Rauðu djöflarnir

Enska úrvalsdeildin

Hefnd gegn Swansea á morgun!

skrifaði þann | 6 ummæli

Á morgun tekur United á móti Swansea í annað skipti á innan við viku. Við þurfum ekkert að ræða það neitt frekar hvernig leikurinn spilaðist síðasta sunnudag, enda einn af lágpunktum tímabilsins (hingað til allavega). Ef ég væri leikmaður United þá væri ég mjög æstur í að spila þennan leik á morgun og hefna fyrir „ruglið“ um síðustu helgi. Það verður því forvitnilegt að sjá hvaða leikmenn mæta dýrvitlausir til leiks og hverjir ekki (ef einhverjir). Ef þetta er ekki tækifærið fyrir leikmenn liðsins til að sýna öllum hvað þeim virkilega finnst um gengið undanfarna daga, já þá veit ég ekki hvað þarf til að vekja þessa menn.

Skoðum aðeins hvernig byrjunarliðið gæti orðið. Rooney* ætti að vera kominn aftur, og kannski Phil Jones líka, en Evans og Ferdinand eru báðir meiddir. Spáum þessu svona:

De Gea

Rafael Smalling Vidic Evra

Carrick Cleverley

Valencia Rooney Januzaj

Welbeck

Já þetta verður athyglisverður leikur, tja eins og allir leikir liðsins þessa dagana. Ef ég sé einn United leikmann inn á vellinum með hangandi haus þá hrynur sá maður í áliti hjá mér. Ég ætla ekki að gera kröfu um einhvern 5-0 sigur, ég vil bara sjá menn leggja allt í sölurnar, þetta er tíminn til þess. Ég vil sjá liðið spila eins og þeir gerðu gegn Arsenal á Old Trafford, því ef við sjáum svoleiðis baráttu, þá getur þetta hæglega orðið 5-0 sigur!

Annars er það eitt að hefna fyrir tapið í bikarnum um síðustu helgi og svo er það annað að halda áfram að elta efstu sex liðin í deildinni. Flest þeirra eiga leiki í „auðveldari kantinum“ þannig að við megum ekki við því að missa þau lengra framúr okkur.

taflan

Leikurinn byrjar klukkan 17:30. ÁFRAM MANCHESTER UNITED!

* Uppfært: Það hefur verið gefið út að Rooney hefur verið sendur í frí til að ná sér góðum af nárameiðslum, hann spilar því ekki á morgun. Ætli Kagawa sé ekki líklegastur til að koma inn fyrir hann.

Slúður

Góðu fréttunum rignir inn

skrifaði þann | 21 ummæli

Já, það er ekkert nema jákvæðir straumar sem streyma frá Old Trafford þessa dagana.

Chris Smalling tók þá upplýstu ákvörðun um að klæða sig upp sem sjálfsmorðsprengjumaður í búningapartý á dögunum. „Blaðamenn“ The Sun voru auðvitað ekki lengi að komast að þessu og birtu þetta á forsíðu blaðsins. Smalling var snöggur að biðjast afsökunar á þessu og sagði þetta misheppnað grín, hann hafi ætlað að þykjast vera svokölluð Jäger-Bomb. Fallega gert hjá honum að taka sviðsljósið af Moyes í smástund.

Í öllu alvarlegri fréttum er það helst að á vef Guardian er birt grein þar sem talað er um að sumir leikmenn Manchester United hafi efasemdir um að Moyes geti snúið gengi liðsins við. Blaðamenn Guardian verða að teljast með þeim áreiðanlegri í þessum efnum og ef satt reynist er þetta afar slæmt fyrir félagið og ekki vænlegt til árangurs.patrio Í greininni er talað um að leikmenn séu ósáttir við að Moyes vilji fá nýjan vinstri bakvörð í stað Evra sem er gríðarlega vinsæll í klefanum. Rio Ferdinand hefur einnig gefið út að hann sé óánægður með þá venju Moyes að gefa út liðið rétt fyrir leiktíma. Leiða má líkur að því að þeir tveir séu forsprakkar í þessum efasemdum um Moyes. Það er slæmt enda eru þetta reynslumiklir menn sem hinir yngri í klefanum líta upp til. Maður veltir því þó fyrir sér hvort að þessir leikmenn ættu ef til vill að líta í eigin barm enda fáir spilað jafn illa á þessari leiktíð en akkúrat þeir tveir.

Mikið hefur verið skrifað um sök Moyes á slæmu gengi liðsins og er hann alls ekki saklaus í þeim efnum, rétt eins og 680 milljóna punda kostnaður við yfirtöku Glazer-druslanna og algjör vanfjárfesting í leikmannahóp liðsins. En hvar koma leikmennirnir inn í þetta? Eiga þeir ekki einhverja sök á slæmu gengi liðsins?

Get me out of here!
Screw this, I’m leaving!

Það eru þeir sem spila leikina og það eru þeir sem hafa oft á tíðum gert sig seka um frekar slæm einstaklingsmistök. Eru þeir kannski svo góðu vanir að þeir geti ekki höndlað alvöru mótlæti? Ég er á því að Moyes fái allavega þrjú ár í stjórasætinu sama hvað gerist og ég held að þetta tímabil verði mjög lærdómsríkt fyrir hann, sérstaklega hvað varðar leikmannahópinn. Það er að koma í ljós hvaða leikmenn eru orðnir saddir og hverjir séu til í slaginn. Það kæmi mér allavega ekki á óvart ef það yrði mikil hreingerning í leikmannahópnum í sumar.

Áður en ég verð ásakur um of mikla ást á Moyes sýni ég ykkur þessa upplýsandi myndir um spilamennsku liðsins sem er gríðarlega einhæf og þar spilar Moyes stórt hlutverk.

 

https://twitter.com/iainod/status/421190617025495040

https://twitter.com/iainod/status/421190763389915137

Þarna sést berlega tvennt sem einkennir spilamennsku liðsins undir stjórn Moyes. Miðjumennirnir eru nánast ekki til staðar og það snýst allt um að gefa út á kantinn og koma boltanum fyrir. Rinse and repeat. Í hverjum einasta fokking leik. Þetta er svo einhæft og fyrirsjáanlegt og svo leiðinlegt að horfa á. Væri gaman að sjá Moyes reyna að fá liðið til þess að prófa eitthvað nýtt. Það er alltof auðvelt að verjast liðinu þegar það spilar alltaf nákvæmlega sama fótbolta, aftur og aftur og aftur.

Við viljum einnig vekja athygli á því að síðan er komin með nýjan og stórglæsilegan banner og var það öðlingurinn og eðaldrengurinn Orri Eyþórsson sem tók þetta verkefni að sér. Kunnum við honum bestu þakkir fyrir það.

Enska deildarbikarkeppnin

Sunderland 2:1 Manchester United

skrifaði þann | 36 ummæli

Gamanið heldur áfram. Liðið var svona:

De Gea

Rafael Evans Vidic Evra

Cleverley Carrick

Valencia Giggs Januzaj

Welbeck

Bekkur: Lindegaard, Smalling, Hernandez, Fletcher, Kagawa, Büttner, Zaha.

Sunderland: Mannone, Bardsley, Alonso, Brown, O’Shea (C), Larsson, Cattermole, Ki, Giaccherini, Borini, Fletcher.

Fyrri hálfleikur var alveg sérstaklega lélegur af hálfu beggja liða en þó sérstaklega af okkar hálfu. Það gerðist akkúrat ekkert fyrr en á 25. mínútu að Moyes færði Januzaj fyrir aftan framherjann og setti Giggs út á kant. Januzaj var eini leikmaðurinn í okkar liði sem var að reyna eitthvað og eftir þessa tilfærslu var hann meira í boltanum og var sprækur. Hann skoraði mark sem var réttilega dæmt af vegna rangstöðu. Eins og venjulega þó misstu okkar menn einbeitinguna undir lok hálfleiksins og fengu á sig mark. Larsson þrykkti aukaspyrnu inní teiginn þar sem Wes Brown kom boltanum inn í markteig þar sem Phil Bardsley og Ryan Giggs voru að kljást. Boltinn barst í markið og líklega mun þetta mark skrifast á Giggs. Við þekkjum þetta handrit og í sannleika sagt er maður að verða dauðþreyttur á því.

Seinni hálfleikur byrjaði vel því í upphafi hans hamraði Nemjana Vidic boltann inn í markið eftir horn og staðan því 1-1. Seinni hálfleikur var örlítið líflegri en sá fyrri. Við vorum meira með boltann en eins og vanalega gerðist voðalega lítið. Það virkar víst ekkert sérstaklega vel að vera bara með eina leið til að sækja að markinu: Koma boltanum út á kant. Gefa hann fyrir. Fatta menn ekkert að þetta virkar ekki þegar enginn af kantmönnum okkar er fær um að gefa skítsæmilegan bolta fyrir?

Sunderland-menn fengu svo víti sem í besta falli var ódýrt. Tom Cleverley flæktist í Adam Johnson sem var ekkert að berjast við að standa í lappirnar. Andre Marriner dæmdi víti, Fabio Borini steig á punktinn og skoraði af fádæma öryggi. 2-1 fyrir Sunderland.

Eftir þetta lágu okkar menn á Sunderland-mönnum en það var auðvelt fyrir þá að verjast sóknartilburðum okkar manna, enda er sóknarleikurinn svo fyrirsjáanlegur að það hlýtur að vera verulega auðvelt fyrir lið að undirbúa sig fyrir leiki við United. Það eina sem þau þurfa að gera er að vera þéttir á miðjunni, leyfa vængmönnumum okkar að fá boltann og pressa þá. Einfalt, eins og sóknarleikurinn okkar.

Sunderland vann því fyrstu lotu 2-1. Seinni leikurinn er á Old Trafford eftir réttar tvær vikur. Miðað við heimavallagengi okkar á tímabilinu ætla ég ekki að reikna með sigri þar.

Ljósi punkturinn í þessum leik er Adnan Januzaj sem hætti aldrei að reyna að gera eitthvað og var hann sá eini í liðinu sem sýndi eitthvað frumkvæði, allir hinir voru bara með.

Við spilum svo við Swansea á laugardaginn. Ég reikna með að Laudrup sé með sína menn á fullu á æfingasvæðinu að æfa hvernig eigi að verjast lélegum og einhæfum sóknarleik.

Enska deildarbikarkeppnin Stjórinn

Undanúrslit deildarbikarsins – taka 1

skrifaði þann | 5 ummæli

Eftir vonbrigði helgarinnar er vel þegið að fá leik strax í kjölfarið svo að hægt sé að einbeita sér að einhverju öðru en eingöngu því neikvæða. Á morgun mætum við Sunderland í úrslitum deildarbikarsins. Sem betur fer á útivelli.

Ég las ágæta grein fyrir helgina um mikilvægi bikarkeppna. Í henni er haldið fram að sigur í bikarkeppni geti virkað sem stökkbretti fyrir lið og fleytt þeim í átt að frekari velgengni. Tekið er dæmi um Nottingham Forest lið Brian Clough frá áttunda áratugnum sem vann hina merku keppni Anglo-Scottish bikarinn árið 1976. Kannski ekki stærsta bikarkeppnin en Clough sagði seinna að þetta hefði haft sín áhrif:

„You got the sense, though, that it was also like we’d been given a shot of something positive that only a trophy, whatever it is, can bring. We’d won something and it made all the difference.„

Þetta hafði sín áhrif. Tímabilið eftir vann Nottingham Forest gömlu 1.deildina og aftur árið eftir. Ekki nóg með það heldur vann þetta Forest-lið Clough Evrópukeppni Meistaraliða, forvera Meistaradeildarinnar, tvö ár í röð, 1979 og 1980. Geri aðrir betur.

Hvaða máli skiptir þetta fyrir United? Sigursælasta lið Englands sem er stútfullt af leikmönnum og starfsmönnum sem þekkja ekkert annað en það að vinna titla. Þeir þurfa ekkert að komast á bragðið, það gerðist fyrir mörgum árum.

Allir nema David Moyes.

Ólíkt nánast öllum leikmönnunum sem hann stjórnar frá degi til dags hefur hann ekki unnið neitt sem skiptir máli. Hvernig ætli það sé fyrir hann að mótivera þessar stórstjörnur, þessa sigurvegara frá degi til dags? Geta þessir sigurvegarar tekið mark á honum sem aðeins hefur unnið ensku 2.deildina? Hvað getur hann kennt þeim? Hvað hefur hann fram að færa?

Þetta eru spurningar sem allir stuðningsmenn Manchester United eru að velta fyrir sér um mundir en enginn hefur svörin við. Það er of snemmt að dæma en í sannleika sagt hefur Moyes sýnt fátt sem bendir til þess að hann hafi eitthvað fram að færa sem stjóri Manchester United.

Deildarbikarinn er því mikilvægari fyrir United í ár en hann mun nokkurntíman vera. Þetta er ekki merkilegasta keppni í heimi og sannarlega höfum við sem stuðningsmenn United gert grín að stuðningsmönnum annara liða þegar þeir fagna sigri í þessari keppni. En í ár getur hún þjónað þeim tilgangi að koma David Moyes á bragðið líkt og Brian Clough talaði um að Anglo-Scottish bikarinn hafði gert fyrir sitt lið. Kampavínið er nefnilega svo bragðgott að þegar menn hafa smakkað það vilja menn ekki neitt annað. Manchester United lið Ferguson smakkaði kampavínið fyrst með sigri í FA-bikarnum árið 1990 og fyrir Chelsea lið Mourinho var það deildarbikarinn 2005. Fyrst að við erum dottnir út úr FA-bikarnum þetta tímabilið skal það vera deildarbikarinn 2014 sem kemur David Moyes á bragðið.

Fyrst þarf þó að sigrast á Sunderland á morgun sem stendur í vegi fyrir okkar mönnum í átt að Wembley. Undanúrslitin eru spiluð heima og heiman og er fyrsti leikurinn á útivelli.

Sunderland situr í botnsæti Úrvalsdeildarinnar og hefur Gus Poyet ekki náð að rífa liðið upp eftir að Paolo di Canio var rekinn fyrr á tímabilinu. Gengið í Deildarbikarnum hefur því verið ljóstýran á þessu tímabili fyrir stuðningsmenn liðsins enda fátt sem bendir til þess að liðið nái að forðast fallið þegar stigin verða talin saman í vor. Við eigum nokkra menn í þessu Sunderland-liði enda Wes Brown og John O’Shea fastamenn í vörninni ásamt Phil Bardsley. Þeir eru þó ekki að standa sig neitt sérstaklega vel, enda aðeins Fulham sem hefur fengið á sig fleiri mörk í deildinni.

Það verður þó að segjast að Sunderland-menn stóðu sig gríðarlega vel gegn Chelsea í 8-liða úrslitum þegar þeir slóu Mourinho & co út úr keppninni á dramatískan hátt á heimavelli. Þó að liðið sé sýnd veiði er hún alls ekki gefin enda fylgja bikarleikir ekki hefðbundnum lögmálum, það getur allt gerst. Okkar menn eru jafnframt ekkert á neinni sérstakri siglingu um þessar mundir auk þess sem að meiðslalistinn okkar er orðinn ansi langur.

Rooney, van Persie, Rafael, Nani, Rio, Young og Phil Jones eru allir frá ásamt Fellaini sem má reyndar ekki spila í þessari keppni. Fabio er svo í banni eftir að hafa nýtt langþráð tækifæri svona líka glæsilega í síðasta leik.

Moyes ætti að stilla upp eins sterku liði og hann getur á morgun til þess að koma okkur í góða stöðu fyrir heimaleikinn, enda alls óvíst að okkar menn geti sótt nógu góð úrslit þaðan ef leikurinn á morgun fer illa. Miðað við allt er eftirfarandi byrjunarlið líklegt:

Lindegaard

Smalling Vidic Evans Büttner

Valencia Giggs Carrick Januzaj

Welbeck Chicharito

Leikurinn hefst klukkan 19.45

Enska bikarkeppnin

Manchester United 1:2 Swansea City

skrifaði þann | 33 ummæli

Moyes sendi út lið sem tók mið af meiðslum og því að við eigum undanúrslitaleik í deildarbikarnum eftir 49 klst.

Lindegaard

Smalling Evans Ferdinand Büttner

Valencia Cleverley Fletcher Kagawa

Hernandez Welbeck

Varamenn: De Gea, Fabio, Anderson, Carrick, Giggs, Zaha, Januzaj

Þetta gerðist svona: Swansea skoraði strax á 11. mínútu, Hernandez jafnaði fimm mínútum síðar. Eftir það gerðist nákvæmlega ekkert í leiknum fyrr en síðustu 10 mínúturnar. Rio Ferdinand fór meiddur af velli og kæmi engum á óvart ef það væri í síðasta sinn sem við sæjum hann. Fabio fékk loksins tækifæri og var svo uppveðraður yfir því að innan við fimm mínútum síðar fékk hann rautt spjald fyrir glórulausa tæklingu á vallarhelmingi Swansea. Wilfried Bony sá svo um að við þurfum ekki að hafa áhyggjur af leikjaálagi í bikarnum með að skalla boltann í netið á 90. mínútu.

Nokkar sundurlausar hugsanir.

  • United hélt boltanum vel, Fletcher góður á miðjunni, en það sköpuðust engin færi, þetta var algerlega bitlaust.
  • United er með fullt lið af ‘squad players’, leikmenn sem eru fínir til að styðja 4-5 heimsklassa spilara en gagnslausir annars.
  • United var í fyrra með fimm heimsklassa spilara, Vidic er búinn, Carrick á síðasta snúning, Rooney og Van Persie meiddir, og De Gea getur engu bjargað með þessa vörn fyrir framan sig.
  • Það er enginn leikmaður utan Rooney og De Gea að spila jafnvel og í fyrra, aukaleikmennirnir eru allir slakari.
  • Það skiptir engu máli hvort Moyes segist ætla að kaupa eða kaupa ekki, við vitum ekkert hvað verið er að reyna bakvið tjöldin. Það er í raun og veru verra að segjast ætla að kaupa, og kaupa ekki. Enda ættu leikmannakaup að gerast bakvið tjöldin, ekki á blaðamannafundum.
  • Moyes er að tapa almenningstengslastríðinu, hann er í erfiðri aðstöðu en virðist alveg ófær um að segja réttu hlutina og snúa þá álitinu aðeins í réttari áttir.
Bottomlæn:

Moyes verður ekki rekinn, Hann hættir ekki. Það er ekkert útilokað að við kaupum í janúarglugganum. Það er ekki alveg útlokað að við slefum fjórða sætið.

Næsti leikur er á þriðjudaginn og svo kemur Swansea aftur í heimsókn á laugardaginn, þá í deildinni. Þetta verður löng vika.