CFR Cluj á morgun

Fyrsti útileikur United í Meistaradeildinni þetta árið er gegn spútn… nei, æ, fyrirgefið, gegn nýríku Nonnunum í liði CFR Cluj frá Rúmeníu.

CFR Cluj er frá borginni Cluj-Napoca í norðvestur Rúmeníu, í héraði sem sumir hafa heyrt nefnt og kallast Transylvania. Flestir tengja héraðið auðvitað Drakúla greifa, en náttúrufegurð ku vera meginaðdráttarafl héraðsins fyrir túrista.

CFR Cluj hafði verið neðrideildarlið í Rúmeníu nær alla tíð frá stofnun 1907 fram til ársins 2002 þegar milljónamæringur frá borginni keypti liðið og setti í það pening. Liðið hefur verið keyrt að mestu leyti á útlendingum síðan þá, Brasilíumönnum, Argentínumönnum, Portugölum og öðrum. Þetta hefur skilað liðinu rúmenska titlinum þrisvar sinnum, og þar af leiðandi Meistaradeildarþáttöku jafn oft. 2008-9 stríddi liðið Roma með útisigri og Chelsea með jafntefli á heimavelli og 2010-11 náðu þeir að sigra Basel (eitthvað sem hefði hjálpað okkur í fyrra) og gera jafntefli við Bayern München.

Nú eru þeir enn komnir í riðlakeppnina eftir sigra á Slovan Liberic frá Tékklandi og Basel (eitthvað sem hefði hjá… Ok hætti núna). Þeir komu síðan verulega á óvart í fyrstu umferð riðlakeppninnar með að ná sigra Braga á útivelli, 2-0 með mörkum frá Brasilíumanninum Rafael Bastos. Sigurinn þótti einstaklega óverðskuldaður, enda voru þetta einu skot þeirra á markið, meðan Braga átti 14, og Braga var með boltann 65% leiksins.

Þetta sýnir að Cluj er sýnd veiði en ekki gefin og það þarf að fara með allri gát á morgun og verjast skyndisóknum þeirra vel.

Margir eru enn að melta leik helgarinnar og þar á meðal ég. Fyrir leikinn á morgun held ég samt að við eigum frekar að horfa til seinni hálfleiksins á laugardag og vonast til að vörn Cluj sé ekki jafn heppin og Tottenham liðið var.

Þegar hópurinn sem fór til Rúmeníu í dag var tilkynntur kom í ljós að Carrick, Scholes og Giggs voru ekki með og á blaðamannafundi áðan sagði Sir Alex að Carrick væri í bæli með vírus og að þeir Scholes og Giggs væru líka ekki frískir. Ég hafði reyndar ekki reiknað með neinum þeirra í byrjunarliði því ég held að það sé ómögulegt að fara fram á við Fergie að hann hætti að hræra í liðinu. Ég bjóst því við nokkrum breytingum á morgun, en þó frekar sterku liði

Þetta er leikur á morgun sem er mikilvægt að vinnist vel. Þetta er á pappírnum veikasta liðið en sýndu samt að það er akkert auðvelt að skora á þá. Þess vegna ætla ég að spá því að við fáum að sjá Rooney og Van Persie saman frammi. Það væri frekar fallegt, ekki satt?

Annars er ekki mikið hægt að hrókera kantmönnum fyrst að Young og Valencia eru meiddir (Valencia gæti spilað á morgun, en líklegra ef svo er að hann byrji á bekknum. Rooney gæti verið úti á kanti, en ég held að þetta sé leikurinn til að blása til tveggja manna sóknar frá fyrstu mínútu. Ef ekki getur samt sama lið verið að spila 4-2-3-1 ef Rooney dettur aftar.

Ætla að vera bjartsýnn og spá 3-0 sigri!