Tottenham kemur í heimsókn

Manchester United byrjar árið 2014 á gíðarlega mikilvægum leik gegn Tottenham á Old Trafford. Okkar menn hafa verið á ágætis skriði undanfarið, unnið fjóra leiki í röð, leikir sem menn hafa nú á undanförnum árum ætlast til þess að United vinni. Morgundagurinn er því gott tækifæri fyrir okkar menn að sýna toppliðunum að þeir ætli sér ekki að gefa tommu eftir, nú og svo væri það líka bónus að ýta Tottenham 3 stigum aftur fyrir sig, en þeir eru með 34 stig eins og United.

Tottenham liðið er mjög sterkt á pappír og vildi ég meina fyrir tímabilið að það væri í raun sterkara en United hópurinn (aftur, á pappír). Það hefur hinsvegar ekki staðið undir væntingum í vetur og kostaði það á endanum André Villas-Boas starfið sem þjálfari liðsins. Tim Sherwood hefur nú stýrt liðinu í þremur leikjum og eru strax ákveðin batamerki á leik liðsins, sérstaklega hafa leikmenn eins og Eriksen, Soldado og Adebayor fengið aukinn kraft við brotthvarf Boas.

Sjálfstraust beggja liða er því á uppleið og má búast við skemmtilegum leik á Old Trafford á morgun. Það er spurning hvernig Moyes stillir upp liðinu. Það hefur auðvitað verið mikið álag undanfarið en þar sem leikurinn er á morgun er líklega sá mikilvægasti í jólatörninni má búast við að sjá svipað lið og það sem hefur verið að standa sig vel undanfarið. Rooney verður mættur aftur í holuna, Januzaj hvíldi gegn Norwich þannig að ég býst við honum aftur í byrjunarliðið, spurning er svo hvort Valencia komi inn í hægri bakvörðinn eða hvort Smalling verði þar áfram eftir að vörnin hélt hélt hreinu í síðasta leik. Kannski sjáum við svo Van Persie á bekknum? Hver veit, þetta er allt saman frekar óljóst þannig að ég ætla að skjóta bara eitthvað út í bláinn:

Veðbankar setja 55% líkur á sigri United þannig að þetta verður hörku leikur, engin spurning. Ég ætla að spá 2-1 sigri hjá okkar mönnum, Rooney og Welbeck setja’nn.

Fyrst skulum við þó njóta áramótanna. Gangið hægt um gleðinnar dyr og sjáumst hress seinnipartinn á morgun. Gleðilegt nýtt ár!