Rauðu djöflarnir

Enska úrvalsdeildin

United 2:0 WBA

skrifaði þann | 8 ummæli

Hið spræka lið West Bromwich Albion mætti til leiks í rigninguna á Old Trafford. Fyrir leik var rigningin reyndar svo mikil að óttast var um tíma að fresta þyrfti leiknum. Völlurinn fékk þó grænt ljós og leikurinn fór fram. Sir Alex kom mörgum á óvart með liðsvali sínu í dag en liðið sem hóf leikinn var svona:

De Gea

Smalling Evans Vidic Evra

Valencia Carrick Cleverley Young

Kagawa

Welbeck

Bekkur:

Lindegaard, Giggs, Hernández, Scholes, Büttner,Ferdinand,RvP

Kagawa kom óvænt beint í byrjunarliðið eftir langa fjarveru, Robin van Persie fékk verðskuldaða hvíld og Danny Welbeck fékk tækifæri í sinni réttu stöðu, uppi á toppi. United-menn byrjuðu leikinn af krafti og yfirleitt fór það í gegnum Kagawa sem spilaði í holunni fyrir aftan Welbeck. Welbeck, Young og Kagawa náðu vel saman í framlínunni og sköpuðu nokkurn usla. Strax á 9. mínútu leiksins kom fyrsta mark leiksins. Young og Kagawa tóku nettan þríhyrning, Young fékk boltann og dúndraði honum inn í teiginn þar sem McAuley varð fyrir því óláni að reka löppina í boltann, 1-0 fyrir United. Own goal mættur aftur.

Eftir markið hélt ég að United myndi ganga frá WBA í þessum leik. Liðið spilaði skemmtilegan og hraðan bolta og satt best að segja voru strákarnir hans Steve Clarke varla með í leiknum, liðið átti varla skot á markið í fyrri hálfleik. En þessir yfirburðir United skiluðu sér ekki í mörkum, fyrir framan markið gengu hlutirnir ekki upp og það vantaði aðeins meiri kraft og áræðni í sóknarleikinn. Liðið skapaði sér nokkur hálffæri en það var lítið um opin marktækifæri í þessum leik. Í lok fyrri hálfleiks fengu WBA-menn nokkrar aukaspyrnur á hættulegum stöðum en varnarlína United var, aldrei þessu vant, algjörlega vandanum vaxin.

WBA-menn voru töluvert sprækari í seinni hálfleik og leikurinn opnaðist í kjölfarið. Bæði lið sköpuðu sér nokkur hálffæri en United-menn voru klaufar að nýta sér ekki góðar leikstöður á meðan varnarlína okkar varðist fimlega með tæklingum og blokkeringum þegar WBA komst í skotfæri. Þannig gekk þetta út seinni hálfleikinn, liðin skiptust á að sækja án árangurs. Ferguson var þó augljóslega orðinn stressaður síðustu 20 mínútur leiksins því að þá sá maður að Valencia spilaði nánast sem bakvörður á meðan Smalling færði sig í miðvörðinn með Evans og Vidic. Þetta var líklega gert til þess að berjast  gegn Lukaku sem kom með aukinn kraft inní lið WBA.

Það var þó aðeins maður sem gat gert út um þennan leik, um miðjan síðari hálfleik kom Robin van Persie inná fyrir Kagawa og hann kláraði leikinn fyrir okkur á 91. mínútu með laglegu skoti við vítateigslínuna, staðan orðinn 2-0 og úrslitin því ráðin.

Heilt á litið var frammistaða liðsins svolítil vonbrigði, liðið spilaði flottan bolta en náði ekki að skapa sér færi gegn afar döpru liði WBA. Varnarmenn WBA voru oft á tíðum algjörlega úti á þekju og synd að við skulum ekki hafa getað nýtt okkur það betur. En á þessum tímapunkti er frábært að ná sigri og láta með því City þurfa að elta okkur áfram. Þessi frammistaða var líklega mörkuð af því að menn eru orðnir þreyttir eftir þessa leikjatörn og því ætti maður ekki að vera að kvarta yfir þessum þremur stigum.

Auk þessara þriggja stiga er það klárlega jákvætt að liðið hafi náð að halda hreinu. Varnarlínan var frábær í þessum leik og réði við allt það sem WBA henti að henni. Vidic, Evans, Smalling og Rio vernduðu De Gea afskaplega vel enda þurfti hann varla að taka þátt í þessum leik. Það er augljóst að Ferguson og þjálfarateymi hans hafa nýtt tímann á milli leikjanna til þess að fara vel yfir varnarleik liðsins. Það var einstaklega ánægjulegt að sjá Nemanja Vidic stíga upp og hann var einfaldlega frábær í þessum leik og óhætt að segja að hann hafi verið besti maður liðsins í leiknum, með þá Evra, Evans og Smalling í öðru sætu á eftir honum. Meira svona.

Einnig var gaman að sjá Kagawa koma svona sterkt til baka. Hann var arkítektinn af flestu því besta sem United gerði í fyrri hálfleik, spilaði boltanum frábærlega frá sér og birtist allstaðar á vellinum. Það er frábært að fá hann aftur og vonandi að hann nái að haldast heill út tímabilið.

Næsti leikur er svo á nýársdag gegn Wigan á útivelli, þrjú stig þar og þá er ljóst að jólavertíðin hefur reynst liðinu afar vel.

Enska úrvalsdeildin

Liðið gegn WBA

skrifaði þann | 9 ummæli

Það var í vafa hvort að leikurinn myndi fara fram vegna mikillar rigningar en eftir ástandsskoðun á vellinum hefur leikurinn fengið grænt ljós. Þetta eru þeir leikmenn sem munu hefja leikinn á rennblautum Old Trafford:

De Gea

Smalling Evans Vidic Evra

Valencia Carrick Cleverley Young

Kagawa

Welbeck

Bekkur:

Anders Lindegaard
Ryan Giggs
Javier Hernández
Robin van Persie
Paul Scholes
Alexander Büttner
Rio Ferdinand

Það er alltaf hægt að treysta á að það er ekki hægt að spá fyrir hvernig Ferguson stillir upp liðinu á milli jóla og nýárs. Kagawa byrjar inná, RvP á bekknum og loksins fær Danny Welbeck að spila í sinni réttu stöðu, frammi. Nokkuð spennandi byrjunarlið verð ég að segja.

WBA liðið er eftirfarandi:

Foster

Jones McAuley Ridgewell Tamas

Brunt Thorne Dorrans Odemwingie

Rosenberg Long

Enska úrvalsdeildin

WBA á morgun

skrifaði þann | 8 ummæli

Jólavertíðin er í fullum gangi og það þýðir bara að maður getur varla andað á milli leikja. Kvörtum þó varla yfir því. Eftir háspennuna gegn Newcastle er komið að því að fá eitt af spútnik-liðum deildarinnar í heimsókn, West Bromwich Albion. Steve Clarke og lærisveinar hans hafa komið flestum á óvart í vetur og sitja spakir í 6. sæti hafandi unnið frækna sigra á Liverpool og Chelsea. Þessi góði árangur liðsins er fyrst og fremst heimavallarformi þeirra að þakka en liðið sæti í 3. sæti á eftir Manchester-liðinum ef taflan tæki aðeins mark á heimaleikjum.

Þetta er fyrsta tímabil Steve Clarke sem stjóra en hann er auðvitað vel skólaður í aðstoðarþjálfaraskólanum hafandi verið aðstoðarþjálfari hjá Chelsea, West Ham og Liverpool. Hann hefur byggt gríðarlega vel ofan á það sem Roy Hogdson var að gera með liðið og hefur það stigið skref áfram undir stjórn Clarke. Liðið er afskaplega jafngott. Það er erfitt að segja að einhver einn leikmaður skari fram úr heldur myndar liðið sterka heild sem erfitt er að brjóta á bak aftur. Liðið hefur unnið tvo síðustu leiki sína en í síðasta leik meiddust Jonas Olson, Youssouf Mulumbu og Goron Popov, einnig er Claudio Yacob meiddur. Þetta er talsvert áfall fyrir WBA enda mynda Mulumbu og Yacob gríðarsterkt akkeri á miðjuni hjá WBA og því ljóst að hún verður veikari fyrir vikið. Vonandi eitthvað sem við getum nýtt okkur.

Nóg um WBA, Rooney er víst „meiddur“ og verður ekki með ásamt Phil Jones og líklegt er að Giggs og Scholes verði hvíldir. Shinji Kagawa gæti látið sjá sig á bekknum eftir langa fjarveru. Liðið vann auðvitað frábæran sigur á annan í jólum og þó að leikurinn hafi verið mikil skemmtun er ekki annað hægt en að gera miklar athugasemdir við varnarleik liðsins. Það er ekki mikill tími til æfinga á þessum árstíma og ég vona að Ferguson hafi sent varnarmenn okkar heim með myndbandsspólur af varnarleik liðsins gegn Newcastle. Dembum okkur í byrjunarliðið:

De Gea

Rafael Evans Vidic Evra

Valencia Carrick Cleverley Young

Hernandez Van Persie

De Gea heldur sínu sæti, Rafael kemur inn eftir „meiðslin“ sín og Vidic fær aftur leik. Markamaskínan Evra auðvitað á sínum stað. Á miðjunni kemur Cleverley inn við hliðina á  Carrick en það er óhætt að segja að fáir leikmenn í deildinni séu að spila jafn vel og hann akkúrat núna. Young kemur inn fyrir Giggs og Valencia heldur sæti sínu. Það kæmi mér ekki á óvart ef Welbeck eða annar miðjumaður komi í staðinn fyrir Valencia sem hefur vægast sagt verið afar dapur undanfarið. Fregnir herma að hann sé meiddur á ökkla en á meðan það eru bara sögusagnir verður hann að hysja upp upp um sig buxurnar. Á meðan Nani er frá er fátt um fína drætti á hægri kantinum og maður spyr sig hvort að Fergusons sé hreinlega að reyna að spila Valencia í gang? Hernandez og Van Persie eru svo sjálfkjörnir fram í fjarveru Wayne Rooney.

Ferguson á það auðvitað til að flippa algjörlega um jólin og því set ég þetta byrjunarlið án allrar ábyrgðar, aldrei þessu vant.

WBA er lið sem við eigum að sigra og höfum raunar gert það undanfarið, liðið hefur ekki unnið leik í síðustu 13 heimsóknum á Old Traff0rd. Við skulum endilega halda því áfram.

Ég spái 2-3 sigri í háspennuleik. Við lendum 2-0 undir en Evra, Carrick og Hernandez skora mörkin. Leikurinn er kl. 15.00 á morgun.

Enska úrvalsdeildin

Manchester United 4:3 Newcastle

skrifaði þann | 12 ummæli

Uppstillingin fyrir leikinn var mörkuð af því að Rooney og Young meiddust á æfingu í gær og Danny Welbeck veiktist í nótt. Giggs og Scholes byrjuðu því saman inná,

En það var hvorugur þeirra sem gerði afdrifarík mistök strax á fjórðu mínútu heldur Michael Carrick sem missti boltann til Demba Ba. Ba skaut og De Gea varði boltann beint fyrir fætur James Perch sem skoraði örugglega. Skelfileg byrjun hjá United, enn eina ferðina enn fáum við á okkur fyrsta mark. Það má ef til vill að hluta kenna De Gea um þetta, en boltinn var erfiður á rennblautum velli.

Eftir markið var leikurinn frekar jafn, United sótti meira, en sóknirnar strönduðu alla jafna við vítateiginn. Hernandez átti þokkalegar rispur hægra megin en náði ekki að koma boltanum almennilega fyrir í bestu sókninni.

Rétt eina ferðina enn náðum við þó að jafna. Van Persie tók aukaspyrnu frá hægri, inn á teiginn að því er virtist beint inn á vörnina en boltinn datt síðan inn á Chicharito sem með harðfylgi náði skotinu. Krul varði, hélt ekki boltanum og Evans var fyrstur á staðinn og renndi boltanum í netið. Fjórða markið frá Evans í vetur, og fimmta markið hans á ferlinum. Varnarmennirnir okkar eru svo sannarlega að skila mörkunum í vetur.

En einungis nokkrum mínútum síðar setti Evans boltann í eigið net úr skoti frá Ba. Cissé var fyrir innan Evans í rangstöðu og truflaði Evans klárlega. Línuvörðurinn flaggaði en Mike Dean ákvað að Cissé hefði ekki áhrif á leikinn. Skelfilegt mark og Sir Alex varð öskuillur eins og vænta mátti.

Síðasta kortérið í hálfleiknum var nokkuð fjörugt, liðin sóttu á víxl, besta færið kom þó hjá Newcastle, Marveaux smellti aukaspyrnu í þverslánna.

Í fyrri hálfleik var nákvæmlega eins og marga grunaði, miðjan var ekki nógu hröð og hreyfanleg hjá okkur og vörnin var jafn viðkvæm og hún er búin að vera í allan vetur. Erfitt að geta ekki haft neinn af þeim Rooney, Young, Welbeck, Nani, Anderson eða Kagawa til að setja inn á í svona stöðu.

Eina breytingin sem virtist augljóst að gera var að setja Cleverley inn á en það kom þó ekki í hálfleik. Í staðinn hellti Fergie sér yfir Mike Dean dómara og línuvörðinn líka áður en seinni hálfleikurinn byrjaði og var heppinn að vera ekki sendur upp í stúku.

Leikurinn hélt áfram að vera fjörugur og loksins fundu United menn leið að marki úr því sem eitt sinn var ólíkleg átt, en Patrice Evra skoraði sitt fjórða mark í deild á vetrinum og kom sér í fjórða sæti yfir deildarskorara. Í þetta sinn var þetta ekki skalli eftir horn heldur flott skot utan teigs, gegnum vörnina og inn.

Þá hélt maður nú að þetta færi að koma, United sótti en gamli United maðurinn Gabriel Obertan kom inn á, lét það verða sitt fyrsta verk að rúlla upp Smalling á kantinum, gefa fyrir og Papiss Cissé var næsta óvaldaður, og skoraði þrátt fyrir örvæntingarfulla tilraun Evra til að blokkera skotið. 2-3

Þá loksins kom Cleverley inná fyrir Scholes og aðeins þrem mínútum eftir mark Cissé kom Van Persie okkur aftur inn í leikinn. Fyrirgjöf frá Valencia, skot Van Persie, Krul varði út í teiginn, Carrick setti fótinn í boltann og hann fór aftur á Van Persie sem í þetta sinn smellti tuðrunni inn.

Hasarinn var þá rétt að byrja og síðustu 20 mínúturnar voru endanna á milli. Chicharito komst framhjá Krul en var kominn upp að endamörkum og fyrirgjöfin fór í vörnina. Van Persie átti skot rétt framhjá eftir flotta sendingu Carrick inn á teiginn og mínútu síðar skallaði Chicharito framhjá eftir fyrirgjöf Valencia. Flott fyrirgjöf reyndar, og langt síðan maður hefur séð slíka frá Tony V.

Hinu megin átti Sammy Ameobi skot í stöng eftir að hafa fengið að athafna sig alltof frjálslega í teignum, De Gea feginn að fá boltann í fangið eftir það. Svo skallaði Chicharito aftur, þetta sinn beint á Krul, hefði mátt gera mun betur þar.

En á slaginu 90 mínútur kom þetta loksins. Enn ein snilldarsending Michael Carrick, inn á teiginn og þar sá Chicharito við rangstöðunni, var aleinn á teignum og kláraði snyrtilega.

Undir lok leiksins meiddist Vurnon Anita leikmaður Newcastle eftir slæma tæklingu Valencia sem hefði átt að rjúka útaf fyrir annað gult í það minnsta, Tony heppinn þar.

En loksins flautaði slakur dómari leikinn af og sigurinn var í höfn. Ótrúlegur leikur. Gersamlega ótrúlegur leikur. Það var eins og allt það sem við höfum verið að kvarta undan og fagna í vetur kæmi í einn leik. Vörnin var slök, sér í lagi Smalling í bakverðinum, stóð sig ekki mjög vel og kom lítið fram á við. Vonandi ekki ástæða fyrir að hann spili þar aftur frekar en Jones. Ferdinand var óöruggur á tíðum og Evans átti sjálfsmark. Jafnvel þó dæma hefði átt rangstöðu á Cissé breytir það ekki að þetta gríðarslakt.

Miðjan var næsta ósýnileg fyrir utan Michael Carrick sem enn eina ferðina enn er að stjórna spilinu og eiga snilldarsendingar, lagði upp mörk númer þrjú og fjögur. Það er gersamlega ótrúlegt að enn séu einhverjir þarna úti sem sjá ekki mikilvægi hans fyrir liðið, sér í lagi þegar restin af miðjunni er að spila undir getu eða samkvæmt aldri.

Líka var eins og Valencia vaknaði aðeins undir lokin og við sáum glefsur af Valencia tímabilsins frá í fyrra. Alveg kominn tími á það. Það er líka alveg kominn tími á að spila ekki með Scholes og Giggs saman. Sitt í hvoru lagi ætti að vera í lagi, sér í lagi ef Giggs er á kantinum

Frammi voru Van Persie og Hernandez ekki sannfærandi fyrr en í hasarnum síðustu 20 mínúturnar. Van Persie skoraði ekta markaskoraramark sem við keyptum hann til að gera, og Chicharito hefði getað verið búinn að klára þetta, en þetta kom þó á endanum og til þess er hann þarna.

Á sama tíma var City að tapa, og núna stöndum við uppi með sjö stiga forskot. Það er svo gjörsamlega ótrúlegt ef ég á að segja nákvæmlega það sem mér finnst, en taflan lýgur ekki. United er trekk í trekk að spila allt að því illa, vörnin lekur eins og gatasigti, menn vilja helst gefa miðjuna til fjórðu deildarliðs (nema Carrick!!) en samt hefst þetta alltaf. Þar er auðvitað fyrst að þakka Robin van Persie sem er að borga kaupverðið til baka í hverjum leik. Rooney hefur komið sterkur inn eftir meiðslin í haust og Hernandez hefur sett nokkur kvikindi líka.

En ég ætla að ljúka þessari skýrslu um þennan ótrúlega leik á eftirfarandi statistikk: í leikjum United í deildinni í vetur hafa miðjumenn United skorað 9 mörk. Varnarmenn United hafa hins vegar sett heil 10! Og á meðan við skorum fleiri mörk en við fáum á okkur þá ætla ég ekki að kvarta! (mikið)

Enska úrvalsdeildin