Manchester United mætir Aston Villa á Villa Park.

Okkar menn tryggðu sér 1. sætið í A-riðli Meistaradeildarinnar með ágætum sigri á Shakhtar í vikunni. Aldrei þessu vant skiptast liðin í 1. og 2. sæti í riðlum Meistaradeildarinnar nokkurn veginn eftir getu og eigum við ekki möguleika á að lenda á móti hinum af bestu liðum álfunnar i 16-liða úrslitum. Það er jákvætt.

Moyes glímir við talsverð meiðslavandræði. Carrick er ennþá meiddur ásamt Smalling og í gær bættist Robin van Perse í meiðslahópinn en hann verður frá í heilan mánuð. Það er neikvætt. Vidic, Evra og Fellaini eru einnig tæpir og óvíst með þáttöku þeirra í þessum leik. Eins og lesendur hafa bent á lýsti Nani því svo yfir að hann og heitkona hans hefðu eignast lítinn strák og hann hefði fengið frí til þess að eyða tíma með fjölskyldunni. Hann verður því ekkert viðriðinn leikinn en óskum við honum auðvitað til hamingju með föðurhlutverkið. Hann dettur því út byrjunarliðinu eins og ég hafði spáð að það yrði. Set þá Valencia á hægri kantinn og Januzaj færir sig yfir á þann vinstri.

Dembum okkur í byrjunarliðið:

Rio fær líklega annan leik í röð vegna meiðsla í hópnum. Það er ekkert sérstaklega gott því það verður að segjast eins og er að hann er bara að spila verulega illa og lítur mjög illa út á vellinum. Hann minnir mig mikið á Gary Neville undir það síðasta. Er ekki kominn tími á þig, Rio? Moyes virðist einnig hafa tröllatrú á Büttner og aumingja Fabio fær ekki séns. Ég vildi alveg sjá Fabio fá sénsinn í vinstri bak, hann getur ekki verið mikið verri en Büttner sem er langt frá því að vera nógu góður fyrir þennan kúbb.

Jones er líklega sjálfkjörinn á miðjuna og Cleverley spilaði ekki allan leikinn gegn Shakhtar og ætti að vera nokkuð ferskur. Cleverley hefur legið undir gagnrýni undanfarið. Hann virðist gera sér grein fyrir þessu og hefur lofað að standa sig betur. Kagawa spilar kannski í holunni en er ekki allt í lagi að gefa Chicarito færi á að spila leik? Ég held það en í fjölmiðlum undanfarið hefur verið rætt um að hann verði notaður sem skiptimynt fyrir Freddy Guarin hjá Inter í janúar.

Andstæðingurinn

Ólíkt flestum liðum virðist Aston Villa kunna betur við sig á útivelli heldur en á heimavelli. Liðið hefur spilað 8 leiki á heimavelli og aðeins unnið 2, gert eitt jafntefli og skorað 6 mörk. Villa-menn kunna  betur við sig á útivelli enda unnið 3, gert tvö jafntefli og skorað 10 mörk. Nokkuð sérstakt og eitthvað sem ætti vonandi að vinna með okkar mönnum.

Það hjálpar líklega ekki að þeirra besti maður á síðasta tímabili er alveg ískaldur um þessar mundir. Það hefur lítið gengið hjá Christian Benteke á þessu tímabili ef frá er talinn fyrsti leikurinn á tímabilinu þar sem hann sá alfarið um sigur liðsins á Arsenal. Þetta veit væntanlega bara á eitt, hann mun komast í sitt gamla form gegn United á morgun!

Villa-menn munu líklega sitja til baka og reyna að beita skyndisóknum á meðan við gefum boltann til hliðar á næsta mann. Rio og Büttner verða veiku hlekkirnir í vörninni hjá okkur og verða að passa sig á skyndisóknunum frá Villa.

Ég býst varla við spennandi leik á morgun þar sem hvorugt þessara liða er að spila sinn besta bolta um þessar mundir. Við verðum þó að sækja til sigurs til að snúa þessari taphrinu við og til þess að dragast ekki aftur úr toppliðunum. Titilinn verður æ fjarlægari en Meistaradeildarsætin eru vel innan seilingar.

Það verður líklega bara skorað eitt mark í þessum leik og ég vona að það verði við sem náum að pota því inn. Það hefur hinsvegar ekki mikið fallið með okkur í síðustu deildarleikjum, með örlítilli heppni værum við með 9 stig í viðbót á töflunni úr síðustu þremur leikjum. Vonum því að lukkan verði með okkur í liði á morgun.

Leikurinn hefst klukkan 13.30 á sunnudaginn.