Rauðu djöflarnir

Enska úrvalsdeildin

Everton á Old Trafford

skrifaði þann | 18 ummæli

Déjà vu? Það var það fyrsta sem ég hugsaði er ég sá United sigra Fulham 1:0 um síðustu helgi og ná 9 stiga forskoti á City, sem gerði 2:2 jafntefli gegn Liverpool. Af hverju Déjà vu spyrjið þið kannski? Nú vegna þess að næsti leikur er gegn Everton á Old Trafford!

Fyrir þá sem eru búnir að gleyma, á síðasta tímabili var United með 6 stiga forskot á City þegar Everton kom í heimsókn á Old Trafford. United leiddi leikinn 4-2 (með mörkum frá Rooney (2), Welbeck og Nani) og tuttugu mínútur eftir á leikklukkunni. Sigurinn og þrjú stig nánast komin í hús. En svo gerist það. Á þriggja mínútu kafla nær Everton að gera hið ómögulega, þeir skora tvö mörk og stela sigrinum af United. Það þýddi að munurinn á milli United og City fór niður í 3 stig sem var sérstaklega slæmt þar sem City var með betri markatölu og United átti eftir að spila á Etihad. Flestir eru sammála um að þarna hafi verið vendipunkturinn á síðasta tímabili er City náði titlinum af United. Ef einhver hefur svo áhuga að sjá það helsta úr þessum hörmungarleik, þá er hér eitt jútúb vídeó sem reddar því.

Á fréttamannafundinum í gær var Ferguson ekkert að skafa utan af hlutunum og sagði United einfaldlega hafa tapað titlinum þegar liðin mættust síðast á Old Trafford:

„It’s a tough game on Sunday,“ Sir Alex said at his pre-match press conference. „We were 4-2 up with seven or eight minutes to go. It was unexpected and we have to anticipate the unexpected in the run-in. That was a bad blow for us and it cost us the league.“

„Everton are very experienced and, if you look at their record, they’ve only lost three games this season [the same number as United]. They’re obviously hard to beat.“

„But the team is playing well, I’m pleased with their form and I’m pleased that the players we’re changing around, when I’m making different team selections, are buying into it well.“

„They’re all contributing in their own way and that gives us a better chance in terms of dealing with the various competitions we’re in now.“

Ég hef tröllatrú á að leikmenn United komi snarbrjálaðir inn í þennan leik. Ekki nóg með að þeir séu fúlir fyrir jafnteflið á síðustu leiktíð heldur vilja þeir eflaust einnig hefna fyrir 1-0 tapið á Goodison Park í fyrsta leik liðsins á þessu tímabili. En þrátt fyrir mikilvægi leiksins þá eru góðar líkur að Ferguson geri einhverjar breytingar með næsta leik í huga. Aðeins þremur dögum á eftir mætir United Real Madrid á Santiago Bernabéu í 16 liða úrslitum meistaradeildarinnar. Semsagt tveir gríðarlega erfiðir og mikilvægir leikir núna hjá United en svo léttist róðurinn aðeins er United mætir Reading á Old Trafford og QPR á Loftus Road.

Í öðrum fréttum þá var Ferguson sektaður um £12,000 fyrir ummæli hans um dómara leiks United gegn Tottenham.

Tölfræði
  • Í síðustu sex leikjum hefur United unnið fimm og gert jafntefli í einum
  • Í síðustu sex leikjum hefur Everton unnið tvo, gert þrjú jafntefli og tapað einum
  • Í síðustu 20 heimaleikjum hefur United hefur unnið 18, gert eitt jafntefli og tapað einu sinni
  • Í síðustu 20 útileikjum hefur Everton hefur unnið 5, gert 12 jafntefli og tapað þrisvar sinnum
  • Í síðustu 10 viðureignum á milli liðanna hefur United sigrað fjórum sinnum, Everton tvisvar og fjórir leikir endað í jafntefli
  • Í síðustu 20 viðureignum á milli liðanna á Old Trafford í deildinni hefur United sigrað 15 sinnum, Everton eitt skipti og fjögur jafntefli. Markatalan svo 43 mörk gegn 16, United í vil.
Meiðsli/Veikindi:

Samkvæmt Physioroom þá er United með fjóra leikmenn á meiðslalista, Fletcher, Young, Carrick og Jones. Fletcher hefur sitt fastasæti á þessum lista og ef hann kemur einhverntímann til baka, þá gerist það í fyrsta lagi á næsta tímabili. Á fréttamannafundinum í gær sagði Ferguson að Young, sem hefur verið að glíma við hnémeiðsli síðustu vikur, væri kominn til baka og að Carrick væri orðinn heill heilsu eftir smávægileg meiðsli (Vináttulandsleikjameiðsli?). Einnig sagði hann að allir leikmenn liðsins hefðu sloppið við meiðsli eftir vináttulandsleikina.

Í vikunni sagði Stuart Pierce, þjálfari U21 árs landsliðs Englands, að Phil Jones hefði veikst og að hann hefði fengið það sem á ensku er kallað ‘Shingles’. Ferguson, sem var greinilega mjög ósáttur við Pierce fyrir að tala við fjölmiðla um veikindi Jones, sagði að þetta væru ekki alvarleg veikindi. Ekki er samt vitað nákvæmlega hversu lengi Jones verður frá en líklegt er að það taki drenginn tvær til fjórar vikur að jafna sig á þessum veikindum.

Hjá Everton eru Séamus Coleman og Tony Hibbert meiddir en mikilvægustu fréttirnar eru að Fellaini gæti misst af leiknum United vegna meiðsla sem eru hræðilegar fréttir fyrir stuðningsmenn Everton.

Hvern skal varast?

Marouane Fellaini

Þrátt fyrir að vafi leikur á að hann muni spila gegn United á morgun þá er varla hægt að benda á annan leikmann Everton liðsins en hinn hávaxna og hárprúða Belga, Marouane Fellaini. Drengurinn er einfaldlega langbesti leikmaður Everton liðsins og er að eiga sitt besta tímabil í ensku deildinni þar sem hann hefur spilað 20 leiki, skorað 10 mörk og gefið 3 stoðsendingar (23 leikir, 11 mörk og 5 stoðsendingar ef við tökum FA bikarinn og Capital One Cup með í pakkann). Ekki slæmt fyrir leikmann sem vill helst spila sem varnarsinnaður miðjumaður.

Í síðustu viðureign United og Everton, sem var í ágúst 2012, var hann án efa langbesti maður vallarins og sá til þess að Everton tók öll þrjú stigin í leiknum. Það var ekki nóg að hann skoraði sigurmarkið á 57′ mín, heldur náði hann að hrella varnalínu United allan leikinn. The Dail Mail til dæmis lýsti honum sem ‘Unplayable’ þetta kvöld. Hinsvegar er mikilvægt að nefna það að í þeim leik neyddist Ferguson að stilla Carrick við hlið Vidic í vörninni og Valencia sem hægri bakvörð vegna meiðsla. En það er engin spurning að United þarf að hafa sérstakar gætur á Fellaini, ef hann spilar, ef vil viljum forðast endurtekningu á úrslitum fyrsta leik tímabilsins. (Ef þið þekkið einhvern Everton stuðningsmann, þá er hægt að kaupa bol með þessari mynd af drengnum)

Líklegt byrjunarlið

Eins og þið vitið þá er næstum því ómögulegt að giska hvernig Ferguson ákveður að stilla upp liðinu fyrir leiki. Ég ætla þess vegna að bara henda upp liðinu sem ég vil sjá spila á morgun.

De Gea

Rafael Ferdinand Vidic Evra

Carrick Cleverley

Valencia Rooney Kagawa

Van Persie

Að lokum

Björn skrifaði flotta grein í dag um fjármál United þar sem hann lítur yfir og útskýrir grein Andy Green. Mæli sterklega með því að þið lítið á hana.

Til ykkar sem eru skráð á Twitter. Á meðan leiknum stendur, verið dugleg að tísta með #Djöflarnir. Ég hef mikinn áhuga á að bæta skemmtilegum tístum í leikskýrsluna á sunnudag þannig að ‘Bring it On’!

Þá er komið að ykkur! Hvaða leikmenn viljið þið sjá í byrjunarliðinu? Hvernig myndu þið stilla upp liðinu? Hvernig haldið þið að leikurinn fari? Hvaða leikmenn þurfum við að varast hjá Everton?

Fjármál Pistlar

Skuldlaust United?

skrifaði þann | 6 ummæli

Þau sem eitthvað hafa fylgst með fjármálasögu United síðustu árin vita hver Andy Green, eða @andersred er. Enginn hefur gert stöðu mála betri skil og hann hefur verið harður andstæðingur Glazeranna. Í bloggfærslu sem hann birti í gær fjallar hann ítarlega um möguleikann á því að United nái að greiða upp skuldir sínar á næstu árum, ástæður þess og hugsanlegar afleiðingar. Það er rétt að taka hér saman helstu niðurstöður, en ég hvet alla til að lesa greinina, þó löng sé.

Eins og vitað er keypti Malcolm Glazer Manchester United fyrir tæpum átta árum með skuldsettri yfirtöku. Síðan þá hefur stór hluti hagnaðar United farið í að greiða þessar skuldir. Engu að síður fóru þær stighækkandi enda voru vaxtakjör slæm. Í júní 2010 voru heildarskuldir félagsins 784m punda. Síðan þá hafa hlutir frekar snúist við. PIK lánin svokölluðu, lang verstu lánin, voru greidd upp á árinu 2010 án þess að fram kæmi hvaðan sá peningur kæmi. Tekjur af AON auglýsingasamningnum og Ronaldo sölunni voru síðan notaðar til niðurgreiðslu, og loks var helmingur tekna hlutafjárútboði síðasta árs notaðar til skuldaniðurgreiðslu og nú er svo komið að 30. september sl. voru skuldirnar 360m punda.

Green telur nú ljóst að tekjur United muni aukast til muna næstu ár og telur þar til Chevrolet samninginn, síhækkandi sjónvarpsréttartekjur og endurnýjun á treyjusamningnum við Nike. Hann spáir að tekjur muni hafa hækkað um 110m punda, eða 35%, þegar kemur fram á 2015 af þessum þrem ástæðum. Að auki muni 40m punda koma úr öðrum áttum, samtals 150m punda.

Á kostnaðarhliðinni telur hann ekki líklegt að leikmannakostnaður hækki mjög, nýju ‘Financial Fair Play’ reglurnar muni halda aftur af leikmannakaupverði og launum. (þessu tengt sá ég í vikunni af að leikmannatilfærslum á síðasta ári voru 10% kaup, 70% frjálsar Bosman sölur, og 20% lán. Man þó ekki hvort þetta voru evrópskar tölur eða enskar). Einnig muni það fyrst og fremst verða tekjur þar sem öll liðin njóta hækkana (sjónvarpið) sem verði til hækkunar launa.

United standi því betur að vígi og muni enda með meiri hagnað eftir reglulega starfsemi, sem nemur allt að 100m punda á ári sem nýta má til skulda- og arðgreiðslna.

Það er nokkuð ljóst, telur hann, að þetta muni ekki leiða til aukinnar eyðslu í leikmenn, bæði eins og að ofan er talið, og eins þar sem lýst var yfir í tengslum við hlutafjárútboðið að leikmannaútgjöld yrðu áfram svipuð og þau hafa verið.

Niðurstaðan er því: Af ástæðum sem að mestu eru ótengd eigendunum hefur félaginu tekist að vinna á þessari gríðarlegu Grýlu sem skuldsetningin var og því má áætla að skuldir félagsins verði ekki baggi til að hafa áhyggjur af í framtíðinni. Heildarkostnað af Glazerunum metur  hann að verði kominn í 1ma punda árið 2016 þannig að þó svona sé komið nú, er ekki nokkur ástæða til að telja þá einhverja frábæra eigendur. Ljóst er að án Sir Alex hefði þessi saga orðið allt önnur.

En, farið og lesið alla greinina.

Við vitum að innan örfárra ára eða jafnvel mánaða verður kominn nýr stjóri á Old Trafford. Það er erfitt að sjá fyrir sér að stjóri á því kaliberi sem við viljum þurfi ekki að fá að eyða peningum, nema kannske Moyes verði ráðinn. Ofangreint gæti því hugsanlega veitt svigrúm til þess, en engu að síður er erfitt að sjá eigendurna breyta frá því sem verið hefur.

Að lokum ætla ég að smella hér inn mynd sem ég hef lumað á og átti að fara í aðra færslu um fjármálasöguna, sem bið hefur orðið á að skrifa. Þessi mynd sýnir án nokkurs vafa hversu aðhaldssamir United hafa verið í leikmannakaupum.

Árleg eyðsla í leikmannakaup
Gögn fengin frá transferleague.co.uk

Grafið er einfaldlega nettó eyðsla á hverju ári, með tveim breytingum sem jafna út risastórar sveiflur. Stærstu kaup síðustu ára, Dimitar Berbatov, voru gerð sumarið áður en Ronaldo fór. Á þeim tíma var samt yfirmönnum United algerlega ljóst að Ronaldo færi sumarið eftir, og því færi ég þessi kaup yfir á sumarið eftir. Á sama hátt var salan á Ronaldo þannig að hún setur tekjur af leikmannasölu það ár í 64m punda. Ég ákvað, af handahófi, að dreifa tekjunum af Ronaldo sölunni á fjögur ár.

Loks er rétt að minna á það að þegar Glazerar tóku við, lýstu þeir yfir að á hverju ári yrði eytt um 20m punda í leikmannakaup, og 25 að auki ef einhver alveg sérstakur var í boði. Það þótti ekki vita á gott þá… en raunin er sú að við erum fjarri því að hafa eytt þessu!

 

 

Leikmaður mánaðarins

Michael Carrick er bestur í janúar!

skrifaði þann | 4 ummæli

Michael Carrick spilaði vel í janúar

Það var hörku spennandi kosning hér á síðunni um leikmann janúarmánaðar en það fór á svo á endanum að Michael Carrick var kosinn bestur með 33% atkvæða, 2% meira en Patrice Evra sem kom næstur í valinu. Robin Var Persie var svo þriðji með 19% atkvæða.

Eins og venjulega spilaði Carrick næstum því allar mínúturnar í deildinni í janúar en var hvíldur í bikarleikjunum gegn West Ham. Hann hefur stjórnað miðjuspilinu eins og herforingi undanfarið og fyrir utan eina slæma sendingu aftur á De Gea í leiknum gegn Southampton (sem reyndist sem betur fer ekki of dýrtkeypt) þá steig hann ekki feilspor. Hans besti leikur var líklega gegn sínum gömlu félögum í Tottenham en því miður fell sú frammistaða í skuggann á jöfnunarmarki Tottenham í lok leiksins. Eftir slæma byrjun í haust hefur vörn United verið að spila betur og betur og má að einhverju leiti þakka yfirvegun Carricks aftast á miðjunni um það.

Að lokum er gaman að segja frá því að lesendur ManUtd.com völdu Robin Var Persie sem leikmann janúarmánaðar, nokkuð örugglega, með 53% atkvæða.

Pistlar Sagan

Flugslysið í München 1958

skrifaði þann | 1 ummæli

Í dag eru liðin 55 ár frá flugslysinu í München þar sem 8 leikmenn Manchester United, 3 starfsmenn félagsins og 12 aðrir létust.

Leikmennirnir voru Geoff Bent, Roger Byrne fyrirliði, Eddie Colman, Duncan Edwards, Mark Jones, David Pegg, Tommy Taylor og Liam Whelan.

Walter Crickmer, ritari félagsins, Bert Whalley yfirþjálfari og Tom Curry þjálfari létu einnig lífið.

Nöfn þeirra munu lifa meðan knattpspyrna er leikin undir merkjum Manchester United og við minnumst þeirra með ljóði Eric Winter, The Flowers of Manchester.

Minningarsíða um flugslysið

Minningarsíða á openberu síðunni, m.a. heimildarmynd í 9 hlutum um liðið og slysið.

Leikmaður mánaðarins

Leikmaður janúarmánaðar?

skrifaði þann | 11 ummæli

Fyrsti mánuður ársins búinn og komið að því að kjósa besta leikmanninn í janúar. United spilaði 7 leiki í janúar, sigraði 5 leiki (þar á meðal Liverpool!) og gerði svo tvö jafntefli. Góður árangur hjá okkar mönnum og sérstaklega ánægjulegt að sjá vörnina vera bæta leik sinn en United fékk aðeins 6 mörk á sig í janúar, sem er bæting um 5 mörk frá því í desember. Nokkrir koma til greina að þessu og stefnir þetta því allt í spennandi kosningu.

Leikir United:

Kosning:

[poll id="4"]
Uppfært (4. feb kl 16:45):
Menn hafa bent á að Rooney ætti skilið að vera tilnefndur líka, eftir að hafa átt tvo góða leiki í lok mánaðarins. Ég bið alla sem vilja kjósa hann að gera það með athugasemd við þessa grein. Slík atkvæði verða tekin góð og gild!