Rauðu djöflarnir

Opin umræða Slúður

Í ruglinu

skrifaði þann | 12 ummæli

Þetta er held ég örugglega orðið ruglaðasta ‘silly season’ sem ég man eftir hvað United varðar.

Síðan við heyrðumst síðast fyrir tveim dögum:

  • Tito Vilanova segir að Cesc vilji vera áfram.
  • Reyndar var það í vor sem Cesc sagði það.
  • Thiago segist hafa tekið ákvörðun um að fara til Bayern eftir að hafa talað við Pep eftir HM U-21. Áttum semsé aldrei séns.
  • Wayne Rooney er “reiður og ringlaður” vegna þess að United er að fara illa með hann.
  • Það er hollt að lesa hvað Moyes sagði í raun um Rooney. (Takk Kristjans)
  • Chelsea býður 10 milljónir punda í Rooney, plús annað hvort Mata eða Luiz
  • Chelsea neitar að hafa boðið leikmenn, segir það frá United komið til að hræra í leikmönnum Chelsea (en Chelsea er þá augljóslega ekkert að hræra í Rooney)
  • Blaðamenn neita að ‘Mata eða Luiz’ slúðrið hafi komið frá United.
  • Svona í millitíðinni berast fréttir um að Nani fái nýjan samning og sé alveg á tæru að sé sterklega inni í myndinni hjá Moyes.
  • Andy Mitten, gegnheill United maður og traustur, segir alveg á hreinu að Fàbregas vilji spila og vilji koma til United en sé að bíða eftir að Barcelona taki fyrsta skrefið og segi í lagi að hann fari.
  • Ed Woodward, stórleikari úr The Equa… nei ég meina varaforseti Manchester United yfirgaf túrinn í Ástralíu í gær og flaug heim til Englands, nei, ég meina, flaug „til Evrópu“ til að sinna „mikilvægum leikmannaviðskiptum“
  • Þessi leikmannaviðskipti eru að tryggja okkur Fàbregas.
  • Nei, Modrić, sem við fengum allt í einu aftur áhuga á. (Skv Tancredi Palmieri og Sky Italia. Nei, það eru ekki traustar heimildir)
  • nú, eða Gareth Bale, sem Daily Mirror slær upp í dag að við ætlum að bjóða 60 milljónir punda í.

Er nema von menn verði ringlaðir!

En ef ég ætti að leggja undir pening í dag hvað gerðist þá þætti mér líklegustu atburðir næstu vikna vera þeir að Wayne Rooney fari, og Fellaini komi. Síðan virðist alveg séns að næla í Fàbregas. Ef Rooney verður notaður sem skiptimynt, er ekkert óvitlaust að vonast eftir t.d. Mata, sem er eiginlega vitað að Mourinho er alveg til í að láta frá sér. (Sama gildir um Luiz og Torres).

Rooney upp í Bale? Já, hvers vegna ekki? Um daginn var slúðrið meira að segja Rooney OG Nani upp í Bale.

Ef Rooney fer þá er það ekkert alnauðsynlegt að taka framherja inn í staðinn. Við höfum Chicharito og Danny til að leysa Robin af, og Kagawa myndi taka holuna eða fremsta miðjumann með Powell og Januzaj sem varaskeifur. Það er ekkert slæm tilhugsun.

Yfir til ykkar. Hverjar eru líkurnar á að miðjan okkar næsta vetur verði Fellaini, Mata og Fàbregas? Eða Bale, Carrick, Cleverley, Fàbregas og Nani

Slúður

F&F&F… Slúðurpakkinn

skrifaði þann | 14 ummæli

Cesc FàbregasÍ gær bauð United 30 milljónir evra, eða um 26m punda, í Cesc Fàbregas hjá Barcelona. Það er ekki hægt annað að vera skeptískur enda eru það ansi margir („Heldur áfram þangað til allir ársmiðar seljast“ er það sem oft heyrist á sumrin, og ekki bara hjá United).

Það sem mælir gegn því að þetta gerist virðist vera margt. Upphæðin er ekkert ofurhá, Cesc er hjá draumaliðinu sínu, Barcelona er nýbúið að missa ungan miðjumann sem ég man ekki hvað heitir, og Arsenal á einhvers konar forkaupsrétt.

Á hinn bóginn eru ekki allir að afskrifa þetta. Telegraph segir „United are quietly confident“ sem persónulega ég ætla að ekkert að fara að trúa. Flest blöðin keyra með „Cesc fer ef Barcelona taka tilboðinu og vilja hann ekki“ vinkilinn á hann. Sumir segja að hann hafi bara rétt núna heyrt af þessu, en slúðrið af innra spjalli Red Issue segir að hans fólk hafi verið að tala um fyrir mánuði síðan að Cesc væri á leiðinni til United.

En það er alla vega ljóst að næsta félagaskiptasaga er byrjuð, má búast við daglegum „kemur, kemur ekki“ fréttum, a.m.k. þangað til að allir ársmiðarnir eru farnir.

Svona bara til að setja ekki öll slúðureggin í eina körfu nefna bæði Guardian og Telegraph að Moyes sé að íhuga að bjóða í Fellaini, Guardian segir hann vilji bæði Fàbregas og Fellaini, en Telegraph vill meina að Fellaini sé frekar til vara ef Fàbregas kemur ekki.

Sjálfur tel ég ólíklegt að Fàbregas komi, líklegra að Fellaini náist, en þetta tvít í gær fyllti mig hræðslu að það væri allt annað F sem myndi birtast á miðjunni í haust:

Fizzer18, öðru nafni Phil Neville, er greinilega að halda sér í formi fyrir veturinn, og ég býst fastlega við að hann verði kominn á leikmannaskrá áður en við vitum af!

 

Æfingaleikir Slúður

Með sunnudagssteikinni

skrifaði þann | 6 ummæli

Fyrsti leikur United undir stjórn David Moyes fór fram í gær. Liðið keppti við úrvalslið tælensku deildarinnar sem kenndi sig við ódáinsmjöðinn Singha.

Liðið stillti upp í 4-5-1, eða 4-2-3-1 svo:

Amos

Fabio Ferdinand Evans Büttner

Carrick Cleverley

Januzaj Anderson Giggs

Welbeck

Büttner meiddist í fyrri hálfleik þannig að Rafael kom inn á og tvíburarnir spiluðu síðan í síðum stöðum. Í seinni hálfleik komu Jones, Lingard og Zaha inn á fyrir Giggs, Cleverley og Anderson og loks Evra fyrir Fabio.

Það er ekki hægt að segja að United hafi verið stórkostlegir í leiknum, enda þarf ekki að búast því í fyrsta leik eftir sumarfrí. 1-0 sigur tælenska liðsins var sanngjarn, enda sköpuðu þeir sér oft ágæt færi, oftast vegna þess að Evans og Rio voru ekki alveg nógu vel vakandi fyrir stungusendingum.

Það er óþarfi að velta sér upp úr spilamennskunni í fyrsta æfingaleik en hægt að benda á það sem gott var.

Januzaj á sprettinum

Adnan Januzaj var hiklaust besti maður liðsins. Fékk að leika frjálsa stöðu fyrir milli miðju og Welbeck, þó að kanturinn væri aðalábyrgðin og sýndi flotta takta og gott spil. Á hiklaust eftir að fá tækifærið í vetur og þau sem ekki vissu fyrir hver hann er ættu að kannast við hann upp frá þessu.

Wilfried Zaha kom inn á og var mjög ferskur og ætlar greinilega að eigna sér strax stöðu í liðinu. Ef hann heldur svona áfram, þá reikna ég með því að það gerist í vetur.

Ben Amos var traustur í markinu og mun gera tilkall til varamarkmannsstöðunnar í vetur. Tók þá bolta sem átti að taka, átti eina eða tvær mjög góðar vörslur. Spurning hvort hann hefði getað varið skotið sem gaf mark ef hann hefði ekki verið lagður af stað í skutlið, en boltinn fór af Rio þannig að það var hvort eð er mjög erfitt.

Fabio var góður, reyndi lítið á hann í vörninni, en var sókndjarfur og átti m.a. eina bestu sendingu leiksins sem Januzaj var nálægt að skora úr.

Það var því gott að sjá þessa jaðarmenn í hópnum nýta leikinn til að sýna hvað þeir geta. Við þekkjum hina vel og vitum hvað þeir geta og þó leikur hafi tapast er það nú enginn heimsendir. Danny Welbeck spilaði frammi og átti ekki sérstaklega góðan leik. Fyrir vikið hefur verið hraunað yfir hann, en ég er ennþá #TeamWelbeck. Er þess fullviss að hann á eftir að standa sig vel þegar þarf. Ekki síst vegna þess að hann er Unitedmaður í gegn og veit hvað það þýðir. Það skiptir ekki litlu máli að hafa uppalda leikmenn í liðinu og áhrif þeirra eru oft mun meiri en bara þau sem við sjáum inni á vellinum.

Cleverley tísti þessari

Nú er liðið komið til Sydney (ekki Sidney) og horfa á óperuhúsið úr hótelherbergjunum sínum. Leikurinn þar er næsta laugardag þannig þeir hafa góðan tíma til að æfa og stilla strengina. Van Persie, De Gea og Valencia koma til Sydney í vikunni og verða með um næstu helgi.

Stuttlega um annað:

Thiago virðist á leiðinni til Bayern, enda ekki við öðru að búast ef gamli stjórinn hans vill fá hann til sín. Yfir því er ekki ástæða til að fara í djúpa sorg yfir að United geti ekki fengið til sín mennina sem við viljum, en á hinn bóginn liggur við að viðbrögðin við þannig sorgarviðbrögðum séu jafn leiðinleg. Það er nokkuð ljóst að við reyndum við hann, hvað sem Moyes segir eða segir ekki og hann myndi hiklaust styrkja liðið. Það er því alveg leyfilegt að verða fyrir smá vonbrigðum með þetta

Annars virðist Moyes hafa á fréttamannafundi ýjað að því að hann hafi nær ótakmörkuð fjárráð. Ekki kannske sniðugasta prútttaktíkin en það sem er samt ótrúlegast við þessa frétt er að hann á að hafa sagt „We are short in midfield“. Það hefur ekki heyrst frá framkvæmdastjóra Manchester United í mörg ár. Þetta eru sannarlega breyttir tímar. (Það má alveg afskrifa þetta bull sem Sun býr til útfrá þessum tilvitnunum og segir okkur á eftir bæði Bale og Ronaldo, ekki að fara að gerast)

Æfingaleikir

Vináttuleikjaferð Manchester United 2013

skrifaði þann | 4 ummæli

Leikmenn United hafa verið að skríða saman úr sumarfríi og á morgun má segja að undirbúningstímabilið hefjist formlega þegar liðið spilar við Singha All-Stars í höfuðborg Tælands, Bangkok. Fyrir skömmu var hópurinn sem fer í ferðalagið tilkynntur og er hann eftirfarandi:

Markmenn: Anders Lindegaard, Ben Amos
Varnarmenn Rafael, Phil Jones, Rio Ferdinand, Jonny Evans, Patrice Evra, Alex Büttner, Fabio, Michael Keane
Miðjumenn: Michael Carrick, Anderson, Tom Cleverley, Ryan Giggs, Wilfried Zaha, Jesse Lingard, Adnan Januzaj
Framherjar: Wayne Rooney, Danny Welbeck

David de Gea og Robin van Persie hitta hópinn í Sidney og Kagawa kemur til leiks í Japan. Javier Hernandez fær sumarfrí vegna þáttöku Mexíkó í Álfubikarnum og annara landsliðsverkefna.

Mesta athygli vakti að fyrirliðinn Nemanja Vidic fer ekki með og hefur klúbburinn ekki gefið út skýringar á fjarveru hans er talið er að hann sé í meðferð vegna þjótaks í baki sem hefur verið að plaga hann.

Í gær var síðan tilkynnt að Wayne Rooney hefði verið sendur beint heim eftir að lærmeiðsli sem komu fyrst upp daginn fyrir brottför reyndust alvarlegri en vonast hafði verið til.

Planið er eftirfarandi, allar tímasetningar að íslenskum tíma:

Singha All Star XI – 13. júlí kl 13:00
Rajamangala Stadium, Bangkok, Tælandi

Australian A-League All Stars – 20. júlí kl 09:30
ANZ Stadium, Sydney, Ástralíu

Yokohama F·Marinos – 23.júlí kl 10:20
Nissan Stadium, Yokohama, Japan

Cerezo Osaka – 26.júlí  kl 10:00
Osaka Nagai Stadium, Osaka, Japan

Kitchee FC – 29.júlí  kl 12:00
Hong Kong Stadium, Hong Kong

síðan verður haldið heim til Manchester og svo farið til Svíþjóðar.

AIK Fotboll – 6. ágúst kl. 17:30

Friends Arena, Stockholm, Sweden

Eins og sést á þessari mynd er þetta talsvert ferðalag og spurning hvort að þessi ferðalög muni hafa áhrif á gengi liðsins í byrjun tímabils?

 

Á morgun kl 13:00 verður sem sé spilaður fyrsti leikur liðsins undir stjórn David Moyes og verður afar spennandi að sjá hvernig Moyes setur þetta upp. Reikna má með að Danny Welbeck spili frammi! Einnig vonast margir til að sjá til unglinganna sem ferðast með, þeirra Keane, Lingard og Januzaj, og loks verður spennandi að sjá hvort að Wilfried Zaha stimplar sig inn, en miðað við frammistöðu kantmannanna okkar síðasta tímabil gæti góð frammistaða hans skilað byrjunarliðssæti í vetur.

Mótherjarnir eru úrvalslið úr tælensku deildinni sem enginn hér veit neitt um, en væntanlega ekki of sterkt lið.

Opin umræða Slúður

Fréttabútar á sunnudagsmorgni

skrifaði þann | 13 ummæli

Darren Fletcher er búinn að fara í þriðju aðgerðina á skömmum tíma við sáraristilbólgunni sem hrjáir hann. Að aðgerðirnar væru þrjár var samkvæmt áætlun, og nú mun endanlega koma í ljós hvort Fletcher getur snúið til baka sem atvinnuknattspyrnumaður.

Íþróttadagblaðið Sport í Barcelona sló því upp á forsíðu að Thiago væri búinn að semja til fimm ára við United og þetta yrði tilkynnt í vikunni. Ekkert nýtt svo sem þar, en ætli sé ekki óhætt að gera ráð fyrir að samningar séu á því stigi að flestir sem skipti máli vilji að þetta gerist. Ekki er samt sopið kálið þau í ausuna sé komið og enn getur þetta farið gjörsamlega út um þúfur, enda væri það ekki í fyrsta skipti í leikmannasölum sem slíkt gerðist.

Eftir mjög svo skemmtilegan  uppslátt eins götublaðsins í Englandi um síðustu helgi að United væri að fylgjast með stöðunni hjá Messi eftir að Neymar gekk til liðs við Barcelona er kominn annar nær skondinn orðrómur á kreik. Skv. gersamlega óstaðfestum heimildum af Twitter á Daniel Levy, formaður Tottenham að vera að íhuga tillögu United um að Wayne Rooney verði skiptimynt í kaupum United á Gareth Bale. Ég get ekki sagt að ég væri afhuga slíku, en milligjöfin mætti ekki vera of mikil.

Í örlítið-en-ekki-mjög-svo-líklegri slúðurdeildinni á United að þiggja 25m evra, 21,5m pund plús David Villa frá Barcelona fyrir Wayne Rooney. Villa er nú helst til gamall fyrir svona held ég.

Fyrir þau sem furða sig á að slúður um Rooney hafi ekki hætt þegar Moyes lýsti því yfir að hann væri ekki til sölu, er skýringin einföld: Moyes kom sér alfarið framhjá því að svara hvort Rooney sjálfur vildi vera áfram hjá United.

Orðið er laust.