Wigan á næsta ári

Fyrsti leikur á nýju ári er stutt skrepp til Wigan.

Eins og venjulega er Wigan í bullandi fallbaráttu, en aldrei þessu vant eru þeir ekki í fallsæti heldur heilu stigi frá. Það er orðið fastur liður að Wigan bjargi sér frá falli, oftar en ekki með góðum kaupum í janúarglugganum. Spurning hvort að það verði í þetta skiptið lánsmaðurinn frá okkur, Ángelo Henriquez. Fyrri leikurinn var öruggur sigur United en Wigan kemur í leikinn núna með meira sjálfstraust eftir góðan sigur á Villa á laugardaginn. Það er þó fyrsti sigur þeirra í mánuðinum og óþarfi fyrir United að hafa of miklar áhyggjur fyrir þennan leik. Gætum séð Scholes og Giggs í byrjunarliði en ég ætla bara að skjóta á að við setjum vídd á miðjuna, enda Wigan með þriggja manna vörn sem staðalbúnað. Valencia búinn að spila alla jólaleikina og fær að hvíla sig á bekknum, Young getur spilað hægra megin, nú eða Welbeck.

Spurning hvort Carrick fær líka smá hvíld og Cleverley komi inn (nei, ég er ekki að fara að spá Giggs og Scholes í byrjunarliði, bara ekki). Spái 3-1 sigri okkar manna.

Annars er það að frétta að Sir Alex aftekur alveg að Nani sé á leiðinni í burtu og að hann ætli ekkert að gera í glugganum enda sé hópurinn einn sá besti sem hann hefur haft hjá United. Ætli sé þá ekki best að gera ráð fyrir sölu á Nani og minnst tveim kaupum? Nani er annars í Dubai í endurhæfingu að sögn Fergie, ekki bara í innkaupaferðum og búist við honum heilum um miðjan janúar.

Að lokum er bara tvennt:

Til hamingju með 71 árs afmælið Sir Alex Ferguson. Every single one of us…

Lesendum þökkum við samfylgdina þetta fyrsta ár Rauðu djöflanna og óskum ykkur öllum gleðilegs United árs