Rauðu djöflarnir

Leikmaður mánaðarins

Leikmaður febrúarmánaðar?

skrifaði þann | 3 ummæli

Jæja, ég held að það sé bara best að gleyma þessum skrattans leik gegn Real og vinda sér í það að kjósa besta leikmann United í febrúar. Sökum þess hversu snaggaralegur febrúar er spilaði United aðeins fimm leiki og unnu af þeim fjóra. Góðir sigrar þó svo lítið hafi verið um flugeldasýningar. Besti leikur United í febrúar var gegn Real Madrid á Santiago Bernabeu þar sem gríðar góð barátta var í liðinu, en því miður fór það allt sman fyrir lítið, og þar með rifja ég upp leikinn sem ég ætlaði að gleyma.

Leikir United:

Kosning:

[poll id="5"]

Meistaradeild Evrópu

Manchester United 1:2 Real Madrid

skrifaði þann | 30 ummæli

Leikurinn í dag réðist af gjörsamlega óafsakanlegu athæfi:

Lið sem búið var að ráða stærstum hluta leiks á ekki að hrynja niður í rusl, þó það missi hægri kantmann útaf, sama hversu vafasamur dómur það er. Það er það sem ég fer með út úr þessum leik.

Fyrir leikinn var ég nær viss um að við myndum ekki ráða við þetta verkefni, en fyrri hálfleikur kom mér skemmtilega á óvart. reyndar voru fyrstu mínúturnar frekar stressaðar af hálfu United, nokkuð um misheppnaðar sendingar en svo fór að rætast úr þessu. Gagnsóknir United voru oft ansi beittar, og Danny Welbeck var eins og hlaupageit um allar trissur, sívinnandi. Það var hins vegar besti maður United í leiknum, Ryan Giggs sem vann hornið sem gaf hættulegasta færið í fyrri hálfleik, skalla Vidic í stöng. Að öðru leyti var hálfleikurinn vel spilaður hjá okkar mönnum. Reyndar var United ekki með boltann nema 37% en það var vel ásættanlegt. Real skapaði litla sem enga hættu og þetta var allt í góðum gír.

Síðari hálfleikur var varla byrjaður þegar United komst yfir. Rafael gaf inn á teiginn þar sem Welbeck komst ekki í skotfæri, missti boltann frá sér, barðist um hann þannig að hann barst til Van Persie. Robin skaut í varnarmann og útað endalínu þar sem Nani hirti boltann af Varane, gaf fyrir, Welbeck setti fót í boltann og þaðan barst hann í legginn á Sergio Ramos og framhjá López í markinu. Frábær byrjun.

Atvikið sem gerði svo út um leikinn varð síðan tíu mínútum síðar. Nani reyndi að komast fyrir háan bolta út úr vörninni, lyfti fæti hátt og fór með hann í bringuna á Arbeloa sem stökk móti boltanum. Það er nokkuð ljóst að Nani sá ekki Arbeloa fyrr en of seint, en engu að síður var um háskaleik að ræða. Ég ætla að sleppa því hér að dæma frekar hvor rauða spjaldið sem Nani fékk fyrir vikið var rétt eða ekki, hitt veit ég að ég hef sé mun vafasamari rauð spjöld, og ég ætla ekki að formæla dómaranum sem svindlara. Til þess þarf mun verri ákvarðanir áður en ég geng svo langt.

En við þetta spjald missti United fótanna algerlega. Ákvörðunin var vafasöm og menn misstu sig á hliðarlínunni og virtist sem menn inni á vellinum gerðu það líka.  Real setti í algeran fluggír, United missti allan takt og aga í spilinu og Mourinho gekk á lagið, setti Modrić inn á fyrir Arbeloa og innan þrettán mínútna var Real komið í 1-2 og leikurinn í raun búinn. Modrić skoraði fyrra markið, glæsilegt mark af 25 metra færi, stöng og inn, Ronaldo það síðara (og fagnaði ekki) eftir fyrirgjöf Higuain þvert fyrir teiginn á fjær stöng þar sem Ronaldo afgreiddi hann.

Þá gaf Real eftir, leyfði United að sækja síðustu 20 mínúturnar og ef ekki fyrir nokkrar góðar vörslur Lópezar hefði United alveg átt skilið að jafna í það minnsta.

Það situr fátt eftir eftir þennan leik nema þetta rauða spjald, og kortérs uppgjöf eftir það. Langbesti maður okkar var Ryan Giggs sem hafði þol umfram allt sem búast má við af manni á hans aldri, var út um allt á vellinum. Danny var góður í fyrri hálfleik en var svo búinn á því og kom útaf fyrir Ashley Young á 81. Þar hefði ég nú frekar sett inn Hernandez til að reyna að lúra inn í teig. Stóru fréttirnar fyrir leik voru auðvitað að Rooney var á bekknum. Hann kom síðan ekki inn á fyrr en staðan var 2-1 og var nokkuð sprækur, en ég styð fullkomlega þá ákvörðun að hvíla hann, Danny og Ryan sáu alveg um þetta.

Vörnin var góð, nema þetta martraðarkortér, gömlu mennirnir Rio og Nemanja voru alveg að skila sínu og ekkert undan þeim að kvarta.

Að skoða sendingarstatistikkina er síðan frekar dapurleg lesning. 57% sendinga okkar manna rötuðu á samherja, og hver öðrum slakari þar.

Loks er rétt að minnast á áhorfendur, langt síðan maður hefur heyrt svona stemmingu á Old Trafford. Svona er þetta þegar fólk fær að standa, og vonandi að „örugg stæði“ („safe standing“) fái að líta dagsins ljós á næstu árum

Við þurfum amk. ekki að hafa áhyggjur af  því að spila fjórðungsúrslit sitt hvoru megin við leikinn við City. Það hefði verið gaman að komast áfram, en meistaratitillinn er algerlega takmark númer eitt í vetur. Mér finnst, líklega réttilega, þó til sanns vegar megi færa að við höfum verið betra liðið í báðum leikjunum gegn Real, að það vanti einhverja smá töfra í liðið til að við getum, og eigum skilið að vinna Meistaradeildina.

Svo er það bara næsti leikur, bikarinn gegn Chelsea. Það væri ekkert að því að vinna tvöfalt!

Meistaradeild Evrópu

Manchester United gegn Real Madrid: Byrjunarliðin

skrifaði þann | 11 ummæli

Jææææja! Klukkutími í stórleikinn! Byrjunarliðin voru að detta í hús og líta þau svona út:

Manchester United

De Gea

Rafael Ferdinand Vidic Evra

Nani Cleverley Carrick Welbeck

Giggs Van Persie

Varamenn:
Lindegaard, Rooney, Evans, Valencia, Young, Kagawa, Hernandez

Real Madrid

Lopez

Arbeloa Varane Ramos Coentrao

Di Maria Alonso Khedira Ozil Ronaldo

Higuain

Varamenn:
Adán, Pepe, Kaká, Benzema, Albiol, Modric, Callejón

Meistaradeild Evrópu

Real Madrid í heimsókn.

skrifaði þann | 9 ummæli

Þrjár vikur liðnar og enn er komið að örlagastundu. Madrídingar eru lentir í Manchester og tilbúnir í slaginn á morgun. United eru líka tilbúnir en það sem verst er, Phil Jones er ekki tilbúinn. A.m.k. segir Sir Alex Ferguson ekki, og Fergie hefur aldrei sagt ósatt orð um hvort leikmenn séu tilbúnir eða ekki. Vindum okkur fyrst af öllu í uppstillinguna

Sir Alex

Ferguson veit hvernig liðið

verður en ég hef

ekki hugmynd

Sleppur ekki svona?

Nei, þetta er ekki alveg svona óljóst, það er í minum huga, sem og hjá fleirum bara tvö stór spurningamerki, og eitt lítið.

De Gea

Rafael Ferdinand Evans Evra

Nani Carrick Cleverley Welbeck

Rooney

Van Persie

Mig grunar að Nani fái þarna tækifæri og held að Cleverley verði fyrir valinu frekar en Kagawa. Kagawa fær amk ekki að spila fyrir Welbeck.

Það má kalla það magnað að okkar besti varnarmaður sé ekki þarna með, en enn og aftur held ég að þessi þrír dagar milli leikja séu of stutt og að Evans sé hreinlega betri en Vidic þegar það er tekið með í dæmið.

Hvað Madrid varðar þá eru þeir með alla heila, Casillas ferðaðist með en er ekki leikfær þannig ég býst við sama liði og í fyrri leiknum. Væri gaman að sjá Pepé inná fyrir Varane, en því miður er það ólíklegt, Varane enda búinn að standa sig gríðarvel undanfarið.

Við erum búnir að vinna þessa þrjá leiki sem liðu frá útileiknum, en Real hefur gert betur, og unnið fjóra. Þá þarf varla að taka það fram að tveir síðustu leikir þeirra voru sigurleikir gegn Barcelona, og það þó þeir hefðu hvílt hálft liðið í leiknum á laugardaginn. Þannig að við vitum alveg hvað þetta verður erfiður leikur. Við þurfum a) að fá ekki á okkur mark, og b) helst að skora. Hvort tveggja er erfitt, en þó er ég viss um að b) er auðveldara. Vörn Real er ekki alveg jafn skæð og sóknin og því held ég að við getum sett eitt til tvö. Eins og ég fór rækilega yfir í upphitun fyrir fyrri leikinn fór síðasti leikur Real Madrid á Old Trafford 4-3, og Ronaldo skoraði þrennu. Það eru úrslit sem við getum mjög auðveldlega sætt okkur við á morgun, en mig grunar samt að við séum ekki að fara að fá á okkur þrjú mörk.

Vandamálið við þennan leik er ósköp einfalt. Bæði lið kjósa það öðru fremur þegar að svona leikjum kemur að byggja á þéttri vörn og sterkri miðju og beita svo gagnsóknum. United komst upp með það í útileiknum, en spurning hvort heimavöllurinn verður of freistandi til að sækja um of. Kannske sá Sir Alex Milan taka Barcelona í bakaríið á heimavelli þar sem Milan spiluðu lengst af í 5-5-0 með skyndisóknum. Ekki kannske það fallegasta, en samt var Milan að spila flottar en Barcelona sem dútluðu sér hægri vinstri, gjörsamlega bitlausir, en skyndisóknir Milan voru bara virkilega flottar.

Það væri því ekkert að því að vinna þennan leik á þann hátt 2-1.

Enska úrvalsdeildin

Manchester United 4:0 Norwich

skrifaði þann | 16 ummæli

Þrjú stig komin í hús og alls ekki leiðinlegt að krækja í þau með glæsisigri. United sigrar Norwich með fjórum mörkum gegn engu. Kagawa með þrennu og Rooney með bombu á 90. mínútu.

Þar sem þetta er nú aðeins leikskýrsla númer tvö hjá mér, þá ætla ég að taka það aftur fram að í mínum leikskýrslum nenni ég ekki að fara yfir hvert einasta atriði sem gerðist í leiknum. Ég tek frekar saman það helsta sem mér þótti eftirtektarvert, sem við getum svo rætt áfram í athugasemdunum fyrir neðan.

Liðsuppstillingin

Eins og ég nefndi í upphituninni, þá var maður spenntur að sjá hvernig Ferguson og Mourinho myndu stilla upp liðunum í dag. Hvaða leikmenn fengu hvíld og hverjir myndu spila. Ef það var einhver vafi um hvaða titlar eru í forgangi hjá Ferguson og Mourinho, þá var honum algjörlega sturtað niður í klósettið í dag. Ferguson ætlar svo sannarlega að taka deildina í ár og tefldi hann fram mjög sterku liði gegn Norwich. Á sama tíma hvíldi Mourinho sína helstu lykilleikmenn þegar Real mætti Barcelona í El classico (sem kom reyndar ekki að sök þar sem þeir unnu 2-1).

Svona hafði Ferguson liðið í dag:

De Gea

Smalling Evans Vidic Evra

Valencia Anderson Carrick Kagawa

Rooney Van Persie

Og á bekknum voru: Lindegaard, Rafael, Cleverley, Nani, Young, Welbeck, Chicharito

Tölfræði leiksins

Í fyrri hálfleik var nánast bara eitt lið á vellinum. United var næstum allan tímann með boltann, átti ellefu skot og þrjú á rammann á meðan Norwich náði ekki einu skoti! Í seinni hálfleik náðu Norwich að halda boltanum ágætlega og náðu að skapa eitt stórhættulegt færi, sem endaði þó með að dæmt var á Holt fyrir að brjóta á Evra (Hvernig í ósköpunum klikkaði Martin á þessu færi samt?). En þegar fimmtán mínútur voru eftir af leiknum, fór vörnin að opnast hjá Norwich og náði United að negla inn þrem stórglæsilegum mörkum með stuttu millibili (76., 87. og 90. mín).

Svona leit tölfræðin út eftir leikinn:

Manchester United   Norwich City
19(7) Shots (on goal) 1(0)
5 Fouls 14
7 Corner kicks 3
3 Offsides 2
65% Time of Possession 35%
0 Yellow Cards 4
0 Red Cards 0
0 Saves 3

Mig langaði að finna síðu með góða tölfræði fyrir þessa skýrslu og eftir smá Google leit rakst ég á espnfc.com sem sýnir manni það mikilvægasta. Mér þótti sérstaklega gaman að skoða myndina sem sýnir hvar leikmenn United héldu sig helst á vellinum í dag (e. „Average Position“)
Staðsetningar leikmanna United

Þessi mynd sýnir greinilega hversu mikla yfirburði United hafði í þessum leik. Næstum allir leikmenn United eyddu tímanum á vallarhelmingi Norwich.

Stórglæsileg mörk

Þið hljótið að vera ánægð með mörkin sem við fengum að sjá í dag? Þetta voru alveg stórglæsileg mörk sem Kagawa og Rooney skoruðu.

Fyrsta markið var kannski ekki það fallegasta í dag en að sjá RVP ná boltanum sem kom frá Valencia og koma honum til Kagawa fékk mig til að brosa.

Þegar Kagawa skoraði mark númer 2 hló ég upphátt hér aleinn heima hjá mér. Af hverju? Því ég fékk þá tilfinningu að Rooney og Kagawa væru hreinlega að leika sér að fífla vörnina hjá Norwich. Rooney fær gullfallega sendingu frá Carrick, tekur boltann niður og kemst í góða stöðu til að annaðhvort skjóta eða senda boltann. Ákveður að senda á Kagawa sem skýtur laflaust en hnitmiðað framhjá Bunn í markinu og varnarmanninum sem reyndu allt hvað þeir gátu til að þvælast fyrir.

Spilið svo í þriðja markinu var alveg stórkostlegt. Ég hugsaði með mér að Kagawa var einmitt keyptur til að skapa og skora svona mörk. Spilið á milli Welbeck, Rooney og Kagawa gaf mér svipaða gæsahúð og ég fékk þegar ég sá Nani skora gegn City í góðgerðarskildinum 2011 eftir glæsilegt samspil milli Cleverley, Welbeck, Rooney og Nani. Vörnin hjá Norwich náði að galopnast og vippaði Kagawa boltanum snyrtilega yfir Bunn.

Fjórða markið var svo stórglæsilegt í alla staði! Það sýndi okkur hvað Rooney getur verið stórhættulegur ef honum er gefið smá pláss. Vel fyrir utan vítateiginn tekur hann boltann, ógnar skoti og kemst framhjá leikmanni Norwich og neglir svo tuðrunni framhjá Bunn í markinu, sem átti aldrei sjens í boltann. Gullfallegt mark!

Kagawa & Rooney

Það er ekki hægt annað en að tala um leikmanninn sem skorar þrennu fyrir liðið. Eftir fyrri hálfleikinn var ég búinn að undirbúa mig undir að skrifa um hvað hann átti frekar dapran leik þrátt fyrir að skora. En eftir að leiknum lauk gat maður ekki annað en að draga það allt til baka. Drengurinn er búinn að eiga erfitt á þessu tímabili eftir mjög góða byrjun og spila þá helst leiðindameiðsli þar inn. Frábærlega gert hjá drengnum og vonandi heldur hann þessu áfram. Eftir leikinn sagði Ferguson þetta um Kagawa:

„He’s gradually getting his form back because he missed that period of football in October and November which set him back a little bit.

He’s going to be a good player. Next year he’ll be far, far better too.“

Svipað og með Kagawa þá var ég búinn að punkta hjá mér, eftir fyrri hálfleik, að ræða allar feilsendingarnar hjá Rooney í þessum leik (Mikið djöf. voru þær margar). En eftir undirbúninginn og stoðsendinguna á Kagawa í marki nr.2 og glæsimarkið í lokin, þá ætla ég hreinlega að gefa honum frí í dag. Vonandi verður hann kominn í betri sendingargír á þriðjudaginn því líklegt verður að hann spili ca. 3-4 stöður í þeim leik.

Vörnin

Það er mjög ánægjulegt að sjá varnarmenn United brillera þessa dagana. Leikurinn í dag var fjórði deildarleikurinn í röð sem United spilar án þess að fá á sig mark. Miðvarðarteymið í þessum leikjum er búið að vera Ferdinand Evans (Fulham), Ferdinand Vidic(QPR) og Vidic Evans (Everton & Norwich). Það er alveg frábært að þeir séu að toppa á hárréttum tíma, eftir að hafa kostað okkur alveg óásættanlega mikið af mörkum á þessu tímabili, því núna eru allir leikir mikilvægir fyrir liðið. Að auki má segja að De Gea sé búinn að fá sína hvíld fyrir stórleikinn á þriðjudag þar sem hann þurfti lítið sem ekkert að gera í dag.

Staðan

Aftur erum við komnir með fimmtán stiga forskot á City og núna eru tíu umferðir eru eftir og City með leik til góða. Datt einhverjum í hug að við myndum ná slíku forskoti á þessu tímabili? Ef svo er, þá megið þið klappa ykkur á bakið því þið eruð snillingar! City spila á mánudag við Aston Villa á útivelli og bind ég litlar vonir við að Villa menn geri okkur einhvern greiða þannig að líklegt að þetta verði tólf stig á mánudag.

Nú koma tveir stórleikir í röð. Fyrst er það Real Madrid á þriðjudaginn í meistaradeildinni og svo Chelsea í FA Bikarkeppninni á sunnudag eftir viku. Party on!

Tíst dagsins

Viðtal við Ferguson eftir leikinn