Rauðu djöflarnir

Evrópudeildin

Upphitun: FCSB – Manchester United

skrifaði þann | 17 ummæli

Embed from Getty Images

Eftir fjóra sigra í Evrópudeildinni í röð hefur hagur Manchester United vænkast verulega. Liðið er öruggt með að komast áfram en gæti enn lent í umspili með óhagstæðum úrslitum og þarf því stig annað kvöld gegn FCSB í Rúmeníu.

Hugleiðingar eftir Fulham?

Langskot, hefst upp í hornið sláin inn. Sannarlega glæsileg lýsing, þegar ekki er tekið fram að boltinn hafi farið í varnarmann og þaðan í furðulegan boga yfirmarkvörðinn sem náði ekki nógu mikilli snertingu til að blaka honum frá. En við þiggjum það sem er í boði er.

United verðskuldaði ekki sigur í hrútleiðinlegum leik gegn Fulham síðasta sunnudag. Það segir sitt að bæði lið voru með 0 í flokknum „stærr færi“ í tölfræðiforritum. Vissulega er gleðilegt að liðið hafi verið skipulagt og að mestu haldið aftur af Fulham en á móti kemur kemur að sóknin var jafn geld eins og hún hefur verið síðustu ár. Rasmus Höjlund var enn eina ferðina týndur frammi og heppnismark Lisandro Martinez skildi liðin að.

Janúarglugginn

United virðist hafa gengið frá kaupunum á Patrick Dorgu, örvfættum vængbakverði frá Lecce á Ítalíu. Dorgu, sem er danskur, mun væntanlegur til læknisskoðunar í Manchester á morgun. Kaupverðið mun vera 24 milljónir punda staðgreitt og fjórar síðar ef honum vegnar vel. Ekkert hefur komið fram enn um hvort United fjármagnar kaupin, hvort liðið geti lifað á yfirdrætti fram í júní og selt þá eða þurfi að selja strax.

Nærveru Marcusar Rashfords er klárlega ekki óskað. Ruben Amorim sagðist frekar setja inn á 63 ára markmannsþjálfarann heldur en leikmann sem ekki stæði sig á æfingum þegar hann var spurður um stöðu Rashfords eftir Fulham leikinn. Þjálfaranum virðist eins og Ingu Sæland ganga illa að hemja hvatvísina.

Rashford er áfram orðaður við ýmis lið en það virðast engar yfirgnæfandi líkur á sölu. Alejandro er áfram orðaður við Napoli og Chelsea, sem vilja nýta sér bága stöðu United til að fá Argentínumanninn á góðum díl. Það að hann hafi byrjað síðustu tvo leiki bendir til að Amorim vilji halda honum.

Tyrrell Malacia gæti verið lánaður eftir tilkomu Dorgu og smávegis áhugi virðist á Casemiro. United áfram orðað við sóknarmenn, helst Christopher Nkunku frá Chelsea á láni en líka Mathys Tel sem vill víst fara frá Bayern München. Tel er afar spennandi leikmaður en United á ekki krónu í hann án þess að selja Rashford eða Garnacho.

Liðsfréttir

Lið halda opna æfingu daginn fyrir Evrópuleiki. Í morgun sást til Luke Shaw á slíkri æfingu en hann er þó vart leikfær. Victor Lindelöf var þar líka og á meiri möguleika á að komast í hópinn. Manuel Ugarte virtist líka í ágætu standi en hann fór meiddur af velli á sunnudag.

Hvað er þetta FCSB?

FCSB er nýlegt nafn í Evrópuboltanum en félag með mikla sögu. Flest þekkjum við Steaua Búkarest sigursælasta lið Rúmeníu en það skipti um nafn árið 2017 eftir deilur. Liðið er nær eingöngu skipað rúmenskum leikmönnum, þar af fjórum sem eru í landsliðhópnum.

Liðinu hefur gengið ágætlega í Evrópudeildinni í vetur, mest þökk sé sterkum varnarleik því fyrir utan 4-0 tap gegn Rangers hefur liðið aðeins fengið á sig 3 mörk í 6 leikjum. Liðið hefur þó ekki lent í mörgum liðum úr efsta hluta töflunnar.

Hve mikilvægur er leikurinn United?

Þetta þýðir hins vegar að liðið er í áttunda sæti sem gefur sæti beint í 16 liða úrslitum fyrir leikinn á morgun. Þar er það með 14 stig en United er í fjórða sæti með 15 stig. Liðin í 9. – 12. sæti gætu öll náð United ef liðið tapar. Ósigur myndi ekki endilega fella liðið niður í umspilssætin (9. – 24.) en væri óþarfi. Jafntefli ætti að tryggja sæti meðal þeirra átta efstu. Engin ástæða er til annars en stefna hátt, United er eitt þriggja liða sem ekki hefur enn tapað í Evrópudeildinni.

Sigurvegari Evrópudeildarinnar kemst í Meistaradeildina á ári. Miðað við stöðu United í ensku úrvalsdeildinni virðist helsta vonin um Evrópusæti á ári vera sú leið eða að verja bikarinn.

Leikurinn hefst klukkan 20:00

 

Enska úrvalsdeildin

Upphitun: Fulham -Manchester United

skrifaði þann | 3 ummæli

Embed from Getty Images

Manchester United heimsækir Fulham í kvöld á furðulegum leiktíma, um kvöldmat á sunnudagskvöldið. Slíkt hentar eflaust vel til sjónvarpsútsendinga til Bandaríkjanna en síður fyrir vinnandi fólk sem fylgir liðunum. En Fulham virðist yfirhöfuð með miðaverðlagningu sinni ekki hafa áhyggjur af lægri stéttum.

Hugleiðingar eftir Rangers

United vann á fimmtudagskvöld Glasgow Rangers 2-1 í Evrópudeildinni. United lenti í vandræðum, skömmu fyrir leikslok misreiknaði Harry Maguire háan bolta og Rangers jafnaði. Bruno Fernandes skoraði sigurmark í uppbótartíma.

Sigurinn var þó verðskuldaður, Alejandro Garncho brenndi af tveimur dauðafærum og þeir Magueire og Manuel Ugarte fengu báðir opin skallafæri. Leiksins verður þó sennilega helst minnst fyrir að innihalda stærsta framlag Jack Butlands til United. Hann spilaði ekki sekúndu þegar hann var í láni hjá liðinu fyrri hluta árs 2023 en skoraði fyrra mark United þegar hann kýldi boltann í eigið net eftir horn.

Þess má þó geta að Rangers liðið kom vængbrotið inn í leikinn, lykilmenn voru fjarverandi og þegar á leið leikinn hrundu fleiri niður eins og flugur þannig að eftir stóð hálfgert unglingalið. United lenti líka í vandræðum, bæði Mathijs de Light og Leny Yoro fóru út af meiddir.

Hvað framlag einstakra leikmanna áhrærir má minnast á að Toby Collyer lék sinn fyrsta byrjunarliðsleik síðan í haust og leysti sitt hlutverk mjög vel, fyrir utan tvær sendingar. Garnacho var líflegur en fór illa með færin og að lokum var það Bruno sem dró vagninn, sem oft áður.

Janúarglugginn

Anthony var í hóp hjá United en strax í kjölfarið var gengið frá láni hans til Real Betis út leiktíðina. Hann náði þó ekki inn í hóp þess í gærkvöldi. Ekkert er um kaup í samningnum en margt þarf að breytast til að Anthony eigi framtíð hjá United.

Það má margt segja um Anthony. Hann kom 22ja ára gamall til United, sem er fínn aldur og átti fínasta fyrsta tímabil, 8 mörk og 3 stoðsendingar í 44 leikjum er engin hörmung. Í fyrra lenti hann í vandræðum í einkalífi og leikur hans hrundi, líkt og annað hjá United. En eftir stendur að 80 milljóna punda kaupverð er eins og þegar Baldrick í Blackadder prúttaði um rófuna.

Sögur um sölu á Alejandro Garnacho halda áfram. Napoli virðist hafa gefið eftir en Chelsea komið sterkara inn. Einhverjir töldu Garnacho hafa gengið klökkan af velli á fimmtudag og Ruben Amorim neitaði engu um sölu. Chelsea-viðskiptin eru meðal annars sögð ganga út á að Christopher Nkunku komi til United í staðinn, sem væru furðuleg skipti.

United lagði farm nýtt tilboð í Patrick Dorgu. Þar virðist þokast í samkomulagsátt þótt tilboðinu hafi verið hafnað. Flest hefur hljóðnaði í kringum Marcus Rashford, helst er hann orðaður við Barcelona en hæpið að félagið geti nokkuð gert fyrr en í sumar.

Ríkið styrkir völlinn

Í gærkvöldi staðfesti breski fjármálaráðherrann vilja ríkisins til að taka þátt í uppbyggingu í kringum Old Trafford. Frá því að Jim Ratcliffe keypti sig inn í félagið hefur verið unnið markvisst að áformum um endur- eða nýbyggingu heimavallar United. Ratcliffe hefur þó lagt áherslu á að draga úr því sem hann/United þurfa að borga og ná einhverju af skattborgurum, í gegnum borgina eða ríkið.

Samkvæmt því sem tilkynnt var í gærkvöldi ber United ábyrgð á vellinum sjálfum en opinberir aðilar taka þátt í uppbyggingu í kring, svo sem á samgöngumannvirkjum eða íbúabyggð. Verkefninu er ætlað að örva fjárfestingu og hagvöxt í Manchester.

Liðsfréttir

Noussair Mazraoui var hvíldur gegn Rangers eftir að hafa fengið högg í leiknum gegn Brighton síðasta sunnudag. Yoro sást á ferð með United-liðinu í gær en ekki de Light. Victor Lindelöf er að nálgast leikform eftir meiðsli en lengra er í Luke Shaw. Johnny Evans og Mason Mount eru enn meiddir.

Markvarðarstaðan gæti orðið það athyglisverðasta í liðsvali dagsins. Altay Bayindir byrjaði sinn fyrsta Evrópuleik í vetur gegn Rangers en André Onana hefur verið mistækur í síðustu leikjum. Bayindir er ekki mest sannfærandi markvörður í heimi en hann gerði það sem til var hægt að ætlast á fimmtudag og verður ekki kennt um markið.

Joshua Zirksee átti ekkert verri dag en þá sem Rasmus Höjland hefur átt í framlínunni að undanförnu. Garnacho var ferskur og Amad Diallo leysti bakvarðarstöðuna. Kobbie Mainoo og Manuel Ugarte voru hvíldir framan af leik sem væntanlega þýðir að þeir byrja í kvöld.

Hjá Fulham eru þeir Kenny Tete og Reiss Nelson meiddir. Fulham vann Leicester fyrir viku en hefur annars gengið upp og ofan. Það hefur tilhneigingu til að gera jafntefli, alls níu í 22 leikjum, þar af sex í tíu deildarleikjum síðan í desember. Þar á meðal voru stig gegn Arsenal og Liverpool, auk sigurs gegn Chelsea en líka jafntefli gegn Southampton. Liðið er ofar en United í töflunni, með 33 stig í 10. sæti meðan United er með 26 í því þrettánda.

Leikurinn hefst í kvöld klukkan 19:00

Evrópudeildin

Upphitun: Manchester United – Rangers

skrifaði þann | 1 ummæli

Embed from Getty Images

Manchester United tekur á móti Glasgow Rangers í næst síðasta leik liðanna í deildarkeppni Evrópudeildarinnar á Old Trafford annað kvöld. United þráir ekkert heitar en sigra og nýja leikmenn en hvort tveggja er vandfundið þessa dagana.

Janúarglugginn

Þótt stuðningsmenn United séu upp til hópa á móti að selja Alejandro Garnacho þá virðast stjórnendur félagsins að vera að skoða það af fullri alvöru. Napoli hefur sýnt sterkastan árangur en lítið mun hafa þokast í samkomulagsátt þar í dag. Chelsea hefur einnig verið orðað við hann en engar viðræður milli liðanna eru hafnar enn.

Sky skýrði annars í kvöld hvernig málið snýst um hvernig málið snýst um miklu meira fyrir United en einhverjar 60 milljónir punda í söluandvirði. Sala á uppöldum leikmanni myndi gera liðinu kleift að eyða allt að 180 milljónum í nýja leikmenn, samkvæmt reglum ensku úrvalsdeildarinnar.

Þarna er í gangi köld hagfræði. Með að fórna Garnacho, sem óvíst er hversu vel hentar nýjum leikstíl liðsins, væri hægt að kaupa nokkra leikmenn sem henta því. Aðrir kostir virðast ekki í boði. Anthony virðist á leið til Real Betis, en það er bara lán og eignafærslan á honum þannig að hann skilar aldrei pening í kassann. Kobbie Mainoo væri einnig hægt að selja en það er jafnvel enn verra en Garnacho.

Kannski var Marcus Rashford settur út í kuldann til að pína hann frá félaginu í þessum tilfangi, hann er bæði eldri og launahærri en Argentínumaðurinn. Barcelona hefur vart efni á honum í janúar og hann vill ekki Borussia Dortmund. Fréttir um að Rashford telji sig ekki eiga neitt sökótt við Rubin Amorim, hafi lagt sig fram við æfingar að undanförnu og sé tilbúinn ef á þurfi að halda benda til þess að hann telji útgönguleiðir lokaðar að sinni. Við þetta má bæta að hreyfingar eru hjá Dortmund. Þjálfarinn Nuri Sahin var rekinn í morgun og Erik ten Hag er talinn meðal þeirra líklegustu til að taka við.

United hefur í vikunni átt í viðræðum við Lecce á Ítalíu um Patrick Dorgu, tvítugan vinstri bakvörð frá Danmörku. Hann þykir mikil orkusprengja þótt einhverjir kunni að setja spurningamerki um innkaup á leikmanni með takmarkaða reynslu frá liði sem er í fallbaráttu í Serie A. Framherjar hafa einnig verið orðaðir við félagið.

Bræðisköst Amorims

United tapaði á sunnudag 1-3 fyrir Brighton í ensku úrvalsdeildinni í leik sem best er að hafa sem fæst orð um. Reyndar mun Rubin Amorim hafa haft um hann heldur fleiri orð inni í klefa en hann er vanur eftir leiki. Hann virðist nánast hafa gengið berserksgang, öskrað á leikmenn og mölvað sjónvarpstæki. Stuðningsmenn United hafa deilt slíkum tilfinningum með honum og fyrri þjálfurum, en óskandi er fjárhags heimilanna vegna að sjónvarpstækin hafi sloppið. Á fréttamannafundi í dag sagðist Amorim sjá eftir að hafa misst stjórn á skapi sínu. Hann sé enn ungur af þjálfara að vera og geri því mistök.

Orð hans opinberlega um að núverandi United lið væri það versta í sögunni vöktu líka athygli. Hann sagðist einnig hafa gengið of langt þar. Æfingar í vikunni hefðu hins vegar gengið vel. Það hefur heyrst áður án þess að það skilaði sér út í leiki.

Staðan á liðunum

Af æfingasvæðinu eru reyndar ágætar fréttir. Fyrrnefndur Rashford sást á æfingu með liðinu í dag og sömuleiðis Victor Lindelöf. Svíinn er þó ekki enn leikfær hafandi verið meiddur í mánuð. Amorim sagði einnig að endurhæfing Luke Shaw og Mason Mount gangi vel. Johnny Evans er enn meiddur.

Jack Butland, sem ekki fyrir svo löngu var í láni hjá United og Tom Lawrence, sem er uppalinn hjá félaginu, eru í dag hjá Rangers og báðir tæpir fyrir leikinn. Það sama gildir um varnarmennina John Souttar og Dujon Sterling. Miðjumaðurinn Mohamad Diomande er í banni. Þá eru þeir Rafael Fernandes, Inanis Hagi, Rabbi Matondo og Clinton Nsiala ekki í Evrópuhópi félagsins.

Nauðsynleg keppni

Evrópudeildin skiptir United máli því möguleikarnir á Evrópusæti í gegnum ensku úrvalsdeildina fara þverrandi með hverjum leiknum. Sigurvegari keppninnar spilar í Meistaradeildinni að ári. Þótt sigurlíkurnar séu takmarkaðar með núverandi spilamennsku er aldrei að segja hvað hægt sé að berjast áfram í útsláttarkeppni, eins og United sýndi í enska bikarnum í fyrra.

Fyrsta verkið er að vera meðal átta efstu liðanna til að þurfa ekki að spila aukaleiki um sæti í 16 liða úrslitum. United hefur með þremur sigrum í röð tekist að komast í sjöunda sætið en Rangers er í því áttunda. Í skosku deildinni er liðið vel á eftir Celtic.

Leikurinn hefst klukkan 20:00.

Enska úrvalsdeildin

Upphitun: Manchester United – Southampton

skrifaði þann | 8 ummæli

Embed from Getty Images

Brúnin hefur lyfst heldur á stuðningsmönnum Manchester United eftir fyrstu leiki nýs árs þótt afrekin séu ekki stærri en tvö jafntefli. En það sem raunverulega skilur milli feigs og ófeigs í enska boltanum er hvort viðkomandi spili vel á köldu kvöldi í Stoke. Á morgun verður prófraunin á janúarkvöldi í Manchester gegn Southampton.

Stuðningsmenn United hafa glaðst yfir jafntefli gegn Liverpool og sigri í vítaspyrnukeppni gegn Arsenal í bikarnum. Báðir leikirnir voru á útivelli en sannarlega úrslit sem United þáði eftir þrjú töp í deildinni í röð, þar af tvö á Old Trafford.

Það er samt rétt að hafa fæturna á jörðinni, samanlagt var xG-gildi leikjanna um það bil 6-2. United átti það kannski inni eftir að hafa farið illa út úr Bournemouth leiknum fyrir jól. En mörkin eru það sem telja og kannski hefur það jákvæðasta verið að sjá hjarta í liðinu, eins og eftir að það lenti manni undir gegn Arsenal.

En jafntefli eru lítils virði og verða fljótt gleymd ef United tekst ekki að vinna Southamtpton sem er rígbundið við botninn með sex stig, sem er með því verra sem deildin hefur séð.

Janúarglugginn

Það er umrót á United miðað við fréttir. Marcus Rashford hefur ekki sést í mánuð og ferill hans hjá félaginu virðist einfaldlega búinn. Líklegast virðist að hann fari til AC Milan. Napoli er klárlega að míga utan í Alejandro Garnacho. Í það minnsta umboðsmenn hans og mögulega hann sjálfur virðast ekki afhuga ítalska liðinu, trúlega í von um feitar greiðslur og United hefur í það minnsta ekki skellt á þá dyrunum en virðist gera kröfur sem eru langt umfram það sem Napoli virðist tilbúið að borga. Þá verður ekki mikið um að vera.

Anthony er áfram orðaður við önnur lið en ekkert hefur enn hreyfst þar. Það sama gildir um Casemiro. Í kringum Christian Eriksen og Victor Lindelöf er allt hljótt. Samningar þeirra tveggja síðasttöldu renna út í sumar og eru því væntanlega falir ef tilboð berst. Toby Collyer var tekinn fram yfir miðjumennina þegar fríska fætur þurfti gegn Arsenal og átti frábæra innkomu. Til dæmis var ánægjulegt að sjá hann spretta fram í þeim fáu skyndisóknum sem United fékk undir lokin og skapa pláss fyrir samherjana með hlaupalínum sínum.

Sem stendur er ekkert sem hönd á festir um þá sem orðaðir eru við félagið. Trúlegustu sögurnar eru Ruben Amorim vilji fá vinstri kantbakvörð en þar eru engin nöfn. Ef Rashford fer gæti verið þörf á sóknarmanni en þar er einnig fátt um sögur. Randal Kolo Muani, sem helst var orðaður við liðið, virðist vera farinn annað. Frumskilyrði virðist að leikmenni verði seldir eða lánaðir til að fjármagna þá sem gætu komið inn.

Dalot í leikbanni

En fyrst er það Southampton á morgun. Diogo Dalot er í banni eftir brottvísunina gegn Arsenal. Hann hefur verið fastamaður á vinstri kantinum. Tyrrell Malacia kom inn í þá stöðu seint í leiknum á sunnudag, hefur nokkrum sinnum spilað hana og virðist því líklegasti kosturinn.

Altay Bayindir átti stórleik þegar á leið sunnudaginn en varla nóg til að Andre Onana verði ekki áfram í byrjunarliðinu í úrvalsdeildinni, eins og öllum leikjum tímabilsins. Harry Maguire var veikur í aðdraganda bikarleiksins en lagði sig allan fram í 90 mínútur og er vonandi búinn að ná sér alveg.

Southampton vann sinn fyrsta leik undir stjórn Ivan Juric um helgina, gegn Swansea úr B-deildinni í bikarnum. Jack Stephens er meiddur og því verður Southampton án fyrirliða síns. Ross Stewart og Flynn Downes eru einnig á meiðslalistanum.

Leikið er á Old Trafford og hefst leikurinn klukkan 20:00

 

Almennt

Eigendur Manchester United hittust á Íslandi

skrifaði þann | Engin ummæli

Embed from Getty Images

Fjögur af Glazer-systkinunum sex heimsóttu Vopnafjörð í sumar í boði Jim Ratcliffe sem styður þar við uppvöxt villta Atlantshafslaxsins í gegnum félagið Six Rivers.

Austurfrétt greinir frá því að bræðurnir þrír: Joe, Avram og Bryan, sem hafa verið virkastir fjölskyldunnar í stjórnun United, hafi komið austur ásamt systur þeirra Darcie. Þau hafi reynt fyrir sér í veiði og notið náttúrufegurðar í Vopnafirði í nokkra daga.

Heimsókn þeirra var um miðjan júlí en sex einkaþotur voru um stund á flugvellinum á Egilsstöðum. Ein þeirra er skráð í Flórdía þar sem fjölskyldan hefur bækistöðvar sínar. Jim Ratcliffe var sjálfur á svæðinu sömu helgi en hann sendi enska landsliðinu kveðju úr veiðihúsinu við Selá.

Ratcliffe hefur í tæp 10 ár keypt jarðir í Vopnafirði og víðar á Norðausturlandi. Landakaupin eru hluti af vinnu hans við að vernda villta Atlantshafslaxinn. Stofninn hefur minnkað verulega undanfarna áratugi en vísindamenn hafa ekki náð að festa fingur á hvers vegna. Rannsóknir þeirra hafa verið kynntar á nær árlegum ráðstefnum hérlendis og var sú síðasta haldin á Vopnafirði í vor. Ratcliffe hefur setið nokkrar þeirra, þó ekki þá síðustu.

Ratcliffe er fastagestur eystra á hverju sumri. Einkaflugvélar hans lenda á Egilsstöðum áður en hann flýgur til Vopnafjarðar með þyrlu. Hefð er til dæmis fyrir því að hann komi um Jónsmessurnar þegar veiði í ánum hefst.