Marouane Fellaini seldur til Kína *staðfest*

Fimm og hálfs árs dvöl Marouane Fellaini er lokið hjá United. United hefur staðfest að hann mun ganga til liðs við Shandong Luneng og söluverðið mun vera tíu og hálf milljón punda.

Wishing you all the best for the future, @Fellaini. A big thank you for everything at #MUFC!

— Manchester United (@ManUtd) February 1, 2019

Það er óhætt að segja að enginn leikmaður United hafi verið jafn umdeildur jafn lengi og Fellaini. Allt frá því að hann var einu kaup David Moyes fyrsta, og eina, sumar Moyes í starfi, keyptur á síðasta degi gluggans, fimm milljónum dýrar en hann hefði verið nokkrum vikum fyrr og þar til Ole Gunnar Solskjær tók við starfi framkvæmdastjóra hefur hann verið Plan B holdi klætt. Stór og hálfklunnalegur og með betri móttökutækni með kassanum en fótunum, og reyndar betri á kassann en flestir leikmenn með fótunum.

No player could control the ball better with their chest than Fellaini… I had a soft spot for him for that reason alone… good luck to him! pic.twitter.com/LDkAWODJ75

— Stanley Chow (@stan_chow) January 29, 2019

Jafnvel þó Fellaini væri að leika fyrir stjórann sem honum hafði gengið svo vel hjá með Everton var fyrsta tímabil hans hjá United hálfgerð martröð. Hann lék 16 leiki í deild og var aldrei nálægt því að tryggja sér fast sæti, þó liðinu gengi arfailla. Fyrsta tímabil Van Gaal með United var hann þó mun betri, skoraði heil sjö mörk og var raunverulegt Plan B. Veturinn eftir var ekki jafn góður en hann skoraði þó gegn Everton í undanúrslitum bikarsins og lék allan bikarúrslitaleikinn.

Fyrra tímabil Mourinho hjá United var hann aftur kominn í stærra hlutverk, lék heila 28 leiki í deild en skoraði ekki nema eitt mark. Hann lék þó allan Evrópudeildarúrslitaleikinn gegn Ajax og var góður í þeim leik og United nýtti sér framlengingarklásúlu í samningnum þá um vorið. Síðasta tímabil byrjaði hann ágætlega og United líka, hann skoraði fjögur mörk í átta leikjum en síðan var hann orðinn að plani C, kom nokkrum sinnum inná, lék 17 leiki í deild og það kom verulega á óvart og var vægast sagt umdeilt þegar United gerði við hann nýjan tveggja ára samning síðasta vor. Hvort sem það var vegna þess að hann þótti ómissandi eða vegna þess að ekkert annað lið vildi hann nógu mikið skal ósagt látið.

En það er óhætt að segja að hann hafi ekki bætt sig þennan veturinn. Enn á ný gekk liðinu illa, en samt voru lítil not fyrir hann sem Plan B eða C, José var rekinn og síðan Solskjær tók við kom hann tvisvar inn á.

En nú er tíma hans hjá United lokið. Það á eftir að koma í ljós hvort þessi morgunroði í stjóratíð Ole Gunnar Solskjær verður að sumarsól, en ef svo skyldi fara, þá gæti vera Marouane Fellaini hjá United orðið að meginmerki þess alls sem var að hjá United þessi fimm ár. Hann var einu kaupin sumarið sem virkilega þurfti að kaupa til að styrkja liðið og nýjan stjóra, hann var leikmaður sem hafði aldrei þá eiginleika sem stuðningsmenn horfa eftir í sönnum United leikmanni, hann var Plan B sem of oft plan A, og því miður þá var svo komið undir lokin að jafnvel þó hann legði sig allan fram og berðist meira en aðrir og stæði sig alltaf vel í stóru leikjnum þá verða fáir sem horfa á eftir honum með miklum söknuði.

Fellaini symbolised the post-Fergie wilderness years in all aspects … save showing some arsehole, turning up in big games and generally giving a shit. Played. pic.twitter.com/5LFGNqbjhJ

— Daniel Harris (@DanielHarris) January 29, 2019

Tveggja ára samningurinn sem var gerður við hann í vor skilaði þó í það minnsta því að nú fær United rúmar 10 milljónir punda fyrir hann. Það er eitthvað.

Við þökkum Fellaini fyrir að reyna sitt besta á erfiðum árum, og óskum honum góðs gengis.