Rauðu djöflarnir

Meistaradeild Evrópu

Real Madrid 1:1 Manchester United

skrifaði þann | 19 ummæli

Hver hefði ekki þegið þessa niðurstöðu fyrirfram? Eins og var alveg vitað fyrir leikinn var stillt upp til svakalegrar baráttu í leiknum. Jones var ekki beinlinis settur til höfuðs Ronaldo en vissi þó alltaf… eða næstum því alltaf hvar hann var. Welbeck, Rooney og Kagawa voru síðan hlaupageiturnar.

Leikurinn var hasar frá upphafi og besti maður United í leiknum, David de Gea, kom strax á fimmtu mínútu með frábæra fingurgómavörslu frá Coentrão, í stöng og út. Gríðarlega mikilvæg varsla og hefði breytt miklu ef sá hefði farið inn. Sjá GIF mynd.

Real pressaði frá upphafi og United dró sig verulega aftarlega og reyndi að stíla á skyndisóknirnar, alveg eins og menn höfðu gert ráð fyrir. Reyndar var það svo að Kagawa datt oft fremst þegar Rooney og Van Persie voru frekar úti á köntum

Það var því frekar gegn gangi leiksins, en í stil við staðsetningar Kagawa þegar hann vann horn eftir baráttu við Sergio Ramos við vítateigslínuna, reyndar ranglega því boltinn fór af Shinji. Rooney tók hornið, Danny Welbeck hristi Ramos af sér, þó sá síðarnefndi héngi í honum, og Danny náði síðan glæsilegum skalla í hornið fjær. Reyndar stóði López sig ekkert sérlega vel þarna en markið engu að síður magnað.

Real setti þá pressuna enn frekar, United var enn aftar og markið lá í loftinu. Eini veiki kafli De Gea var um þetta leyti, hann átti tvær frekar máttlitlar kýlingar sem þó sköpuðu ekki vanda. Hann átti síðan ekki nokkurn möguleika í jöfnunarmark Real. Snarlega tekið innkast vinstra megin barst til Di María og Phil Jones þeim megin á vellinum frekar en að vera nær Ronaldo. Því var það þegar fyrirgjöf Di María kom þá var Evra eini maðurinn í Ronaldo. Ekki að það skipti máli því stökk Ronaldo var óheyrilega hátt og skallinn hamarfastur út við stöng, gersamlega óverjandi fyrir De Gea og eins og Fergie sagði eftir leik

What a header from Ronaldo, unbelievable. You can’t stop that. I said to Patrice at half-time „Patrice, did you not want to challenge for that?“ but then I saw the video and thought „what was I talking about?

Stuttu seinna spiluðu Kagawa og Van Persie vel saman vinstra megin við teiginn og Robin átti flotta fyrirgjöf sem Welbeck komst í en López varði skot hans.

Engu að síður var það pressa Real sem var aðalmálið. Í hvert sinn sem United náði boltanum í vörninni áttu þeir í mesta basli við að koma boltanum áfram, halda honum og sækja. Eftirtektarvert þó alltaf í leiknum að þegar Van Persie fékk boltann náði hann alltaf að gera eitthvað af viti. Vörnin hélt þó út hálfleikinn með góðri frammistöðu, nema Rafael virkaði óöruggur, fékk gult fyrir klaufalegt tuddabrot á Özil. De Gea var aftur kominn í stuð, varði t.d. vel frá Özil.

Rétt fyrir hálfleik var Phil Jones nokkuð heppinn að sleppa við víti þegar hann ýtti helst til hressilega á Di María en við sluppum með 1-1 inní hálfleik

Í seinni hálfleik var að miklu leyti sama upp á teningnum, en þó tók United mun betur á móti pressu Real. Rafael var t.d. traustari. Bæði lið áttu þó mjög góð færi. Flest færi Real voru þó skot af lengra færi og nær öll þeirra sá De Gea um, ýmist af öryggi eða með glæsilegum vörslum. Sú besta kom þegar Coentrão hljóp upp að fjærstöng og komst á endann fyrirgjöf Khedira. De Gea þurfti að beita fótunum með tilþrifum enda ekki í jafnvægi til að skutla sér. Sjá GIF mynd.

Dómari leiksins var annars frekar slakur án þess að hallaði á annað liðið. Hann hefði algerlega getað gefið rautt spjald á Raphaël Varane fyrir að sparka í og toga í Evra þegar sá síðarnefndi var allt í einu kominn inn fyrir vörn Real eftir frábæra stungusendingu. Hann sá þá ekki einu sinni ástæðu til að flauta.

Giggs kom inná fyrir Kagawa á 64. mínútu og stuðningsmenn Real sýndu honum þann heiður að klappa fyrir honum þá. Kagawa hafði verið frekar áhrifalaus mestan part leiksins og átti það sinn þátt í að Rooney þurfti að vinna enn meira og oftast þannig að lítinn árangur bar. Rooney fór reyndar útaf undir lokin fyrir Anderson.

En um miðjan hálfleikinn átti Van Persie færi í tvígang sem hefði mátt nýta. Fyrst fékk hann stungu frá Rooney en López varði í slá, Real hreinsaði og Carrick skallaði háan svifbolta inn á teiginn þar sem Van Persie lúrði órangstæður en hitti boltann illa, og Alonso náði boltanum áður en hann lak yfir línuna.

Það sem eftir lifði leiks var leikur United betri en hann hafði verið. De Gea sá um að verja skotin en sóknir United voru gríðarhættulegar. Boltinn lá eitt sinn fyrir Giggs í opnu færi í teignum en hann ákvað af óskiljanlegum ástæðum að taka snertingu og boltinn fór á endanum af honum útaf. Phil Jones átti mikilvæga blokkeringu á Ronaldo við markteig á 91. mínútu en United átti síðasta færið. Diego López varði þá mjög vel skot Van Persie, United fékk horn, en dómarinn flautaði af eftir 92 mínútur og 55 sekúndur, og leyfði ekki hornið. Hann hafði greinilega ekki áhuga á að reglan segi að spila eigi að lágmarki viðbótartímann.

‘Skemmtilegustu’ tilþrif dómarans voru annars gul spjöld sem hann gaf Van Persie og Valencia. Van Persie fyrir að þreifa á skeggi Ramosar, og Valencia fyrir að vera með hendi þar sem Ramos gat skallað í hana. Já, Sergio Ramos er ekki mesti heiðursmaður á velli, en gott að hann er heill heilsu, það leit út eftir bæði atvikin eins og hann hefði höfuðkúpu- eða kjálkabrotnað

Allt í allt mjög góð frammistaða. Það er ekki hægt að líta framhjá því að United spilaði mjög aftarlega og manni var fjarri því að vera rótt. En vörnin stóð sig og þegar hennar naut ekki við var maður leiksins til varnar, David de Gea. Ef einhver er enn að efast um hæfileika þessa pilts þá hlýtur þessi leikur endanlega að kveða þá vitleysu í kútinn.

Það er ekki síður gaman að því að næstbesti maður United var annar gríðarlega vanmetinn og stundum úthrópaður leikmaður, Danny Welbeck. Hann var hreinlega út um allt. Annað hvort að berjast um að hirða boltann af Real mönnum eða að halda uppi spili, skapa, nú eða skora eina markið okkar. Vonandi að þessi frammistaða hans þaggi sömuleiðis niður í gagnrýninni á hann.

Þriðji sem ég sé ástæðu til að hrósa er Robin van Persie. Hann hefði svo sem mátt skora, en engu að síður var það gríðarlega mikilvægt í þessum stressleik að ef boltinn kom á hann mátti stóla á að hann næði að taka hann til sín, halda honum og skila honum frá sér. Venjulega væri það á miðjunni og frammi, en pressan var svo mikil að hann var iðulega að þessu allt að eigin teig.

En aftur, þetta var mikið streð. Heppnaðar sendingar voru nær hending, Real náði 69% hlutfalli en United aðeins 62%. Til samanburðar var versta hlutfall okkar í Meistaradeildinni hingað til 85%. Ótrúlegar tölur, og ekki bara okkar.

Tístval kvöldsins:

https://twitter.com/Tr16ia/status/301807719466274816

Ljúkum þessu með innilegu faðmlagi, komdu nú heim, vinur!

 

Meistaradeild Evrópu

Liðið gegn Real

skrifaði þann | 10 ummæli

Liðið er komið og lítur svona út:

De Gea

Rafael Evans Ferdinand Evra

Welbeck Carrick Jones Rooney

Kagawa

Van Persie

Varamenn: Lindegaard, Valencia, Giggs, Hernández, Smalling, Cleverley

Ja hér. Welbeck og Rooney á köntunum? Eða bara alls staðar? Bara einn varnarmaður á bekk!

Þegar ég bjóst við baráttuliði var ég ekki alveg að hugsa svona. Þetta er algerlega magnað!

Liðið hjá Real er eins og spáð var nema Di María er heill og kemur inn fyrir Higuain og Benzema fer í senterinn. Varane er inni, enda spilað vel að undanförnu og Pepe ekki 100%

Meistaradeild Evrópu Sagan

Real Madrid á morgun

skrifaði þann | 17 ummæli

Real Madrid – Manchester United.

Real Madrid – Manchester United.

Real Madrid – Manchester United.

Þeir gerast ekki stærri og söguþrungnari leikirnir í Evrópukeppninni. Tvö stærstu lið álfunnar síðustu 60 árin leiða saman hesta sína enn á ný og gefa mér afsökun til að týnast í sögulegri upprifjun þar sem hver viðureignin var annarri stærri. Leyfið mér það og ég lofa að ég kemst á endanum í að fjalla um nútímann.

Fyrsti leikur þessara liða var fyrir 56 árum, 11. apríl 1957. Manchester United hafði storkað ensku deildarkeppninni og knattspyrnusambandinu og ákveðið að taka þátt í Evrópukeppni meistaraliða. Í undanúrslitum mættu þeir Evrópumeisturum síðustu tveggja ára og fengu kennslustund. Fyrri leikurinn fór 3-1 í Madríd og það var bara sárabót að ná 2-2 jafntefli á Old Trafford eftir að Real komst í 2-0.

Eftir flugslysið í München var Real Madrid eitt þeirra liða sem sýndu United höfðingsskap og vináttu. Þeir buðust til að lána leikmenn, nokkuð sem Enska deildin bannaði af víðkunnri tillitsemi, börðust fyrir því að United var boðið sæti í Evrópukeppninni 1958-9, sem Enska deildin stöðvaði af sömu tillitsemi og hjartnæmni, og léku síðan haustið 1959 tvo vináttuleiki við United, heima og heiman.

United komst aftur í Evrópukeppni meistaraliða 1965-6 en töpuðu í undanúrslitum gegn Partizan, þegar Real beið í úrslitum.

En tveim árum síðar var aftur kominn tími á risaslaginn. Fyrri leikurinn var á Old Trafford og Georgie Best skoraði eina markið. Í seinni leiknum voru United undir 3-1 í hálfleik en Busby minnti þá á í klefanum að einungis vantaði eitt mark og United brást við með að ná jafntefli 3-3. Bæði er til fimmtán mínútna samantekt úr leiknum, en líka leikurinn allur fyrir þau sem hafa tíma (og skilja þýsku).

Við þurfum ekkert að rifja upp hvers vegna Evrópukeppni meistaraliða var Unitedlaus í 25 ár,  en aftur var komið að því að Evrópumeistarar stigju á stokk þegar þessi lið mættust. Í þetta sinn var það Manchester United, og árið var 2000. United var að rúlla upp deildinni, voru helst til varkárir í útileiknum á Santiago Bernabéu, komu heim með 0-0 jafntefli og töpuðu síðan heima 2-3 í leik sem breytti knattspyrnufílósófíu Sir Alex upp frá því. Rob Smyth segir betur frá því en ég gæti nokkurn tímann gert.

Síðast léku þessi lið saman vorið 2003. Tap í Madrid, 1-3, olli því að verkefnið á Old Trafford var óviðráðanlegt, en leikurinn varð magnaður.

Það er ekki oft sem leikmaður andstæðinganna fær standandi lófaklapp þegar hann gengur af velli á Old Trafford, en Ronaldo (orginallinn) átti það svo sannarlega skilið eftir þennan magnaða leik.

En nú er árið 2013.

Real Madrid urðu verðskuldað Spánarmeistarar í fyrra, en hafa gefið gríðarlega eftir í vetur í deildinni. Altalað er að José Mourinho fari frá liðinu í sumar og það er útilokað annað en að nú sé allt kapp lagt á að vinna Meistaradeildina. Real kemur inn í þennan leik eftir auðveldan sigur, 4-1 á Getafe um síðustu helgi og mun blása til sóknar á Santiago Bernabéu. Líkleg uppstilling er

Diego López

Arbeloa Ramos Pepe Coentrão

Khedira Alonso

Benzema Özil Ronaldo

Higuain

Angel di Maria er meiddur og verður frá í báðum leikjum.

Þarna þarf engan að kynna nema helst Diego Lopéz sem kom frá Sevilla í janúar og er ágætis varaskeifa fyrir Casillas. Það er síður en svo árennileg sókn og miðja í þessari uppstillingu og það verður gríðarlega spennandi að sjá hvernig Fergie stillir þessu upp. Mun Phil Jones spila á miðjunni? Verður Valencia yfirfrakki á Ronaldo?

Eins og ég lýsti að ofan höfum við í tvö síðustu skipti farið flatt á útileik á Bernabéu og það er spurning hvort að nú muni Sir Alex ákveða að sókn sé besta vörnin og gerast eilítið djarfur. Það sem mér finnst hins vegar algerlega skýrt er að vinnusemi er lykill að þessum leik. Þetta er svona leikur þar sem fyrir þrem árum hefði Park Ji-sung verið fyrsta nafnið á liðsblaðið.

En án ábyrgðar, með smá óskhyggju, ætla ég að spá þessu svona

De Gea

Rafael Ferdinand Evans Evra

Valencia Carrick Jones Welbeck

Rooney

Van Persie

Vidic er líklega enn ekki nógu sterkur í tvo leiki á skömmum tíma og þá er vörnin örugglega svona ef Evans er heill eftir sunnudaginn. Valencia mun spila og vinna varnarvinnu betur en Nani nokkurn tíma, Carrick, Rooney og Van Persie munu örugglega spila og ég vel Jones (aftur, ef hann er heill eftir sunnudaginn) og Welbeck þarna vegna þess að þeir munu hlaupa og hlaupa og hlaupa allan leikinn. Og ekki eins og hauslausar hænur. Sama á við um Rooney. Það verður gríðarleg barátta á miðjunni móti Khedira og Alonso og til að brjóta það niður þurfum við Jones og Rooney og þeir ásamt Carrick eiga að geta haldið boltanum og spilað honum án þess að vera að gefa hann frá sér að óþörfu. Svo er jafnvel spurning hvort Jones þurfi ekki að veita Özil sérstaka athygli.

Ég treysti síðan Rooney og Van Persie til að nýta eitt færi, því það er algerlega nauðsynlegt að fara heim með mark. Markaskorarar United í leikjum við Real Madrid eru Tommy Taylor, Bobby Charlton, George Best, David Sadler, Billy Foulkes, Beckham, Scholes, og Van Nistelrooy. Allt risanöfn í sögu United, (Eða næstum. David Sadler á ‘ekki nema’ 335 leiki fyrir United…) og nú er komið að því að bæta á þennan lista. Wayne og Robin, ykkar verkefni!

Og svo ekki vera að gefa neinar heimskulegar aukaspyrnur innan við 30 metra frá marki, strákar.

En það fer að styttast í leik, og ég get hreinlega ekki beðið. Fyrir leikinn á sunnudaginn var fínt að tala um að deildin væri það sem skipti öllu máli, hún gerir það enn, en nú er það stóra stundin.

Þetta er það sem Evrópukeppnin snýst um.

Þetta er alvöru!

Enska úrvalsdeildin

Manchester United 2:0 Everton

skrifaði þann | 14 ummæli

12 stig!! Það verður nú ekki sagt annað en að það var alveg yndislegt að horfa liðið ná tólf stiga forskoti á City með tvö núll sigri á Everton í dag. Og það skemmir ekki fyrir að næsti deildarleikur United er gegn QPR á meðan City neyðist til að taka á móti Chelsea.

Ferguson stillti liðinu upp svona:

De Gea

Rafael Vidic Evans Evra

Valencia Jones Cleverley Giggs

Rooney van Persie

og á bekknum voru Amos, Anderson, Smalling, Hernandez, Carrick, Nani og Welbeck.

Í stað þess að rifja upp einstaka atriði, sem gerðust í leiknum, þá ætla ég einfaldlega að ræða það helsta sem ég tók eftir og fannst vert að nefna.

Mörkin

Fyrsta markið kom á þrettándu mínútu þegar Valencia skallaði boltann inn í teig, Persie nær honum og kemur honum til Giggs sem skýtur í stöng og inn. Tuttugu og þrjú ár í röð er gamli maðurinn búinn að skora í ensku deildinni! Njótið þess því við munum líklega aldrei sjá slíkt aftur. Skemmtileg staðreynd, Giggs var byrjaður að skora í deildinni áður en Jones og Rafael voru fæddir.

Á 45. mín nær RVP að skora annað mark United. Rafael var allt í einu mættur á miðjuna og á alveg frábæra stungusendingu á RVP og fór hann, í annað skiptið í leiknum, hægra megin framhjá howard en í þetta skiptið klúðraði hann ekki þó að Heitinga hefði verið hársbreidd frá því að verja boltann. Ben Hibbs orðaði þetta ágætilega:

Vinnusemi

Frá fyrstu mínútu var United með svakalega pressu á leikmenn Everton. Þeim var einfaldlega ekki gefið neitt pláss á vellinum og í fyrri hálfleik var Jones aðalmaðurinn í að refsa þeim. Eins og ég nefndi í upphituninni þá er Fellaini langhættulegasti leikmaður Everton og var Jones greinilega settur inn með það hlutverk að passa upp á hann. Ekki hægt að segja annað en að hann stóð sig frábærlega í því hlutverki. Jones var með 96% sendingarhlutfall í fyrri hálfleik sem er vægast sagt frábært! Það sást að Fellaini varð fljótt pirraður og náði sér aldrei á strik í leiknum. Mission accomplished!

Hinsvegar sáum við hættuna sem skapast þegar Carrick er tekinn út og Jones settur inn í staðinn. Jones missti boltann á stórhættulegum stað og Everton hársbreidd frá því að skora þegar Rafael nær að pota boltanum í burtu á síðustu stundu.

Menn að komast í sitt gamla form

Í dag fengum við að sjá svipaða frammistöðu frá Vidic og við vorum orðin vön fyrir meiðslin. Hann var gjörsamlega stórkostlegur í vörninni og ég er ekki viss um að allir skilji hversu erfitt það er að skalla þessa þúsund háu bolta inn í teig í burtu. Hann og Evans eru alveg frábært varnarteymi.

Þrátt fyrir að hvorki skora né gefa stoðsendingu í þessum leik, þá finnst mér Rooney vera byrja spila aftur frábærlega fyrir liðið. Þegar hann er í stuði þá spilar liðið svo miklu betur þar sem hann er gæjinn sem reglulega dreifir boltanum út á kantmennina, gefur stungusendingarnar, er mættur inn í teig tilbúinn að skora o.s.frv. Einnig magnað að það héldu flestir að hann myndi vera hvíldur eftir 90 mínútur með landsliðinu í vikunni, orkan sem drengurinn hefur er alveg mögnuð. Megi hann vera í miklu stuði á miðvikudag!

Að sama skapi þá fannst mér RVP ekki eiga sérstaklega góðan leik í dag. En hvað getur maður sagt þegar leikmaður er ekki að spila frábærlega, nær að skora einu sinni og gefa stoðsendingu í tvö núll sigri? Ég á satt að segja ennþá erfitt með að trúa því að við náðum að næla í drenginn. Ótrúlegur leikmaður.

Ferguson og Giggs

Ferguson sagði eftirfarandi í viðtali eftir leikinn:

„We have got to win our games anyway, so it didn’t matter what happened to City on Saturday,” Sir Alex told Sky Sports. “That’s the way we should look at it and I’ve been saying that for week. If we concentrate on our own game then we’ll be okay.“

„I was going to make about seven changes but when I got the result, I felt this was a more important game for us because it could give us a comfortable lead. We can make changes later on in the season. It is realistic; we knew that if we got a good result today then we’d be in a positive position.“

„The first half, I thought they dominated for 20 minutes in terms of possession and had a couple of chances from corner kicks. They had some great deliveries from Leighton Baines but we saw it through. In the second half, we played much better without scoring the goals. We were in control.“

Hann var svo spurður hvort það væru einhver lýsingarorð eftir til að lýsa Ryan Giggs og hann svaraði:

„I think they have all been used up and I don’t think he needs any himself,” the boss said. “He lives on and is a fantastic human being. Today, at 38 years of age, or 39, or he might even be 40, he was up and down the pitch and showed fantastic energy for the game. It was wonderful to see.“

Þess má geta að Giggs skoraði sitt hundrað og áttunda deildarmark fyrir United. Í núverandi leikmannahópi er Rooney sá eini sem hefur fleiri (139). Giggs varð svo þriðji elsti markaskorari úrvalsdeildarinnar (39 ára og 73 daga gamall), efsta sætið vermir Teddy Sheringham (40 ára og 268 daga gamall) og í öðru sæti er Dean Windass (39 ára og 235 daga gamall)

Aðrir punktar

Mér þótti gaman að sjá De Gea óhræddan að fara af marklínunni og kýla boltann í burtu. Þó svo að það hafi skapað hættu í eitt skiptið. Ég get ekki beðið eftir því að ræða við fólk sem hefur sagt hann vera flopp og segja „I told you so!“. Allt tal um Begovic er algjör þvæla og ég segi bara njótið þess að sjá drenginn verða einn af bestu markvörðum heimsins á næstu árum!

Valencia átti fínan leik í dag sem er mjög ánægjulegt þar sem hann hefur átt erfitt á þessu tímabili. Ef við fáum að sjá hann byrja spila nálægt sínu besta þá mega önnur lið fara passa sig. Kæmi mér ekki á óvart ef hann yrði mikilvægur fyrir okkur í leikjunum gegn Real Madrid.

Besti leikmaður leiksins

Ef Jones hefði spilað allan leikinn á sama tempói og hann gerði í fyrri hálfleik, þá væri hann sjálfkjörinn hérna. En þar sem hann var tekinn af velli í byrjun seinni hálfleiks þá verður maður að líta annað. Vidic var algjör nagli allann leikinn í vörninni og byrjaður að sýna sína gömlu takta eins og ég nefndi hér fyrir ofan. Rafael var alveg frábær og það er alveg afskaplega gaman að horfa á hann spila svona vel fyrir liðið. Hefur einhver náð jafn miklum framförum síðustu 2 ár? Leyfi mér að efast stórlega um það. Verð að játa það að ég held enn í vonina um að við fáum að sjá sömu framfarir hjá bróður hans, Fabio. Maður verður hreinlega spenntur yfir tilhugsuninni um þá tvo í svona formi, sitthvorum megin í vörn United.

Ég á rosalega erfitt með að velja á milli Rafael og Vidic. Þar sem ég stjórna þessari leikskýrslu (og neita að fylgja einhverjum reglum) þá ætla ég hreinlega að velja þá báða. Og hananú!

Tíst

Ég bað ykkur fyrir leikinn um að tísta með „hastag-ið“ #Djöflarnir og þið stóðuð ykkur ansi vel. Höldum því áfram! Hér fyrir neðan eru helstu tíst (e. tweets) sem ég gat fundið.

https://twitter.com/FootballFunnys/status/300682593324638208

https://twitter.com/BigRed_M/status/300660776836952065

Enska úrvalsdeildin

Liðið gegn Everton

skrifaði þann | 11 ummæli

Liðið er svona:

De Gea

Rafael Vidic Evans Evra

Valencia Jones Cleverley Giggs

Rooney van Persie

Varamenn: Amos, Anderson, Smalling, Hernandez, Carrick, Nani, Welbeck

Jones settur í destroyer stöðu á miðjunni til að taka á Fellaini án efa. Ekkert gefið eftir í framlínunni eða vörninni, Rio kemur inn á móti Real. Carrick á bekknum ef þarf, en vonandi verður þetta þannig að hægt verður að taka menn útaf til að hvíla. 12 stigin verða að verða að veruleika! Koma svo