Dregið í 16-liða úrslit Meistaradeildarinnar.

*Uppfært*

Jahérna. Steve McMananamananam glotti allsvakalega þegar hann dró United gegn Real Madrid. Þetta er alvöru, þetta er það sem Meistaradeildin á að snúast um. Stærstu lið heimsins að mætast. Ég kveið þessu fyrir dráttinn en ég verð að segja að ég er gríðarlega spenntur fyrir þessum leikjum, þetta verður svakalegt. Mér skilst að United fari fyrst á Bernabeu og seinni leikurinn verði spilaður á Old Trafford. Leikdagar eru 12./13. og 19/20. febrúar og seinni leikirnir 5./6. og 12./13. mars.

Annars verða fullt af hörkuviðureignum í 16-liða úrslitum:

• REAL MADRID – MANCHESTER UNITED
• Galatasaray – Schalke
• Celtic – Juventus
• Arsenal – FC Bayern
• Shakhtar Donetsk – Borussia Dortmund
• AC Milan – Barcelona
• Valencia – PSG
• Porto – Malaga

Maður veit að það eru að koma jól þegar farið er að draga í 16-liða úrslit Meistaradeildarinnar. Nú iðar allt af lífi í höfuðstöðvum UEFA í Nyon í Sviss þar sem drátturinn mun fara fram núna kl. 10.30. Mér skilst að Steve McMananananaman muni fá þann heiður að draga liðin saman og ég er viss um það að hann er búinn að leggja á minnið hvernig kúlur Manchester United og Real Madrid líta út.

Hvað um það. Okkar menn eru að sjálfsögðu í potti eitt eftir ágætan sigur á H-riðlinum. Pottur eitt  lítur svona út:

• PSG, Schalke, Malaga, Dortmund, Juventus, Bayern Munchen, Barcelona, Manchester United.

Þessi lið geta ekki mæst innbyrðis og munu dragast gegn einhverjum af liðinum úr potti tvö sem lítur svo út. Lið geta ekki dregist gegn liði frá sama landi né liði úr sama riðli:

• Porto, Arsenal, AC Milan, Real Madrid, Shakhtar, Valencia, Celtic, Galatasaray.

Feitletruðu liðin eru þau lið sem við getum mætt. Real Madrid er auðvitað liðið sem stendur uppúr og þó það væri gaman að fá Bjúgnakræki aftur á heimaslóðir held ég að allir séu sammála um að betra væri að sleppa við það, í bili. Við ættum að ráða við öll hin liðin en af þeim væri ég til í að sleppa við Shakhtar. Þar er hörkulið á ferðinni sem spilar af miklum krafti og ég held að það gæti endað illa fyrir okkar menn, a la Athletic Bilbao. Best væri að fá Valencia og Celtic en ég græt auðvitað ekki ef við fáum Porto eða AC Milan.

Að venju er leikið heima og að heiman og fara fyrri leikirnir fram 12./13. og 19/20. febrúar og seinni leikirnir 5./6. og 12./13. mars.

Herlegheitin byrja klukkan 11 og við munum að sjálfsögðu fylgjast með þessu hér og á Twitterinu okkar. Menn geta horft á dráttinn í beinni útsendingu á heimasíðu UEFA.