Krísa? Hvaða krísa – Chelsea á morgun

Miðað við viðbrögð margra stuðningsmanna hefði mátt halda að United hefði í vikunni tapað 4-0 á heimavelli fyrir Sevilla. En svo var nú ekki. 0-0 var raunin og þó að útvallarmark sé gríðarlega mikilvægt þá mætum við Sevilla aftur á Old Trafford eftir tvær og hálfa viku, vissir um að sigur nægir til að halda áfram í Meistaradeildinni.

Það er auðvitað enginn að mæla því í mót að leikurinn var ekki sá skemmtilegasti sem liðið hefur leikið og það hefur vissulega verið aðalsmerki United í gegnum áratugina að spila skemmtilegan fótbolta. En það er ekki hægt að horfa á einn leik án þess að líta á heildarmyndina. Manchester United hefur líklega ekki leikið skemmtilegan fótbolta trekk í trekk í hátt í áratug. Síðustu ár Sir Alex voru byggð á sterkri vörn og síðan vannst titill 2013 út á kaupin á Robin van Persie.

Sir Alex skildi eftir brothætt lið sem þurfti að endurnýja á réttan hátt og við vitum öll að David Moyes kom og braut þetta í spað. Louis van Gaal kom og átti að byggja upp, en nær öll kaup hans mistókust á ninn margvíslegasta hátt.

Þegar José Mourinho var ráðinn þá vissum við öll hvað var verið að fara út í. Það þarf ekki að fordæma hann ranglega fyrir eilífar rútulagningar þó það sé viðurkennt að hann hefur alltaf lagt megináherslu á sterkar varnir. En hann var, á þeim tímapunkti sem hann var ráðinn, því sem næst eini stjórinn á heimsmælikvarða sem var hægt að fá. Það var augljóst val. Ekkert sem hefur gerst síðan þá breytir þeirri staðreynd. Það þýðir ekkert að tala um Jürgen Klopp sem stjóra Manchester United, ekki frekar en að ræða það hvort Eric Cantona eigi að fá tækifæri með liðinu. Pochettino er vissulega góður stjóri en væri eitthvað vit í því að reka Mourinho til að reyna að fá Pocchetino? Nei, enda er það aldrei gert. Það væri alltaf búið að þreifa fyrir sér með tilvonandi stjóra. Og ég er þess fullviss að hvorki nú, né í sumar, gefi Pochettino færi á sér. (Hann fer til Real. beisik)

Embed from Getty Images

Þannig að, United er þar sem liðið er, með þennan stjóra og þennan hóp fram á vor. Hvað er til ráða? Svarið er einfalt: Láta stjórann um þetta. Eins og staðan er í dag eru nokkur augljós atriði sem öll stuðla að því sem við höfum verið að sjá undanfarið. Vörnin er ekki nægjanlega sterk, og verður vonandi forgangsatriði í sumar. Meiðsli lykilmanna á miðjunni hefur gert að verkum að ekki hefur verið hægt að skipta út eins og ætti að vera, Nemanja Matic er ekki svipur hjá sjón miðað við hvað hann var í haust og Pogba hefur ekki það frelsi sem hann þarf til að vera upp á sitt besta. Að lokum er það að koma í ljós að það sem sagt er að Mourinho stundi, það er að þjálfa ekki sóknina sérstaklega en láta góða sóknarleikmenn sjá um að gera hlutina upp á eigin spýtur er ekki að virka.

Það er enn langt í sumar en ef við skoðum hópinn eins og við sýnum hann hér á síðunni, þá telur hann 29 manns. Þrír (Fosu-Mensah, Tuanzebe og Wilson eru í láni) og því 26 menn. Af þeim hafa tveir misst úr nær allt tímabilið og eftir standa 24 sem José hefur talað um að sé hans uppáhaldshópstærð. En vandamálið er að af þessum 24 eru hreinlega of margir sem eru ekki nógu góðir til að standa undir því að vera að spila alla leiki, eða því sem næst. Það eru of margir leikmenn sem eru fínir í hóp og skila sínu þegar þarf, en þegar hálft liðið samanstendur af leikmönnum sem í besta falli eru 3,5 af fimm í einkunn þá er bara alveg ágætt að þeir séu að skila okkur öðru sætinu.

Það er langt í sumarið en ég kastaði upp mynd af því sem gæti gerst og skyggði út þá leikmenn sem eru að hætta eða gætu verið á förum. eftir stendur 21 leikmaður og þá þarf þrjá nýja bara til að koma hópnum í Mourinho stærð og helst fimm til að komast í hóp sem stendur vel að vígi gagnvart meiðslum og að teknu tilliti til þess að við verðum með þrjá tvítuga drengi í hópnum.

Það verða því eflaust miklar breytingar í sumar og eins og ég hef sagt í hlaðvörpunum okkar og hér á síðunni þá treysti ég Mourinho alveg fyrir því að kaupa nýja leikmenn í hópinn sem duga og gott betur og myndu, ef til þess kemur að reka José, standa sig ágætlega fyrir arftaka hans. En eftir umrót síðustu ára er það samt algjörlega ótímabært að fara út í þá vegferð að skipta up stjóra í fjórða skiptið á sex árum.

Tl;dr: Það er enginn að fara að reka Mourinho og það hefur ekkert upp á sig.

En það er Chelsea á morgun. Þar er nú lið sem kann að reka stjórana sína og eftir að José okkar potaði aðeins í Conte í desember fór liðinu að ganga hrapallega hvort sem það var því eða þakkað eða öðru og náði hámarkið þegar Watford vann þá 4-1. En síðan þá hefur Chelsea bætt sig, vann botnlið West Brom 3-0, og rústaði Hull í bikarnum 4-0. Loks gerðu þeir gott jafntefli við Barcelona í vikunni á Stamford Bridge.

Lið þeirra verður svona:

Traust lið og helst að Álvaro Morata eigi ekki sæti sitt víst, enda hefur hann dalað allverulega í vetur eftir frábæra byrjun.

Það verður mjög fróðlegt að sjá hvernig Mourinho stillir upp en ég held að við eigum ekkert að gera okkur grillur um að José sé með einhverja ævintýramennsku í huga.

McTominay er búinn að sýna sig að vera maðurinn sem nota á til að brjóta upp miðjuspil andstæðinganna frekar en að gera eitthvða fyrir spil United og hann á eftir að vera nauðsynlegur á morgun til að loka á Fábregas, Kanté eða það sem mér finnst líklegast: Hazard.

Vörnin er eins og hún er og það sem við verðum að vona er að Bailly sé tilbúinn að koma til baka og vera sá klettur sem við vitum að hann getur verið.

Það mun engum koma á óvart ef þessi leikur endar með jafntefli og því síður mun það koma á óvart ef José verður ánægður með það. Sigur myndi hins vegar setja okkar lið í ansi vænlega stöðu í baráttunni um meistaradeildarsæti.

Leikurinn hefst kl. 14:05 á morgun, sunnudag