Mánudagspælingar 2015:01

Mikið rosalega var sigurinn í gærkvöldi gegn Tottenham kærkominn. Ekki nóg með það að frammistaða liðsins hafi verið eitthvað sem við höfum beðið eftir í allan vetur (jafnvel lengur) heldur tókst liðinu bæði að setja pressu á Manchester City í öðru sætinu sem og að senda einn af okkar helstu keppinautum um sæti í Meistaradeildinni að ári niður í miðjumoðið. Það er nóg eftir af tímabilinu en hver sigur á þessu stigi deildarinnar er einfaldlega gulls ígildi.

Mig langar að skoða tvennt að þessu sinni. Í fyrsta lagi ætla ég aðeins að kíkja á varnarleik liðsins en nú hefur liðið haldið hreinu í síðustu þremur deildarleikjum. Í öðru lagi ætla ég aðeins að skoða leikmannamálin fyrir næsta tímabil.

Varnarleikur liðsins

Varnarleikur United hefur ekki þótt sérstaklega merkilegur á þessu tímabili. Hann hefur fengið sinn skerf af gagnrýni. Heldur betur. Talsvert af þessari gagnrýni á rétt á sér. Það er tiltölulega erfitt að setja niður varnarlínu á blað og bera hana saman við þau lið sem við viljum bera okkur saman við. Kæmist Valencia eða Evans í vörnina hjá Chelsea eða Real Madrid. Væru Jones eða Smalling fastamenn í City eða Barcelona?

Það hjálpar ekki til að varnarmenn okkar eru oft sjálfum sér verstir. Valencia gaf mark gegn Arsenal fyrir viku, Jones var nálægt því að gefa mark gegn Tottenham í gær. Það vill svo til að af þeim 20 liðum sem eru í Úrvalsdeildinni er United í 2. sæti þegar kemur að tölfræðiþættinum varnarmistök (Defensive Error). Everton trónir á toppnum með 30 stykki og við fylgjum þeim fast á hæla með 26. Chelsea er með 11, City með 14. Varnarmenn okkar gera því mikið af mistökum og líta því oft illa út inni á vellinum.

Það vill okkur til happs að bakvið vörnina er besti markmaður heimsins um þessar mundir. Hann á stóran þátt í því að aðeins 2 af þessum 26 mistökum hafa leitt til marks. Everton hefur fengið á sig 14 í kjölfar varnarmistaka. Aðeins Burnley og Chelsea fá á sig færri mörk en United vegna varnarmistaka. Blessunarlega koma þessi mistök því ekki alvarlega í bakið á liðinu.

Það hjálpar auðvitað ekki til að varnarmenn okkar er ekki úr mikið sterkara efni en hvaða meðalpappakassi sem er. Louis van Gaal hefur þurft að rótera ansi grimmt vegna meiðsla allt tímabilið og þá sérstaklega fyrri hluta þess. Á meðan hafa Chelsea, City og Southampton sem eru þau lið fyrir utan United sem hafa fengið fæst mörk á sig í deildinni og gert einna fæst varnarmistök verið að rúlla á sömu varnarmönnum leik eftir leik. Þessi lið hafa að miklu leyti sloppið við meiðsli og það er á kristaltæru hvernig besta varnarlína þessara liða er. Þetta er munaður sem við höfum ekki geta leyft okkur á þessu tímabili.

Þrátt fyrir þetta hafa bara Chelsea og Southampton fengið á sig færri mörk á þessu tímabili. Aðeins þrjú lið hafa skorað tvö eð fleiri mörk á okkur í leik á þessu tímabili, WBA, Swansea (2x) og Leicester(!). Það er því undantekning ef liðið fær á sig meira en 1 mark. Að auki hefur liðið ekki fengið á sig mark í 10 leikjum á tímabilinu og af toppliðunum hafa bara Chelsea, Liverpool og Southampton haldið hreinu oftar.

Hvernig er hægt að útskýra þetta? Ég er búinn að nefna David de Gea. En má ef til vill finna aðra skýringu? Má benda á hinn varfærna og tiltölulega leiðinlega leikstíl sem við höfum séð liðið spila á stórum hluta þessa tímabils. Getur verið að þessi hægi og áhættulausi sendingarstíll sé kominn til vegna þess að varnarmönnum okkar sé ekki treystandi og að þeir þurfi alla þá vernd sem hægt er að fá? Hvernig er annars hægt að skýra það að United gerir næstflest varnarmistök allra liða í deildinni en er samt eitt af bestu varnarliðum deildarinnar? David de Gea er góður en er hann svo góður?

Þetta er athyglisverð pæling og ef það er sannleikskorn í henni er ekki laust við það að maður finni fyrir örlítilli tilhlökkun og bjartsýni varðandi næsta tímabil enda öllum fulljóst að helsta markmið sumarsins sé að fylla liðið af varnarmönnum sem hægt er að treysta. Fáum við þá að sjá United spila viku eftir viku eins og það spilaði gegn Tottenham í gær? Eða er þetta kannski aðeins of hentugt til þess að vera satt?

Leikmannaslúður

Mike Keegan er blaðamaður Daily Mail. Hann tísti þessu á föstudaginn:

Told tonight United have already agreed three deals for the summer. No names mentioned but it’s looking like a better structured window.

— Mike Keegan (@MikeKeegan_DM) March 14, 2015

Daily Mail er auðvitað ekki áreiðanlegasti miðill heimsins en þessi tiltekni blaðamaður er búinn að vera í bransanum í dágóðann tíma. Hann starfaði áður hjá Manchester Evening News og BBC en íþróttadeild BBC er staðsett í Manchester. Hann ætti því, að minnsta kosti ef hann vill láta taka sig alvarlega sem íþróttablaðamann sem á að fjalla um Manchester United, að vera með þokkalega heimildarmenn innan félagsins. Annað sem vekur athygli er að þessu tísti fylgir enginn tengill inn á neitt. Þetta var því ekki eitt af þessum skemmtilegu tístum sem fær mann til þess að fara inn á síðu blaðsins hans í von um að finna eitthvað bitastætt.

Hann lét engar frekari skýringar falla en þetta eina tíst. Þetta hefur orðið tilefni mikilla vangaveltna á Twitter. Ég held að það sé morgunljóst að Ed Woodward & co hafi allt þetta tímabil verið að vinna í leikmannamálum fyrir sumarið. Undanfarin tvo sumur hefur United farið alltof seint af stað og stundað sín viðskipti undir lok gluggans. Það er ekki vænlegt til árangurs en má ef til vill skýra með því að undanfarin tvo tímabil hafa nýir stjórar tekið við og þeir hafa báðir tekið við tiltölulega seint. Moyes í byrjun júlí og Van Gaal um miðjan júlí.

Í sumar vonar maður innilega að United klári sín viðskipti fljótt og vel og fréttir á þessu tímabili benda til þess sú verði raunin. Sagan segir að menn viti nákvæmlega hvaða stöður menn vilji styrkja og hvaða leikmenn menn vilji fá. Það hafa margir leikmenn verið orðaðir við okkur en ef maður sigtar í gegnum allt það er ljóst að Van Gaal er að leita að miðverði, hægri bakverði, miðjumanni, kantmanni og líklega sóknarmanni því að ekki virðist allt þetta Falcao-umstang vera að borga sig.

Ef við gefum okkur að Mike Keegan sé með réttar upplýsingar og að Woodward sé búiinn að klára þrjú leikmannakaup nú þegar, hvaða kaup eru þetta?

Það er hægt að fara með þetta fram og aftur en ég tel að hér sé ekki átt við einhver stórkaup á leikmönnum á borð við Hummels, Pogba eða Ronaldo/Bale ef menn vilja láta sig dreyma. Ég tel að hér sé átt við leikmenn sem eru hjá minni liðum Evrópu, leikmenn sem hafa átt gott tímabil og vilji spreyta sig hjá stærri félögum. Jafnvel geta þetta verið leikmenn sem eru samningslausir eftir tímabilið og er þá þeim mun auðveldara að fá. Ef ég ætti að giska á nokkur nöfn myndi ég segja að hér væri að ræða um einhverja af eftirtöldum leikmenn:

Memphis Depay – PSV: Besti leikmaður besta lið tímabilsins í Hollandi. Hefur skorað 16 mörk í 23 deildarleikjum og er mikill aðdáandi Louis van Gaal eftir að okkar maður gaf Memphis tækifæri með hollenska landsliðinu. Kantmaður sem er mjög eftirsóttur um þessar mundir og fyrrverandi njósnari United telur vera meira efni en sjálfur Cristiano Ronaldo var á sínum tíma. Það er talið öruggt að hann fari frá PSV eftir tímabilið.

Paulo Dybala – Palermo: Hefur vakið mikla athygli fyrir vaska framgöngu á tímabilinu. Framherji sem skorar ekki bara mörk heldur leggur upp fyrir félaga sína. Er með 12 mörk og 7 stoðsendingar í Serie A. Stjórnarformaður liðsins segir að hann sé með tilboð í höndunum frá ónefndu félagi auk þess hann sagði í janúar að United hafi spurst fyrir um leikmanninn í janúar.

 

Danny Ings – Burnley: Þessi enski framherji hefur komið flestum í opna skjöldu með góðum frammistöðum með Burnley á tímabilinu. Það sást þegar Burnley spilaði gegn United á Old Trafford um daginn að þarna er á ferðinni fínasti framherji. Ungur, enskur og samningslaus eftir tímabilið og fengist því frítt en hann hefur mikið verið orðaður við Liverpool og vin okkar Moyes hjá R. Sociedad.

 

Nigel de Jong – AC Milan: Þennan leikmann þekkja allir og fáir betur en Louis van Gaal. Spilaði með City og er eiginlega alveg óþolandi leikmaður en hann er óumdeilanlega góður í því sem hann gerir sem er að vera brimbrjótur sem stöðvar uppspil mótherjans. Ekki mest spennandi leikmaðurinn á markaðinum en gæti þó verið ágætur kostur á miðjuna í 1-2 tímabil hjá United. Hann er samningslaus eftir tímabilið og kæmi því frítt.

Af þessum leikmönnum hefði ég mesta trú á að Depay verði keyptur til liðsins. Sambands við Louis van Gaal á að vera með besta móti. Hann myndi jafnframt henta fullkomnlega í þá uppstillingu sem liðið er að spila um þessar mundir. Þetta er þó auðvitað hægt að ræða fram og aftur án þess að það skili nokkrum árangri. Auðvitað gæti þessi tiltekni blaðamaður bara verið að bulla og auðvitað þarf enginn af þessum leikmönnum endilega að vera á ratsjánni. Það sem skiptir mestu máli er að mönnum takist að ganga frá leikmannamálum sumarsins hratt og örugglega. Það er aldrei gott að vera að ýta á F5 klukkan 23.59 á síðasta degi leikmannagluggans í von um eitthvað bitastætt.

Annars gef ég bara orðið laust ef menn hafa einhverjar aðrar vangaveltur sem þeir vilja lofta um.