Er Meistaradeildarsætið í hættu?

Það er ýmislegt sem hægt er að ræða eftir þessar síðustu umferðir í enska boltanum. Eftir flotta byrjun á árinu hefur Manchester United nú tapað tveimur af síðustu þremur leikjum í ensku deildinni og spilamennska liðsins ekki beint verið að heilla. Liðið er enn sem stendur í 2. sætinu, þar sem það hefur verið frá því í 6. umferð, fyrir utan stutt stopp í 3. sætinu í lok árs 2017. En liðin sem eru þar rétt fyrir neðan nálgast og framundan er 11 umferða barátta fjögurra liða um þrjú laus sæti í Meistaradeild Evrópu að ári.

Hér á eftir fer ég yfir það hvernig síðustu 11 umferðirnar á tímabilinu líta út hjá liðunum og hvar þau standa í þessari baráttu. Það er bara tímaspursmál hvenær Manchester City staðfestir titilinn og Arsenal eru búnir að stimpla sig út úr Meistaradeildarbaráttunni, í það minnsta að sinni.

Til að útskýra aðeins frekar uppsetninguna á leikjunum sem liðin eiga eftir:

• Rauður er leikur gegn liði í topp 6
• Gulur er leikur gegn liði í 7.-12. sæti (ekkert undir)
• Grænn er leikur gegn liði í 13.-20. sæti (fallbaráttan)
• Skáletur þýðir útileikur, hefðbundið letur þýðir heimaleikur
• Athugið að dagsetningar á leikjunum í apríl og maí eru ekki staðfestar, það á enn eftir að hliðra leikjum til vegna sjónvarpsútsendinga

Manchester United

• 2. sætið í deild
• 56 stig
• 51 mark skorað
• 19 mörk fengin á sig
• 9 stig í síðustu 5 leikjum

Eins og kemur fram að ofan þá hefur Manchester United verið í 2. sæti deildarinnar í 21 af 27 umferðum sem búnar eru. Lengi vel var liðið lang-næstbesta liðið í deildinni en hefur þó tekið tarnir þar sem leikjunum hefur beinlínis verið hent frá sér og karakterinn virðist hafa verið víðs fjarri. Jafnteflin þrjú yfir jólatörnina voru dýr og tapið gegn Newcastle um síðustu helgi minnti á álíka slæmt tap gegn Huddersfield í október. En það er þó ástæða fyrir því að liðið er í 2. sæti og hefur verið það svona lengi, liðin þarna rétt fyrir neðan hafa nefnilega líka tekið svona daufar frammistöður og hent frá sér stigum.

Manchester United er enn með í enska bikarnum. Næsti leikur er í þeirri keppni, gegn Huddersfield á útivelli. Fari United áfram í þeirri keppni þá mun liðið spila í fjórðungsúrslitum helgina 16.-18. mars og deildarleikur gegn West Ham á útivelli frestast því.

Manchester United er líka að spila í Meistaradeild Evrópu. Leikirnir gegn Sevilla í 16-liða úrslitum hitta nálægt stórleikjum gegn Chelsea og Liverpool. United þykir töluvert sigurstranglegra lið, sé miðað við stuðla veðbanka. Ef liðið fer áfram í Meistaradeildinni þá verða leikirnir í 8-liða úrslitum spilaðir sitt hvoru megin við leikinn gegn Manchester City á Etihad vellinum. Nái United ekki að saxa á forskot City fyrir þann leik þá getur Manchester City tryggt sér Englandsmeistaratitilinn í þeim leik. Það þarf því ekki mikið að gerast til þess að Manchester United gæti þurft að standa heiðursvörð fyrir Manchester City.

Leikjatörn Manchester United á lokaspretti ensku deildarinnar lítur svona út:

• 4 leikir gegn topp 6 liðum
• 3 leikir gegn miðjuliðum
• 4 leikir gegn fallbaráttuliðum
• 6 heimaleikir
• 5 útileikir

Liverpool

• 3. sæti í deildinni
• 54 stig
• 61 mark skorað
• 31 mark fengið á sig
• 10 stig í síðustu 5 leikjum

Framan af tímabili rokkaði Liverpool vel upp og niður töfluna eftir úrslitum hverrar umferðar fyrir sig. Liðið fór úr 9. sæti eftir 1. umferð upp í 2. sæti eftir 3. umferð og aftur niður í 9. sæti eftir 9. umferðina. Aðallega voru þetta rándýr jafntefli sem skemmdu fyrir Klopp og félögum en liðið vann aðeins 3 leiki í fyrstu 9 umferðunum. Mestum parti tímabils hefur liðið þó eytt í 4. sæti deildarinnar og frá öflugum sigri gegn Manchester City um miðjan janúar hefur liðið svo að mestu verið í 3. sæti riðilsins, fyrir utan netta dýfu í 4. sætið eftir tap gegn botnliði Swansea City. Liðið getur spilað einhvern beittasta fótbolta deildarinnar þegar sá gállinn er á því og hefur oftar en ekki endað tímabil vel eftir að Klopp tók við. Það hefur þó líka sýnt að stigin geta flogið út um gluggann, jafnvel í leikjum gegn liðum sem ættu ekki að vera mikil fyrirstaða.

Liverpool er ekki lengur í enska bikarnum, eftir að hafa tapað í 4. umferðinni á heimavelli gegn West Bromwich Albion. Það þýðir að liðið fær 10 daga frí eftir leikinn í Meistaradeildinni gegn Porto þangað til næsti leikur í deildinni fer fram. Að auki á Liverpool leik gegn Watford þegar fjórðungsúrslit bikarsins verða spiluð, Watford er líka dottið út úr bikarnum svo þeim leik verður alveg örugglega ekki frestað. Liverpool gæti þó lent í frestun 21. apríl ef vinir þeirra í WBA ná alla leið í undanúrslit bikarsins.

Liverpool er í Meistaradeild Evrópu og mætir Porto í 16-liða úrslitum. Í þeirri viðureign þykir Liverpool mun sigurstranglegri aðilinn. Fari liðið áfram í keppninni þá mun það leika í 8-liða úrslitum sitt hvoru megin við útileik gegn Everton.

Leikjatörn Liverpool á lokaspretti deildarinnar lítur svona út:

• 2 leikir gegn topp 6 liðum
• 4 leikir gegn meðalliðum
• 5 leikir gegn fallbaráttuliðum
• 5 heimaleikir
• 6 útileikir

Chelsea

• 4. sæti í deildinni
• 53 stig
• 49 mörk skoruð
• 23 mörk fengin á sig
• 7 stig í síðustu 5 leikjum

Chelsea hefur eytt meirihluta tímabilsins í 3. sæti deildarinnar. Og samtals hefur liðið verið 23 umferðir af 27 í einu af efstu fjórum sætunum. Hæst fór liðið í 2. sætið, tók þá það sæti af Manchester United í eina umferð um áramótin. Liðið hefur lengst af virst ætla að sigla þessu Meistaradeildarsæti öruggu í höfn en þó alltaf öðru hvoru sýnt óvenjulega karakterbresti. Til dæmis hefur Chelsea tapað 3 leikjum á heimavelli í vetur, sem er jafn mikið og hin 5 liðin í efstu 6 sætunum til samans (Manchester United, Tottenham og Arsenal hafa tapað einum heimaleik hvert en Manchester City og Liverpool eru taplaus á heimavelli). Vissulega var einn þessara leikja gegn Manchester City en hinir tveir komu gegn Burnley og Bournemouth. Að auki virðist Conte ekki vera á góðum stað þessa dagana og liðið hefur byrjað árið illa með 2 sigra, 2 jafntefli og 2 töp í fyrstu 6 leikjum ársins.

Chelsea á föstudagsleik í bikarnum, heimaleik gegn Hull City. Ef liðið fer áfram þá verður útileik gegn Burnley frestað þann 17. mars. Sá bikarleikur kæmi þá í kjölfarið á erfiðum seinni leik í Meistaradeildinni,  á útivelli.

Chelsea er þetta tímabilið, ólíkt meistaratímabilinu í fyrra, í Evrópukeppni. Liðið var ekki beint heppið með andstæðing í 16-liða úrslitum heldur mætir þar spænsku risunum frá Barcelona. Chelsea þykja ekki líklegir til að komast áfram í þeirri viðureign. En ef svo fer að Chelsea fari áfram þá spilar liðið fyrri leikinn í 8-liða úrslitum í kjölfarið á deildarleik á heimavelli gegn Tottenham í byrjun apríl.

Leikjatörn Chelsea á lokaspretti deildarinnar lítur svona út:

• 4 leikir gegn topp 6 liðum
• 2 leikir gegn meðalliðum
• 5 leikir gegn fallbaráttuliðum
• 5 heimaleikir
• 6 útileikir

Tottenham

• 5. sæti í deildinni
• 52 stig
• 52 mörk skoruð
• 24 mörk fengin á sig
• 11 stig í síðustu 5 leikjum

Eftir rokkandi byrjun virtist Tottenham ætla að negla sér í 3. sætið þegar það náði að halda sér í því sæti í 5 umferðum í röð. En eftir tap gegn Manchester United í lok október kom slakur kafli hjá liðinu þar sem það náði aðeins að vinna einn leik af sex. Eftir það var Tottenham aðallega flakkandi á milli 6. og 7. sætis, var jafnvel að missa Burnley uppfyrir sig á töflunni. En fimmta sætið hefur verið hlutskipti liðsins frá því fyrir jól og það hefur náð að saxa á forskot liðanna fyrir ofan á síðustu vikum. Þar hefur aðallega komið til góður árangur liðsins í stóru leikjunum því í síðustu 6 umferðum hefur Tottenham skiptst á að vinna og gera jafntefli. Liðið hefur unnið Manchester United og Arsenal en líka þurft að koma til baka og ná jafntefli gegn West Ham og Southampton eftir að hafa lent undir.

Tottenham er í enska bikarnum og ætti að fara áfram því liðið mætir Rochdale á sunnudaginn í 16-liða úrslitum. Fari liðið áfram þarf að fresta heimaleik gegn Newcastle í deildinni svo Tottenham geti tekið þátt í 8-liða úrslitum.

Tottenham er svo einnig með í Meistaradeild Evrópu. Liðið á áhugaverða viðureign við Juventus framundan. Tottenham hefur sannarlega sýnt það á tímabilinu að það getur keppt við bestu liðin í Evrópu svo þessi viðureign gegn Juventus gæti orðið mjög spennandi. Veðbankar eru flestir með Juventus sem líklegri sigurvegara en það munar þó ekki miklu, Ítalirnir taka líklega stuðlana helst út á Evrópureynsluna. Fari svo að Tottenham komist áfram þá verður fyrri leikur liðsins í 8-liða úrslitum spilaður vikuna eftir útileik gegn Chelsea í deildinni og seinni leikurinn vikuna fyrir heimaleik gegn Manchester City.

Leikjatörn Tottenham á lokaspretti deildarinnar lítur svona út:

• 2 leikir gegn topp 6 liðum
• 3 leikir gegn meðalliðum
• 6 leikir gegn fallbaráttuliðum
• 5 heimaleikir
• 6 útileikir

Pælingar út frá þessari samantekt

Manchester United á flesta heimaleiki eftir af þessum liðum. United á 6 heimaleiki á meðan hin eiga öll 5 eftir. En þrír þessara heimaleikja eru vissulega gegn Chelsea, Liverpool og Manchester City. Svo það segir ekki allt. Heimaleikirnir sem Liverpool á til dæmis eftir eru gegn West Ham, Watford, Bournemouth, Stoke og Brighton. Töluvert léttara prógram á blaði. Það er þó oft þannig að léttu leikirnir á blaði þyngjast þegar út á völlinn er komið.

Manchester United og Chelsea eiga bæði 4 leiki eftir gegn liðum í topp 6 á meðan Liverpool og Tottenham eiga 2 slíka leiki eftir. Það gæti vel munað um það. Þetta virðast þó oftar en ekki vera einmitt leikirnir sem Liverpool og Tottenham eiga auðveldast með að gíra sig í svo kannski væru þau lið alveg til í að eiga fleiri slíka leiki eftir.

Tottenham á flesta græna leiki eftir, leiki gegn liðum sem núna eru í fallbaráttunni. Aftur hljómar það vel á blaði en það getur verið strembið að mæta fallbaráttuliðum í lok tímabils, sem berjast með kjafti og klóm fyrir áframhaldandi veru í deild þeirra bestu. Fjórir þessara leikja hjá Tottenham eru þar að auki á útivöllum sem geta reynst erfiðir.

Það eru ansi mörg lið í fallbaráttunni á þessum tímapunkti, það munar aðeins 3 stigum á 13. og 19. sætinu. Lið hafa flogið upp og niður töfluna í neðri hlutanum með 1-2 góðum eða slæmum úrslitum. Eftir því sem líður á munu einhver þessara liða eflaust rífa sig aðeins frá og jafnvel ná að bjarga sér vel fyrir lokaumferðina, fikra sig yfir í gula flokkinn. Það getur vel verið æskilegra að mæta liðum í gula hlutanum á lokaspretti deildarinnar, liðunum sem hafa ekki að neinu að keppa og ekkert að óttast lengur. Leikmenn sem eru jafnvel farnir að huga að sumarfríunum sínum strax í apríl. Nú eða liðin sem þegar eru fallin.

Liverpool á flest gul lið framundan. 4 af 11 leikjum sem liðið á eftir eru gegn liðum í miðjumoðinu. Þá er ekki ólíklegt að WBA verði fallið þegar Liverpool heimsækir The Hawthorns seinni partinn í apríl og Brighton gæti alveg verið búið að bjarga sér fyrir lokaumferðina. Það er því ljóst að leikjatörnin lítur vel út fyrir Liverpool hvað það varðar.

Liverpool er líka eina liðið í þessari baráttu sem á ekki eftir að mæta Manchester City aftur. Tottenham á eftir heimaleik gegn Manchester City en bæði United og Chelsea eiga eftir að fara á Etihad. Þessir leikir gætu haft áhrif, hvort sem er að lið tapi stigum gegn verðandi meisturunum í City eða nái sér í nítróbúst með sigri á lærisveinum Guardiola.

Öll lið gætu líka lent í því að fá Evrópuleiki inn á milli leikja og auka þannig leikjaálagið hjá sér. Flest liðanna gætu einnig lent í frestuðum leikjum vegna enska bikarsins, Liverpool stendur þar betur að vígi ef bara er tekið tillit til deildarinnar.

Ef við tökum bara allra næstu leiki þá er Tottenham þar í dauðafæri á að setja aukna pressu á liðin fyrir ofan því næstu 4 deildarleikir eru ekki þeir strembnustu sem liðið gæti fengið. Á meðan eiga Manchester United og Chelsea töluvert erfiðara prógram. Þessi lið mætast í næstu umferð og sá leikur er risastór fyrir næstu skref í baráttunni um Meistaradeildarsætin.

Hér hefur verið stiklað á stóru, það er hægt að spá í spilin og reyna að rýna í knattspyrnulegar kristalskúlur eftir svörum við því hvernig þetta mun allt spilast en við vitum að það poppa gjarnan upp atvik og stöður sem erfitt er að sjá fyrir.

Manchester United er áfram í þeirri kjörstöðu að vera í 2. sætinu, efst þessara fjögurra liða sem berjast um þrjú laus sæti í Meistaradeild Evrópu að ári. Vissulega viljum við ekki að liðið fari út í það að verja 4. sætið, miklu frekar að vinna þetta 2. sæti og hafa þann árangur að byggja á fyrir sumarið og næsta tímabil.

Við hentum fram skoðanakönnun á Twitter um það hvar fólk sæi fyrir sér að Manchester United myndi enda í deildinni eftir tímabilið. Niðurstöðurnar úr því voru eftirfarandi:

Í hvaða sæti telur þú að Manchester United endi þegar enska deildin klárast í vor?#Djöflarnir

— Rauðu djöflarnir (@raududjoflarnir) February 12, 2018

Um helmingur svarenda er bjartsýnn á að Manchester United nái að halda 2. sætinu út tímabilið. Mikill meirihluti hefur greinilega ekki áhyggjur af því að Meistaradeildarsætið sé í mikilli hættu.

Sé markmiðið einungis að komast í Meistaradeildina að ári þarf liðið auðvitað ekki að vera best af þessum liðum, það nægir að vera betra en eitt þeirra. En við viljum auðvitað sjá Manchester United leggja meiri metnað í sitt spil og þennan lokasprett.

Spurningar fyrir Djöflavarpið?

Nokkrir úr ritstjórn Rauðu djöflanna stefna á að eyða rómantísku Valentínusarkvöldi í að taka upp nýjan þátt af Djöflavarpinu. Við höfum ýmislegt að ræða, að venju, en við þiggjum endilega spurningar frá lesendum okkar til að svara í þættinum. Hvort sem er í þyngri eða léttari kantinum. Það má henda á okkur spurningum í kommenti hér fyrir neðan, inni á Facebooksíðunni okkar eða með því að nota myllumerkið #Djöflavarp á Twitter.