Rauðu djöflarnir

Jæja, þetta var ömurlegt. City nær að eyðileggja hamingjudaginn fyrir okkur og sigrar United með tveimur mörkum gegn einu. James Milner (’51) og Sergio Aguero (’79) með mörkin fyrir City á meðan Kompany skoraði sjálfmark eftir skalla frá Phil Jones (’59).

Það leiðinlegasta sem ég les er þegar reynt er að kenna hinum og þessum leikmanni þegar United upplifir tapleiki og neita ég að detta í þann gír. En það er ekki hægt að neita því að maður er afskaplega svekktur með bæði mörkin sem United fengu á sig í kvöld. Fyrra markið kom eftir mislukkaða hælsendingu hjá Giggs, Barry nær boltanum og brunar fram í sókn og endar boltinn hjá Milner sem nær góðu skoti og endar boltinn í netinu. Svo er það seinna markið þegar Yaya Toure gefur boltann á Aguero sem fær frelsi til að hlaupa framhjá allri vörninni og skora þetta óþolandi flotta mark fyrir City og tryggja þeim þrjú stigin. Sérsaklega súrt þar sem liðið var búið að halda hreinu í yfir 600 mínútur. Virðist vera smá trend á þessu tímabili að fá á okkur svona mörk þar sem leikmenn hlaupa í gegnum vörnina: Bale, Vertonghen og núna Aguero.

Það hlýtur svo að vera rosalega skrítin tilfinning að vera miðjumaður fyrir Manchester United. Á miðjuna með Carrick var í dag settur hinn fjörtíu ára gamli Ryan Giggs. Það þarf varla að taka það fram hversu mikið maður dýrkar Ryan Giggs og var ég meir að segja nokkuð sáttur með hann til að byrja með í dag en þetta gengur ekki upp í 90 mínútur, sérstaklega á móti svona kaliberi af leikmönnum eins og þeir í City hafa upp á að bjóða. Persónulega hef ég alltaf viljað sjá Giggs koma inn og spila síðustu 30 mín í leikjum frekar en að byrja þá og vil ég líka sjá hann á kantinum en ekki miðjunni! Þótti mér svo leiðinlegt að sjá ekki Kagawa koma mun fyrr inn í þessum leik. Hann fékk varla 4 mínútur til að spila og var það allt allt allt allt of sein skipting hjá gamla manninum.

Leikurinn í heildina var annars ágætur. Byrjaði þrusuvel þar sem bæði lið sóttu villt og galið en svo datt hann í eðlilega gírinn þar sem lítið gerist í einhvern tíma. City voru samt alltaf einhvernveginn með tökin á leiknum í dag. United voru ekki að ná að halda boltanum vel og reyndu ítrekað að senda langar sendingar fram á Van Persie og Rooney sem gekk misvel.

Besti leikmaður United í dag?
Ég ætla að velja hinn fjallmyndarlega Phil Jones sem þið sjáið hér hægra megin (Smellið á myndina til að sjá hana stærri). Mikið held ég að Ferguson hafi gert góð kaup þegar hann ákvað að kaupa þennan dreng af Blackburn árið 2011. Það eru ekki margir tuttugu og eins árs stákar sem fá að spila svona stórleiki en hann stóð sig prýðilega allan leikinn fyrir utan Aguero hlaupið í seinni hálfleik. Hann fær nú ekki United markið skráð á sig en hann gerði vel í að ná boltanum eftir aukaspyrnu frá Van Persie og sem betur fer fór boltinn í Kompany því annars værum við eflaust brjálaðir yfir því að hafa klúðrað færinu. Drengurinn er að finna sig meir og meir með liðinu og er afskaplega erfitt að segja til um hvort hann eigi meira heima á miðjunni eða í hjarta varnarinnar.

Jæja, þetta er gott í bili. Næsti leikur United er gegn Stoke, sunnudaginn fjórtánda apríl. Ég enda þetta í dag með nokkrum tístum.