Leikir septembermánuðar:
Liverpool 1:0 Manchester United
Manchester United 2 : 0 Crystal Palace
Manchester United 4:2 Bayer Leverkusen
Manchester City 4:1 Manchester United
Manchester United 1:0 Liverpool
Manchester United 1:2 West Bromwich Albion
Tökum bara þennan vinkil á þetta:
[poll id=“9″]
Eftir vægast sagt slæmt gengi og ósannfærandi tilburði í deildinni þá er velkomið að fá svona eitt stykki Evrópuleik. Reyndar spilaði liðið frekar vel í fyrstu umferð Meistaradeildarinnar og skoruðu 4 mörk. Næstu 3 mánuðir munu vera tækifæri fyrir ákveðna leikmenn til að sanna sig og réttlæta það að vera leikmenn Manchester United.
Reyndar myndi vera betra að þurfa ekki að ferðast alla leið til Úkraínu til að spila þennan leik sem mun að öllum líkindum verða erfiður fyrir okkar menn. Shakhtar eru eins og stendur í 3. sæti úkraínsku úrvalsdeildarinnar eftir 11 umferðir.
Þetta verður í fyrsta skipti sem þessi lið mætast. Shakhtar sigruðu Sociedad 2-0 í fyrstu umferð A-riðils. Shakhtar hefur fengið ensk lið í heimsókn þrisvar og unnið alla 3 leikina. Síðast þegar við lékum við lið frá Úkraínu þá var það gegn Dynamo Kyiv tímabilið 07-08 og fóru leikirnir 2-4 fyrir United á útivelli og 4-0 á Old Trafford. Ryan Giggs spilaði í fyrstu heimsókn Manchester United til Úkraínu tímabilið 2000-2001. Þetta er 19. ár Manchester United í Meistaradeild Evrópu eða 1 meira en Barcelona, Real Madrid og Porto, einnig er þetta 18. árið í röð í keppninni sem er líka 1 meira Real Madrid.
Af leikmönnum United er það að frétta að Nani er búinn að afplána leikbannið eftir atvikið fræga (alræmda) gegn Real Madrid á síðustu leiktíð. Rio Ferdinand og Tom Cleverley verða að öllum líkindum ekki með sökum meiðsla.
Liðinu ætla ég að spá svona:
De Gea
Rafel Vidic Evans Evra
Carrick Fellaini
Valencia Rooney Nani
van Persie
Þetta var hrikalega lélegt. Það er ekki boðlegt að lið eins og West Bromwich Albion komi á Old Trafford og spili mikið betur en heimaliðið og fari verðskuldað heim með stigin þrjú í pokahorninu. David Moyes stillti upp eftirfarandi liði:
De Gea
Jones Ferdinand Evans Büttner
Carrick Anderson
Nani Rooney Kagawa
Chicharito
Bekkur: Evra, Welbeck, van Persie, Valencia, Fellaini, Amos & Januzaj.
Rek ekki atburði leiksins lið fyrir lið heldur ætla ég að minnast á nokkra hluti sem mér þótti standa uppúr.
Liðið er að spila alltof hægt. Oft í leiknum töpuðu WBA menn boltanum á okkar vallarhelmingi og við áttum fína möguleika á skyndisóknum. Það fjaraði hinsvegar nánast alltaf út þar sem menn voru ekki nógu snöggir upp eða fóru til baka í staðinn fyrir að sækja að markinu. Liðið hefur nú ekki skorað mark í deildinni úr öðru en föstu leikatriði síðan Danny Welbeck vippaði yfir Michel Vorm þann þann 17. ágúst sl. Það er mikið áhyggjuefni og eitthvað sem menn þurfa að leita svara við á æfingarsvæðinu
David Moyes er ennþá að finna besta miðjuparið en eftir það sem er liðið af þessu tímabil er ljóst að Anderson er ekki hluti af því. Hann hefur verið arfaslakur það sem af er tímabili og var einfaldlega hrikalega slappur í dag. Átti fjölmargar lélegar sendingar og lítur bara, því miður, alls ekki út fyrir að vera leikmaður í United-klassa. Hans tími er líklega endanlega upp runninn og nema hann bæti sig virkilega er hann á leiðinni burt. Carrick var heldur ekkert sérstakur í leiknum og það er ljóst að Moyes mun bæta við sig miðjumönnum í janúar-glugganum.
Það er hinsvegar jákvæð hlið á þessum leik að Nani var að spila vel ásamt Kagawa og Januzaj sem kom inn í seinni hálfleik. Nani og Januzaj voru þeir einu sem voru að reyna eitthvað þegar liðið var að sækja jöfnunarmarkið og áttu mjög fína spretti. Nani sýndi gamla takta oft á tíðum og liðið þarf að negla niður samning við Januzaj sem fyrst. Hann er núna í hörkuséns til þess að vinna sér hreinlega inn byrjunarliðssæti hjá United og það kæmi mér ekki á óvart ef við sæum hann spila mun meira á næstu vikum en áætlað var.
Hvað er að gerast með Rio Ferdinand. Ég er ekki viss um að hann kæmist í Þórsliðið í Pepsi-deildinni með þessum frammistöðum í síðustu tveimur leikjum sínum. Hann var virkilega dapur gegn City og hann leit alls ekki vel út í mörkunum sem WBA skoraði í dag. Í fyrra markinu leyfði hann Amalfitano að rölta í gegnum miðja vörnina og í seinna markinu hafði hann ekki neina hugmynd um neitt.
Það er verulegt áhyggjuefni ef að hálfmeiddur Victor Anichibe getur gjörsamlega pakkað saman miðvarðaparinu okkar einn síns liðs. Evans og Rio voru dauðhræddir við hann og leyfði honum trekk í trekk að taka á móti boltanum að skila honum frá sér. Rio og Evans og miðjuparið okkar hafði svo ekkert svar við þeim félögum Sessegnon, Amalfitano og Berahino sem spiluðu feiknalega vel í svæðinu á milli miðju og varnar. Það sést svo langar leiðir að Büttner er ekki meira en deildarbikarleikmaður og hann á ekkert erindi í þessa deild. Hrikalegur varnarlega og aðeins betri sóknarlega. Því fyrr sem við náum okkur í alvöru arftaka Patrice Evra því betra.
Wayne Rooney var góður sem fyrr og ávallt að reyna að skapa eitthvað. Javier Hernandez var lítt sjáanlegur í leiknum og það sama má segja um Robin van Persie eftir að hann kom inná. Það er áhyggjuefni hvað fremsti maðurinn í leikkerfinu hefur verið að taka lítinn þátt í leikjum tímabilsins er frá er talinn leikurinn gegn Swansea. Menn verða að finna leiðir til þess að nýta krafta Robin van Persie betur.
Moyes sagði eftir leikinn gegn City að það væri ljóst að liðið þyrfti 1-2 leikmenn beint inní byrjunarliðið og það er auðvelt að sjá að það er rétt mat hjá honum. Við erum með sterkan hóp en það vantar fleiri afgerandi leikmenn og það er verkefnið hjá Moyes að bæta þeim leikmönnum við í næstu gluggum. Þetta var léleg frammistaða hjá liðinu en það eru bara 6 leikir búnir af tímabilinu og auðvitað fráleitt að afskrifa manninn strax. Moyes er ennþá að vinna með hópinn og þreyfa sig áfram. Það er eitthvað sem hann verður að fá tíma til að gera. 13. sæti er náttúrulega ekki það sæti sem við erum vanir að vera í en það er alveg ljóst að deildin mun verða jafnari en nokkru sinni fyrr og öll toppliðin munu misstíga sig. Aston Villa sigraði Manchester City í dag. Það geta allir unnið alla eins og sást í dag.
Hrikalega svekkjandi tap staðreynd og annað tapið í röð í deildinni. Það er ekki nógu gott og Moyes veit það alveg sjálfur. Leikmennirnir hafa ekki verið að standa sig vel og hann hefur ekki verið að standa sig nógu vel. Þeir vita það og þetta lið er með alveg nógu mikinn karakter til þess að skoppa til baka eftir þessa viku. Við vitum það hinsvegar manna best að tímabilið er langhlaup en ekki spretthlaut og það er ekki alltaf sá sem nær forskoti fyrstu metrana sem vinnur þessa deild, hvað þá sæti í Meistaradeildinni, sem er raunhæfa markmiðið fyrir Moyes í vetur. Framundan í deildinni eru, á pappírnum fræga, auðveldir leikur og því hægur leikur fyrir Moyes og félaga að vinna sig upp töfluna. Við munum örugglega sjá fleiri svona leiki undir stjórn Moyes og á vissan hátt eru þeir góðir því að nú eru sprungurnar að bresta sem Sir Alex Ferguson tókst svo meistaralega að fela. Það er hlutverk David Moyes að laga þær endanlega og leikir eins og þessi hjálpa til við það.
Menn eru væntanlega að koma niður af jörðinni eftir leikinn gegn Liverpool í fyrradag og farnir að einbeita sér að krafti að næsta verkefni. West Bromwich Albion kemur í heimsókn á Old Trafford klukkan 14:00 á morgun.
Steve Clarke tryggði sér og liði sínu sæti í öllum fótbolta pup-quizum heimsins næstu áratugina þegar liðið gerði 5-5 jafntefli við Manchester United í síðasta leik síðasta tímabilsins og í síðasta leik Manchester United undir stjórn Sir Alex Ferguson. Það stig tryggði þeim 8.sæti sem verður að teljast verulega góður árangur fyrir lið á borð við WBA.
Þeir hafa ekki alveg náð að fylgja þessum góða árangri eftir á þessu tímabili, sitja í 14. sæti en gerðu þó öllum þann greiða að vinna Sunderland í síðasta leik 3-0 sem varð til þess að Paolo di Canio var rekinn þaðan. West Brom eru þéttir fyrir og spila agaðan leik en eru þó án efa sterkari á heimavelli en á útivelli.
Þeir Sessegnon og Amalfitano eru skemmtilegir og léttleikandi leikmenn á miðjunni en liðinu skortir þó hrein-ræktaðan markaskorara, einhvern til þess að fylla það skarð sem Romelu Lukaku skyldi eftir sig í fyrra auk þess sem liðið varð fyrir mikilli blóðtöku þegar markmaðurinn Ben Foster meiddist fyrr í haust. Hann er einn af þeirra bestu mönnum og hefur verið saknað. Hann er ekki sá eini sem er meiddur því WBA er reyndar það lið sem er með lengsta meiðslalistann um þessar mundir, alls 10 manns sem eru meiddir.
Við þetta má bæta að liðið spilaði einnig 120 mínútur gegn Arsenal á miðvikudaginn í deildarbikarnum og miðað við hvað mikið er um meiðsli í hópnum er ljóst að þar á bæ verða þeirra menn örugglega þreyttir á morgun sem mun hjálpa okkar mönnum.
Flestir stóðu sig vel í leiknum gegn Liverpool og það væri gaman að sjá Moyes gera ekkert alltof margar breytingar á byrjunarliðinu. Þó að Nani og Kagawa hafi kannski ekki skilað miklu í leiknum gegn Liverpool voru þeir ógnandi og með þá tvo inn á vellinum er liðið mun meira ógnandi en með þá félaga Young og Valencia. Carrick og Fellaini koma svo án efa inn á miðjuna í staðinn fyrir Jones og Giggs sem stóðu sig þó virkilega vel á móti Liverpool.
Það þarf ekkert að tala um Rooney og eina spurningin varðandi framlínuna er hvort að RvP nái leiknum eða ekki. Hernandez ætti að halda sínu sæti en ef RvP er heill mun Hollendingurinn fljúgandi án efa koma aftur í byrjunarliðið. Annar möguleiki er að hafa Rooney fremstan og Kagawa fyrir aftan hann en líklega gerir Moyes það samt þó ekki.
Varnarlínan er í raun stærsta spurningin. Rafael heldur væntanlega sínu sæti og Evra kemur inn í staðinn fyrir Büttner. Mér fannst Evans og Smalling standa sig ágætlega gegn Liverpool og ég myndi alveg sætta mig við að þeir félagar fengu að halda sæti sínu, senda Vidic og Rio þau skilaboð eftir leikinn á sunnudaginn að þeir eigi ekki öruggt sæti í byrjunarliðinu. Líklegast munu þeir þó byrja leikinn, í það minnsta annar þeirra.
De Gea
Rafael Rio Vidic Evra
Carrick Fellaini
Nani Rooney Kagawa
Hernandez
Ef RvP er heill kemur hann pottþétt inn í liðið. Persónulega vil ég sjá Nani fá nokkra leiki í röð núna, jafnvel þótt hann standi sig ekki vel því hann er þannig leikmaður að hann þarf sjálfstraust og spilatíma til að spila vel. Þegar hann er uppá sitt besta er hann einn allra besti leikmaður deildarinnar en þegar hann er ekki í þannig formi er hann bara frekar lélegur. Það er því mikilvægt að koma honum á þann stað að spilamennska hans nái hæstu hæðum. Moyes hefur tæklað Rooney-málið mjög vel og er að ná að kreista allt það besta út úr honum og afhverju ætti hann því ekki að geta gert það sama við Nani?
Meira svona!
Allt í allt ætti þetta að vera auðveldur heimasigur og ég ætla að gerast svo djarfur að spá 3-0 sigri fyrir okkar mönnum. Set mörkin á Evra, Fellaini og Hernandez.
Frá því að Danny Welbeck skoraði síðasta markið gegn Swansea í ágúst hefur liðið ekki skorað mark (í deildinni) nema það komi úr föstu leikatriði. Vissulega jákvætt að skora mörk úr þessum leikatriðum en á morgun vil ég sjá okkur skora eftir opið spil, ég vil ekkert mark eftir hornspyrnur, ekki víti, bara mörg úr góðum færum eftir flott samspil. Komum þessi skipi á skrið!
Leikurinn er klukkan 14:00 á morgun. Michael Oliver mun dæma herlegheitin en þess má geta að hann dæmdi 5-5 leikinn fræga á síðasta tímabili.
Það er aldrei leiðinlegt að sigra Liverpool og hvað þá að slá þá út úr bikarkeppni. Þetta er bara deildarbikarinn en það er öllum sama um það í augnablikinu. Fínasti 1-0 sigur á erkifjendunum staðreynd. Þetta var opin og skemmtilegur leikur og allt annað en leikur þessara liða í deildinni í byrjun mánaðarins. Rétt í þessu var svo dregið í 4. umferð keppninnar og þar mætum við Norwich á Old Trafford. Leikurinn fer væntanlega fram þann 30. október.
Moyes gerði þónokkrar breytingar á liðinu frá því á sunnudag. Hann skipti alveg um varnarlínu nema Smalling fór úr bakverðinum yfir í miðvörðinn. Rafael sneri aftur úr meiðslum og Evans og Büttner spiluðu sína fyrstu leiki á tímabilinu. Jones sneri aftur eftir meiðsli og var á miðjunni ásamt Giggs. Kagawa og Nani fengu svo sitt tækifæri á köntunum og Hernandez og Rooney röðuðu sér fyrir framan þá.
De Gea
Rafael Evans Smalling Büttner
Giggs Jones
Nani Rooney Kagawa
Hernandez
Bekkur United: Amos, Fabio, Anderson, Carrick, Zaha, Januzaj, Welbeck
Ég ætla svo sem ekki að fara lið fyrir lið yfir atburði leiksins. Í grófum dráttum spilaðist fyrri hálfleikur þannig að United hafði yfirhöndina fyrstu 20 mínúturnar en Liverpool náði að koma sér inn í leikinn eftir það og réði ferðinni til loka fyrri hálfleiks. Bæði liðin sköpuðu sér nokkur hálffæri en engin afgerandi færi litu dagsins ljós. Tvískiptur fyrri hálfleikur en nokkuð jafn á heildina litið. Okkar menn komu þó beittari til leiks í seinni hálfleik og skoruðu þegar 40 sekúndur höfðu liðið af seinni hálfleik:
