Liverpool á morgun

Í fyrramálið stígur United liðið upp í rútu og ekur stuttan spöl upp M62 hraðbrautina og heimsækir bæli óvinarins kl 12.30 að íslenskum tíma.

Stærsti útileikur vetrarins, a.m.k. fyrir okkur hér uppi á Íslandi, og ennþá fyrir marga á Englandi er á dagskrá áður en tímabilið er varla hafið. Þrefið og slefið yfir leikmannamálum hefur fengið alla athygli manna síðustu daga og varla að ég hafi tekið eftir því að þessi leikur væri að koma. En nú þarf að einbeita sér að því sem skiptir máli, Fellaini, Baines, de Rossi, Herrera og Ronaldo verða af athyglinni í dag.

Fyrstu tveir leikirnir hafa verið þokkalegir. Swansea var auðveldur sigur og það sem ég sá af Chelsea leiknum var stórmeistarajafnteflislegt. Það er ansi ólíklegt að sú verði raunin á morgun. Liverpool verður ekki jafn varnarsinnað og Chelsea var og þá opnast tækifæri fyrir United að vera grimmari en á mánudag. Brandan Rodgers er eitthvað að skjóta á Moyes í Guardian í dag og vill meina að United séu strax orðnir eftirgefanlegri, Sir Alex hefði aldrei leyft leiknum á mánudag að renna út í jafntefli. Vilð látum slíkt sem vind um eyru þjóta, enda væri eitthvað að ef ekki væri reynt að grípa í hálmstrá þegar erfiður leikur er framundan.

Já, ég ætla að vera ofsalega frumlegur, spá nákvæmlega sama liði og Maggi spáði og hafði rétt fyrir Chelsea leikinn. Það skyldi þó ekki vera að Moyes ætli að hringla minna með liðið? Nani og Chicharito eru enn meiddir þannig að þeir koma ekki að þessum leik. Þeir sem helst mætti ætla að ættu tilkall í byrjunarliðið eru Anderson, Young, og Kagawa, í þessari röð.

Þetta er ósköp einfaldlega lið sem á að vinna Liverpool, þó að hinir síðarnefndu hafi byrjað frísklega. Þeir hafa unnið báða leikina í deildinni 1-0 en lentu í smá basli í deildarbikarnum í vikunni, þurftu framlengingu til að klára Notts County 2-0.

Janúarmennirnir Coutinho og Sturridge hafa verið að spila vel og sá síðarnefndi virðist loksins laus við viðhorfsvandamálin sem fylgdu því að komast ekki í lið hjá betri liðum. Kolo Touré af öllum mönnum á víst að vera sá sem hefur bundið saman vörnina í þessum leikjum, en er tæpur fyrir leikinn á morgun. Í markinu hefur Simon Mignolet verið að bjarga stigunum í báðum deildarleikjunum og er greinilega betri en Pepe Reina var síðari ár. Að auki verður fróðlegt að sjá hvort nýi maðurinn Aspas getur eitthvað. Samkvæmt öllu þessu ætti Liverpool að geta gert aðeins betur en á síðasta tímabili, og eins og venjulega er ekki spurt um stöðu í deildinni þegar þessi lið mætast. Stemmingin verður vel viðunandi og ekkert nema sigur er ásættanlegur.

Spái 2-1 fyrir okkar mönnum, þetta verður frækin heimsókn á Anfield og væri ekki slæmt fyrir David Moyes að koma í nýju hlutverki þangað og sýna að hann er ekki lengur framkvæmdastjóri Everton heldur Manchester United.

Endum þetta á smá innblæstri fyrir okkar menn

Síðan þessi leikur vannst höfum við unnið tvo, gert eitt jafntefli og tapað þremur leikjum á Anfield. Á morgun munum við jafna þessa tölfræði!

Þess er vert að geta að í hádeginu í dag mun Tryggvi Páll mæta til leiks ásamt @maggamark frá kop.is í Útvarpsþátt Fótbolta.net á X-inu 977 til þess að ræða leikinn sem er fjallað um hér að neðan, við hvetjum alla lesendur til þess að stilla inn á það.