Manchester United 2:2 Southampton

Lið Manchester United var óbreytt, enda engin meiðsli að hrjá hópinn og eins og Ole sagði fyrir leik, þokkaleg hvíld frá síðasta leik, þó það muni nú breytast

Varamenn: Romero, Bailly, Williams, Andreas, Fred, James, Mata, McTominay, Ighalo

Leikurinn fór alls ekki fjörlega af stað, Southampton meira með boltann þó án þess að ógna mjög og það var United sem fékk fyrsta færið, Martial hirti boltann af Ward-Prowse og kom upp í teig, einn á móti markverði en lét McCarthy verja frá sér. Góð varsla en hrikalega slappt hjá Martial. Það liðu síðan varla tvær mínútur þangað til refsingin fyrir þetta kom. De Gea spilaði boltanum út á Pogba rétt utan teigs, Ings pressaði á hann og komst í boltann sem barst til Redmond sem lék inni í teiginn, gaf yfir á fjærstöng þar sem Stuart Armstrong var einn og óvaldaður, hafði nægan tíma, lagði fyrir sig boltann og hamraði í netið. Eitt-núll fyrir Southampton á 12. mínútu. Skelfilega illa að verki staðið þarna hjá United.

Þetta var ekki alveg nóg til að vekja United, Pogba missti til að mynda boltann aftur á miðjunni en þeir fóru að minnsta kosti að sækja smá og á 20. mínútu kom jöfnunarmarkið. Pogba gaf inn á teiginn Martial tók við og náði að gefa á Rashford sem skoraði með góðu skoti. Betur gert þarna hjá Martial sem var með bakið í markið og kominn úr jafnvægi.

Embed from Getty Images

Ef það er eitthvað sem hefur ekki vantað hjá United undanfarið þá eru það mörk og United var komið yfir þremur mínútum síðar. Hröð sókn upp, gefið út á vinstri kantinn og þar var Martial, kom hratt upp og inn í teig, hreinlega labbaði framhjá Walker-Peters og hamraði í netið. Martial bætti sannarlega fyrir klúðrið fyrir mark Southampton.

Embed from Getty Images

Þetta kom á besta tíma, rétt fyrir drykkjarhléiið sem oft hefur breytt tempói leikja en í þetta skiptið tók United völdin eftir það og setti mikila pressu á vörn Southampton, komnir í hálfgerðar handboltasóknir gegn þeim, ekki í fyrsta skiptið í sumar. Það entist samt ekki allof lengi og aftur sótti Southampton í sig veðrið. United náði að stöðva flestar sóknir þeirra áðurin en hætta skapaðist að ráði og þá tóku við skyndisóknir. Þær voru þó helst til hættulitlar. Leikurinn snérist svo enn á ný síðustu 10 mínúturnar og United sótti vel. Romeu braut illa á Greenwood, fór með takka í ökkla en dómarinn sá það ekki, hefði getað verið eitthvað þar. VAR skoðaði en það þótti ekki ‘skýr og óumdeild röng ákvörðun’ hjá dómara og því ekkert aðhafst. Enn á ný er VAR með furðulegar ákvarðanir, og líklega eins og oft áður útaf einkennilegum reglum þar sem of erfitt er að bylta ákvörðuninni á vellinum

Það gerðist ekkert frekar í þessum fyrri hálfleik en Southampton byrjaði mun betur í þeim seinni. Redmond átti langskot rétt framhjá og síðan settu þeir vörn United í ýmsan bobba en nýttu það þó ekki. Það þýddi að leikurinn snérist enn á ný, United fór að sækja enn á ný, þó ekki væri það alltof hættulegt, sóttu samt nokkur gul spjöld.

Leikurinn var því nokkuð fjörugur þó færin vantaði. Fyrsta skipting United kom á 63. mínútu, Fred kom in á fyrir Pogba.

Loksins kom svo frábær sókn United, Rashford gaf á Martial sem fór alla leið að endamörkum gaf út á markteiginn og þar var Rashford aftur en Bertrand komst fyrir skotið, hefði verið frábært mark annars.

Í góðri sókn sneri Luke Shaw sig þegar hann var að reyna fyrirgjöf og Brandon Williams kom inná fyrir hann fljótlega eftir það.

Ef eitthvað var voru Southampton sterkari í leiknum og vörn United þurfti oftar en ekki að hreinsa inni í teig, ekki kannske alltaf hætta á ferð, en alls ekki eitthvað sem var í lagi.

Martial var ekki alveg búinn, hann átti mjög flott hlaup upp völlinn inn í teig, og átti svo sem alveg inni að reyna skotið frekar en að reyna sendinguna á Rashford en það skot var fjarri þvi að hitta rammann.

Síðasta skiptingin hjá Solskjær var ekki mjög sóknarsinnuð, McTominay og James komu inná fyrir Bruno Fernandes og Mason Greenwood. Það var hins vegar augljóst að leikmenn United voru orðnir mjög þreyttir og á 85. mínútu þurfti De Gea að verja mjög vel frá Redmond til að halda forystunni. Þetta var orðin nauðvörn hjá United, pressa Southampton orðin mjög þung og þó United menn reyndu að hreinsa af og til gekk þeim ekkert að halda boltanum.

Í lok venjulegs leiktíma skullu þeir Brandon Williams og Kyle Walker-Peters illa saman og þurfti að hlynna að þeim í nokkrar mínútur. Williams þurfti að fara af leikvelli og missa af síðustu mínútunum og ekki hægt að setja mann inná.

Embed from Getty Images

Það lá því alveg í loftinu að Southampton myndi jafna og það gerðu þeir á 96. mínútu. Ward-Prowse tók hornið, Bednarek framlengdi með skalla og Obamafemi varð á undan Lindelöf meter frá marki og kláraði. Ekki besta varnarvinnan hjá neinum en frekar blóðugt fyrir Lindelöf sem var búinn að eiga ágætan leik.

En það verður að segjast að Southampton átti stigið fullkomlega skilið. Nú er það Crystal Palace á fimmtudaginn, vonandi ekki án beggja vinstri bakvarðanna. Það hljóta að verða breytingar á liðinu enda það orðið geysiþreytt. Svo er undanúrslitaleikur gegn Chelsea á sunnudaginn.