Southampton á morgun

Loksins aftur komin helgi og leikur á morgun! Og nú er það stórleikur. Dýrlingarnir mæta á svæðið og þarf að fara langt aftur í tímann til að þessi leikur hafi verið leikur tveggja toppliða. Fyrir rúmum 30 árum endaði Southampton í 2. sæti í 1. deild sem er besti árangur þeirra í deild. Það ár endaði United í fimmta sæti en þegar United tók á móti Southampton 21. janúar 1984 var United í öðru sæti en Southampton í fimmta. Sigur þá hélt United í öðru sætinu en tveir sigrar í síðustu 11 leikjunum sáu til þess að það árið var ekki sigursælt hjá okkar mönnum.

En síðan eru liðin allmörg ár og saga þessara tveggja liða ekki legið saman í toppsætunum. En nú tekur United í þriðja sæti á móti Southampton sem verður í fjórða sæti, nema Tottenham vinni Crystal Palace í leiknum sem er um það bil að hefjast.

Stærstu fréttirnar fyrir leikinn eru næsta augljósar:

Já, Ashley Young er eini aðalliðsleikmaðurinn sem er á meiðslalistanum. Reyndar má ætla að þeir leikmenn sem hafa verið að hefja æfingar í vikunni verði ekki taldir leikfærir í vikunni, eða í besta falli bekkmatur. Að spá liðinu er samt einhver erfiðasta spá um byrjunarlið í vetur. Stóra spurningin er auðvitað leikaðferðin og ég ætla að fylgja hjartanu

Er að giska á að Falcao verði hvíldur og vona að við spilum með tvo miðverði.

Andstæðingarnir

Það er ekki nema mánuður síðan við fórum á St Mary’s og stálum sigri þar. Nú erum við komnir á heimavöll og ég vona að með fjóra á miðjunni þá munum við eiga auðveldar með að taka á móti Southampton. Búast má við líku liði Southampton og síðast. Sadie Mané er meiddur, Schneiderlin hins vegar heill, og hollenski kantmaðurinn Eljero Elia er kominn á láni frá Werder Bremen og það má búast við honum á einhverjum tímapunkti. Í vikunni var verið að orða okkur við Nathaniel Clyne, hægri bakvörð Southampton. Hann er að koma til baka úr meiðslum og verður með.

Þetta verður strembinn leikur, enginn vafi á því en í þetta sinn hef ég fulla trú á liðinu. Við verðum með sterkt lið og geysisterkan bekk, þó nokkra þeirra skorti leikæfingu. Það verður því sigur á morgun!

Vikan í leikmannamálum

United er búið að vera að taka aðeins til. Michael Keane var búinn að standa sig vel í láni hjá Burnley og þeir hafa nú keypt hann. Fyrir tímabilið var hann án efa á undan McNair og Blackett í miðvarðaröðinni, var lánaður og missti því af því tækifæri sem hinir tveir fengu. Eins og við komum inná í podkastinu síðasta sunnudag þá er United með fjólda miðvarða þegar allir eru heilir og miklar breytingar þar framundan ekki síst þar sem búist er við einum nýjum ef ekki tveim þetta árið. Brottför Keane kemur því ekki á óvart.

Við fórum rækilega yfir nýja markvörðinn okkar í vikunni: Víctor Valdés verður á bekknum á morgun.

Einn unglingur fór á lán í vikunni. Ben Pearson var unglingaliðsleikmaður ársins í fyrra og fer nú til Barnsley fram á vorið. Hann byrjar vel, var valinn maður leiksins í dag í 2-0 sigri Barnsley á vinum okkar í Yeovil.