Rauðu djöflarnir

Þegar liðsuppstilling kom sást að blása átti til sóknar gegn Stoke. Van Persie, Rooney og Welbeck allir í liðinu, Valencia eini ekta kantmaðurinn og Scholes og Carrick á miðjunni.

United byrjaði nokkuð betur og átti gott spil, en sköpuðu ekki mikið. Ein af fyrstu sóknum Stoke gaf hins vegar aukaspyrnu næstum úti við hornfána eftir klaufalegt brot Scholes. Charlie Adam tók aukapyrnuna, góð fyrirgjöf inn í teig og þar kom Wayne Rooney og skoraði sjálfsmark með góðum skalla af markteig. Gjörsamlega óverjandi fyrir de Gea. Hrikalega slysaleg byrjun.

Ekki mátti miklu muna rétt um mínútu síðar þegar Adam tók skot að marki utan að kanti og de Gea sem hafði búist við fyrirgjöfinni og var aðeins illa staðsettur mátti hafa sig allan við til að verja boltann í horn. Næstu mínúturnar á eftir voru Stoke ferskari, héldu boltanum vel milli þess sem þeir pumpuðu fram. Spil United var á tíðum snyrtilegt en vantaði lokahnykkinn gegn þéttri vörn Stoke þar sem allt liðið bakkaði vel, flestir inni í teig. Síðan De Gea þurfti aftur að bjarga vel eftir flotta sókn Stoke og skot, og sýndi enn og aftur að af markvörðunum okkar tveimur hefur hann betri viðbrögð þegar að því kemur að taka skotin.

Loksins náðu United menn þó að brjóta gat á vegg Stoke. Evra kom upp að teignum, stakk út á Van Persie á kantinum sem smellti frábærri sendingu inn á teiginn þar sem Wayne Rooney kom á ferðinni og komst milli tveggja varnarmann og skoraði með fallegum skalla.

United hélt boltanum mun meira eftir markið og sama mynstur hélst, Stoke dró sig allaleið aftur að teig en United reyndi að prjóna sig í gegnum vörnina með samspili. Scholes var næstum kominn í gegn á 39. mínútu en vörnin náði að blokka og mínútu síðar átti Welbeck glæsilegt skot utan teigs sem sleikti ofanverða slána.

En enn og aftur náðu United að brjóta sér leið í gegn. Valencia fékk sendingu frá Scholes út á kantinn, hann gaf sér góðan tíma og á meðan kom Robin van Persie sér fyrir gjörsamlega óvaldaður á markteigshorninu nær og þegar sendingin frá Valencia kom milli fóta varnarmanns stýrði Van Persie boltanum fallega í netið. Þarna var vörn Stoke gersamlega sofandi á verðinum gagnvart eitraðasta sóknarmanni deildarinnar. Áttunda mark Van Persie í haust, og fyrsta sem hann skorar á Stretford End.

Það kom nokkuð á óvart að sjá Scholes koma inn á í seinni hálfleikinn. Hann var á gulu spjaldi eftir klassíska Paul Scholes tæklingu aftanfrá langt frá bolta og rétt fyrir hlé tók hann svipað spark í Stoke leikmann sem hefði alveg mátt gefa gult fyrir. Að öðru leyti var hann enn á ný að sýna snilldarleik á miðjunni

Það var síðan ekki liðin mínúta af seinni hálfleik þegar Wayne Rooney gaf frábæra sendingu af hægri kantinum og Danny Welbeck stakk fram sér milli tveggja varnarmanna og skoraði með dýfuskalla. Frábær byrjun. United hélt áfram sóknum og tveim mínútum síðar varði Begovic glæsilega skalla frá Jonny Evans. Welbeck hefði síðan átt að gera betur þegar hann fékk stungu frá Van Persie en gat ekki hrist af sér varnarmennina og missti boltann. United hélt áfram að pressa en ótrúlegt nokk náðu Stoke að minnka muninn. Michael Kightly hljóp upp allan völlinn, var heppinn þegar boltinn fór í hælinn á Rio, aftur af Kightly sem náði honum aftur, komst inn í teig og skoraði með góðu skoti. Hrikalegt fyrir vörnina að fá svona mark á sig.

En United héldu áfram og enn einu sinni skoraði United eftir horn. Boltinn skoppaði fram og til baka við markteiginn eftir horn Van Persie á 65. mínútu og endað hjá Rooney á fjærstöng. Hann afgreiddi boltann örugglega og aftur var komin tveggja marka forysta. Ekki hægt að segja annað en að vörn Stoke hafi verið í tómu tjóni og ekki í fyrsta skipti í leiknum. Sjötta mark United eftir horn á tímabilinu, það er af sem áður var þegar við skoruðum aldrei úr hornum.

Skiptingarnar hjá United voru frekar einfaldar, Anderson inn fyrir Scholes snemma í hálfleiknum, sem við var að búast, Nani fyrir Valencia og loksins kom Chicharito inn fyrir Welbeck sem hafði staðið sig þokkalega en sóað einum þrem færum sem hefði verið hægt að gera eitthvað úr.

Fjórða markið drap nokkuð niður leikinn, United róaði þetta niður og einbeitti sér að því að hleypa ekki Stoke aftur í leikinn, þannig að sóknum fækkaði all verulega.

Allt í allt ágætissigur. Fyrstu tuttugu mínúturnar voru ekki vænlegar en um leið og United tóku völdin og fóru að sækja meira kom þetta allt. Það spillir ekki fyrir þegar þarf að brjóta niður varnir að hafa Rooney og Van Persie í liðinu og þeir skiluðu sínu. Vörn Stoke hjálpaði reyndar aðeins til við það.

Áfram er það áhyggjuefni að við erum að fá of mikið af mörkum á okkur og ekki er það afsökun að vörnin sé síbreytanleg. Vissulega söknum við Vidic en þetta er samt ekki nógu gott. Það er eflaust ekki að hjálpa að markmannsstaðan er enn ekki ákveðin.