Mótherjinn mælir: Kristján af kop.is

Það verður vonandi reglulegur viðburður hér fyrir stórleiki að fá stuðningsmann mótherjanna til að segja okkur aðeins frá liðinu sínu frá sínum sjónarhóli svo við getum aðeins kynnst þeim betur. Stórleikirnir gerast ekki stærri en leikurinn á sunnudaginn og það er við hæfi að fá fótboltabloggara sem er hokinn af reynslu sem fyrsta gest okkar hér.

Við bjóðum velkominn í heimsókn Kristján Atla Ragnarsson frá kop.is

Hvernig er almennt álit Liverpool stuðningsmanna á Brendan Rodgers?
Er hann rétti maðurinn í starfið?
Það er of snemmt að segja. Mönnum líst almennt mjög vel á hann; Swansea spiluðu flottan bolta á síðustu leiktíð og hann hefur sagt allt það rétta síðan hann tók við Liverpool. Hann kemur mjög vel fyrir. Hins vegar var sumarglugginn hálfgert klúður og það er erfitt að fylkja sér á bak við knattspyrnustjóra sem segir allt það rétta þegar hann hefur ekki unnið leik í fyrstu fjórum umferðunum. Ég skal svara þér um jólin.

Hvað þyrfti Liverpool að gera til þess að þú yrðir ánægður með þetta tímabil?
Hvar endar Liverpool í deild?
Mín von í upphafi tímabils var að liðið myndi bæta sig frá síðustu leiktíð og berjast um Meistaradeildarsæti. Hins vegar er leikmannahópurinn svo þunnskipaður að það þurfa nánast allir aðalliðsmenn að spila framar vonum og enginn þeirra má meiðast til að þær vonir standist. Og miðað við byrjun tímabilsins og þá ömurlegu staðreynd að Lucas Leiva sé þegar búinn að meiðast í 2-3 mánuði er ég nánast þegar búinn að gefa upp vonina. Í dag kæmi mér þægilega á óvart ef liðið næði Evrópusæti.

Hverjir verða meistarar?
Manchester City stigu stóra skrefið á síðustu leiktíð og verða illviðráðanlegir í vetur. United hafa reynsluna og Chelsea virka feykisterkir í upphafi móts en ég held að breiddin hjá City segi sitt. Ég verð hissa ef þeir verja ekki titilinn í ár, þótt ég búist við að Chelsea og United muni pressa þá alla leið að venju.

Hverjir eru mikilvægustu leikmenn Liverpool?
Lucas Leiva og Luis Suarez. Ef sá fyrrnefndi er ekki með stórsér á allri spilamennsku liðsins og ef sá síðarnefndi skorar ekki mörkin í vetur gerir það enginn. Í alvöru, hafið þið séð sóknarlínuna okkar? Suarez er helmingurinn af henni og hinn helmingurinn er að spila fyrir West Ham.

Hver er helsti veikleiki Liverpool-liðsins?
Sóknin, aftur. Ef Suarez skorar ekki mörkin gerir það enginn. Liðið skoraði aðeins 47 mörk í deildinni á síðustu leiktíð og veikti sóknarlínuna frekar en að styrkja hana í sumar. Lið sem skora ekki mörk ná ekki árangri.

Hvað þurfa leikmenn Liverpool að hafa mest í huga er þegar þeir mæta United?
Hvar er United hættulegast?
Robin Van Persie er augljóst svar, hann er heitasti framherji heims utan Spánar í dag og hann kálaði Liverpool á Anfield með ótrúlegri tvennu á síðustu leiktíð. Hins vegar er ég einnig logandi hræddur við Shinji Kagawa. Ég fylgdist vel með honum hjá Dortmund sl. tvö ár og miðað við hvernig Santi Cazorla fór með vörn Liverpool fyrir rúmum tveimur vikum ætti Kagawa að geta leikið sama leik ef hann fær tækifæri til. Liverpool verður að þagga niður í þessum tveimur til að eiga séns.

Hvaða veikleika telur þú United hafa sem Liverpool gæti nýtt sér?
Ég myndi segja að vörn United sé ekki sú sterkasta sem þeir hafa átt en þar mætir veikileiki United, vörnin, veikleika Liverpool, sókninni. Hins vegar hefur United annan veikleika sem aðdáandi United ræddi í podcast-þætti TheAnfieldWrap.com sl. mánudag, þ.e. að United virðist hafa nálgast Anfield af ákveðinni hræðslu síðustu ár. United virðist spila þessa leiki upp á jafntefli í stað þess að ráðast á Liverpool og ef þeir gera það núna eru þeir að bjóða hættunni heim. United er með sterkara liðið í dag og ég vona því að þeir sýni áfram sömu varkárni og undanfarin ár. Ef þeir ráðast að Liverpool eru mínir menn í vandræðum.

Ef þú gætir fengið einn leikmann frá United til Liverpool, hvern myndir þú velja?
Robin Van Persie. MÖRK ÓSKAST!

Hvernig myndir þú stilla Liverpool-liðinu upp fyrir leikinn?
Sterkasta lið Liverpool er nokkuð sjálfvalið þessa dagana og ég sé lítið sem breytir því, sérstaklega á meðan Lucas er meiddur. Pepe Reina verður í markinu, Johnson, Skrtel, Agger og Enrique verða í vörn, Allen, Gerrard og annað hvort Sahin eða Shelvey á miðjunni og Suarez, Borini og hinn ungi Sterling verða frammi. Ég vona að Nuri Sahin verði klár í þennan leik og ég vona að Rodgers hætti að prófa Glen Johnson í vinstri bakverði á kostnað Jose Enrique.

Hverju eiga United menn helst að taka eftir í leik Liverpool? Hvaða leikmanni/taktík?
Joe Allen. Hann er að spila langbest af okkar mönnum enda sá sem fylgdi Rodgers yfir frá Swansea og þekkir spilamennsku hans best. Aðrir leikmenn eiga í vandræðum í upphafi tímabils með að aðlagast nýjum leikstíl og Allen hefur staðið höfuð og herðar yfir aðra leikmenn liðsins hingað til, þrátt fyrir smæð. Auðvitað má líka benda mönnum á að fylgjast með hinum 17 ára Raheem Sterling sem hefur reynt fleiri „einvígi“ (þ.e. að sóla andstæðing) en nokkur annar leikmaður í deildinni hingað til.

Þín spá fyrir leikinn?
Suarez og Evra takast ekki í hendur og allt verður vitlaust … utan vallar. Eða þá að Evra verður á bekknum og Buttner í byrjunarliðinu. Get ég pantað það, plís? Allavega, leikurinn endar í jafntefli sem hentar báðum liðum ágætlega vel.

Hver er uppáhaldsleikur Liverpool og United sem þú hefur séð?
Ég hef þrisvar sinnum séð leiki þessara liða á Anfield og United hefur unnið þá alla. Ég hef svarið þess eið að fara aldrei, aldrei, aldrei aftur á leiki við United og ég mun fara í gröfina pirraður yfir John O’Shea-markinu vorið 2007. Hins vegar fór 1-4 sigurinn 2009 langt með að bæta mér þessa þrjá leiki upp. Það er og verður uppáhalds leikurinn minn um ókomna tíð grunar mig, enda ekki oft sem Liverpool vinnur svo stóran sigur á Old Trafford. ANDREA DOSSENA!

Nú erum við hér uppi á Íslandi ekki eins beintengdir í óvildina milli stuðningsmanna úti, en finnst þér aukin illindi milli stuðningsmanna síðasta tímabil hafa skilað sér upp á skerið?
Já. Því miður. Ég á nokkra bestu vini sem halda með United og það hefur verið þögult samkomulag okkar á milli að ræða Suarez/Evra-málið aldrei. Það þýðir bara ekkert. Hafi verið rígur þarna á milli í mörg ár er þar núna bara tilefni til rifrildis því Suarez og Evra bera nánast alltaf á góma og þá fer fólk að rífast. Ég veit ekki hversu langan tíma það tekur að hætta að rífast yfir þeirra máli, sennilega róast það ekki aftur fyrr en þeir eru báðir hættir að spila með sínum liðum. Þannig að ef þið væruð til í að selja Evra strax í janúar væri það vel þegið og myndi strax byrja að græða sárin :-)

Við þökkum Kristjáni Atla kærlega fyrir og vonum að þið hafið haft gaman af þessari innsýn í hugarheim Liverpool manna.