope I can play a great game.“

Moyes um að fá Persie, Rooney og Fellaini til baka

„I’ve got them back and it’s great to have them. We’re mindful they’re both coming back from injuries and we have to make sure they’re ready [before we give them 90 minutes]. We’re a little bit more concerned about Robin because he’s been out longer; Wayne’s been out for a shorter period. We have to keep managing them and do things right. When you want to win you need people like Robin van Persie, who will get you the winning goal. The other night, we started well and Robin got us a goal after six minutes.“

Moyes um janúargluggann, Mata og Zaha

„There’s no disappointment [that there will be no more transfers]. I said at the start that we wouldn’t do much business in January. There’s no one reason for that.“

„[Um Mata] He’s everything I thought he was. He’s a terrific footballer, a good lad to work with and he’s settled in quickly. He played well in the game, which was important because we wanted him to make a difference straight away. I’m wary that we need to give him time to settle in and not expect too much too soon, but I was impressed with his first game.“

„[Um Zaha] We felt Cardiff was the right choice for him. Hopefully he will go and get those games, show what he can do in the Premier League and be ready to come back to us at the end of the season.“

Lesefni

Félagaskipti Slúður

Glugginn lokar!

skrifaði þann | 7 ummæli

Þetta hefur nú þegar verið betri gluggi en bjartsýnustu menn höfðu þorað að vona enda nældum við okkur í besta leikmann Chelsea síðustu tveggja tímabila í stærstu kaupum gluggans til þessa þegar Juan Mata gekk til liðs við félagið fyrir metfé. Við reiknum ekkert sérstaklega með að fleiri leikmenn bættist við en verðum á vaktinni og reynum að greina frá því helsta sem gerist.

Skömmu eftir miðnætti – Vaktaplan ritstjórnar fór eilítið úr skorðum… en það kom ekki að sök, afskaplega lítið gerðist. Helstu fréttir voru þær að Larnell Cole var á endanum seldur til Fulham. Nokkuð efnilegur drengur þar sem sumir sjá eftir, en líklega erfið leið í aðalliðið. Sala Ryan Tunnicliffe til Fulham var líka staðfest, sem og lán Michael Keane til QPR. Síðan var Tom Lawrence lánaður til Championship deildar liðs Yeovil.

Og að lokum var það loksins staðfest endanlega í dag að Fábio hefur verið seldur og Zaha lánaður til Cardiff.

16:15 – Unglingarnir Charni Ekangamene og Sam Byrne eru báðir á leið til Carlisle á láni. Síðan er búið er að staðfesta kaup Fulham á Kostas Mitroglu sem mætir okkur þar af leiðandi ekki í liðið Olympiakos í meistaradeildinni.

12:35 – David Moyes:

„You can stand your cameras down. I don’t think they will be required. We have done our business.“

Þá vitum við það.

12:30 – Lánamálin: QPR er á höttunum eftir Michael Keane á láni og Fulham virðist vera við það að kaupa Ryan Tunnicliffe. Fréttir um kaup Fulham á Larnell Cole virðast beggja blands. Nýjustu fréttir herma að United hafi skipt um skoðun og vilji ekki selja heldur lána Cole. Fulham er hins vegar búið að fullnýta leikmannalán í vetur þannig að lán til Fulham gengur ekki. Tyler Blackett og Tom Thorpe eru síðan á leiðinni til Birmingham á láni.

10.25 – United á að hafa boðið 12,3m punda í Nicolás Otamendi hjá Porto sem fyrr segir. Trikkið í þessu er að City er á eftir Eliaquim Mangala sem er líka varnarmaður hjá Porto og Porto myndi aldrei láta báða fara.

09:00 – Umboðsmaður Javier Hernandez segir að sex félög í Evrópu vilji fá Mexíkóann knáa til liðs við sig en hann sé hinsvegar ekki á leiðinni frá Old Trafford. Fulham og West Ham eru að berjast um Kostas Mitroglou sem er framherji Olympiakos og þeirra besti leikmaður. Við mættum einmitt Olympiakos í næstu umferð Meistaradeildarinnar.

08:30 – Twitter slúður morgunsins segir okkur á höttunum eftir Andros Townsend hjá Tottenham. Og þá að Nani fari í hina áttina. Það er þumalputtaregla í slúðri að trúa aldrei þegar slúðrið snýst um leikmannaskipti, enda gerast þau nær aldrei.

07:20 – David Moyes hefur verið að leita sér að miðjumanni og hefur verið þrálátur orðrómur um að Toni Kroos, leikmaður Bayern sé á leiðinni til félagsins. Ekkert er þó staðfest í þeim efnum nema það að Moyes og njósnateymi hans virðast vera á fullu að finna mannskap til að bæta hópinn, hvort sem að það ber ávöxt núna eða í næsta glugga.

Seint í gær Twitter fylltist af orðrómi um United hefði boðið 12 milljónir í miðvörð Porto, Nicolas Otamendi. Liðið hefur einnig áhuga á Fernando, miðjumanni sama liðs. Nani gæti einnig verið á förum en Inter hefur verið að spyrjast fyrir um hann.

Sjáum hvað setur.

 

Leikmenn Pistlar

Tvíburarnir

skrifaði þann | 5 ummæli

Maðurinn hefur lengi spurt sig þeirrar spurningar hvernig samspil erfða og umhverfis hefur áhrif á líf manna. Fyrst um sinn glímdu heimspekingar við þessa spurningu. John Locke taldi umhverfi skipta meginmáli, við fæðingu var heilinn óskrifað blað en Immanuel Kant taldi að við fæðingu hefði maðurinn einhverja fyrirframgefna þekkingu. Síðar meir, líkt og með mörg önnur viðfangsefni heimspekinnar, færðist þessi spurning yfir á svið vísindanna. Í dag glíma erfðafræðingar, sálfræðingar og læknar öðrum fremur við þessa spurningu.

Til þess að finna svar við þessari spurningu hafa eineggja tvíburar reynst eftirsóknarvert rannsóknarefni. Erfðafræðilega eru þeir nánast samskonar en þeir alast ekki alltaf upp í sama umhverfi og á því hafa rannsakendur sérstakan áhuga því þá gefst kjörið tækifæri til að sjá hvernig erfðir og umhverfið spila saman.

Afhverju er ég að bulla eitthvað um heimspeki, erfðafræði og tvíburarannsóknir á vefsíðu um knattspyrnulið á Englandi? Aðallega vegna þess að ég lærði heimspeki í háskóla og á ennþá eftir að finna hagnýta leið til þess að nýta mér þá þekkingu.

rafael-and-fabio-de-silvaEinnig þó vegna þess að hjá Manchester United mátti þangað til nýlega finna eineggja tvíbura og báðir voru taldir eiga bjarta framtíð fyrir sér hjá félaginu þegar þeir gengu til liðsins. Tveir leikmenn, eineggja tvíburar, erfðafræðilega samstæðir í nákvæmlega sama umhverfi, svo líkir að Sir Alex Ferguson þekkti þá lengi vel aðeins í sundur á því að Fabio gekk með giftingarhring. Samt sem áður er annar þeirra búinn að vera byrjunarliðsmaður í nokkur ár á meðan hinn náði aldrei að festa sig í sessi. Fabio er farinn, Rafael varð eftir. Hvernig stendur á þessu?

Nú hljóta erfðafræðingar heimsins að vera með vatn í munninum. Eða ekki.

Það er margt sem týnist og gleymist á netinu í þessu upplýsingaflæði sem dynur á mann á hverjum degi en ég man eftir umræðu um þá bræður fljótlega eftir að þeir gengu til liðsins að litið væri á Fabio sem betri leikmanninn af þeim tveimur. Þegar þeir gengu til liðs við Fluminese árið 2005 var Fabio varnarmiðjumaður en Rafael var framherji. Þjálfarinn þeirra sá þá þó frekar fyrir sér sem bakverði. Báðir eru þeir réttfættir sem hefur væntanlega skapað einhver vandræði enda fá lið sem spila með tvo bakverði hægra megin. Eða vinstra megin ef út í það er farið. Lausnin var sú að Fabio færði sig í vinstri bakvörðinn, einfaldlega vegna þess að hann stóð sig svo vel þar þegar hann var prófaður í þeirri stöðu. Rafael fékk hægri bakvörðinn.

C_71_article_1491337_image_list_image_list_item_0_image-651940

Þegar þeir komu til United beið þeirra þó ólíkt hlutskipti. Rafael var að keppa við Gary Neville og Wes Brown, Fabio við Patrice Evra. Neville og Brown voru oft á tíðum meiddir auk þess sem að Neville var óðum að verða of gamall til að standa í eltingarleik upp og niður kantinn. Leiðin var því tiltölulega greið fyrir Rafael inní í byrjunarliðið og honum til tekna nýtti hann þau tækifæri sem hann fékk gríðarlega vel. Hann spilaði alls 28 leiki á fyrsta tímabilinu og leit aldrei aftur um öxl. Wes Brown var seldur, Gary Neville hætti og Rafael var hægri bakvörður nr.1 hjá United og fékk gamla treyjunúmerið hans Gary Neville því til staðfestingar.

Á sama tíma og meðvindurinn lék um Rafael blés allt í fangið á Fabio. Hann meiddist skömmu eftir komuna til United og spilaði ekki sinn fyrsta leik fyrr en um ári eftir að hann gekk í raðir United og meiddist meira að segja í þeim leik, bikarleik gegn Tottenham. Hann fékk ekki tækifæri til að spila í deildinni fyrr en rúmlega einu og hálfu ári eftir að hann gekk til liðs við United, í águst 2009 en Rafael hafði fengið sitt tækifæri í sama mánuði, ári fyrr. Eftir þetta voru tækifærin af skornum skammti fyrir Fabio, ekki endilega vegna skorts á hæfileikum eða vinnuframlagi. Ólíkt Rafael var Fabio að keppa við Patrice Evra sem spilaði svo gott sem hvern einasta leik. Það var því nánast ómögulegt fyrir Fabio að brjóta sér leið inn í byrjunarliðið í sinni stöðu. Það fór svo að á endanum var hann farinn að keppa við Rafael um hægri bakvörðinn. Það segir kannski ýmislegt að Fabio var valinn í byrjunarliðið í úrslitaleik Meistaradeildarinnar 2011. Hvar spilaði hann? Í hægri bakverðinum, tvíburabróðir hans sat í áhorfendastúkunni.

Það entist þó ekki lengi og Fabio fór aftur að keppa við Evra um vinstri bakvörðinn. Hann fékk lítið að spila og var á endanum lánaður til QPR sem var í bullandi fallbaráttu. Það gekk ekki upp og hann hefur fengið örfá tækifæri hjá David Moyes og hefur nú gengið til liðs við Cardiff á meðan Rafael þýtur upp og niður hægri vænginn á Old Trafford.

ManUnitedYouth er twitter-síða stuðningsmanns United sem fylgist grannt með gangi mála hjá varaliðinu og yngri liðunum. Hann hafði þetta að segja um brottför Fabio:

https://twitter.com/manunitedyouth/status/427445549244379136

https://twitter.com/ManUnitedYouth/status/427446722911277056

https://twitter.com/ManUnitedYouth/status/427447209698009088

https://twitter.com/ManUnitedYouth/status/427447460542566401

Það er nokkuð til í þessu. Báðir leikmenn voru álíka góðir þegar gengu til liðs við félagið, báðir leikmenn æfðu við nákvæmlega sömu aðstæður og hafa meira segja örugglega borðað sama mat því að þeir bjuggu saman um hríð. Hvað skilur á milli feigs og ófeigs í þessu máli?

Aðstæður. Umhverfi.

Rafael fékk tækifæri og nýtti það vel. Í hans stöðu voru leikmenn fyrir sem voru mikið meiddir eða komnir á síðasta spölinn. Hann greip gæsina og er bakvörður nr.1 í dag.

Fabio var mikið meiddur og þegar hann kom úr meiðslum þurfti hann að keppa við einn besta vinstri bakvörð í heimi sem missti helst ekki úr leik.

Þessi litla tvíburarannsókn sem við höfum fengið í hendurnar með því að skoða ferla þeirra bræðra varpar ljósi á hversu mikið ytri aðstæður og þættir sem erfitt er að hafa stjórn á hafa áhrif þróun ungra leikmanna. Í fótboltanum, sem og á öðrum sviðum lífsins, er stundum hreinlega ekki nóg að vera hæfileikaríkur, stundum er jafnvel ekki nóg að vinna hörðum höndum og leggja sig allan fram til að ná því sem þú vilt. Það skemmir auðvitað ekki fyrir en stundum verða hlutirnir bara að falla með þér. Það þarf einhver að gefa þér tækifæri og þú þarft að nýta það tækifæri. Meiðsli annara leikmanna geta fært þér sénsinn eins og í tilfelli Rafael eða öfugt, eins og í tilfelli Fabio. Svo margir litlir hlutir geta skipt sköpum þegar kemur að þróun ungra leikmanna. 

Hversu margir leikmenn sem mögulega hefðu orðið stórstjörnur eru núna að spila í neðri deildum eða að selja ryksugur vegna þess að þeir fengu aldrei tækifærið eða nýttu það ekki nógu vel?  Hvernig hefði ferill margra leikmanna þróast ef fyrsta skotið þeirra hefði farið stönginn inn, en ekki stönginn út? Eða öfugt. Danny Welbeck er byrjunarliðsmaður í enska landsliðinu í dag, hann skoraði í sínum fyrsta úrvalsdeildarleik með United. Frazier Campbell fékk dauðafæri í leik gegn Newcastle í ágúst 2008 til að tryggja United sigurinn. Hann skoraði ekki. Hann fór skömmu seinna frá félaginu. Hvað hefði gerst ef hann hefði skorað úr þessu færi? Það er auðvitað ómögulegt að segja en varpar ákveðnu ljósi á hlutina.

Það er svo margt sem veltur einfaldlega á aðstæðum og umhverfi og það sést hvergi betur en þegar maður horfir á feril þessara tvíburabræða frá Brasilíu.

Enska úrvalsdeildin

Manchester United 2:0 Cardiff City

skrifaði þann | 15 ummæli

Manchester United tók á móti Cardiff City í leik sem var áttahundruðasti byrjunarleikur Ryan Giggs fyrir liðið og fyrsti leikur Juan Mata í uppstillingu sem leit svona út

De Gea

Rafael Evans Smalling Evra

Valencia Jones Giggs Young

Mata

Van Persie

Eftir að fyrstu gleðiviðbrögðin við að sjá Mata og Van Persie í liðinu voru liðin hjá er ekki ólíklegt að flestir stuðningmenn United hafi hugsað svipað

https://twitter.com/RobDawsonMEN/status/428240240105381888

Juan Mata var ánægður með mark Van Persie
Juan Mata var ánægður með mark Van Persie

En United byrjaði af krafti! Það voru ekki liðnar sex mínútur þegar Robin van Persie stimplaði sig rækilega inn eftir tveggja mánaða fjarveru. Ashley Young átti snilldarsendingu inn á teiginn, Valencia skallaði í slá, Van Persie skallaði frákastið á markvörð Cardiff sem hélt ekki boltanum og Van Persie var auðvitað fyrstur í boltann og kláraði dæmið. Það sem við höfum saknað hans!

Eftir það verður að segjast að leikurinn féll í það far sem mátti búast við þegar liðin birtust. United miðjan var ekki nógu öflug í að halda boltanum eða stöðva Cardiff snemma. Cardiff náði þó ekki að koma sóknum upp að teignum og um leið og United náði að koma almennilega fram var spilið þar orðið fínt. Bæði Johnny Evans og sérstaklega Ashley Young hefðu átt að gera betur með flottar fyrirgjafir Mata.

Sama var upp á teningnum í seinni hálfleik. Cardiff náði meira að segja að sækja vel og ógna nokkuð inn í teig. Varnarmenn náðu samt alltaf að hreinsa og á 59. mínútu fékk Ashley Young boltann úti á kanti, kom þvert fyrir og verandi á auðum sjó tók skotið af 25 metra færi og smellti boltanum í netið alveg úti við stöng. Juan Mata átti sendinguna upp á Young og fær því skráða sína fyrstu stoðsendingu

Meiðslagrísirnir tveir skiptust svo á á 62. mínútu. Robin van Persie kom af leikvelli og Wayne Rooney kom inná. Rooney kom vel inn, var mjög ferskur, hlaupandi út um allt og með nokkrar ansi nettar sendingar og United var farið að ná upp alveg þokkalegu spili á köflum. Tom Cleverley kom inn fyrir Giggs á 71. mínútu. Áfram héldu sóknir United og Valencia bjó sér til alveg prýðis færi rétt á eftir. Var kominn nær innfyrir, en varnarmaður náði að trufla, Valencia fintaði hann upp úr skónum og náði skotinu sem markvörður varði í stöng og framhjá,

Epísku skiptingunum var ekki lokið, fyrsta leik Juan Mata fyrir United lauk með því að Adnan Januzaj kom inn á fyrir hann á 83. mínútu. Prýðilegur leikur Mata sem var með mikla yfirferð, spilaði yfir þveran völlinn frá vinstri til hægri og átti margar stórfínar sendingar. Hann hefði hugsanlega getað skorað rétt áður en hann fór útaf en boltinn fór aðeins of mikið aftur fyrir hann þannig að hann náði ekki almennilegu skoti. Færin komu fleiri, Young sendi Evra upp að endamörkum, sendingin út í teig fór á Januzaj og skot hans fór rétt framhjá. Wayne Rooney átti síðustu alvöru innleggið í leikinn með skoti yfir og United vann öruggan sigur.

Sendingar í fyrri hálfleik
Sendingar í fyrri hálfleik
Sendingar í seinni hálfleik
Sendingar í seinni hálfleik

Þessar myndir hér að ofan sýna sendingar United í fyrri og seinni hálfleik hálfleik og sýnir vel hvað lítið af þeim var inni á miðju vallarins. Við erum greinilega búnir að fá glæsilega sendingu í Juan Mata og frábært að fá Van Persie og Rooney til baka og meira að segja Valencia og Ashley Young, sem öllum að óvörum og mér líka fær útnefninguna maður leiksins fyrir mark og stoðsendingu, voru að spila mun betur en áður. En, það vantar miðjumann.