Leikmenn í landsliðsverkefnum

Okkar menn voru út um allan heim að spila knattspyrnu í gær fyrir landslið sín.

Danny Welbeck stóð upp úr er hann skoraði tvö glæsileg mörk gegn Moldavíu í gær. Hann nældi sér líka í gult spjald sem þýðir að hann mun ekki spila útileikinn erfiða gegn Úkraínu á þriðjudaginn og ætti því að vera sprækur fyrir næsta leik okkar. England vann 4-0 og er í ágætri stöðu.  Ashley Young, Michael Carrick, Tom Cleverley og Chris Smalling tóku ekki þátt í leiknum.

Fyrir utan landsleik Sviss og Íslands í gær var leikur Norður-Íra og Portúgala líklega leikur dagsins. Alls litu þrjú rauð spjöld dagsins ljós og N-Írar komumst í 2-1. Jonny Evans spilaði leikinn fyrir N-Íra og lagði m.a. upp seinna mark þeirra. Nani kom inn af bekknum fyrir Portúgal og var sprækur, enda breyttist leikur Portúgala við það og unnu þeir á endanum 2-4 þar sem Ronaldo skoraði þrennu.

Fellaini spilaði fyrir Belga í 2-0 sigri á Skotum og nældi sér í gult spjald.

Patrice Evra spilaði í markalausu jafntefli Frakka og Geogíu-manna og Robin van Persie bjargaði einu stigi fyrir Hollendinga þegar hann skoraði jöfnunarmark á 94. mínútu í 2-2 jafntefli gegn Eistum.

Shinji Kagawa spilaði svo 75 mínútur í vináttuleik gegn Guatemala og var allt í öllu og átti stóran þátt í fyrstu tveimur mörkum Japana.