Huddersfield 0:2 United

Í kvöld mætti Manchester United til leiks í 5. umferð FA-bikarsins á John Smith‘s Stadium þar sem heimamenn í Huddersfield tóku á móti okkar mönnum. Í síðustu 13 viðureignum liðanna hafði Huddersfield einungis tekist að knýja fram sigur einu sinni gegn United en sá leikur var einmitt deildarleikur fyrr á leiktíðinni á sama velli. José Mourinho stillti upp mikið breyttu liði frá síðasta leik en fastaleikmenn eins og De Gea og Pogba voru hvergi sjáanlegir. Í stað þeirra fengu Carrick og Romero pláss í byrjunarliðinu en það var ánægjulegt að sjá ungu strákana í leimannahópnum í kvöld, þá Castro Pereira, Angel Gomes og Ethan Hamilton sem voru á bekknum auk þess að Scott McTominay byrjaði á miðjunni.

Bekkur: Pereira, Bailly, Darmian, Gomes, Hamilton, Lingard og Martial

Veðrið í Yorkshire var ósköp hefðbundið bresk veður, gríðarlega mikil rigning sem virtist hafa örlítil áhrif á spilamennsku beggja liða. Þrátt fyrir rigninguna var frábær stemningin á vellinum.

Leikurinn var fjörugur framan af og strax á annarri mínútu átti Mounie hættulítið skot framhjá markinu. En mínútu síðar áttu Mata og Lukaku laglegt þríhyrningaspil við miðjubogann sem endaði í því að Lukaku losaði sig frá varnarmanninum og brunaði í átt að marki, snéri yfir á hægri fótinn öllum að óvöru og lagði boltann snyrtilega í nærhornið fram hjá Lössl í markinu. Frábær byrjun hjá United.

Embed from Getty Images

Næst kom ágætis sókn hjá Huddersfield þar sem Smalling var næstum búinn að gefa vítaspyrnu með því að handleika boltann í eigin vítateig en okkur tókst að hreinsa bolta. Eftir að við náðum að bægja hættunni frá tímabundið náðu Huddersfield að koma boltanum inn fyrir vörnina en Huddersfield tókst að koma boltanum fyrir markið en sem betur fer var enginn til þess að pota boltanum inn á fjærstönginn. United stálheppnir þarna en og aftur.

Sóknarþungi Huddersfield jókst í kjölfar marksins og eftir fyrstu tíu mínuturnar voru heimamenn 75% með boltann. United fór þó hægt og sígandi að vinna sig aftur inn í leikinn og átti ágætis sóknir sem þó vantaði nokkuð upp á til þess að hætta skapaðist. En leið og maður fór að halda að United væri að fara taka leikinn föstum tökum áttu Huddersfield hættulega sókn þar sem Mounie gaf fyrir en sem betur fer skallaði ?? laflaust á markið. Í næstu sókn brunaði svisslendingurinn Hadergjonaj upp hægri kantinn og kom með stórhættulega fyrirgjöf sem Tom Ince var hársbreidd frá því að ná til. Enn og aftur sleppum við með skrekkinn en einhvern veginn var stutt í þá tilfinningu að mark lægi í loftinu.

Embed from Getty Images

Huddersfield voru sérstaklega duglegir að fara upp hægri kantinn og treystu á það að Alexis Sanchez væri ekki duglegur að hjálpa Luke Shaw. Þessi taktík virtist vera að skila sér því trekk í trekk komust þeir upp vænginn og áttu ágætis fyrirgjafir inn í teiginn sem varnarmennirnir okkar áttu þó ekki í teljandi vandræðum með. Engu að síður mikið áhyggjuefni hve illa liðinu gékk að halda boltanum og byggja upp sóknir.

Svo virtist sem liðin væru að bíða eftir hálfleiksflautunni þegar Ashley Young fékk boltann á hægri kantinum og tók á rás upp kantinn og fann Mata inn í teignum sem var loksins ekki rangstæður en honum tókst að leika á Lössl og skora í autt markið. Við tók VAR syrpa þar sem heimamenn vildu meina að Mata hefði verið rangstæður og eftir umtalsverðar vangaveltur og pælingar dæmdi Kevin Friend dómari markið ólöglegt og staðan því óbreytt 1-0 fyrir United. Miklar deilur eru uppi um hvort Mata hafi í raun verið rangstæður en myndin sem VAR tæknin gaf okkur virtist engan veginn styðja þá ákvörðun dómarans að dæma markið af.

Einungis örfáum andartökum síðar krækti Sanchez í aukaspyrnu, en úr henni kom falleg fyrirgjöf inn fyrir vörn Huddersfield og bæði Matic og Lukaku stóðu einir og óvaldaðir í teignum og sá fyrrnefndi tók við boltanum og lagði hann í markið framhjá Lössl en aftur dæmi herra Friend rangstöðu og fékk markið ekki að standa. Í þetta skiptið nennti dómaratríóið ekki að skoða þetta í VAR heldur dæmdu umhugsunarlaust rangstöðu, sem var sennilega hárrétt, þannig að United fór inn í hálfleik með 1-0 forystu.

 

Seinni hálfleikur

Síðari hálfleikur fór jafn hressilega af stað og sá fyrri en því miður voru það Huddersfield menn sem réðu ferðinni. Hver sóknin á fætur annarri, hættulegar fyrirgjafir og slakar hreinsanir og fengu heimamenn einnig nokkur góð aukaspyrnufæri beint fyrir utan teiginn. Sem betur fer tókst Billing ekki að nýta sér þessar spyrnur heldur setti hann þær beinustu leið í vegginn. Þeir fengu reyndar hornspyrnu í kjölfarið en úr henni tókst United að skapa sér skyndisókn þar sem Lukaku bar upp boltann og fann Sanchez sem þakkaði pent fyrir sig með því að gefa hárnákvæma stungusendingu til baka á Lukaku í svæði þar sem hann var kominn og lagði boltann á endanum vinstra meginn við Lössl.

Goalllllllllllllllll

LUKAKU 2-0 #mufc pic.twitter.com/3kNaAgFLPU

— Man Utd Goals 🎦 (@UtdGoals) February 17, 2018

Fjórða skiptið sem United kom boltanum framhjá Lössl og í þetta skiptið fékk markið að standa. Tveggja marka forysta en Huddersfield voru hvergi nærri hættir þó að dregið hefði úr þeim við seinna markið. Í næstu sókn United komst Lukaku upp að vítateigshorninu og Mata tók hlaupið út fyrir hann og fékk boltann og svo virtist sem brotið hefði verið á honum en ekkert dæmt og leikurinn hélt áfram. Við tók ansi mikið miðjumoð og lítið um hættuleg færi. Þó tókst Lukaku að finna pláss í vítateigsboganum en skot hans fór í varnarmann.

Think of the families @AnthonyMartial pic.twitter.com/4iqgbjlGPC

— The Peoples Person (@PeoplesPerson_) February 17, 2018

Loksins á 75. mínútu gerði Mourinho breytingu, Sanches kom útaf fyrir Anthony Martial, þó einhverjir hefðu verið til í að sjá óreyndari leikmenn fá tækifærið og jafnvel hvíld fyrir Matic fyrir næsta leik gegn sínum gömlu félögum. En næstur til að fá skiptingu var Juan Mata en inn á í hans stað kom Jesse Lingard. Fljótlega eftir skiptingarnar kom eitt besta færi United í síðari hálfleik þar sem þríhyrningaspil kom Martial inn fyrir vörnina og hann ásamt Lukaku voru einir fyrir framan mark Huddersfield en sendingin fór fyrir aftan Lukaku. Illa farið með mjög fínt færi þar sem Lukaku hefði getað fullkomnað kvöldið með þrennu. Aftur komst Martial inn í teiginn og átti fyrirgjöf sem enginn gerði atlögu að.

Embed from Getty Images

Síðasti markverði atburður leiksins kom á annarri mínútu uppbótartíma þegar Eric Bailly kom inn á fyrir Lukaku en hann er nýbúinn að jafna sig af erfiðum meiðslum og verður kærkomin viðbót við varnarlínuna okkar sem hefur fengið mikla gagnrýni á sig undanfarið. Leiknum lauk þó stuttu síðar og ekki margar snertingar sem hann fékk.

 

Vangaveltur eftir leikinn

Nú er United komið áfram í 6. umferð FA bikarsins en það er greinilegt á liðsvali Mourinho í kvöld að ekki miklu púðri verður eytt í þessa keppni. Þó spiluðu menn eins og Lukaku og Matic 90 mínútur í dag, nokkuð sem kom á óvart miðað við að næsti leikur liðsins er gífurlega mikilvæg viðureign gegn Chelsea á Old Trafford í baráttunni um annað sætið.

Kjúklingarnir sem voru á bekknum í dag fengu engar mínútur þó að leikurinn hefði eflaust verið tilvalinn til þess en engu að síður ákvað stjórinn að tefla ekki tvísýnt með leikinn. Ég veit ekki hversu mikið ég get verið sammála því, kannski blundar einhver óskhyggja um rómantíkina sem því fylgir að sjá leikmenn úr akademíunni á stóra sviðinu, a.m.k. hefði verið gaman að sjá Angel Gomes eða Ethan Hamilton fá smjörþefinn af tilfinningunni og ábyrgðinni sem fylgir því að spila fyrir aðalliði.

United skoraði óvenju snemma í leiknum en það var eins og leikmenn væru á autopilot á stórum köflum í leiknum í kjölfarið, ekki mikið drápseðli þó að við hefðum vissulega komið boltanum fjórum sinnum í markið. Annað sem kann að vekja upp spurningar, þá var Huddersfield með boltann 55% á meðan við vorum með hann 45% tímans. Að auki áttu þeir 19 skot á móti 5 skotum okkar, þar af 5 á rammann.

Þó verður að minnast á það að það virtist aldrei myndast raunveruleg hætta fyrir framan markið og allt sem stefndi á rammann var tiltölulega beint á Romero í markinu. Þó að United hafi siglt þessum sigri nokkuð þægilega í höfn og aldrei verið spurning hvoru megin sigurinn myndi detta, þá er ekki hægt að tala um neina yfirburði liðsins og liðið virkaði frekar þurrt og líflaust.

 

Nú er búið að draga í næstu umferð FA bikarsins en í henni fáum við Brighton í heimsókn. Brighton and Hove Albion unnu í dag D-deildarliðið Coventry City með 3 mörkum gegn einu og ljóst er að við fáum skemmtilegan heimaleik í 8. liða úrslitum. Í öðrum viðureignum mætast :
Sheff Wed/Swansea gegn Rochdale/Spurs
Leicester vs Chelsea
Wigan/Man City gegn Southampton

Það er því möguleiki á því að í undanúrslitum verði Tottenham, Man City, Chelsea og Man Utd en það ræðst á næstu dögum. Einnig vil ég minna á síðasta djöflavarpið þar sem farið var yfir spilamennsku liðsins, Chris Smalling og fleira.

Djöflavarpið 48.þáttur – Er Chris Smalling ekki lengur Mike Smalling?